Հա

Համայնք

11/09/2016 - 10:30

Թեհրանի «Ակունք» պարախմբի ելոյթը՝ Ուրմիայում

Չորեքշաբթի, օգոստոսի 31 երեկոյեան ժամը 8:30-ին, Թեհրանի «Ակունք» պարային համոյթը, ղեկավարութեամբ պարուսոյց եւ գեղարւեստական ղեկավար Կարինէ Սուքիասեան-Մանուչերեանի, բացառիկ ելոյթով հանդէս եկաւ Ուրմիայի «Արամ Մանուկեան» հանդիսասրահում, հովանաւորութեամբ Ատրպատականի հայոց թեմի առաջնորդ՝ Տ. Գրիգոր եպս. Չիֆթճեանի:

Ատրպատական, ազգային առաջնորդարան - Չորեքշաբթի, օգոստոսի 31 երեկոյեան ժամը 8:30-ին, Թեհրանի «Ակունք» պարային համոյթը, ղեկավարութեամբ պարուսոյց եւ գեղարւեստական ղեկավար Կարինէ Սուքիասեան-Մանուչերեանի, բացառիկ ելոյթով հանդէս եկաւ Ուրմիայի «Արամ Մանուկեան» հանդիսասրահում, հովանաւորութեամբ Ատրպատականի հայոց թեմի առաջնորդ՝ Տ. Գրիգոր եպս. Չիֆթճեանի:
Հայ Օգնութեան միութեան Ուրմիայի եւ Թաւրիզի մասնաճիւղերի վարչութիւնների ամբողջական համագործակցութեամբ էր նախաձեռնւել սոյն ելոյթը, որի կազմակերպական գործնական աշխատանքները իրականացրել էր Ուրմիայի Գործակալական խորհուրդը:
160911d02aԵլոյթը հովանաւորում եւ նախագահում էր Սրբազան Հայրը: Ներկայ էին նաեւ Ուրմիայի հոգեւոր հովիւ՝ Տ. Ներսէս քհնյ. Պասիլեանը, Ուրմիայի շրջանի Պատգամաւորական ժողովի եւ Գործակալական խորհրդի անդամներ, բարերարներ, ինչպէս նաեւ Հայաստանից ժամանած մշակութային գործիչ եւ «ՀՃՈՒ հիմնադրամի գիտական ուսումնասիրութիւնների կենտրոն»-ի տնօրէն՝ Սամուէլ Կարապետեանը իր գործընկերների հետ:
Ելոյթի սկզբում «Ակունք» պարախմբի կողմից պատրաստւած մի վաւերագրական տեսաերիզ ցուցադրւեց, որը նկարների եւ կարճ ժապաւէնների, ու նրանց ընկերակցող բացատրութիւնների միջոցով ներկայացնում էր պարախմբի անցած 30 տարիների ուղին, սկսած դրա կազմաւորման առաջին քայլերից, մինչեւ շքեղ ելոյթները եւ յաջողութիւնների յիշարժան պահերը:
Ապա, հայկական մասնաւոր թեմաներին նւիրւած պարեղանակների հետեւողութեամբ, պարախումբը մշակութասէր հասարակութեանը ներկայացրեց արւեստի բարձրորակ կատարումով պարեր, խլելով ներկաների որոտընդոստ ծափահարութիւնները: Այսպիսի պարեղանակներից էին «Արցախ» վերնագրւածը, ինչպէս նաեւ մի քանի այլ մարտական շարժումներով ներկայացւած պարեր:
Յատկանշական էր նաեւ իրանական ոճի պարերի ներկայացումը, գեղջկական կեանքից քաղւած, հնձւորի, քաղհանի, թոնրատէր կնոջ եւ այլ կենցաղային պատկերներով յագեցւած:
160911d02bԲեմի համեստ պայմաններին յարմարւելու եւ իւրաքանչիւր պարի յատուկ տարազաւորումով բեմ բարձրանալու սեղմ ժամանակը ընդլայնելու միտումով, բանաստեղծական ասմունքներով հանդէս եկաւ, թաւրիզահայ անւանի ասմունքող Նայիրի Դիլանեանը:
