Հա

Համայնք

15/10/2017 - 13:10

Հայ Մշակոյթի օրւայ տօնակատարութիւն Թաւրիզի ազգ. դպրոցում եւ Թարգմանչաց տօնի նւիրւած ժամերգութիւն Լիլաւայի եկեղեցում

Շաբաթ, 14 հոկտեմբեր 2017-ի առաւօտեան ժամը 10-ին, հովանաւորութեամբ եւ նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի եւ Թեմական խորհրդի, Թաւրիզի ազգ. դպրոցի տեսչութեան, հոգաբարձութեան, ուսուցչական կազմի եւ ծնողական խորհրդի կազմակերպութեամբ, Հայ Մշակոյթի օրւայ տօնակատարութիւն տեղի ունեցաւ դպրոցի սրահում, աշակերտների կատարումով: Սրբազան Հօր կողքին ներկայ էին Թաւրիզի հոգեւոր հովիւ արժ. Տ. Մարտիրոս քհնյ. Ղուկասեանը, Ազգային իշխանութեան անդամներ եւ հրաւիրեալներ: 

«alikonline.ir» - Շաբաթ, 14 հոկտեմբեր 2017-ի առաւօտեան ժամը 10-ին, հովանաւորութեամբ եւ նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի եւ Թեմական խորհրդի, Թաւրիզի ազգ. դպրոցի տեսչութեան, հոգաբարձութեան, ուսուցչական կազմի եւ ծնողական խորհրդի կազմակերպութեամբ, Հայ Մշակոյթի օրւայ տօնակատարութիւն տեղի ունեցաւ դպրոցի սրահում, աշակերտների կատարումով: Սրբազան Հօր կողքին ներկայ էին Թաւրիզի հոգեւոր հովիւ արժ. Տ. Մարտիրոս քհնյ. Ղուկասեանը, Ազգային իշխանութեան անդամներ եւ հրաւիրեալներ: Տեղեկացնում է Ատրպատականի ազգային առաջնորդարանը:

Բացման խօսքը կատարեց Լիլիթ Դանղեանը, Թարգմանչաց խորհուրդի օծուն օրւայ խոր նշանակութիւնը հաղորդելով ներկաներին: Ապա, Թաւրիզի հայոց ազգ. դպրոցի երգչախումբը, ղեկավարութեամբ Նարինէ Սայադեանի, մայրենի լեզւի նւիրւած երգեր կատարեց, մեներգների եւ խմբերգների ելոյթներով: Գեղարւեստական ծրագրին մաս էին կազմում նաեւ ասմունքներ, հայոց Այբուբենի անփոխարինելի նշանակութիւնը շեշտող: Մեր ժողովրդի համար հայ տառերին «մայր», «երկինք», «հող» եւ «հայրենիք» լինելու գաղափարներով ողողւած մանկապատանեկան ասմունքներով, աշակերտները իրենց սէրը արտայայտեցին մեր լեզւի հանդէպ, միաժամանակ յուզելով ներկաները իրենց թովիչ առոգանութեամբ:

Օրւայ խորհուրդը հաղորդելու համար բեմ հրաւիրւեց Թաւրիզի ազգ. դպրոցի տեսչուհի Արմինէ Վահրամեանը: Պարոյր Սեւակի Հայոց մեծ Գիւտարար Մաշտոցին նւիրւած բառերը փոխ վերցնելով, Արմինէ Վահրամեանը անմահանուն սրբի յիշատակը ոգեկոչեց, բոլոր դարերի համար նրա կատարած մեծ գործը եւս անմահ յայտարարելով:

Եզրափակիչ եւ օրհնութեան խօսքով հանդէս եկաւ առաջնորդ Սրբազանը: Նա երանելի համարեց բոլոր ներկաներին, որոնք այս տարի եւս առիթ ունեցան Հայ Մշակոյթի օրը տօնել Թաւրիզի հայոց ազգ. դպրոցի սուրբ յարկի ներքոյ: Ապա, հին ժողովուրդների անվերծանելի տառերի իրավիճակին անդրադառնալով, նրանց անհասկանալի լինելու պատճառ ներկայացրեց դրանք խօսողների չքացումը աշխարհից: Նա բացատրեց, թէ ինչպէս մէկ լեզու կը մեռնի: Որովհետեւ դա խօսող մարդ չի մնար. «Վա՜յ մեզ, եթէ մեր լեզուն մեր կողմից չխօսւելու հետեւանքով, մէկ օր մեռած լեզուների շարքին դասի աշխարհը», ասաց նա, շեշտելով որ Արեւելեան երկրների պայմանները շատ աւելի թոյլատու են, մեր լեզւամշակութային ինքնութիւնը պահպանելու:

