Հա

Համայնք

24/12/2016 - 10:00

Աստւածաշնչի տպագրութեան 350-ամեակի նշում եւ հնատիպ Սուրբ Գրքերի ցուցահանդէս՝ Թաւրիզում

Ուրբաթ, դեկտեմբեր 9-ի երեկոյեան ժամը 7:30-ին, ազգային առաջնորդարանի «Էմիլ Յակոբեան» դահլիճում, Աստւածաշնչի հայերէն տպագրութեան 350-ամեակի առիթով տեղի ունեցաւ իւրայատուկ դասախօսութիւն, որին յաջորդեց նաեւ հնատիպ Սուրբ Գրքերի ցուցահանդէս:

Ատրպատական ազգային առաջնորդարան - Ուրբաթ, դեկտեմբեր 9-ի երեկոյեան ժամը 7:30-ին, ազգային առաջնորդարանի «Էմիլ Յակոբեան» դահլիճում, Աստւածաշնչի հայերէն տպագրութեան 350-ամեակի առիթով տեղի ունեցաւ իւրայատուկ դասախօսութիւն, որին յաջորդեց նաեւ հնատիպ Սուրբ Գրքերի ցուցահանդէս:
350-ամեակի առիթից օգտւելով, ազգ. առաջնորդարանի հնատպերի հաւաքածոյում գտնւած հնագոյն 8 Ճաշոցների ուսումնասիրութիւնը կատարել էր Ատրպատականի հայոց թեմի առաջնորդ՝ Տ. Գրիգոր եպս. Չիֆթճեանը, որը սահիկների ցուցադրութեամբ ներկայացրեց թեմի մտաւորականների խմբակին:
161224d02aՄշակութային բարձր արժէք ներկայացնող հնատիպ հաստափոր սուրբ մատեանների իւրայատուկ բոյրով օծուն դահլիճում, երեկոյի բացման խօսքը կատարեց Ռիտա Նազարբէգեանը: Ոսկան Երեւանցու կողմից 1666 թւականին, Ամստերդամում իրականացւած Աստւածաշնչի հայերէն տպագրութեան անդրադառնալով, նա ասաց. «Գիրքը տպւեց այն ժամանակների համար բաւականին մեծ՝ 5000 տպաքանակով, էջերի քանակը՝ 838: Այդ շքեղ եւ պատկերազարդ գրքի լոյսընծայմամբ հայերը ունեցան իրենց ազգային լեզւով տպագրւած Աստւածաշունչը: Ոսկան վարդապետ Երեւանցին (նաեւ Ոսկան Ջուղայեցին) ծնւել է 1614 թւականին, Իրանի Նոր Ջուղայում: Ի յիշատակ ծնողների նախկին բնակավայրի կոչւել է Երեւանցի: Հայերէն առաջին Աստւածաշնչի տպագրութեամբ Ոսկան վարդապետը մատուցել է վիթխարի ծառայութիւն: Միշտ բարձր է գնահատւել նրա վաստակը հայ մշակոյթի պատմութեան, նաեւ հայ ազգի մտաւոր զարգացման մէջ: Հայ տպագրութեան երախտաւորը վախճանւել է 1674 թւականին Մարսէյլում»: Բացման հակիրճ բայց բովանդակալից խօսքը նա աւարտեց Մեծի Տանն Կիլիկիոյ կաթողիկոս Ն.Ս.Օ.Տ.Տ. Արամ Ա Վեհափառ Հայրապետի բառերով. «Արդարեւ, եթէ Մեսրոպ Մաշտոց ու Սահակ Հայրապետ 5-րդ դարուն Աստուծոյ խօսքը հայացուցին ստեղծելով մեր պատմութեան Ոսկեդարը, ապա, Ոսկան վարդապետ ձեռագիրներու փոշիներուն տակ մնացած Աստւածաշունչը մատչելի, տեսանելի ու շօշափելի դարձուց մեր ժողովուրդին»:
161224d02bԱռաջնորդ Սրբազան Հայրը իր դասախօսութեան սկսելով, ներկայացրեց այն վիթխարի մշակութային հարստութիւնը, որի տէրն է ատրպատականցի հայը, ձեռագրերի եւ հնատիպ հազւագիւտ հատորների հաւաքածոյով: Իր աշխատանքը սահմանափակելով միայն 8 Ճաշոցների ուսումնասիրութեան շրջագծում, Սրբազան Հայրը մէկ առ մէկ սահիկների ընկերակցութեամբ բացատրեց նրանց ներկայ իրավիճակը, դարերի ընթացքում կատարւած վերանորոգութեան աշխատանքները, ինչպէս նաեւ ընկած էջերի փոխարէն աւելացւած ձեռագիր անգին էջերը:
161224d02cԴասախօսութեան հիմնական մասը կազմում էր այն յիշատակարանների ներկայացումը, որոնք ե՛ւ նւիրատուների կողմից ձեռագիր արձանագրւել են Ճաշոցներում, ե՛ւ պատահական անհատների կողմից տարբեր էջերում թողնւել են իբրեւ յիշատակ: Երբեմն դժւար վերծանելի անձնանուններ, տեղանուններ եւ մաշւած տողեր Սրբազան Հայրը արտագրել էր Ճաշոցներից, որոնցից իւրաքանչիւրը Ատրպատականի տարբեր գաւառներում եւ գիւղերում օգտագործւել էր եւ ապա հանգրւանել Թաւրիզում:
Դասախօսութիւնից յետոյ հարցերի առիթ տրւեց ներկաներին, որոնց լուսաբանիչ պատասխաններ տւեց Սրբազան Հայրը: Թեմի հին, բայց անցեալ չդարձած պատմութեան շօշափելի հարստութիւններին մօտենալով, ներկաները ըմբոշխնեցին սուրբ գրքերի եւ նրանց ձեռագիր էջերի ու յիշատակարանների փոխանցած մշակութային զգացմունքը:

