Հա

Համայնք

24/10/2017 - 10:00

Թարգմանչաց տօնը եւ Հայ մշակոյթի օրը Ուրմիայում

Հինգշաբթի, 19 եւ ուրբաթ, 20 հոկտեմբեր 2017-ին, հովանաւորութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի, Ուրմիայի Սբ. Ստեփանոս եկեղեցու «Արամ Մանուկեան» սրահում, երկու օրերի վրայ տարածւած ձեռնարկներով, Հ.Օ.Մ.-ի հովանու տակ գործող «Անի» միաւորի կատարումով նշւեց Սրբոց Թարգմանչաց վարդապետաց տօնը եւ Հայ մշակոյթի օրը:

«alikonline.ir» - Հինգշաբթի, 19 եւ ուրբաթ, 20 հոկտեմբեր 2017-ին, հովանաւորութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի, Ուրմիայի Սբ. Ստեփանոս եկեղեցու «Արամ Մանուկեան» սրահում, երկու օրերի վրայ տարածւած ձեռնարկներով, Հ.Օ.Մ.-ի հովանու տակ գործող «Անի» միաւորի կատարումով նշւեց Սրբոց Թարգմանչաց վարդապետաց տօնը եւ Հայ մշակոյթի օրը: Տեղեկացնում է Ատրպատականի ազգային առաջնորդարանը:

Զոյգ հանդիսութիւններին ներկայ էին Ուրմիոյ հոգեւոր հովիւ արժ. Տ. Ներսէս քհնյ. Պասիլեանը, Ուրմիոյ շրջանի Պատգամաւորական ժողովի անդամներ, միութիւնների եւ կազմակերպութիւնների ներկայացուցիչներ եւ մշակութասէր ներկաներ:

«Անի» միաւորի չորս անդամներ միասնաբար կատարեցին բացման խօսքը, բարի գալուստ մաղթելով հանդիսականներին եւ նշելով Թարգմանչաց տօնի եւ Հայ մշակոյթի օրւայ բացառիկ խորհուրդը: Նրանք նաեւ կատարեցին օրւայ հանդիսութեան հաղորդավարութիւնը:

Այս տարի Հայ մշակոյթի օրը նւիրւել էր անմահանուն բանաստեղծ եւ հեքիաթագիր Յովհաննէս Թումանեանին: Առաջին օրը յատկացւած էր Յովհաննէս Թումանեանի հեքիաթների բեմականացման, հինգ թատերգութիւնների ներկայացումով: «Անի» միաւորի պատանի դերասանների խաղարկութեամբ բեմ բարձրացւեցին «Պոչատ աղւէսը», «Շունն ու կատուն», «Անբան հուրին», «Չարի վերջը» եւ «Պըլըպուղի»-ն:

Իրենց ուսուցիչների յոգնաջան աշխատանքի իբրեւ արդիւնք, փոքրիկ դերասանները այնքան յաջողութեամբ կարողացան բեմի վրայ իրենց ստանձնած դերերը կատարել, Թումանեանի գրականութեան հարազատ պատկերը ներկայացնելով հանդիսատեսին: Հինգ ներկայացումներում էլ, «Անի» միաւորի թատերական խմբակին յաջողւեց հանդիսականների մօտ ստեղծել այն մթնոլորտը, եւ փոխանցել այն զգացումները, որոնք արծարծւած հինգ նիւթերը իբրեւ պատգամ տալիս էին ներկայ մարդուն:

Թատերական ներկայացումների աւարտին բեմ հրաւիրւեց Հ.Օ.Մ.-ի Ուրմիոյ մասնաճիւղի ատենապետուհի Սեդա Մեջլումեանը որ վարչութեան անունից գնահատանք յայտնեց բոլոր երեխաներին եւ նրանց դասատուներին: Ապա, նա բեմ հրաւիրեց Ուրմիոյ հոգեւոր հովիւ Տ. Ներսէս քհնյ. Պասիլեանին, ընթերցելու համար Ատրպատականի հայոց առաջնորդի պատգամը: Սրբազան Հայրը իր պատգամում բարձր էր գնահատել Ուրմիոյ հայութեան կեանքում Հ.Օ.Մ.-ի դերակատարութիւնը, ինչպէս նաեւ նրա հովանաւորութեամբ ծաղկած «Անի» միաւորի մշակութային առաքելութիւնը: Սրբազանը նաեւ Հայ մշակոյթի տօնի առիթով, Թեմական խորհրդի կողմից նիւթական յատկացումներ էր կատարել ուրմիահայ բոլոր կառոյցներին՝ կրթական, մշակութային, մարզական, ինչպէս նաեւ շրջանի եկեղեցիների հոգաբարձութիւններին եւ խնամակալ մարմնին:

Մշակութային զոյգ ձեռնարկների առաջին օրը փակւեց քահանայ հօր «Պահպանիչ» աղօթքով:

Յաջորդ օրը՝ Ուրբաթ երեկոյեան, մշակութասէր հասարակութիւնը դարձեալ համախմբւեց «Արամ Մանուկեան» սրահում, ներկայ գտնւելու Հայ մշակոյթի օրւայ երկրորդ ձեռնարկին, որը գեղարւեստական ծրագիր էր ընդգրկում:

Միջոցառումը բացւեց Նայիրի Գոլոյեանի եւ Նունէ Խուդավերդեանի հաղորդավարութեամբ: Նրանք բարի գալուստ մաղթելով բոլորին, յայտնեցին որ օրւայ միջոցառումը բաղկացած է ժողովրդական երգերից, պարերից եւ արտասանութիւններից:

Պատանիների եւ պարմահունիների պարերը, երգերն ու ասմունքները սրահում մեծ խանդավառութիւն ստեղծեցին, արժանանալով ուրմիահայ մշակութասէր հասարակութեան ծափողջոյններին:

Ձեռնարկի աւարտին բեմ հրաւիրւելով, Հ.Օ.Մ.-ի ատենապետուհի Սեդա Մեջլումեանը եզրափակեց երկօրեայ մշակութային ծրագրերը: Շնորհաւորանքի եւ գնահատանքի իր խօսքը ուղղելով, տիկին Մեջլումեանը քաջալերեց բոլորին՝ երեխաներին եւ նրանց դաստիարակներին, որոնք ամիսներ տքնել էին իրենց խնամքին յանձնւած երեխաների հետ, լաւագոյն ծրագրերով հանդէս գալու համար:

Հ.Օ.Մ.-ի ատենապետուհին հակիրճ անդրադարձաւ «Անի» միաւորի երեքամեայ աշխատանքին, իր շնորհակալութիւնները յայտնելով տնօրէն՝ Լորիկ Ազիզեանին եւ նրա կողքում ծառայած բոլոր դաստիարակներին: Ապա, Հ.Օ.Մ.-ի վարչութեան կողմից, նա բոլորին նւիրեց արծաթէ ծաղիկներ, որոնք խորհրդանշականօրէն քաջալերանք էին տարիների ընթացքում իրենց ծառայութիւնը մատուցած անձերին՝ տնօրէն Լորիկ Ազիզեանին, դաստիարակներ՝ Մարինէ Յովհաննէսեանին, Արտեմիս Բայրամեանին, Նայիրի Գոլոյեանին եւ Նունէ Խուդավերդեանին: Ծնողների կողմից եւս երախտագիտական արտայայտութիւն եղաւ ծաղկեփնջերի մատուցումը «Անի» միաւորի բոլոր դաստիարակներին:

Այս առիթով, Հ.Օ.Մ.-ի վարչութիւնը վիճակախաղ կազմակերպել էր, ոսկեայ խաչի մեծ պարգեւով, որը նւիրաբերւել էր բարերար՝ տիկ. Սանդրա Մեջլումեանի կողմից, ի նպաստ Հ.Օ.Մ.-ի ապագայ ծրագրերին: Պարգեւի վիճակը ընկաւ Արմէն Բադալեանին:

Հայ մշակոյթի օրւայ քաղցր յուշերով, ներկաները հրաժեշտ տւեցին միմեանց եւ թողեցին սրահը:

Յարակից լուրեր

  • Մայրերի օրւայ եւ ուսուցչաց տօնի նւիրւած խրախճանք Ուրմիայում
    Մայրերի օրւայ եւ ուսուցչաց տօնի նւիրւած խրախճանք Ուրմիայում

    Հ.Օ.Մ.-ի Ուրմիայի մասնաճիւղի վարչութեան կազմակերպութեամբ, 2 մայիս 2019-ի երեկոյեան, Ուրմիայի Սբ. Ստեփանոս եկեղեցու «Արամ Մանուկեան» սրահում տեղի ունեցաւ խրախճանական հանդիպում, ներկայութեամբ միութենականների եւ հրաւիրեալների:

  • Ապրիլեան նահատակաց տօնը հանդիսաւոր սբ. պատարագով նշւեց Ուրմիայում
    Ապրիլեան նահատակաց տօնը հանդիսաւոր սբ. պատարագով նշւեց Ուրմիայում

    Կիրակի, 28 ապրիլ 2019 թ.-ի առաւօտեան, Ուրմիայի ծխական Սբ. Ստեփանոս եկեղեցում հանդիսաւոր սուրբ եւ անմահ պատարագ մատոյց Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը, առընթերակայութեամբ Ուրմիայի հոգեւոր հովիւ՝ արժ. Տ. Ներսէս քհնյ. Պասիլեանի:

  • Սբ. Զատկւայ պատարագ Ռահւայի Սբ. Աստւածածին հնադարեայ եկեղեցում
    Սբ. Զատկւայ պատարագ Ռահւայի Սբ. Աստւածածին հնադարեայ եկեղեցում

    Յիսուս Քրիստոսի հրաշափառ Սուրբ Յարութեան տօնի յաջորդող ուրբաթ օրը, 26 ապրիլ 2019-ին, առաւօտեան ժամը 11-ին, Ատրպատականի Հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը ժամանեց Ուրմիայի Ռահւա գիւղը, եւ եպիսկոպոսական հանդիսաւոր ս. պատարագ մատոյց գիւղի հնադարեայ Սբ. Աստւածածին եկեղեցում, ներկայութեամբ գիւղի եւ Ուրմիայից ժամանած հաւատացեալների:

  • «Քրիստոսի խորհրդանշական թաղման կարգը Ատրպատականի հայոց թեմում
    «Քրիստոսի խորհրդանշական թաղման կարգը Ատրպատականի հայոց թեմում

    Աւագ ուրբաթ, 19 ապրիլ 2019 թ.-ի երեկոյեան, Ատրպատականի հայոց թեմում հանդիսաւորապէս կատարւեց տարւայ ամէնից սուրբ օրւայ արարողութիւնը՝ Յիսուսի սուրբ թաղման խորհրդանշական արարողութիւնը: Երեկոյեան ժամերգութեան ընթացքին եւ ապա նախատօնակով, բարեպաշտ ժողովուրդը իր երկիւղալից յարգանքը ընծայեց Փրկչին, որ մարդկութեան մեղքերի քաւութեան համար յանձն առաւ խաչի մահը:

  • Աւագ հինգշաբթիի հոգեթով արարողութիւնները Ատրպատականի հայոց թեմում
    Աւագ հինգշաբթիի հոգեթով արարողութիւնները Ատրպատականի հայոց թեմում

    Եկեղեցական սրտառուչ արարողութիւններով եւ մեղանոյշ շարականներով հարուստ Աւագ շաբաթում, իւրայատուկ իմաստ եւ նշանակութիւն ունի Աւագ հինգշաբթին համայն քրիստոնեայ աշխարհի համար: Սոյն օրւայ ընթացքում, աղօթքների միջոցաւ եւ շարականների երաժշտական յուզականութեամբ պատմւում են Քրիստոսի տնօրինական կեանքի վերջին դէպքերը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։