Հա

Համայնք

Չորեքշաբթի, 19 Ապրիլի 2017 08:50

Հաղորդութեան խորհրդի հաստատման ս. պատարագ, Ոտնալւայ եւ Խաւարման հոգեխռով գիշերը՝ Ատրպատականի հայոց թեմում

Աւագ հինգշաբթիի՝ ապրիլի 13-ի առաւօտեան, Թաւրիզում եւ Ուրմիայում ս. պատարագ մատուցւեց ի յիշատակ ս. Հաղորդութեան խորհրդի հաստատման: Թաւրիզում ս. պատարագը մատուցեց հոգեւոր հովիւ Տ. Մարտիրոս քհնյ. Ղուկասեանը, իսկ Ուրմիայում՝ հոգեւոր հովիւ՝ Տ. Ներսէս քհնյ. Պասիլեանը:

«alikonline.ir» - Քրիստոնէական եկեղեցու եւ յատկապէս մեր եկեղեցու կեանքում հոգեւոր ապրումներով լեցուն Աւագ շաբաթւայ ամէնից հարուստ օրն է Աւագ հինգշաբթին: Հոգեթով շարականներն ու մելանոյշ երգերը, իւրայատուկ զգացողութիւն են տալիս մարդկային հոգուն, Քրիստոսի խաչի ճանապարհով ընթանալու բարեպատեհ առիթը ընծայելով հաւատաւոր քրիստոնեայ հային:

Աւագ հինգշաբթիի՝ ապրիլի 13-ի առաւօտեան, Թաւրիզում եւ Ուրմիայում ս. պատարագ մատուցւեց ի յիշատակ ս. Հաղորդութեան խորհրդի հաստատման: Թաւրիզում ս. պատարագը մատուցեց հոգեւոր հովիւ Տ. Մարտիրոս քհնյ. Ղուկասեանը, իսկ Ուրմիայում՝ հոգեւոր հովիւ՝ Տ. Ներսէս քհնյ. Պասիլեանը: Այս մասին տեղեկացնում է Ատրպատականի ազգային առաջնորդարանը:

Ս. պատարագի ընթացքում, ըստ աւանդութեան, քարոզի փոխարէն ընթերցւեց Հայրերի սուրբ գրականութիւնից յորդորական աղօթքը, ուղղւած բոլոր ժամանակների քրիստոնեաներին, մաքուր խղճմտանքով մօտենալու ս. Հաղորդութեան խորհրդին:

Երեկոյեան ժամը 4-ին, տեղի ունեցաւ Ոտնալւայի արարողութիւնը, կատարողութեամբ հոգեւորականաց դասի: Առաջնորդ Սրբազանը Ոտնալւայի կարգը Թաւրիզում կատարելով, տւեց իր պատգամը: Իրենց վտանգաւոր թերութիւններում մնալ յամառող եւ իրենց նմանի հանդէպ վնասակար ընթացքում յայտնւած մարդկանց դիմաց, նա ցոյց տւեց աստւածային խոնարհութիւնը եւ ներողամտութիւնը. «Եթէ Աստւած յանձն առաւ հողաստեղծ մարդու ոտքերի առջեւ ծնկի գալ, դու եւ ես ո՞վ ենք, որ շարունակենք յամառիլ մնալ մեր ինքնատես ու անզիղջ դիրքերում»,- ասաց Սրբազանը: Ուրմիայում եւս, տէր հայրը իր քարոզում Քրիստոսի անսահման խոնարհութեան երեւոյթը շեշտեց, պատւիրելով նմանւել նրան մեր հաւատացեալի կեանքում:

Այնուհետեւ կատարւեց Ոտնալւայի դաստիարակիչ արարողութիւնը: Առաջնորդ Սրբազանը եպիսկոպոսական իր հանդերձանքը մէկ կողմ դնելով, Քրիստոսի օրինակով մէկ ղենջակ կապեց, ու սկսեց Քրիստոսի տասներկու աշակերտները խորհրդանշող տասներկու անձերի ոտքերը լւանալ:

Նոյն օրը, երեկոյեան ժամը 8-ից մինչեւ կէս գիշեր տեղի ունեցաւ Խաչելութեան կարգը կամ ժողովրդական բացատրութեամբ, Խաւարման գիշերեը Թաւրիզում եւ Ուրմիայում: Կարդացւեցին արարողակարգում նշւած խաչելութեան եօթը աւետարանական հատւածները: Ս. Սարգիս եկեղեցում բոլոր արարողութիւնների երգեցողութիւնները կատարւեցին «Կոմիտաս» դպրաց դաս երգչախմբի կողմից, ղեկավարութեամբ երաժիշտ Վարդան Վահրամեանի եւ դոկտ. Վարդան Սիմոնզի, իսկ կրտսերաց Դպրաց դասի անդամները կատարեցին բուրվառակրութեան, մոմակրութեան եւ դպրութեան բոլոր պաշտօնները:

Ուրմիայում երգեցողութիւնը կատարւեց «Նարեկացի» երգչախմբի կողմից, ղեկավարութեամբ Օֆելիա Սայադեանի եւ մասնակցութեամբ դպրաց դասի անդամների:

Իւրաքանչիւր աւետարանի ընթերցման պահին դաստակի յատուկ թելի վրայ մէկ հանգոյց կապեց բարեպաշտ ժողովուրդը հին աւանդութեան հետեւելով, որպէսզի մինչեւ Համբարձում իր ձեռքի վրայ իբրեւ զօրութիւն պահպանի Աւետարանները:

Տարւայ ամէնից խորհրդաւոր պահին, երբ եկեղեցու բոլոր ճրագները մարւեցին ու խաւար տիրեց, լսւեց Յիսուսի ողբը «Ո՞ւր ես մայր իմ» ողոգական ձայնով երբ նա Գողգոթայի բարձունքին մենակ էր մնացել իր ցաւերի մէջ, մարդկութեան փրկութեան ի խնդիր:

Եկեղեցու խոր մթութեան մէջ, առաջնորդ Սրբազանը տւեց իր պատգամը, այժմէական շնչով մեկնաբանելով Յիսուսի հետ խաչւած վիճակում դարձի եկող աւազակի հոգեւորապէս երջանիկ դրութիւնը. «Մարդ էակը կեանքում բոլոր տեսակի աշխատանքներից յոգնում է, բացի չարիք խորհելու եւ գործելու աշխատանքից», շեշտեց Սրբազանը՝ աղօթելով որ Խաւարման գիշերի խորհրդաւոր այս պահը զղջման ու դարձի առիթ հանդիսանայ իւրաքանչիւրին:

Մինչեւ ուշ գիշեր տեւած արարողութեան աւարտին, «Խաչի քո Քրիստոս» փառաբանական երգի երգեցողութիւնը կատարւեց եւ Կենաց Փայտի օրհնութեամբ արձակւեց բարեպաշտ ժողովուրդը ի խաղաղութիւն:

Յարակից Հրապարակումներ

  • Ատրպատականի հայոց թեմի առաջնորդը եւ ընտրւած պատգամաւորները կը մեկնեն Անթիլիաս
    Ատրպատականի հայոց թեմի առաջնորդը եւ ընտրւած պատգամաւորները կը մեկնեն Անթիլիաս

    Երկուշաբթի, 4 դեկտեմբեր 2017-ին, Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը եւ թեմի պատգամաւորական ժողովի կողմից ընտրւած պատգամաւորները կը մեկնեն Անթիլիասի մայրավանքը՝ Լիբանան, մասնակից դառնալու Մեծի Տանն Կիլիկիոյ կաթողիկոսութեան Ազգային ընդհանուր ժողովին, որ չորս տարին մէկ գումարւում է Ն.Ս.Օ.Տ.Տ. Արամ Ա Վեհափառ Հայրապետի բարձր հովանաւորութեամբ եւ նախագահութեամբ, ու մասնակցութեամբ բոլոր թեմերի առաջնորդ սրբազանների եւ ներկայացուցիչ պատգամաւորների: 

