Հա

Օրակարգ

10/09/2018 - 14:40

Համաիրանեան տնտեսական տագնապը եւ իրանահայ համայնքը...

Սիրելի ընթերցող, եկէք ընդունենք ու որպէս փաստ արձանագրենք բազմիցս բարձրաձայնւած այն օրինաչափ ու այսպէս ասած՝ չգրւած օրէնքի մասին, որն, ինչ խօսք՝ վերջին ժամանակներում, գրեթէ հասարակական բոլոր ոլորտներում զգացնել է տալիս իրեն, որպէս համընդհանուր մտահոգութիւն…

(Մաս 1)

Դ. Մ.

 

Սիրելի ընթերցող, եկէք ընդունենք ու որպէս փաստ արձանագրենք բազմիցս բարձրաձայնւած այն օրինաչափ ու այսպէս ասած՝ չգրւած օրէնքի մասին, որն, ինչ խօսք՝ վերջին ժամանակներում, գրեթէ հասարակական բոլոր ոլորտներում զգացնել է տալիս իրեն, որպէս համընդհանուր մտահոգութիւն…

Խօսքն, անշուշտ վերաբերում է համաիրանեան մակարդակով սոցիալ-տնտեսական խոր ճգնաժամին, որն պաշտօնական թէ՛ անպաշտօն գնահատանքների համաձայն՝ արդիւնքն է ինչպէս ներքին-կառավարչական ապիկարութեան, նոյնպէս եւ աւելիով՝ արտաքին ու մասնաւորապէս ԱՄՆ-ի քաղաքական ճնշումների ու տնտեսական սանկցիաների կիրառման:

Վերոնշեալ ճգնաժամը, որն գրեթէ ամենօրեայ խնդրոյ եւ հակոտնեայ դիրքերի բախման տեղիք է տալիս երկրի եռեակ իշխանութիւնների՝ օրէնսդիր, դատական եւ յատկապէս գործադիրի մակարդակներում, բայցեւայնպէս իր բացասական ազդեցութիւնն է թողնում, տւեալ դէպքում առաջին թիրախ՝ ժողովրդի ու հասարակայնութեան լայն խաւերի առօրեայ կեանքի սոցիալ-տնտեսական, կենցաղային, հոգեբարոյական առանց այն էլ ոչ նախանձելի իրավիճակին…:

Գալով մեզ, որպէս համայնքային ու այսպէս ասած՝ փոքրամասնական կոչւող միաւորի, նշեալ ճգնաժամը իր բոլոր հետեւանքներով կրկնակի հետք ու ազդեցութիւն է պատճառում՝ թէ՛ իբրեւ Իրանի քաղաքացի եւ թէ՛ իբրեւ փոքրամասնական ու առանձնայատուկ գոյավիճակ ունեցող միաւոր-հաւաքականութիւն…:

Այս համընդհանուր իրավիճակում, ու դրանից անկախ՝ մի պահ պատկերացնենք մեր սեփական՝ համայնքի ազգային, հոգեւոր, մշակութային, միութենական եւ որ կարեւոր է՝ կրթական միաւորումների կարգավիճակը (միմիայն աչքի առաջ ունենանք դոլարի մակընթացութեան արդիւնքում մեր հայ ուսուցիչների ու պաշտօնեաների կենսամակարդակը), եւ այն ժամանակ աւելի պարզորոշ կը դառնայ յուսալքութեան ու անհեռանկարայնութեան անխուսափելիութիւնը՝ մեր հասարակայնութեան տարբեր խաւերի ներկայացուցիչների եւ անդամների մօտ:

Ահաւասիկ.-

Անկախ համաիրանական մասշտաբով մեզ բաժին ընկած դժւարութիւնները դիմագրաւել-յաղթահարելու քիչ թէ շատ յուսալիութեան հանգամանքից, հարկաւոր է, որ որպէս ուրոյն համայնք, նւազագոյնը քննարկման եւ ուսումնասիրման առարկայ դարձնենք մեր սեփական՝ համայնքային կարելիութիւններն ու հնարաւորութիւնները (ոչ միայն նիւթական) եւ գնահատենք առաջնային խոցելի ու թիրախային կէտերը, որպէսզի արդէն իսկ ներազդած ու զգացնել տւած դժւարութիւնների դիմագրաւմանը գէթ համեմատական պատրաստ վիճակում լինենք:

Մեր կարծիքով՝ անհրաժեշտ է եւ այլեւս անյետաձգելի, որպէսզի մեր ազգային իշխանութեանց պատասխանատու՝ գործադիր թէ՛ օրէնսդիր մարմինների նախաձեռնողական նախաքայլը կարող է լինել՝ համայնքիս ամենատարբեր մասնագէտ-միջամուխ եւ մտահոգ շերտերի ներկայացուցչական հաւաք-քննարկումների կազմակերպումը, որից էլ բնականաբար բխելու է նւազագոյնը այն, որ իբրեւ հինաւուրց մի համայնքի ժառանգներ՝ որտե՞ղ ենք գտնւում, ի՞նչ մարտահրաւէրների առջեւ ենք կանգնած եւ ինչպէ՞ս ենք պատրաստւում դիմագրաւելու այդ բոլորը…:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։