Հա

Օրակարգ

12/09/2018 - 16:20

Համաիրանեան տնտեսական տագնապը եւ իրանահայ համայնքը...

Ինչպէս ողջ Իրանի քաղաքացիներ, իրանահայ համայնքն էլ ենթակայ է այնպիսի դժւարութիւնների եւ սպառնալիքների, որոնք հնարաւոր է իր մօտ եւս խորացնեն միեւնոյն անորոշութեան եւ անհեռանկարայնութեան հանգամանքները, որոնց էլ համայնքով մէկ՝ պարտաւորութիւն ունենք դիմագրաւել, վնասները նւազագոյնի իջեցնելու նպատակով:

(Մաս 3)

Ամփոփում

Դ. Մ.

 

Ընթերցողներին քաջ յայտնի է, որ համաիրանեան տնտեսական տագնապի դիմագրաւման խնդրում պետական կառոյցները ներքին ճակատում կիրառել ու կիրառում են տարբեր միջոցներ: Նոյնիսկ խորհրդարանը անվստահութիւն յայտնեց ու հրաժարեցրեց գործադիրի տնտեսական բնագաւառի նախարարների ու Կենտրոնական բանկի ընդհանուր տնօրէնին: Աւելին՝ Մեջլիսը նոյնինքն նախագահին խորհրդարանի դահլիճում հարցապնդման ենթարկեց եւ անբաւարարութիւն յայտնեց նախագահ Ռոհանիի՝ երկրի մասշտաբով տնտեսական հիմնահարցերում որդեգրած քաղաքականութիւնը արդարացնելու մտօք պատասխանների առթիւ: Միւս կողմից էլ դատական ատեանը շրջանառութեան մէջ դրեց կոռուպցիոն չարաշահումների բազմաթիւ թղթածրարներ, սակայն, փաստ է, որ նման միջոցառումներով ժողովրդի վրայ օրէցօր ծանրացող տնտեսական բեռը գոնէ կարճաժամկէտում, թեթեւանալու միտում չունի…:

Մեր նախորդ համարներում նոյնպէս շեշտադրել էինք երկրի տնտեսական տագնապի արտաքին՝ քաղաքական ենթատեքստի առկայութեան մասին, պայմանաւորւած՝ ԱՄՆ-ի միակողմանի պատժամիջոցների կիրառմամբ, որի թիրախում է ոչ միայն Իրանը, այլեւ դեռեւս միջուկային գործարքին հաւատարիմ մնացած Եւրոպան, ինչպէսեւ՝ շրջանային, թէ՛ արտաշրջանային ուժերը:

Մի խօսքով՝ ստեղծւած իրավիճակը իր հեռակայ թէ՛ մօտակայ հաւանական զարգացումներով կամ ելքերով հանդերձ, հասարակայնութեան մօտ առաջացնում է սպասողական, բայց կայուն անորոշութեան մի կացութիւն, որն յատկապէս երիտասարդ խաւերի մօտ անհեռանկարայնութեան, ինչու ոչ՝ նաեւ յուսալքութեան տպաւորութիւններով է դրսեւորւում: Սա համարենք օրինաչափ, քանզի տնտեսութեան եւ առհասարակ կենսամակարդակի դրական թէ՛ բացասական ազդեցութիւնը սրընթաց եւ անմիջական կերպով է տարածւում հասարակայնութեան տարբեր շերտերի ուղղութեամբ:

Ահաւասիկ.-

Ինչպէս ողջ Իրանի քաղաքացիներ, իրանահայ համայնքն էլ ենթակայ է այնպիսի դժւարութիւնների եւ սպառնալիքների, որոնք հնարաւոր է իր մօտ եւս խորացնեն միեւնոյն անորոշութեան եւ անհեռանկարայնութեան հանգամանքները, որոնց էլ համայնքով մէկ՝ պարտաւորութիւն ունենք դիմագրաւել, վնասները նւազագոյնի իջեցնելու նպատակով:

Մեր նախորդ երկու համարներում փորձել ենք ներկայացնել մի շարք առաջադրանքներ, ուղղւած մեր ազգային իշխանութիւններին, քաջ գիտակցելով, որ վերջիններիս մօտ եւս առկայ են տւեալ մտահոգութիւնները, բայցեւ անհրաժեշտաբար դրանք քիչ թէ շատ փարատելու քայլերն ու աշխատանքները պէտք է ակներեւ լինեն հասարակայնութեանը:

Մենք, մեր հերթին, որպէս լրատւամիջոց, բացի առաջարկութիւններից, փորձելու ենք նոյն տնտեսական տագնապի ու մեր համայնքի գոյավիճակի վերաբերեալ մտքերի փոխանակման, քննարկումների ու նոր առաջադրանքների հրապարակման սիւնակներ տրամադրել, բազմակողմանիօրէն խնդիրը հասարակութեան սեփականութիւնը դարձնելու մտադրութեամբ…:

Լիայոյս ենք, որ մամուլ-համայնք-ղեկավարութիւն փոխհասկացութիւնն եւ ստեղծւած իրավիճակից նւազագոյն վնասով ելքեր փնտրելու միասնական ջանքերը կարդիւնաւորւեն՝ իրանահայ հինաւուրց համայնքի կենսունակութեան պահպանմանն ու առաջընթացի ապահովմանը ծառայեցնելու համար:

 

Յարակից լուրեր

  • «Ալիք» օրաթերթի խմբագիրը ազգային առաջնորդարանում
    «Ալիք» օրաթերթի խմբագիրը ազգային առաջնորդարանում

    Երկուշաբթի, 11 մարտ, 2019-ի կէսօրին, թեմիս առաջնորդ՝ գերշ. Տ. Սեպուհ Ս. արք. Սարգսեանը առաջնորդարանի իր գրասենեակում ընդունեց «Ալիք» օրաթերթի խմբագիր՝ պրն. Դերենիկ Մելիքեանին:

  • Վարշաւայից՝ Սոչի, Իրանի դիւանագիտական յաղթարշաւը...
    Վարշաւայից՝ Սոչի, Իրանի դիւանագիտական յաղթարշաւը...

    Անցնող ու ընթացիկ շաբաթւայ քաղաքական իրադարձութիւնների յաջորդականութիւնը վկայում է տարածաշրջանում մէկ կողմից Թրամփեան վարչախմբի, իսկ միւս կողմից Թուրքիայի արտաքին դիւանագիտութեան կրկնակի ձախողման մասին, յատկապէս հակաիրան արշաւի համատեքստում:

  • Պետականութեան պահպանումը՝ գերխնդիր
    Պետականութեան պահպանումը՝ գերխնդիր

    Պատմական փաստ է, որ իրանական 2500-ամեայ պետականութեան թագաւորական վերջին դինաստիայի՝ Փահլեւիների իշխանակալութիւնը տապալւեց նախորդ դարի՝ 1979 թ. փետրւարեան համակարգային-համաժողովրդական յեղափոխութեամբ:

  • Հայութեան անշեղ սեւեռակէտը...
    Հայութեան անշեղ սեւեռակէտը...

    Անցնող տասնօրեակում հայկական (եւ ոչ միայն) ազգային, պետական-դիւանագիտական, քաղաքական, մամլոյ եւ առհասարակ հասարակական լայն շրջանակների ուշադրութեան կիզակէտում էր յայտնւել Արցախեան հարցի կարգաւորման շուրջ հաւանական զարգացումները…

  • Իրան-Հայաստան «ճանապարհային նոր քարտէզի» ուրւագիծ…
    Իրան-Հայաստան «ճանապարհային նոր քարտէզի» ուրւագիծ…

    ՀՀ վարչապետը յունւարի վերջին, Գերմանիա պաշտօնական այցի ընթացքում Քեօլնի հայ համայնքի ներկայացուցիչների հետ հանդիպմանը յայտարարել է մէկ ամիս անց՝ փետրւարի 27-ին Իրան պաշտօնական այց կատարելու մասին, իսկ դա ինքնին ուշագրաւ է եւ կարեւորութիւն է հաղորդում Հայաստանի վարչապետի իրանական այցին:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։