  • Թաւրիզի Ուրբաթօրեայ աղօթապետի շնորհակալական գիրը՝ Ատրպատականի հայոց առաջնորդին
    Թաւրիզի Ուրբաթօրեայ աղօթապետի շնորհակալական գիրը՝ Ատրպատականի հայոց առաջնորդին

    Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեան եւ ազգային իշխանութիւնը, տեղական պայմանների եւ միջավայրի թելադրած պահանջների համապատասխան քայլերով իր յարաբերութիւնները միշտ նորովի մշակում է Իրանի Իսլամական Հանրապետութեան պետական կառոյցների հետ, հիւսիսային Իրանում մեր ժողովրդի զաւակների նկատմամբ ապահովելով արժանի յարգանք եւ գուրգուրանք:

  • Ատրպատականի հայոց թեմի առաջնորդը այցլեց Արեւմտեան Ատրպատականի նահանգապետին
    Ատրպատականի հայոց թեմի առաջնորդը այցլեց Արեւմտեան Ատրպատականի նահանգապետին

    Չորեքշաբթի 29 նոյեմբեր 2017-ի երեկոյեան ժամը 5-ին, առաջնորդ Սրբազանը ընկերակցութեամբ Ուրմիոյ հոգեւոր հովիւ արժ. Տ. Ներսէս քհնյ. Պասիլեանի, Թեմական խորհրդի կազմի, ներկայութեամբ ատենապետ Ռուբիկ Ջանանեանի, Վարդան Աբրահամեանի, Գագիկ Ջորջեանի Ալէն Սայադեանի եւ Ուրմիահայ ազգային բարերար Էդիկ Մեջլումեանի, որ Սրբազան Հօր պատւիրակութեան մաս էր կազմում, պաշտօնական հանդիպում ունեցաւ Արեւմտեան Ատրպատականի նորանշանակ նահանգապետ՝ դոկտ. Շահրիարիի հետ նահանգապետարանում, Ուրմիա: 

  • Ատրպատականի հայոց թեմը, նահանգապետի միջոցով իր նպաստը բերեց Քերմանշահի երկրաշարժից տուժածներին
    Ատրպատականի հայոց թեմը, նահանգապետի միջոցով իր նպաստը բերեց Քերմանշահի երկրաշարժից տուժածներին

    Ուրբաթ, 24 նոյեմբեր 2017-ի առաւօտեան ժամը 8.30-ին, Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեան, ընկերակցութեամբ Թեմական խորհրդի ամբողջական կազմի, պաշտօնական հանդիպում ունեցաւ Արեւելեան Ատրպատականի նահանգապետ՝ Խոդաբախշի հետ, նահանգապետարանի հնադարեան շէնքում: Հանդիպմանը ներկայ էին ատենապետ՝ Ռուբիկ Ջանանեանը, Համազասպ Ոսկանեանը, Վարդան Աբրահամեանը, Գագիկ Ջորջեանը, Ալէն Սայադեանը եւ փոքրամասնութիւնների գրասենեակի պատասխանատուն:

  • Նոր գրքերի ցուցահանդէս Թաւրիզի հայոց ազգային դպրոցում
    Նոր գրքերի ցուցահանդէս Թաւրիզի հայոց ազգային դպրոցում

    Տարեկան աւանդութեան վերածւած Նոր գրքերի ցուցահանդէսը Թաւրիզի հայոց ազգային «Թամարեան, Հայկազեան, Սահակեան» դպրոցում, այս տարի կայացաւ չորեքշաբթի, 22 նոյեմբեր 2017-ի առաւօտեան ժամը 10.30-ին, դպրոցի գրադարանում:

Ամենաշատ ընթերցւած

Քւէարկութիւն

Ինչպէ՞ս էք վերաբերւում Երուսաղէմը որպէս Իսրայէլի մայրաքաղաք ճանաչելու Թրամփի որոշմանը:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։