Հա

Համայնք

Երեքշաբթի, 14 Մարտի 2017 10:40

Թաւրիզի եկեղեցիների Խնամակալ մարմնի հանդիպումն ազգային առաջնորդարանում

Մարտի 12-ին Ատրպատականի ազգային առաջնորդարանի «Էմիլ Յակոբեան» դահլիճում տեղի ունեցաւ Թաւրիզի եկեղեցիների Խնամակալ մարմնի հանդիպումը՝ նախագահութեամբ Ատրպատականի հայոց թեմի առաջնորդ՝ Տ. Գրիգոր եպս. Չիֆթճեանի:

«alikonline.ir» - Մարտի 12-ին Ատրպատականի ազգային առաջնորդարանի «Էմիլ Յակոբեան» դահլիճում տեղի ունեցաւ Թաւրիզի եկեղեցիների Խնամակալ մարմնի հանդիպումը՝ նախագահութեամբ Ատրպատականի հայոց թեմի առաջնորդ՝ Տ. Գրիգոր եպս. Չիֆթճեանի: Այս մասին տեղեկանում ենք Ատրպատականի ազգային առաջնորդարանից:

Բացման եւ բարի գալստեան խօսքով ներկաներին ողջունեց Մարմնի վարչութեան ատենադպրուհի Էմմա Յարութիւնեանը: Թաւրիզի եկեղեցիների հանդէպ հոգածութեան եւ կարգապահութեան հսկող մարմնի վարչութեան անունից նա շնորհակալութիւն յայտնեց բոլոր անդամուհիներին, յատկապէս՝ նրանց, ովքեր իրենց ամբողջանւէր օժանդակութիւնն են բերում եկեղեցիների մաքրութեան եւ բարեզարդման գործին: Ապա, ներկայացնելով հաւաքի գլխաւոր առիթը, վարչութեան եւ բոլոր անդամների անունից շնորհաւորեց Թաւրիզի նոր հոգեւոր հովիւ՝ Արժ. Տ. Մարտիրոս նորօծ քահանայ Ղուկասեանին՝ մաղթելով, որ իր անսակարկ ու նւիրեալ ծառայութեամբ նա երկար տարիներ հովւի թաւրիզահայութեանը:

Ատրպատականի հայոց թեմի առաջնորդն այս առիթով իր ուրախութիւնը յայտնելով՝ ընդհանուր գծերով ներկայացնելով անցած տարւայ եկեղեցական կեանքը Ատրպատականում, շեշտելով ժողովրդի լայն խաւերի մասնակցութիւնը. «Եկեղեցին կենտրոնական դիրքն է գրաւում իւրաքանչիւր թեմի՝ եկեղեցական վիճակի: Նրա շուրջ են պտտւում բոլոր միւս կառոյցները, իրենց գործունէութիւնը ծաւալելով եւ ազգային կեանքը կազմակերպելով: Խնամակալ միութեան առաքելութիւնը այս իմաստով, պատասխանատու աշխատանք է, եկեղեցին միշտ գրաւիչ դարձնելու եւ ժողովուրդը հրաւիրելու նրա սրբազան կամարների ներքեւ հոգեւորապէս սնւելու»,- ասաց Սրբազանը:

Ապա, ջերմօրէն ողջունելով իր ձեռնասունի՝ Տէր Մարտիրոսի ինքնընծայումը մեր եկեղեցուն եւ թաւրիզահայութեանը, թւեց այն մարտահրաւէրները, որոնք ընդհանրապէս դիմագրաւում է իւրաքանչիւր հոգեւորական սպասաւոր իր կեանքում. «Ժողովուրդը իր ձեռքում ունի ամէնից կատարելագործւած կշեռքը, որով կարողանում է իսկապէս ճանաչել արժանաւորին, զատորոշելով նրան միւսներից: Մեր եկեղեցում արարողութիւնների անթերի կատարումը, ներշնչումի աղբիւր պէտք է հանդիսանայ հաւատացեալների համար: Հոգով ու սրտով, առանց ձանձրոյթի կատարւած արարողութիւնը դրական ազդեցութիւն է գործում հաւատացեաների վրայ: Նորընծայ Տէր Մարտիրոսը խոստմնալից է այս առումով եւ այդ  զգում էք վստահաբար նրա մատուցած պատարագների եւ կատարած ծէսերի ընթացքումե»,- նշեց թեմակալ առաջնորդը: Ի վերջոյ, նա ասաց, թէ Խնամակալ մարմինը միշտ Տէր Հօր կողքին է լինելու, պայծառացնելու համար թաւրիզահայ համայնքն իր եկեղեցով:

Հանդիպման պաշտօնական բաժնից յետոյ տեղի ունեցաւ հիւրասիրութիւն եւ ընթրիք, որի ընթացքում ներկաները մտերմիկ մթնոլորտում առիթ ունեցան զրուցելու միմեանց հետ:

Յարակից Հրապարակումներ

Ամենաշատ ընթերցւած

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։