Հա

Համայնք

Շաբաթ, 01 Յուլիսի 2017 08:50

Թաւրիզի հայոց ազգային դպրոցի տարեվերջի հանդիսութիւն եւ վկայականների բաշխում

Յունիսի 11-ին Ատրպատականի ազգային առաջնորդարանի «Համազասպ Ոսկանեան» սրահում, հովանաւորութեամբ եւ նախագահութեամբ Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանի եւ Թեմական խորհրդի տեղի ունեցաւ Թաւրիզի ազգ. «Թամարեան, Հայկազեան եւ Սահակեան» դպրոցի 2016-2017 տարեշրջանի տարեվերջի հանդիսութիւնը:

«alikonline.ir» - Յունիսի 11-ին Ատրպատականի ազգային առաջնորդարանի «Համազասպ Ոսկանեան» սրահում, հովանաւորութեամբ եւ նախագահութեամբ Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանի եւ Թեմական խորհրդի տեղի ունեցաւ Թաւրիզի ազգ. «Թամարեան, Հայկազեան եւ Սահակեան» դպրոցի 2016-2017 տարեշրջանի տարեվերջի հանդիսութիւնը: Տեղեկացնում է Ատրպատականի ազգային առաջնորդարանը: 

Բացման խօսքով հանդէս եկաւ ուսուցչուհի Լուսիկ Դանղեանը, հայ դպրոցի անզուգական առաքելութեան յատուկ շեշտադրումով. «Ո՛չ մի գիտակից հայ չի՛ կարող ուրանալ հայ դպրոցի անզուգական դերն ու կարեւորութիւնը մեր ազգային կեանքի մէջ: Հայ դպրոցը լծւած է մարդակերտութեան եւ հայակերտութեան վսեմ գործին: Դպրոցին նպատակն է աշակերտը պատրաստել կեանքի համար, կերտել նրա նկարագիրը եւ կազմակերպել նրա հոգեկան աշխարհը», ասաց նա: 

Միջոցառման համար, այս տարի դպրոցի աշակերտութիւնը հայոց պատմութեան վաղ ժամանակներից սկսած հայոց արքաների ամփոփ կենսագրութիւնն էր պատրաստել, դրանք ներկայացնելու համար հանդիսականներին: Բեմը արդէն իսկ հայոց պատմութեան տարբեր դարաշրջանների ականաւոր թագաւորների պատկերներով էր զարդարւել եւ  ստեղծւել  էր յարմար  միջավայր, անդրադառնալու մեր պատմութեան կարեւո փուլերին կամ բարձրակէտերին: Նախաքրիստոնէական ժամանակաշրջանից մինչեւ Հայաստանի պետականօրէն քրիստոնէացումով բացւող նոր իրադրութիւնը, աշակերտները ամփոփ գծերի մէջ ներկայացրին, մեր ցեղային իւրայատկութիւնների խտացած պատկերը հաղորդելով բոլորին: 

Միջանկեալ ներկայացւեց գեղարւեստական յայտագիր՝ ասմունքներով եւ խմբերգներով, ղեկավարութեամբ Նարինէ Սայադեանի: Սոյն ծրագրի աչքառու բաժինը, կանխաւ բեմում զետեղեւած թագաւորական թագերն էին, իւրաքանչիւր դարաշրջանի թագաւորի օգտագործած թագի կրկնօրինակումով, որոնք հերթաբար զետեղւեցին մեր պատմութեան թագաւորների կենսագրութիւնը ներկայացնող աշակերտների գլխին, վերաթարմացնելով մեր պատմութեան հզօր արքաների յիշատակը:  

Շրջանաւարտ դասարանի անունից խօսք արտասանեցին Իւէտ Վարդազարեանը եւ Էջմին Մնացականեանը, որոնք յուզումնախառն արտայայտութեամբ իրենց երախտագիտութիւնը յայտնեցին հարազատ դպրոցին, տեսչութեան, հոգաբարձութեան, ուսուցչական կազմին, ծնողական խորհրդին եւ աշակերտութեան: 

Տեսչական խօսքով եւ նիւթա-բարոյական զեկոյցով հանդէս եկաւ հայոց դպրոցի տեսչուհի Արմինէ Վահրամեանը: Իր խօսքի ընթացքում, տեսչուհին անդրադառնալով ողջ տարւայ կրթական աշխատանքին, շնորհակալութեամբ յիշեց Ազգ. իշխանութեան եւ պետական կրթադաստիարակչական խորհրդի հովանաւորութիւնը, առանց որոնց անկարելի էր լինելու ամբողջացնել ուսումնական տարեշրջանը: Խորհրդածական մտածումները տեսչուհին կենտրոնացրեց «ժամանակ» գաղափարի շուրջը. «Ժամանակը, որ այս աշխարհում երեւի միակ բանն է, որի համար ոչ ոք չի՛ կարող անհանգիստ մնալ:  Դա ամէնքիս հաւասարաբար է տրւել այս աշխարհում: Սակայն, ինչքանո՞վ ենք կարողացել այդ ժամանակը ի բարին գործ դնել, այդ ժամանակը շահեցնել բառին բուն իմաստով: Դա չունի այն գլանակը որ յետ դառնայ: Այն միայն անցնում է անվերադարձ, ուստի պէտք է արժեւորել նոյնիսկ մէկ օրւայ ժամանակը, այն համարելով մեր կեանքի վերջին օրը: Մեր ժամանակաւոր եւ կարճաժամկէտ հաճոյքների համար, մեր երկարաժամկէտ յաջողութիւնները չվատնենք եւ ձեռքից չտանք»,- ասաց տեսչուհին: Ապա, նա ներկայացրեց նիւթական ելեւմուտքի ընդհանուր պատկերը, մանրամասն բացատրելով այն ջանքը, որը ի գործ դրել էին տեսչութեան շուրջ համախմբւած կառոյցները, տարեշրջանի առօրեայ ծախսերը հոգալու համար: 

