Հա

Օրակարգ

Երկուշաբթի, 27 Մայիսի 2013 04:30

ՄԵՐ ՎԱՂՒԱՅ ՕՐՒԱՅ ՈՒՂԵՑՈՅՑԸ

ԱՐԱՄ ՇԱՀՆԱԶԱՐԵԱՆ

Ո՞րն է Մայիս 28-ի խորհուրդը: Պատասխանը մէկն է ու անբեկանելի: Հայ ժողովրդի արեամբ ու քրտինքով կերտւած անկախութեան այգաբաց, հրաշածին վերածնունդ հայ բազմաչարչար ժողովրդի անկախ պետականութեան:
Աւելի քան վեց դար գերութիւնից ազատւած մի տոկուն ժողովրդի դարաւոր երազանքի իրականացումն էր այն, որ ծնունդ առաւ Սարդարապատի, Բաշ Ապարանի եւ Ղարաքիլիսայի հերոսամարտերից… մի խօսքով՝ Մայիս 28-ից:

Պատմական Հայաստանի մէկ մասի վրայ ստեղծւած հայկական պետականութիւնը հանդիսացաւ ո՛չ միայն հայի յոյս ու ապաւէնը՝ երազած աւետեաց երկիրը, այլեւ հիմնաքարը եղաւ մեր մեծ տեսլականի՝ Ազատ, Անկախ եւ Միացեալ Հայաստանի, որը պէտք է ընդգրկի Մեծ Հայքի ողջ տարածութիւնը՝ հանդիսանալով Հայ Դատի լուծման բախտորոշ կռւանն ու յենակէտը:
Այժմ, երբ յետադարձ հայեացքով քննում ենք Մայիս 28-ի սխրանքը, դա, իսկապէս, անհաւանական հրաշք է թւում: Այդ ինչպէ՞ս 600 տարւայ տեղատւութիւն ու քայքայում, կոտորածներ ու ցեղասպանութիւն վերապրած ժողովուրդը պետութիւն հռչակելու, եւ այդ իրաւունքը պաշտպանելու ուժ գտաւ իր մէջ: Ո՞րն էր այդ ուժի աղբիւրը, որտեղի՞ց էր այն բխում: Ընդունենք, որ այս բացառիկ սխրանքի համար դժւար է գտնել որեւէ տրամաբանական՝ պատմագիտական պատասխան: Մայիս 28-ը եւ Հայաստանի Առաջին Հանրապետութիւնը մի վերին կամքով վաղուց ամէն ինչ կորցրած հայ ժողովրդին տրւած հրաշափառ հնարաւորութիւն էր, մեծ շնորհ:
Եւ այդ հրաշափառ հնարաւորութեան շնորհիւ էր, որ հայ մարդն անկախ ապրելու, սեփական ճակատագիրն ինքնուրոյն տնօրինելու ինքնավստահութիւն ստացաւ: Չքացաւ այն առասպելը, թէ հայը չի կարող ապրել ինքնուրոյն՝ անկախ:
Մայիս 28-ը ազատ ապրելու եւ գոյատեւելու վճռական կամք ներշնչեց հային, նոր աւիւն ներարկեց նրա երակներում: Առանց Մայիս 28-ի եւ առանց Հայաստանի Առաջին Հանրապետութեան՝ հայը շնչահեղձ պիտի լինէր եւ անհետ կորէր մարդկային պատմութեան թատերաբեմից:
Եթէ չլինէր Մայիս 28-ը, եթէ չլինէր Հայաստանի Առաջին Հանրապետութիւնը, Հայաստանը ԽՍՀՄ կազմում միութենական հանրապետութեան կարգավիճակ չէր ունենայ, եւ ուրեմն՝ 1991 թւականի սեպտեմբերի 21-ին չէր ունենայ անկախութեան վերանւաճման հնարաւորութիւն:
Այսօր անվարան կարելի է ասել, որ մերօրեայ անկախ Հայաստանի համար առաջին հերթին պարտական ենք Մայիս 28-ին եւ Հայաստանի Առաջին Հանրապետութիւնը կերտած նւիրեալներին:
Կարճ եղաւ Հայաստանի Առաջին Հանրապետութեան կեանքը, սակայն այն եկաւ՝ կապելու հայ սերունդներին եւ սրտերին իրար եւ ստեղծելու մի կուռ գաղափարական աննկուն ոգի, որը ապրեց նոյնիսկ այն ժամանակ, երբ Հայաստանը զաւթեցին բոլշեւիկները եւ փորձեցին հայ մարդու յիշողութիւնից ջնջել անկախութեան սուրբ գաղափարը:
Չմոռանանք պատմական անբեկանելի այն իրողութիւնը, որ վաղւայ օր ունենալու համար երէկւայ յիշողութիւն է պէտք, իսկ պատմութիւն ունեցող ժողովրդի դէպքում՝ պատմական յիշողութիւն: Եւ մեր ժողովրդի պատմական յիշողութեան անբաժան եւ կարեւորագոյն մի հատւածն է կազմում Մայիս 28-ը եւ Հայաստանի Առաջին Հանրապետութեան փառահեղ պատմութիւնը: Պատմութիւն, որը հանդիսանում է մեր վաղւայ օրւայ ուղեցոյցը: Պատմութիւն, որի սերմանած գաղափարներն ու ոգին հանդիսանում են այն վէմն ու կռւանը, որոնք կարող են ազգն ու հայրենիքը պահպանել այլասերման, դիմազրկման եւ ուծացման ազգակործան վտանգից:
Ուրեմն՝ զուր են Մայիս 28-ի սխրանքն ու Հայաստանի Առաջին Հանրապետութեան փառահեղ պատմութիւնը ստւերելու անյաջող փորձերը: Մայիս 28-ը եւ Հայաստանի Առաջին Հանրապետութիւնը վաղուց դարձել են հայ մարդու էութեան մի մասնիկը՝ նկարագիրը, նրա գոյատեւման գրաւականը՝ գենետիկ կոդի խտացումը: Եւ ինչպէս ասել է Յովհաննէս Քաջազնունին.- «Մայիս 28-ը մեր պատմութեան ամենամեծ տօնն է: Հեռու չէ այն օրը, երբ Մայիս 28-ը կը տօնւի իբրեւ համազգային անհերքելի ամենամեծ տօն, եւ ամէն հայ երկիւղածօրէն պէտք է խոնարհւի այդ տօնի առջեւ»:
Շնորհաւոր բոլորիս տօնը: Հայ ժողովրդի տօների տօնը՝ Մայիս 28-ը:

 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։

Joomla-ի վրիպազերծման կառավարակետ

Աշխատաշրջան

Հարցումների հսկման արդյունքները

Հիշողության օգտագործում

ՏԲ-ի հարցումներ