Յարակից լուրեր

  • Ատրպատականի հայոց թեմի առաջնորդը նահանգապետ Փուրմոհամմադիի մօտ
    Ատրպատականի հայոց թեմի առաջնորդը նահանգապետ Փուրմոհամմադիի մօտ

    Ընկերակցութեամբ Ազգային իշխանութեան Պատգմաւորական ժողովի եւ Թեմական խորհրդի ներկայացուցիչների, Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը, երկուշաբթի 14 յունւար 2019 թ.-ի առաւօտեան ժամը 11-ին, պաշտօնական այցելութիւն տւեց Արեւելեան Ատրպատականի նորանշանակ նահանգապետ՝ Փուրմոհամմադին, նահանգապետարանում: 

  • Սբ. Ծննդեան եւ Աստւածայայտութեան տօնը Ռահւա գիւղի Սբ. Աստւածածին եկեղեցում
    Սբ. Ծննդեան եւ Աստւածայայտութեան տօնը Ռահւա գիւղի Սբ. Աստւածածին եկեղեցում

    Ուրբաթ, 11 յունւար 2019 թ.-ի առաւօտեան ժամը 10:30-ին, Ռահւա գիւղ ժամանեց Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանը, եւ գիւղի աւանդութեան համաձայն Սբ. Ծննդեան տօնի յաջորդող ուրբաթ օրը ս. պատարագ մատոյց Ս. Աստւածածին պատմական եկեղեցում: Խորանին սպասարկում էր Ուրմիայի հոգեւոր հովիւ՝ արժ. Տ. Ներսէս քհնյ. Պասիլեանը: Պատարագի երգեցողութիւնը կատարում էր Ուրմիայի «Նարեկացի» երգչախումբը, ղեկավարութեամբ երաժիշտ դոկտ. Վարդան Սիմոնզի:

  • Սբ. Ծննդեան տօնի առիթով Ատրպատականի հայոց թեմի առաջնորդը ուխտաւոր՝ երեք մոգերից մէկի սուրբ գերեզմանին
    Սբ. Ծննդեան տօնի առիթով Ատրպատականի հայոց թեմի առաջնորդը ուխտաւոր՝ երեք մոգերից մէկի սուրբ գերեզմանին

    Ուրբաթ, 11 յունւար 2019 թ.-ին, Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանը, ընկերակցութեամբ մէկ խումբ հաւատացեալների, Սբ. Ծննդեան տօնի առիթով ուխտաւորաբար այցելեց, Ուրմիայում գտնւող այն սրբավայրը, որտեղ ըստ աւանդութեան թաղւել է Արեւելքի իմաստուն երեք մոգերից մէկը, որոնք աստղի առաջնորդութեամբ հասել էին մինչեւ Բեթղեհէմ, երկրպագելու նորածին Արքային՝ մանուկ Յիսուսին:

  • Ս. Ծննդեան առիթով պետական եւ ազգային շնորհաւորանքներ Ատրպատականի հայոց թեմում
    Ս. Ծննդեան առիթով պետական եւ ազգային շնորհաւորանքներ Ատրպատականի հայոց թեմում

    Կիրակի եւ երկուշաբթի 5 եւ 6 յունւար 2019-ին Ատրպատականի hայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանն ու Ազգային իշխանութիւնը, Թաւրիզում եւ Ուրմիայում ընդունեցին պետական, ազգային-միութենական եւ ժողովրդական շնորհաւորանքներ, մեր Տիրոջ եւ Փրկչի՝ Յիսուս Քրիստոսի Սուրբ Ծննդեան տօնի առիթով: 

  • «Վանի արծաթը»` Թաւրիզում
    «Վանի արծաթը»` Թաւրիզում

    Թաւրիզի հայկական թաղամասի Պարոն Աւագ փողոցը հատւում է կենտրոնական Շարիաթի փողոցին, որով զբօսնելիս միանգամից աչք է ծակում «Van Silver» անունը կրող փոքրիկ խանութը: Բացի անւանումից, այն առաւել լուսարձակ է ցուցափեղկերին շողշողացող արծաթեայ իրերի հաշւին, քան հարեւան տաղաւարներն են:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։