Պարերի ընթացքում ներկայացւած հայոց պատմութիւնը, իր անցեալով եւ ներկայով, բացայայտ երեւում էր աղջիկների ներկայացրած պարային նազանքի եւ հայ ժողովրդի վճռակամութիւնը արտայայտող խիզախ շարժուձեւերի միջոցով: Դա արտացոլացնում էր նաեւ, պարարւեստի միջոցով, պարախմբի անդամների ստացած ազգային առողջ դաստիարակութիւնը:
Վերջին պարից յետոյ, պարախմբի վարչութեան պատասխանատուներից եւ Թաւրիզի մասնաճիւղի «Տաթեւ» պարախմբի ղեկավար՝ Նայիրի Դիլանեանը, պարախմբի անունից շնորհակալական խօսքով հանդէս եկաւ, ուրմիահայ համայնքի կողմից ընձեռւած բոլոր դիւրութիւնների համար: Ապա, ՀՕՄ-ի Ուրմիայի մասնաճիւղի ատենապետուհի Սեդա Մեջլումեանը բեմ հրաւիրւելով, շնորհակալութիւն յայտնեց Սրբազան Հօրը, իր հովանաւորութեան եւ ներկայութեան համար, ինչպէս նաեւ ՀՕՄ-ի Թաւրիզի մասնաճիւղին, համագործակցութեան համար, ինչպէս նաեւ Գործակալութեան եւ բոլոր այն անհատներին, ովքեր նպաստել էին սոյն ձեռնարկի յաջողութեանը:
160911d02cԹեմակալ առաջնորդի ձեռամբ, այնուհետեւ, պարախմբի պատրաստած գնահատական յուշանւէրները յանձնւեցին Պատգամաւորական ժողովի ներկայացուցիչ դոկտ. Էլւիս Մայիլեանին, Գործակալական խորհրդի ատենապետ Փայլակ Սահակեանին եւ ՀՕՄ-ի ատենապետուհի՝ Սեդա Մեջլումեանին:
Ապա, իր եզրափակիչ եւ օրհնութեան խօսքով, Սրբազան Հայրը մշակութային վայելք հանդիսացած երեկոն շատ հարազատ համարեց Ատրպատականի հայոց թեմին, որտեղ մեր ժողովուրդը դարեր շարունակ քարից մշակոյթ է ստեղծել, իսկ նոր սերունդը, իբրեւ յետնորդ սերունդը իր պապերի, շարունակում է տէր կանգնել արարւած մշակոյթին:
Սրբազան Հայրը սքանչելի զուգադիպութիւն համարեց յուշարձանագէտ Սամուէլ Կարապետեանի ներկայութիւնը սոյն ելոյթին, որը Ատրպատականի մշակութային ժառանգութեան հետքերն արձանագրելու առաքելութեամբ էր գտնւում թեմում:
160911d02dԲարձր գնահատելով «Ակունք» պարային համոյթի մշակութանւէր ներկայութիւնը իրանահայութեան կեանքում, Սրբազան Հայրը շնորհաւորեց խմբի ղեկավար Կարինէ Մանուչերեանին, իսկական պարուսոյց լինելու համար, «որովհետեւ խմբի կատարելագործւածութիւնը ի յայտ է գալիս, համեստ եւ ամէն յարմարութիւն չունեցող բեմերի վրայ ցուցաբերած անսխալութեամբ եւ մատուցման որակով»,- ասաց Սրբազան Հայրը: Ի վերջոյ նա գնահատեց ՀՕՄ-ի Ուրմիայի մասնաճիւղի վարչութեանը, Գործակալական խորհրդին եւ յատկապէս պարողներին, որոնք «հայ մշակոյթով ապրեցին եւ մեզ ապրեցրին այս գիշեր: Սոյն ելոյթը եկաւ զօրացնելու ազգային մեր անընկճելի կամքը, որի համաձայն, մենք կանք, պիտի լինենք, ու Ատրպատականում նոյնիսկ եթէ չշատանանք, սակայն մեր կերտած մշակոյթով յաւերժ պիտի ապրենք դարէդար», եզրակացրեց Սրբազան Հայրը:
Ապա, ՀՕՄ-ի Ուրմիայի մասնաճիւղը ընթրիքով պատւեց պարախմբի անդամներին եւ ազգային իշխանութեանը:

Յարակից լուրեր

  • Ատրպատականի հայոց թեմի առաջնորդը նահանգապետ Փուրմոհամմադիի մօտ
    Ատրպատականի հայոց թեմի առաջնորդը նահանգապետ Փուրմոհամմադիի մօտ