Տօնակատարութիւնից յետոյ, բոլոր ներկաները ուղղւեցին Լիլաւայի Սուրբ Սարգիս եկեղեցին, որտեղ առաջնորդ Սրբազան հօր հանդիսապետութեամբ կատարւեց ժամերգութիւն, Թարգմանչաց Վարդապետաց նւիրւած: «Քրիստոս Աստւած մեր» եղանակաւոր մաղթանքի ընթացքում յիշւեցին Թարգմանիչ Վարդապետները գլխաւորութեամբ Սուրբ Սահակ հայրապետի եւ Սբ. Մեսրոպ Մաշտոց վարդապետի: Ժամերգութեան ներկայ գտնւեցին նաեւ Հ.Օ.Մ.-ի Թաւրիզի Մասնաճիւղի «Ծերունի Գասպարեան» մանկապարտէզ-նախակրթարանի աշակերտները, իրենց ծնողների եւ ուսուցիչների հետ միասին:

Ժամերգութեան աւարտին կատարւեց հաւաքական խոստովանանք եւ ապա բոլոր ներկաները հաղորդւեցին մեր Տիրոջ սուրբ մարմնով եւ արեամբ:

 

Յարակից լուրեր

  • Տառապողին փառաւորումը՝ Յարութիւն
    Տառապողին փառաւորումը՝ Յարութիւն

    Մարդկանց ամենամեծ ակնկալիքը, դժւարութիւններից դուրս գալու հրաշազան պահն է, որը եթէ ո՛չ յաղթանակի, բայց գէթ փրկութեան ելքով է ազատագրում տագնապահար մարդուն: Յաջողութիւնների ակնկալիքը միշտ զբաղեցնում է մարդու հոգու եւ մտքի հորիզոնը, կարմրաւուն արեւի բազմերանգ ճառագայթների գունագեղ յոյսով վառւած: Սակայն նեղութիւնների դժւարանցանելի արահետներից եւ տրտմութեան հովտից դուրս գալը՝ մարդկային ցեղի համար միշտ նախապատիւ է ու գերադաս, գլխաւորելով նրա սպասումների փութանակի լուծում սպասող ցուցակը:

  • Աւագ հինգշաբթիի հոգեթով արարողութիւնները Ատրպատականի հայոց թեմում
    Աւագ հինգշաբթիի հոգեթով արարողութիւնները Ատրպատականի հայոց թեմում

    Եկեղեցական սրտառուչ արարողութիւններով եւ մեղանոյշ շարականներով հարուստ Աւագ շաբաթում, իւրայատուկ իմաստ եւ նշանակութիւն ունի Աւագ հինգշաբթին համայն քրիստոնեայ աշխարհի համար: Սոյն օրւայ ընթացքում, աղօթքների միջոցաւ եւ շարականների երաժշտական յուզականութեամբ պատմւում են Քրիստոսի տնօրինական կեանքի վերջին դէպքերը:

  • «Տասն կուսանաց»-ի խորհրդալից արարողութիւն Ատրպատականի հայոց թեմում
    «Տասն կուսանաց»-ի խորհրդալից արարողութիւն Ատրպատականի հայոց թեմում

    Քրիստոսի տնօրինական կեանքի վերջին՝ Աւագ շաբաթւայ ընթացքում, եկեղեցական հոգեթով արարողութիւնների ցուցակում իր մասնաւոր տեղով ու բարոյական խոր դասով յայտնի է Աւագ երեքշաբթի օրւայ երեկոյեան ժամերգութիւնը, որի ընթացքում կարդացւում է Յիսուսի պատմած «Տասն կուսանաց»-ի առակը, եւ տասն կոյսեր խորհրդանշականօրէն ներկայացնում են առակի անձերը, սուրբ բեմի առջեւ կանգնած, լապտեր իրենց ձեռքին: Աղջիկներից հինգը խորհրդանշում են առակում պատմւած հինգ իմաստուն կոյսերին, իսկ միւս հինգը՝ յիմար կոյսերին:

  • Միջինքի աւանդական հաւաքոյթը Թաւրիզում Եկեղեցիների Խնամակալ մարմնի կազմակերպութեամբ
    Միջինքի աւանդական հաւաքոյթը Թաւրիզում Եկեղեցիների Խնամակալ մարմնի կազմակերպութեամբ

    Հինգաբթի, 11 ապրիլ 2019 թ.-ին, երեկոյեան ժամը 8:30-ին, կազմակերպութեամբ Թաւրիզի եկեղեցիների Կանանց Խնամակալ մարմնի, տեղի ունեցաւ Միջինքի աւանդական հաւաքոյթը, հովանաւորութեամբ Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանի եւ Թեմական խորհրդի:

  • Ատրպատականի հայոց թեմի առաջնորդը ընդունեց Հ.Մ.Ա.Կ.-ի Թաւրիզի նորընտիր վարչութեան այցելութիւնը
    Ատրպատականի հայոց թեմի առաջնորդը ընդունեց Հ.Մ.Ա.Կ.-ի Թաւրիզի նորընտիր վարչութեան այցելութիւնը

    Հինգշաբթի 11 ապրիլ 2019-ի յետմիջօրէին ժամը 5-ին, Ատրպատականի հայոց թեմի առաջնորդ՝ գերշ. Տ. Գրիգոր Ս. Եպս. Չիֆթճեանը իր գրասենեակում ընդունեց Հ.Մ.Ա.Կ.-ի Թաւրիզի մասնաճիւղի այցելութիւնը, գլխաւորութեամբ ատենապետ՝ Նժդիկ Աբրահամեանի:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։