Հա

Համայնք

Հինգշաբթի, 13 Ապրիլի 2017 09:20

Ծաղկազարդի տօնը Ատրպատականի հայոց թեմում իմաստաւորւեց մանուկների խանդավառ մասնակցութեամբ

Սրբազան Հայրը կոչ ուղղեց ծնողներին, մեր եկեղեցու պայծառութեան ու ազգային արժէքների կենսագործման համար իրենց երեխաների կրօնական դաստիարակութեան հանդէպ առաւել հոգածութիւն ցուցաբերել,:

«alikonline.ir» - Երկնաւոր Վարդապետի խոնարհութեան յաղթանակի տօնը՝ Ծաղկազարդը Ատրպատականի հայոց թեմի երկու հայաշատ քաղաքներում՝ Թաւրիզում եւ Ուրմիայում առաւել իմաստաւորւեց մանուկների խուռներամ մասնակցութեամբ եկեղեցական արարողութեան ու թափօրին, իսկ Գեարդաբադ գիւղում տեղի ունեցած ժամերգութեան ընթացքին կատարւեց ուռենիի ոստերի օրհնութիւն եւ ապա դռնբացէքի արարողութիւն: Տեղեկացնում է Ատրպատականի ազգային առաջնորդարանը:

Ապրիլի 9-ի առաւօտեան, Ատրպատականի հայոց թեմում մատուցւած պատարագներով եւ մանուկների թափօրով, հաւատացեալ ժողովուրդը միասնաբար մուտք գործեց Յիսուսի տնօրինական կեանքի վերջին շաբաթը: Յատկապէս մանուկների համար, այս տօնը հետզհետէ վերածւում է ցնծութեան առիթի, երբ բոլորի կողմից ուշադրութեան առարկայ է դառնում թեմի մատաղատի սերունդը:

Թաւրիզի Լիլաւա թաղամասի Ս. Սարգիս եկեղեցում պատարագեց եւ թեմի ժողովրդին իր պատգամը յղեց Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեան: Երգեցողութիւնը քառաձայն կատարեց «Կոմիտաս» երգչախումբը, ղեկավարութեամբ երաժիշտ Վարդան Վահրամեանի: Իսկ Ուրմիոյ Ս. Ստեփանոս ծխական եկեղեցում պատարագեց եւ քարոզեց՝ հոգեւոր հովիւ՝ արժ. Տ. Ներսէս քհնյ. Պասիլեանը: Երգեցողութիւնը կատարեց «Նարեկացի» երգչախումբը, ղեկավարութեամբ Օֆելիա Սայադեանի:

Առաջնորդ Սրբազանն իր քարոզում վեր հանեց Աստծոյ տան կարեւոր տեղն ու դերը քրիստոնեայ մարդու համար իբրեւ «Աղօթքի տուն», որի մաքրագործումը վաճառականներից եւ աւազակներից, Երուսաղէմ իր յաղթական մուտքի օրը կատարեց Յիսուսը: Սրբազանը տան գաղափարը բացատրեց, սկսելով ընտանեկան յարկից մինչեւ մեր համայնական կեանքն ու եկեղեցին, ցոյց տալով որ դրանք ամէն բանից առաջ մաքուր են լինելու բազմիմաստ ըմբռնումներով ու հասկացողութեամբ: Ի վերջոյ նա շեշտեց այս մաքուր տան մէջ դաստիարակւող նոր սերնդի առողջ կազմաւորման կարեւորութիւնը, մեր ազգի ու եկեղեցու փայլուն ապագայի ի խնդիր:

Սրբազան Հայրը կոչ ուղղեց ծնողներին, մեր եկեղեցու պայծառութեան ու ազգային արժէքների կենսագործման համար իրենց երեխաների կրօնական դաստիարակութեան հանդէպ առաւել հոգածութիւն ցուցաբերել,:

Սուրբ պատարագի աւարտին խորանի վրայ զետեղւած սկուտեղների մէջ օրհնեցին ուռենիի ոստերը, որոնք պատրաստւել էին Խնամակալ մարմնի կողմից: Իսկ երեխաների համար պատրաստւել էին տասնեակներով փուչիկներ՝ տօնական մթնոլորտն առաւել ջերմացնելու համար: Մանուկների թափօրը ընթացք առնելով եկեղեցուց, ուղղւեց դէպի հիւսիսային բակը եւ ապա եկեղեցու շուրջ պտտւելով վերադարձաւ գաւթի մուտքին: Սպիտակ աղաւնիներ արձակւեցին երեխաների ուրախ ու խանդավառ գոչումներով: Նաեւ մանկական թատերական կերպարներն իրենց ներկայութեամբ զւարճացրին մանուկներին:

Նոյն օրը երեկոյեան, դարձեալ Լիլաւայի Ս. Սարգիս եկեղեցում հանդիսապետութեամբ առաջնորդ Սրբազան Հօր կատարւեց Դռնբացէքի խորհրդալից արարողութիւնը, որի աւարտին օրւայ խորհուրդը ներկայացնող պատգամ տւեց Սրբազան Հայրը: Նա օրինակ վերցնելով երկնքի արքայութիւնը խորհրդանշող խորանի վարագոյրից, ներկայացրեց դռան աստւածաբանական ու սովորական կեանքում ունեցած իմաստը: «Քրիստոս-Դուռ»-ը փրկութեան ճանապարհ ներկայացնելով, նրանից անցնելով յաւիտենական երանութեան հասնելու փառքը ցոյց տւեց Սրբազանը՝ միաժամանակ անդրադառնալով երկրաւոր կեանքում դռան հասկացողութեան պակասի հետեւանքով ստեղծւող դժւարութիւններին:

Նոյն օրը, Գեարդաբադի Ս. Գէորգ եկեղեցում տեղի ունեցաւ երեկոյեան ժամերգութիւն եւ Դռնբացէքի արարողութիւն, Ուրմիոյ հոգեւոր հովիւ՝ Տ. Ներսէս քհնյ. Պասիլեանի միջոցով: Դարձեալ նոյն օրը երեկոյեան, Ուրմիոյ Ս. Ստեփանոս եկեղեցում եւս, Տէր հօր միջոցով կատարւեց Դռնբացէքի արարողութիւնը: Երկու եկեղեցիներում տւած իր քարոզի ընթացքում, Տէր հայրը խօսեց Քրիստոսի երկրորդ գալստեան խորհրդով օծուն արարողութեան  խորհրդանշական իմաստը բացատրելով, եւ շեշտելով ապաշխարհութեամբ արդարանալու ուղին:

Ծաղկազարդով եւ Դռնբացէքի խորհրդալից արարողութեամբ, Ատրպատականի հայոց թեմում հայ եկեղեցու զաւակները, մուտք գործեցին Աւագ շաբաթւայ հարուստ օրերը, երբ հոգեպէս լցւելու ենք մեր Տիրոջ երկրաւոր կեանքի վերջին օրերի դրւագների հոգեւոր զօրութեամբ:

Յարակից Հրապարակումներ

  • Տեառնընդառաջի հանդիսաւոր նախատօնակ, մանուկների խորան ընծայում եւ աւանդական խարոյկ՝ Ատրպատականի հայոց թեմում
    Տեառնընդառաջի հանդիսաւոր նախատօնակ, մանուկների խորան ընծայում եւ աւանդական խարոյկ՝ Ատրպատականի հայոց թեմում

    Հայ եկեղեցու որդեգրած սիրելի աւանդութիւններից է Տեառնընդառաջի տէրունի տօնը, մեր Տիրոջ տաճար ընծայման յիշատակը, որը կարօտով սպասւում է ամէն տարի Ատրպատականի հայոց թեմի ժողովրդի կողմից:

    Երեքշաբթի, 13 փետրւար 2018-ի երեկոյեան ժամը 5-ին, թեմի եկեղեցիներում՝ Թաւրիզիում եւ Ուրմիայում տեղի ունեցան հանդիսաւոր նախատօնակ եւ ապա աւանդական խարոյկի բոցավառում:

  • ԻԻՀ յեղափոխոիթեան 39-րդ տարեդարձի առիթով ձեռնարկներ՝ Ատրպատականի հայոց թեմում
    ԻԻՀ յեղափոխոիթեան 39-րդ տարեդարձի առիթով ձեռնարկներ՝ Ատրպատականի հայոց թեմում

    Ատրպատականի հայոց թեմում ապրող մեր ժողովրդի զաւակները, իբրեւ Իրանի Իսլամական Հանրապետութեան բաղկացուցիչ մասնիկ, 39 տարիներ առաջ, երկրի հոգեւոր առաջնորդ այաթ. Էմամ Խոմէյնիի գլխաւորութեամբ սկսւած անցած դարի մեծագոյն Յեղափոխութեան տօնակատարութիւններին իրենց մասնակցութիւնը բերեցին, ե՛ւ ներհամայնքային ծրագրերով ե՛ւ ընդհանրական քայլարշաւում խիտ շարքերով ներկայութեամբ: 

  • Սրբոց Վարդանանց տօնը Ատրպատականի հայոց թեմում
    Սրբոց Վարդանանց տօնը Ատրպատականի հայոց թեմում

    Հինգշաբթի, 8 փետրւար 2018-ին, Սրբոց Վարդանանց զօրավարաց ազգային-եկեղեցական տօնի խորհուրդը նշւեց Ատրպատականի հայոց թեմում, յատկապէս հայաշատ քաղաքներում՝ Թաւրիզում եւ Ուրմիայում, եկեղեցական արարողութիւնների եւ ազգային տօնախմբութիւնների կատարմամբ:

    Թաւրիզի Լիլաւա թաղամասի Սբ. Սարգիս եկեղեցում, չորեքշաբթի, 7 փետրւար 2018-ին, Սրբոց Վարդանանց յիշատակի հանդիսաւոր ժամերգութեան նախագահեց Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը, մասնակցութեամբ Թաւրիզի հոգեւոր հովիւ՝ արժ. Տ. Մարտիրոս քհնյ. Ղուկասեանի:

  • Ատրպատականի հայոց թեմի առաջնորդի այցը Իսլամական մշակոյթի հիմնարկութեան ընդհանուր տնօրէնին
    Ատրպատականի հայոց թեմի առաջնորդի այցը Իսլամական մշակոյթի հիմնարկութեան ընդհանուր տնօրէնին

    Շաբաթ, 27 յունաւր 2018-ի առաւօտեան ժամը 11-ին, պաշտօնական հանդիպում կայացաւ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի, Թեմական խորհրդի եւ Իրանի Իսլամական Հանրապետութեան մշակոյթի տարածման պետական հիմնարկութեան ընդհանուր տնօրէն դոկտ. Մոհամմատփուրի միջեւ, սոյն հիմնարկութեան Թաւրիզի կենտրոնատեղիում: 

  • Սբ. Սարգսի տօնը ուրմիահայ համայնքում
    Սբ. Սարգսի տօնը ուրմիահայ համայնքում

    Շաբաթ, 27 յունւար 2018-ին, Սբ. Սարգսի տօնի առիթով Ուրմիոյ Սբ. Ստեփանոս ծխական եկեղեցում տեղի ունեցաւ ժամերգութիւն, յիշատակելու համար մեծանուն Սրբի եւ նրա որդու՝ Մարտիրոսի նահատակութեան տօնը:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։