ԵՐԲ ՈՂՋ ՀԱՅԱՇԽԱՐՀՆ է ԴԱՌՆՈՒՄ ՏԱՒՈՒՇ…

Եւ այսպէս.

1- «ՏԱՒՈՒՇԸ ՅԱՆՈՒՆ ՀԱՅՐԵՆԻՔԻ ՓՐԿՈՒԹԵԱՆ ԵՐԹ»-ով պայմանաւորւած հայաստանեան վերջին մէկ շաբաթեայ սրընթաց իրադարձութիւններն այսօր, մայիսի 9-ին, իրենց վճռորոշ հանգրւանն են թեւակոխել Երեւանի Հանրապետութիւն հրապարակում, նոյն երթին հաղորդելով համաժողովրդական բնոյթ։

2- Հայրենիքի փրկութիւնը, սակայն, լոկ Տաւուշով չտեղայնացւեց, այլեւ ընդգրկեց Հայաստանի բոլոր մարզերն ու շրջանները, կրելով  համահայաստանեան դիմագիծ։

3- Միեւնոյն տրամաբանութեամբ ու հասարակա-քաղաքական փոխադարձ ներգործութեան ու ներազդման օրինաչափութեամբ, երբ տւեալ դէպքում Հայաստանի ու հայութեան հիմնախնդիրներն են դրւած նժարի վրայ, նոյն համահայաստանեանը անտարակուսօրէն դառնալու է նաեւ համասփիւռքեան ու դեռ աւելին՝ կրելու է համազգային նշանակութիւն, համապատասխան զօրակցական կեցւածքներով ու դրսեւորումներով։

4- Ի տես այս ժողովրդական համընդհանուր շրջադարձին, հայրենածախ ու պետականակործան իշխանախումբը, իրեն յատուկ լկտիութեամբ, փրկութեան ինքնաբուխ եւ արդարացի շարժումը կասեցնելու կոչեր է անում, «յանո~ւն» սեփական իշխանութեան անվերապահ պահպանման։

5- Իզուր չէ, որ արդէն  շրջանառութեան մէջ են վերլուծաբանների այն տեսակէտ-վարկածները, որոնց համաձայն՝ ամէն կարգի սադրանքների ունակ իշխանախումբը, ինքնապահպանման համար պատրաստ կը լինի մինչեւ իսկ նոր ՄԱՐՏԻ 1-եր սանձազերծելուն, այնպէս, ինչպէս դա արեցին 2008-ին, երբ յայտնի ուժերի դրդումով՝ քաոսային իրավիճակ էին ստեղծել երկրում, դեռ այն ժամանակ որպէս «ընդդիմադիրներ»…

6- Ահա, վերոնշեալ չարաբաստիկ իրողութեանն ի տես, վստահաբար Տաւուշեան տարբերակով սկիզբ առած հայրենիքի փրկութեան շարժման առաջնորդներն խորապէս գիտակցում են սադրիչների կողմից հրահրւելիք ներուժ վտանգների նկատմամբ յոյժ զգօն լինելու հանգամանքը։

7- Մէկ այլ իրողութիւն է նաեւ այն, որ Հայրենի ժողովրդի փրկութեան պայքարը ոչ միայն ներքին հայրենադաւների, այլ եւ մանաւանդ արտաքին թշնամիներ՝ ադրբեջանա-թուրքական եւ ինչու չէ՝ արեւմտեան ուժային տարբեր կենտրոնների կողմից քաղաքական ու առաւել եւս քարոզչական ճնշումների ու հակադարձութիւնների է ենթակայ։ Պատճառը ակներեւ է՝ փրկութեան շարժումը խոչընդոտ է նոյն ուժային կենտրոնների տարածաշրջանային նկրտումների իրականացմանը, որին է լծւած եւ որի համար է իշխանութեան բերւած նիկոլական խունտան։

8- Ըստ ամենայնի՝ անհաւասար այս պայքարի ելքը, պատմական թէ՛ ժամանակակից բազմաթիւ նախադէպերի վկայութեամբ՝ վճռելու է համաժողովրդական համախումբ պայքարը։ Պայքար, որի հոգեւոր, բարոյական, իրաւա-քաղաքական ու մէկ խօսքով՝ բոլոր կարգի ազատախոհական գաղափարներին հնարաւոր չէ ընդմիշտ  խոչընդոտել։

9- Ինչպէս նշւել է վերում, անխուսափելիօրէն հայրենի մեր ժողովրդի արդար պայքարին զօրակցական թոյլատրելի  տարբեր կարգի աջակցութիւն է կարող ցուցաբերել արտերկրի հայութիւնը սփիւռքում։ Սա, անշուշտ, հայրենի երկար սպասւած պայքարին հաղորդելու է համահայկական-համազգային բնոյթ ու նշանակութիւն, երաշխաւորելով նոյն պայքարի անպարտելիութիւնը եւ յաղթական երթն ու  աւարտը։

10- Եւ վերջապէս՝ անցնող երեք տասնամեակներում գրանցած  փաստացի ապացոյցներով՝ իրանահայութիւնը, որպէս հայաստանամերձ հինաւուրց համայնք, վճռորոշ այս օրերին եւս, կանգնելու է հայրենի ժողովրդի ու նրա արդար իրաւունքների ձեռքբերման ճամբին շղթայազերծած՝ ՀԱՅՐԵՆԻՔԻ ՓՐԿՈՒԹԵԱՆ ՊԱՅՔԱՐԻ կողքին ու թիկունքին, յանուն ՀՀ Պետականութեան անվտանգութեան եւ հոգեւոր ու ազգային գերագոյն արժէքների պահպանման։

Դ. Մ.

Պատմական գիտութիւնների թեկնածու