Հա

Համայնք

27/01/2018 - 10:20

Լիլաւայի Սբ. Սարգիս եկեղեցու անւանակոչութեան տօնը եւ կիսասարկաւագական ձեռնադրութիւն Թաւրիզում

Սուրբ Սարգիս Զօրավարի եւ նրա որդու՝ Մարտիրոսի տօնի առիթով, ուրբաթ 26 յունւար 2018-ի երեկոյեան, Լիլաւայի Սբ. Սարգիս եկեղեցում կատարւեց նախատօնակ, նշելու համար նաեւ Թաւրիզի հայաշատ թաղամասի եկեղեցու անւանակոչութեան տօնը: 

«alikonline.ir» - Սուրբ Սարգիս Զօրավարի եւ նրա որդու՝ Մարտիրոսի տօնի առիթով, ուրբաթ 26 յունւար 2018-ի երեկոյեան, Լիլաւայի Սբ. Սարգիս եկեղեցում կատարւեց նախատօնակ, նշելու համար նաեւ Թաւրիզի հայաշատ թաղամասի եկեղեցու անւանակոչութեան տօնը: Տեղեկացնում է Ատրպատականի ազգային առաջնորդարանը:

Երեկոյեան ժամերգութիւնից յետոյ սկսւեց նախատօնակի արարողութիւնը, հանդիսապետութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի: Հանդիսաւոր արարողութեան ընթացքին երգւեց օրւայ սրբի նւիրւած «Ամենասուրբ Երրորդութեան ընտրեալ ծառայ» մարտական շնչով շարականը, հաւատացեալները ներշնչելով Սուրբ Սարգսի քաջութեան ոգով, որով խիզախօրէն խոստովանել էր իր քրիստոնէական հաւատքը:

Նախատօնակից յետոյ սկսւեց կիսասարկաւագութեան ձեռնադրութեան կարգը, ձեռամբ առաջնորդ Սրբազանին եւ խարտաւիլակութեամբ Թաւրիզի հոգեւոր հովիւ՝ արժ. Տ. Մարտիրոս քհնյ. Ղուկասեանի: Կիսասարկաւագութեան կարգի հրաւիրւեցին Թաւրիզում եկեղեցուն ծառայող երեք դպիրներ՝ Էջմին Մնացականեանը, Գիվարգիզ Մկրտիչեանը եւ Ժիրայր Աբրահամեանը:

Ձեռնադրիչ Սրբազանը աղօթքների միջոցով իմաստութիւն, զգաստութիւն եւ պարտաճանաչութիւն խնդրեց Աստծուց կոչեցեալների համար, թելադրելով նրանց միշտ պատրաստ լինել ծառայելու Աստծու Ս. Սեղանին՝ խնկարկութեամբ եւ ընծայումի հացը թխելով: Ապա, նրանց ձախ բազուկի վրայ զետեղեց մաքուր եւ սուրբ ուրարը, ի նշան կիսասարկաւագութեան: Ապա, ձեռնադրիչը նրանց յանձնեց սկիհն ու մաղզման, այն մաքրելու իշխանութիւն տալով, ինչպէս նաեւ դրա շուշպան եւ պատարագի լրիւ զգեստ ու խորհրդատետր՝ իշխանութիւն շնորհելով պատարագիչ հոգեւորականին զգեստաւորելու:

Իր պատգամի ընթացքում առաջնորդ Սրբազանը Սուրբ Սարգսի պատրաստակամութեան ու քաջութեան օրինակը վեր հանելով, օրւայ ընծայեալների համար օրինակելի օրինակ ներկայացրեց նրան, ցոյց տալով նրա հաւատքի ամրութիւնը, Աստծուն նւիրւելու քաջութիւնը, եւ իր հաստատակամութեամբ չարը պարտութեան մատնելու հերոսութիւնը. «Երբեք մի՛ վհատւէք Աստծու եւ մեր սուրբ եկեղեցուն ծառայելու ձեր նւիրական աշխատանքում: Այս ամէնից ընտիր ճանապարհն է, երբ Ս. խորանի վրայ լինելով, աւելի մօտ էք լինում Աստծուն, իբրեւ Նրա ընտրեալ զաւակները», ասաց Սրբազանը:

Ապա նա իր խօսքը ուղղելով նրանց ծնողներին եւ ընդհանրապէս համայնքի զաւակներին, ասաց. «Հազարաճիւղ ճանապարհներ կան բացւած այսօր մեր երիտասարդութեան առջեւ: Նրանք էլ շփոթւած են յաճախ, թէ ո՞ր ուղղութեամբ ընթանան, ո՞ր մէկ ճանապարհից քայլեն: Երբեմն սխալ ուղղութիւններ տւող ընկերներ, մեծ եւ փոքր, շեղում են նրանց, իրենց ուղիղ ճանապարհից: Սակայն իր ոտքերը Աստծու եւ եկեղեցու ճանապարհին դնող երիտասարդը բնա՛ւ չի սասանիր», շեշտեց Սրբազանը եւ շնորհաւորեց ընծայեալներին, նրանց ծնողներին, ինչպէս նաեւ եկեղեցու Խնամակալ մարմինին, որոնք այնքան բծախնդիր են եկեղեցու ծառայող դպրաց դասի շապիկների, ուրարների եւ կրօնական բոլոր հանդերձանքի կանոնաւորութեան:

Տեղի ունեցաւ հաւաքական խոստովանանք եւ ապա, բոլոր հաւատացեալները հաղորդւեցին Քրիստոսի սուրբ մարմնով եւ արեամբ:

Աւարտին, Սրբազանը նւէրներ յանձնեց ընծայեալ երեք կիսասարկաւագներին, քաջալերելով նրանց, եկեղեցու խոնարհ կարգերում բարձրացման սոյն քայլի առիթով:

 

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։