Հա

Օրակարգ

19/01/2015 - 12:50

Իրանում Ռուսաստանի արտակարգ եւ լիազօր դեսպանի այցը՝ «Ալիք»

Այցի առիթը՝ օրաթերթիս յունւարի 13-ի համարում տպագրւած «Փլուզման շեմին, Ռուսաստանն ու Ադրբեջանը շտապում են» (հեղինակ՝ Նայիրա Հայրումեան), եւ «Ռուս-թուրք-ադրբեջանական վտանգը» (հեղինակ՝ Թաթուլ Յակոբեան) յօդւածներն էին, որոնք ունէին որոշակի հակառուսական ուղղւածութիւն:

Երէկ՝ յունւարի 18-ին «Ալիք» օրաթերթի խմբագրութիւն այցելեց Իրանի Իսլամական Հանրապետութիւնում Ռուսաստանի Դաշնութեան արտակարգ եւ լիազօր դեսպան Լեւոն Ճաղարեանը, որին ընկերակցում էր դեսպանութեան երկրորդ քարտուղար Անաստասիա Վալչուկը:
Այցի առիթը՝ օրաթերթիս յունւարի 13-ի համարում տպագրւած «Փլուզման շեմին, Ռուսաստանն ու Ադրբեջանը շտապում են» (հեղինակ՝ Նայիրա Հայրումեան), եւ «Ռուս-թուրք-ադրբեջանական վտանգը» (հեղինակ՝ Թաթուլ Յակոբեան) յօդւածներն էին, որոնք ունէին որոշակի հակառուսական ուղղւածութիւն:
Պրն. դեսպանն իր մտահոգութիւնն ու անհամաձայնութիւնն յայտնեց յիշեալ յօդւածների բովանդակութեան կապակցութեամբ, եւ նշեց, որ յօդւածագրերն ըստ երեւոյթի չեն գիտակցում Հայաստան-Ռուսաստան ռազմավարական կապերի նշանակութիւնն ու կարեւորութիւնը:
Նա հանգամանալից ներկայացրեց հայ-ռուսական յարաբերութիւնների ընթացքն ու դրանց մեծ դերը Հայաստանի անվտանգութեան պահպանման գործում, եւ յատուկ ընդգծեց, որ այսօր Հայաստանի ազգաբնակչութեան զգալի մի հատւած իր գոյութիւնը պահպանում է Ռուսաստան արտագնայ աշխատանքի մեկնած իրենց հարազատների դրամական տրանսֆերների (փոխանցումների) շնորհիւ:
Անդրադառնալով Գիւմրիում, Աւետիսեանների ընտանիքի վեց անդամների ողբերգական սպանդին, պրն. Ճաղարեանն իր եւ Ռուսաստանի Դաշնութեան անունից մէկ անգամ եւս ցաւակցեց հայ ժողովրդին ու վստահեցրեց, որ այդ սահմռկեցուցիչ յանցագործութեան հեղինակը, ինչպէս նաեւ՝ Գիւմրիում տեղակայւած ռուսական 102-րդ ռազմաբազայի հրամանատարութիւնը կը պատժւեն օրէնքի ամենայն խստութեամբ:
Խօսելով Աւետիսեանների ընտանիքի վեց անդամների յուղարկաւորութեան օրը, Գիւմրիում ծաւալւած դէպքերի՝ մասնաւորապէս Գիւմրիում Ռուսաստանի հիւպատոսարանի վրայ յարձակման փորձի մասին, պրն. դեսպանը դրանք համարեց անընդունելի, ոչ համաչափ եւ ուղղորդւած, որոնք միայն կարող են վնասել հայ-ռուսական բարեկամական կապերին:
Նա յատուկ ընդգծեց, որ Ռուսաստանի պատկան մարմինները ոչինչ չեն խնայել յանցագործութեան բացայայտման համար, եւ շահագրգիռ են, որպէսզի բացայայտւի ամէն ինչ եւ հաւանական յանցագործը կամ յանցագործները ստանան համապատասխան պատիժը:
Պրն. Ճաղարեանը յիշեցրեց, որ դէպքի օրը Գիւմրի է ժամանել Ռուսաստանի պաշտպանութեան փոխնախարարի գլխաւորած պատւիրակութիւնը, եւ նախարար Սերգէյ Շոյգուն ինտենսիւ կապի մէջ է եղել ՀՀ պաշտպանութեան նախարար Սէյրան Օհանեանի հետ: Իսկ հրաշքով փրկւած փոքրիկ Սերեօժա Աւետիսեանի բուժման նպատակով, Ռուսաստանի առողջապահութեան նախարարի նախաձեռնութեամբ Երեւան են ժամանել ռուսաստանցի մի շարք առաջատար բժիշկ-մասնագէտներ:
Օրաթերթիս գլխաւոր խմբագիր Դերենիկ Մելիքեանը շնորհակալութիւն յայտնելով պրն. Ճաղարեանին՝ այցի համար ասաց, որ յիշեալ յօդւածների տպագրութիւնը չի ունեցել որեւէ յետին նպատակ կամ հակառուսական ուղղւածութիւն:
Նա յատուկ ընդգծեց, որ «Ալիք» օրաթերթը մշտապէս առաջնորդւում է երկու կարեւոր սկզբունքներով՝ ծառայել ու նպաստել հայ ժողովրդի համազգային շահերին, եւ ընթերցողին տրամադրել անաչառ՝ համապարփակ տեղեկատւութիւն:
Նման մօտեցումը, ըստ նրա՝ պայմանաւորւած է ՀՅԴ գաղափարախօսական սկզբունքներով, որոնցով առաջնորդւում է «Ալիք»-ը, ինչպէս նաեւ՝ ժուռնալիստիկական մեր առաքելութեամբ: Նա յատուկ ընդգծեց, որ այս հանգամանքները չափազանց պարտաւորեցնող են «Ալիք»-ի համար, եւ ելնելով հէնց դրանցից, թերթս պարտաւոր է տարբեր թեմաների առնչութեամբ իր ընթերցողին ներկայացնել ամենատարաբնոյթ կարծիքներն ու տեսակէտները, եւ վերոնշեալ յօդւածների տպագրութիւնն էլ պայմանաւորւած է հէնց այդ գործելաոճով:
Յատուկ կարեւորելով հայ-ռուսական ռազմավարական յարաբերութիւնները, «Ալիք» օրաթերթի գլխաւոր խմբագիրն առաջ քաշեց ռուս-թուրքական ու ռուս-ադրբեջանական ճակատում նկատւող որոշակի զարգացումները, որոնք այսպէս, թէ այնպէս չեն տեղաւորւում հայ-ռուսական ռազմավարական յարաբերութիւնների տրամաբանութեան սահմաններում, եւ յուզում ու մտահոգում են ողջ հայութեանը՝ամբողջ աշխարհում:
Վերջում կողմերն իրենց գոհունակութիւնն արտայայտեցին մտերմիկ ու անկեղծ մթնոլորտում կայացած հանդիպման կապակցութեամբ, եւ յոյս յայտնեցին, որ նման հանդիպումները կը նպաստեն առաւել փոխըմբռնման մթնոլորտի ձեւաւորմանը:

Ա. Շ.

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։