Այնուհետեւ Սաթիկ Բաբայեան եւ Նարինէ Սայադեան ներկայացրին պարսկերէն եւ հայերէն առարկաներում յաջողութիւններ արձանագրած աշակերտների անւանացանկերը, որոնք հանդիսութեան ընթացքում գնահատւելու էին: Ապա, աշակերտներից՝ Թադէ Նազարբէգեանը երգեհոնի վրայ նւագեց երաժշտական այն կտորները, որոնք ներկայացրել էր նահանգի համապատասխան մրցոյթում: 

Շրջանաւարտից սոյն հանդիսութեան բարձրակէտը կազմում էր աւարտական դասարանի չորս աշակերտների վկայականների բաշխումը, որի համար բեմում առաջնորդ Սրբազանի կողքին էին Թաւրիզի հոգեւոր հովիւ արժ. Տ. Մարտիրոս քհնյ. Ղուկասեանը, պատգամաւորական ժողովի երիցագոյն անդամներից Համազասպ Ոսկանեանը, Թեմական խորհրդի ատենապետ Ռուբիկ Ջանանեանը, եւ հոգաբարձութեան ատենապետ Հենրիկ Սայադեանը: Տեսչուհին եւ ուսուցչական կազմի անդամները հերթաբար բեմ հրաւիրեցին Իւէտ Վարդազարեանին, Էջմին Մնացականեանին, Ժիրայր Աբրահամեանին եւ Անայիս Ալէքսանեանին, որոնք ստացան հայոց ազգային դպրոցի իրենց վկայականները: Դպրոցի աշակերտներից նրանք ովքեր հայերէն եւ պարսկերէն առարկաներում, ինչպէս նաեւ արւեստի եւ մարզական բնագաւառում յաջողութիւններ էին արձանագրել, գնահատւեցին յատուկ վկայագրերով եւ նւէրներով: Գնահատական նւէրներով պարգեւատրւեցին դպրոցի գրադարանի վարիչ կազմի անդամներ Շաքէ Ջանանեանը, Վահագն Տէր Պետրոսեանը եւ Միշիկ Բուդաղեանը: Միացեալ Նահանգներում կազմւած «Ջան Թաւրիզ» Միութեան յատուկ գնահատագրեր ստացան տեսչուհի Արմինէ Վահրամեանը եւ ուսուցչական կազմի բոլոր անդամները: Օրւայ վիճակախաղի շահողն էր Սեդա Ոսկանեանը, իսկ տեսչութեան կողմից ծնողների վերապահւած վիճակախաղի շահողը Կարինէ Վարդանեանը: 

Հանդիսութեան եզրափակիչ եւ օրհնութեան խօսքը ասաց առաջնորդ Սրբազանը: Գնահատելով բոլորի նւիրեալ աշխատանքը, Սրբազանը ընդգծեց հերոսական այն ջանքերը որոնք տեսչութիւնը իր շրջապատով ի գործ է դնում, կանգուն պահելու համար հայոց դպրոցը Թաւրիզում. «Պատմութիւնից եկած դասերը անգիր սովորել, նշանակում է մեր ազգի ապագան ամուր հիմերի վրայ դնել: Սովորի անցեալի պատմութիւնդ, որպէսզի պարզ տեսնես քո ապագան»,- ասաց Սրբազանը: Ապա աւելցրեց այն, թէ մարդ ինչքան էլ աւարտի դպրոցը, չի՛ կարող վերջնականապէս հրաժեշտ տալ նրան, այլ՝ իր ամբողջ կեանքի ընթացքում մնում է իր հարազատ դպրոցի եւ ուսուցիչների ազդեցութեան տակ:

Ներկայ հանդիսականների եւ աշակերտութեան համար հաւասարապէս, աւարտական սոյն հանդիսութիւնը հին յուշերի թարմացման եւ նոր երազանքների կազմութեան առիթ հանդիսացաւ, ինչպէս նաեւ հայ դպրոցի անգնահատելի առաքելութեան անդրադառնալու պատճառ:

Յարակից Հրապարակումներ

Ամենաշատ ընթերցւած

Քւէարկութիւն

Կարո՞ղ է արդեօք նախագահի այցը Նիւ Եօրք նպաստել Իրանի միջազգային դիրքի ամրապնդմանը:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։