    Ընկերակցութեամբ Ազգային իշխանութեան Պատգմաւորական ժողովի եւ Թեմական խորհրդի ներկայացուցիչների, Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը, երկուշաբթի 14 յունւար 2019 թ.-ի առաւօտեան ժամը 11-ին, պաշտօնական այցելութիւն տւեց Արեւելեան Ատրպատականի նորանշանակ նահանգապետ՝ Փուրմոհամմադին, նահանգապետարանում: 

  • Սբ. Ծննդեան եւ Աստւածայայտութեան տօնը Ռահւա գիւղի Սբ. Աստւածածին եկեղեցում
    Սբ. Ծննդեան եւ Աստւածայայտութեան տօնը Ռահւա գիւղի Սբ. Աստւածածին եկեղեցում

    Ուրբաթ, 11 յունւար 2019 թ.-ի առաւօտեան ժամը 10:30-ին, Ռահւա գիւղ ժամանեց Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանը, եւ գիւղի աւանդութեան համաձայն Սբ. Ծննդեան տօնի յաջորդող ուրբաթ օրը ս. պատարագ մատոյց Ս. Աստւածածին պատմական եկեղեցում: Խորանին սպասարկում էր Ուրմիայի հոգեւոր հովիւ՝ արժ. Տ. Ներսէս քհնյ. Պասիլեանը: Պատարագի երգեցողութիւնը կատարում էր Ուրմիայի «Նարեկացի» երգչախումբը, ղեկավարութեամբ երաժիշտ դոկտ. Վարդան Սիմոնզի:

  • Սբ. Ծննդեան տօնի առիթով Ատրպատականի հայոց թեմի առաջնորդը ուխտաւոր՝ երեք մոգերից մէկի սուրբ գերեզմանին
    Սբ. Ծննդեան տօնի առիթով Ատրպատականի հայոց թեմի առաջնորդը ուխտաւոր՝ երեք մոգերից մէկի սուրբ գերեզմանին

    Ուրբաթ, 11 յունւար 2019 թ.-ին, Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանը, ընկերակցութեամբ մէկ խումբ հաւատացեալների, Սբ. Ծննդեան տօնի առիթով ուխտաւորաբար այցելեց, Ուրմիայում գտնւող այն սրբավայրը, որտեղ ըստ աւանդութեան թաղւել է Արեւելքի իմաստուն երեք մոգերից մէկը, որոնք աստղի առաջնորդութեամբ հասել էին մինչեւ Բեթղեհէմ, երկրպագելու նորածին Արքային՝ մանուկ Յիսուսին:

  • Ս. Ծննդեան առիթով պետական եւ ազգային շնորհաւորանքներ Ատրպատականի հայոց թեմում
    Ս. Ծննդեան առիթով պետական եւ ազգային շնորհաւորանքներ Ատրպատականի հայոց թեմում

    Կիրակի եւ երկուշաբթի 5 եւ 6 յունւար 2019-ին Ատրպատականի hայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանն ու Ազգային իշխանութիւնը, Թաւրիզում եւ Ուրմիայում ընդունեցին պետական, ազգային-միութենական եւ ժողովրդական շնորհաւորանքներ, մեր Տիրոջ եւ Փրկչի՝ Յիսուս Քրիստոսի Սուրբ Ծննդեան տօնի առիթով: 

  • Թաւրիզի ուրբաթօրեայ աղօթապետը, նահանգապետը եւ առաջնորդ Սրբազանը հայ նահատակի տանը
    Թաւրիզի ուրբաթօրեայ աղօթապետը, նահանգապետը եւ առաջնորդ Սրբազանը հայ նահատակի տանը

    Կիրակի 6 յունւար 2019-ի երեկոյեան ժամը 8-ին, Թաւրիզի ուրբաթօրեայ աղօթապետ եւ Իրանի Իսլամական Յեղափոխութեան այժմու հոգեւոր առաջնորդի ներկայացուցիչ՝ այաթ. Ալէ Հաշեմ, ընկերակցութեամբ Արեւելեան Ատրպատականի նահանգապետ Փուրմոհամմեդիի, Նահատակների յատուկ պետական հիմնարկութեան ընդհ. տնօրէնի, Փոքրամասնութեանց գրասենեակի պատախանատուի եւ թղթակիցների, այցելեց հայ նահատակներ՝ Կայծակ Դաւթեանի եւ Գառնիկ Փիլիպոսեանի բնակարանը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։