Հա

Համայնք

25/04/2018

Ապրիլեան Նահատակաց Սրբատօնը Ատրպատականի հայոց թեմում մեր ժողովրդի միասնականութեան շեշտակի կոչերով հնչեց

Երեքշաբթի, 24 ապրիլ 2018-ին, մեր Նահատակների սրբատօնը կատարւեց հանդիսաւորութեամբ, Հայոց Ցեղասպանութեան 103-րդ տարելիցի առիթով: Ատրպատականի հայոց թեմում մատուցւեցին ս. պատարագներ՝ Թաւրիզում եւ Ուրմիայում, որոնց յաջորդեց «Բարեխօսական կարգ»-ի եկեղեցական յատուկ արարողութիւնը՝ Նահատակ սրբերի յիշատակի համար խմբագրւած:

«alikonline.ir» - Երեքշաբթի, 24 ապրիլ 2018-ին, մեր Նահատակների սրբատօնը կատարւեց հանդիսաւորութեամբ, Հայոց Ցեղասպանութեան 103-րդ տարելիցի առիթով: Ատրպատականի հայոց թեմում մատուցւեցին ս. պատարագներ՝ Թաւրիզում եւ Ուրմիայում, որոնց յաջորդեց «Բարեխօսական կարգ»-ի եկեղեցական յատուկ արարողութիւնը՝ Նահատակ սրբերի յիշատակի համար խմբագրւած: Տեղեկացնում է Ատրպատականի ազգային առաջնորդարանը:

Թաւրիզի Լիլաւա հայաշատ թաղամասի Սբ. Սարգիս եկեղեցում հանդիսաւոր ս. եւ անմահ պատարագ մատոյց Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը, առընթերակայութեամբ Թաւրիզի հոգեւոր հովիւ՝ արժ. Տ. Մարտիրոս քհնյ. Ղուկասեանի: Խորանին սպասարկում էին սարկաւագաց եւ դպրաց դասերը, իսկ երգեցողութիւնը կատարում էր «Կոմիտաս» երգչախումբը, ղեկավարութեամբ երաժիշտ՝ Վարդան Վահրամեանի:

«Հրաշափառ»-ից յետոյ, ս. պատարագի ընծայման բաժինը տեղի ունեցաւ Սրբոց Նահատակաց խորանի առջեւ, «Ընտրեալդ» շարականի երգեցողութեամբ, եւ ապա պատարագը շարունակւեց մայր խորանի վրայ:

«Հայր Մեր»-ից առաջ Սրբազան Հայրը տւեց իր պատգամը, նահատակների աւանդին տէր կանգնելու: «Մենք չտկարացող ազգ ենք: Մեր հաւաքական ոյժը ո՛չ ոք կարողացել է ջլատել մինչեւ այսօր: Ցեղասպանւած հայ ժողովուրդը շատ լաւ է իմանում պատմութեան դասերը, որովհետեւ թշնամին մեր միջեւ խտրութիւն չի՛ դրել: Նա հաւասարապէս կոտորել է բոլորին, իրեն հաւատարիմ եղողին եւ անհաւատարիմին, հոգեւորականին եւ շինականին: Որովհետեւ նա մեր ազգութեան դէմ, մեր հայրենիքի դէմ ունեցած իր թշնամանքը հասցրել է Ցեղասպանութեան ոճրին»,- ասաց Սրբազան Հայրը: Ապա կոչ ուղղելով երիտասարդութեանը, նա ասաց. «Դո՛ւք էք իսկական ժառանգները մեր նահատակների: Նրանք սրբերամ պար են բռնել այժմ երկնքում, եւ մեր աղօթքին ու արցունքին կարիք չունեն, ո՛չ էլ իրենց յիշատակի պահպանման համար խնդրանք են ներկայացնում մեզ: Սրբերը մեզ կարիք չունեն, մե՛նք նրանց կարիքը ունենք միշտ, այս անհանդուրժողութեամբ լեցուն աշխարհում: Այս է մեր ազգային դժբախտութեան պատճառը այսօր, որ նաեւ քանդարար դեր է կատարում մեր հաւաքական կեանքի վերելքի գործընթացում: Մեր նահատակները միայն մեր պատրաստակամութիւնը տեսնելու ցանկութիւն ունեն: Պատրաստակամութիւն՝ իրենց արդար դատի ջահը վառ պահելու: Մեր ժամանակակից պատմութեան մեծագոյն ողբերգութիւնն է Ապրիլ 24-ը, որը կարելի չէ՛ մեր հաւաքական յիշողութիւնից դուրս բերել: Բայց վա՜յ այն օրւայ, երբ մեր նոր սերունդները համակերպւեն աշխարհաքաղաքական շահերին, մոռնալով հեղեղանման այն արիւնը, որ ներկեց մեր հայրենի աշխարհի լեռներն ու ձորերը, դաշտերն ու գետերը: Որովհետեւ նոյն արիւնն է որ հոսում է մեր երակներից այսօր, եւ նոյն արեան ծարաւի է մեր թշնամին ամէն օր, իր հին ու նոր դիմակներով ծպտւած…»,- ասաց Սրբազանը:

Սբ. պատարագի աւարտին սկաւուտական կանոնաւոր շարքերով եւ եկեղեցականաց դասով թափօր կազմւեց, գլխաւորութեամբ Նահատակաց Սուրբ մասունքի, որը ճաճանչաձեւ սրբատուփով հաւատացեալների պաշտամունքի առարկայ հանդիսացաւ ամբողջ արարողութեան ընթացքում: Ապա, թափօրը եկեղեցուց յառաջացաւ դէպի Նահատակաց յուշարձանը՝ շրջափակում, որտեղ ննջում են հայ ֆեդայիներ: Այստեղ կատարւեց սրբերի «Բարեխօսական Կարգ»-ը, երգեցողութեամբ «Կոմիտաս» երգչախմբի, ղեկավարութեամբ երաժիշտ Վարդան Վահրամեանի: «Քրիստոս Աստւած մեր» մաղթանքով յիշւեցին մեր մէկուկէս միլիոն Նահատակները, որոնք հաւատքի եւ հայրենիքի համար թափեցին իրենց սուրբ արիւնը:

Եկեղեցական արարողութիւնից յետոյ, Հ.Մ.Ա.Կ.-ի Թաւրիզի մասնաճիւղի սկաւուտական կազմի երդման արարողութիւնը տեղի ունեցաւ խմբապետների ա-ռաջնորդութեամբ: Այս առիթով, առաջնորդ Սրբազանը իր խօսքը ուղղելով նրանց ասաց. «Նւիրական է ձեր այս երդումը, որովհետեւ մեր սուրբ նահատակներին էք խոստանում հաւատարմութիւն մեր ազգին, հաւատարմութիւն մեր եկեղեցուն եւ հաւատարմութիւն մեր հայրենիքին: Այս նւիրական սրբութիւնների հանդէպ հաւատարմութիւնը, մեծ պարտաւորութեան տակ է դնում իւրաքանչիւր երդւող հայի»:

Երդման արարողութիւնից յետոյ տեղի ունեցաւ ծաղկեմատոյց, սկսած Ազգային Իշխանութիւնից, երբ Թեմական խորհրդի ատենապետ Ռուբիկ Ջանանեան եւ Պատգամաւորական ժողովի ատենադպրուհի՝ Արմինէ Վահրամեան ծաղկեպսակ զետեղեցին Յուշարձանին: Ապա, թեմում գործող բոլոր կազմակերպութիւններն ու միութիւնները եւ հաւատաւոր ժողովուրդը նախ երկիւղածութեամբ մօտեցաւ սրբազան մասունքին, համբուրեց այն եւ ապա իր ծաղիկը զետեղեց Նահատակաց յուշարձանին:

 

Երիտասարդական խորհրդալից հսկում Թաւրիզում՝ 23 ապրիլի երեկոյեան 

Նահատակաց տօնի նախօրէին, գլխաւորութեամբ Ատրպատականի հայոց թեմի առաջնորդի եւ Ազգային իշխանութեան, Թաւրիզահայ բոլոր Միութիւնների եւ Կազմակերպութիւնների երիտասարդական բաժանմունքները, Հ.Մ.Ա.Կ.-ի, «Ալիք»-ի, Հ.Օ.Մ.-ի, Հայոց ազգային դպրոցի, մինչեւ իսկ Հ.Օ.Մ.-ի մանկապարտէզ-նախակրթարանի երեխաները, հաւաքւել էին Լիլաւայի Սբ. Սարգիս եկեղեցու շրջափակում գտնւող նահատակաց յուշարձանի առջեւ, մեր նահատակների կտակի հաւատարմութեան իրենց ուխտը վերանորոգելու, հսկումի արարողութեամբ:

Երիտասարդական սոյն հաւաքին ներկայ էին Ազգային իշխանութեան անդամներ՝ Թեմական խորհրդի եւ Պատգամաւորական ժողովի ներկայացուցիչներ, ինչպէս նաեւ Թաւրիզում գործող բոլոր կառոյցների վարչական մարմինները:

Իր պատգամում, առաջնորդ Սրբազանը անդրադառնալով մեր ժողովրդի կեանքը յուզող վերջին իրադարձութիւններին, համայն հայութեան համար չար փորձութեան պահ համարեց դա, շեշտելով որ ամէն ժամանակից աւելի այսօր է մեզ պէտք միասնականութիւնը. «Մեր թշնամու հետապնդած դարաւոր ծրագիրը հովանաւողները կը լինենք մեր ներքին պառակտւածութեամբ, մեր ներքին թշնամանքներով, մեր անտեղի նախանձով ու անհամաձայնութիւններով: Մեր թշնամին, մեր միջից գործակիցներ է փնտռում: Ո՞վ է այն հայը, մեր եկեղեցու աւազանից ծնւած, իր երակներում հայի արեան հոսքը զգացող, որ մեր թշնամու գործակիցը լինելու մէջ պատիւ զգայ: Բոլորս էլ ամէնից վճռական պահերին միացել ենք ու միանալու ենք անքակտելի…»,- ասաց Սրբազանը:

Երեկոն ընդգրկում էր երգ ու ասմունք, ինչպէս նաեւ ազատ բեմ: Հանդիսավարութիւնը ստանձնեց «Ալիք» հաստատութեան Թաւրիզի անդամներից՝ Նժդիկ Աբրահամեանը: Այնուհետեւ «Ալիք» հաստատութեան պատանեկան «Փոթորիկ» երգչախմբի առաջնորդութեամբ, բոլոր ներկաները միասնաբար երգեցին հայրենասիրական երգեր, իսկ Նայիրի Դիլանեանը ասմունքեց Գ. Էմինի «Սասնայ Պարը» քերթւածը: Մեներգով հանդէս եկաւ Միրօ Աբրահամեան: Նժդիկ Աբրահամեան յատկապէս նոր սերնդին ուղղելով իր խօսքը, նահատակների անմեռ կտակի հանդէպ նրանց հաւատարմութեան անհրաժեշտութիւնը շեշտեց, յիշեցնելով որ պայքարի երթ ունենք դեռ, մինչեւ մեր երազների իրականացումը: Պարսկերէն լեզւով Հայ Դատը ներկայացրեց Լիանա Եղոյեանը, յիշելով հայ երիտասարդութեան հողային եւ բարոյական պահանջատիրութիւնը:

Երեկոն եզրափակւեց Նահատակաց նւիրւած յատուկ աղօթքով, որը կատարւեց առաջնորդ Սրբազան Հօր եւ Թաւրիզի հոգեւոր հովիւ՝ արժ. Տ. Մարտիրոս քհնյ. Ղուկասեանի միջոցով: Հին եւ նոր սերունդների հայորդեաց հանդիպման վայր հանդիսացաւ եկեղեցու շրջափակը, մեր ազգի հանդէպ նոյն սիրով, նոյն հեռանկարներով եւ նոյն հաւատարմութեամբ:

 

Ուրմիայում կեանքի կոչւած Հայոց Ցեղասպանութեան 103-րդ տարեդարձը նշող յանձնախմբի կազմակերպութեամբ հսկումի երեկոյ եւ ս. պատարագ 

ա) Երկուշաբթի, 23 ապրիլ 2018-ի երեկոյեան ժամը 7-ին, Ուրմիոյ Սբ. Ստեփանոս եկեղեցու շրջափակում, Ուրմիոյ հայ համայնքը իր մեծաթիւ երիտասարդութեամբ մասնակցեց ծաղկեմատոյցի արարողութեան։ Սկզբում, օրւայ հանդիսավար Արմէն Բադալեան բոլոր ներկաներին հրաւիրեց մէկ ռոպէ յոտնկայս լռութեամբ յարգել նահատակների յիշատակը: Ապա բացման խօսքով մեր սուրբ նահատակներին նւիրւած աղօթքի ու յարգանքի երեկոյի համար հրաւիրեց Ուրմիոյ ծխատէր՝ արժ. Տ. Ներսէս քհնյ. Պասիլեանին, Սրբոց Նահատակաց աղօթք կատարելու, նրանց բարեխօսութիւնը հայցելու համար: Տէր Հայրը կատարեց խունկի օրհնութիւնը, իր կողքին ունենալով կրտսերաց դպրաց դասի անդամ Թադէ Էլիասզադէն:

Արմէն Բադալեան ապա անդրադարձաւ Հայոց Ցեղասպանութեան պատմականին եւ քաղաքական դրդապատճառներին եւ ապա հրաւիրեց ազգային կեանքից ներս գործող բոլոր կառոյցներին, յարգանքի ծաղկեմատոյց կատարելու:

Գեղարւեստական ծրագրին ասմունքով իր մասնակցութիւնը բերեց Նայիրի Գօլոյեանը, իսկ ծաղկեմատոյցի ամբողջ ընթացքում, Ծովիկ Տէր-Պետրոսեանը ասմունքեց ազգայնաշունչ քառեակներ, հայ գրագէտների Հայոց Ցեղասպանութեան նւիրւած քերթւածներից:

Հայ Օգնութեան միութեան Ուրմիոյ մասնաճիւղի վարչութեան խօսքը ներկայացրեց Լինէթ Մեջլումեան, վերաշեշտելով այն հաւատարմութիւնը, որը ունենք ազգովին, հանդէպ մեր նահատակների կտակին: Նոր սերնդի գիտակից մասնակցութիւնը նա համարեց էական, պահպանելու համար մեր ազգային բոլոր նւիրական արժէքները եւ գոյատեւելու իբրեւ ազգ եւ հայրենիք:

Ուրմիոյ հայոց ազգային «Մասիհա» դպրոցի աշակերտների անունից աշակերտուհի Սելինա Նահատակաց ուղղւած երդման խօսք արտասանեց, որուն մասնակցեցին իր դպրոցակիցները: Հ.Օ.Մ.-ի Ուրմիոյ մասնաճիւղի «Նայիրի» մանկապարտէզի երեխաները ազգայնաշունչ խմբական արտասանութիւն կատարեցին, առաջնորդութեամբ իրենց ուսուցչուհու՝ Օֆելիա Սայադեանի:

Ծաղկեմատոյցի հանդիսաւոր արարողութեան մասնակցեցին Տէր Հայրը եւ Սբ. Ստեփանոս եկեղեցու Խնամակալ մարմինը, որին յաջորդեց Գեարդաբադ գիւղի հոգաբարձութեան եւ Խնամակալ մարմնի ծաղկեմատոյցը, ինչպէս նաեւ Ռահւա գիւղի հոգաբարձութեան ծաղկեմատոյցը: Ապա, Հ.Մ.Ա.Կ.-ի Գեարդաբադի եւ Ուրմիոյ մասնաճիւղերը ներկայացան ծաղկեմատոյցի, որին յաջորդեցին Ուրմիոյ հայոց ազգային «Մասիհա» դպրոցի տեսչութեան, ծնողական խորհրդի եւ աշակերտութեան մեծաթիւ խումբը, ինչպէս նաեւ Հ.Օ.Մ.-ի Ուրմիոյ մասնաճիւղի, նրա «Նայիրի» մանկապարտէզի եւ «Անի» միաւորի խմբերը, եւ ներկայ ամբողջ ժողովուրդը:

Ուրմիոյ Սբ. Ստեփանոս եկեղեցու շրջափակում կառուցւած Ապրիլեան Նահատակաց Յուշարձանի առջեւ սոյն հաւաքը, Ուրմիահայ ժողովրդի համար ուխտի հանդիպում եղաւ, շարունակելու մեր նահատակների կտակի հանդէպ հաւատարմութիւնը եւ մեր ազգի, եկեղեցու ու հայրենիքի հանդէպ նուիրումը:

Բբ Երեքշաբթի, Ապրիլ 24 առաւօտեան ժամը 11-ին, Ուրմիոյ Սբ. Ստեփանոս ծխական եկեղեցու սուրբ եւ անմահ պատարագ մատոյց ծխատէր՝ արժ. Տ. Ներսէս քհնյ. Պասիլեանը: Եկեղեցական սրբազան երգեցողութիւնը կատարեց Աննիկ Իւսէֆեան Սարհադեանը:

«Հայր Մեր»-ից առաջ Տէր Հայրը քարոզեց, մեր ժողովրդի Ցեղասպանութեան դժբախտ պատմութեան անցքերին անդրադառնալով: Ցաւի ու տառապանքի աւարտը հայոց աշխարհի անկախութեան արշալոյսով բացատրեց նա: Ապա, աղօթք վերառաքեց առ Աստւած, Հայոց Ցեղասպանութեան զոհերի յիշատակին։

Պահանջատիրական պայքարի աննահանջ երթի իբրեւ ջահակիրներ, Ատրպատականում ապրող հայութիւնը իր բոլոր կազմակերպութիւններով, միութիւններով եւ ժողովրդական խաւերով, յարգանքի իր տուրքը ընծայեց մեր մէկուկէս միլիոն սուրբ զոհերին:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։