Հա

Համայնք

29/05/2018

Հայաստանի անկախութեան 100-ամեակի առիթով գոհաբանական մաղթանք Ատրպատականի հայոց թեմում եւ 50-ամեակ Ն.Ս.Օ.Տ.Տ. Արամ Ա կաթողիկոսի քահանայագործութեան

Կիրակի, 27 մայիս 2018-ի առաւօտեան մատուցւած սուրբ պատարագով եւ Հայաստանի Հանրապետութեան նւիրւած Գոհաբանական մաղթանքով բացումը կատարւեց Հայաստանի անկախութեան 100-ամեակի առիթով թեմում տեղի ունենալիք ձեռնարկներին: Ուրմիայում, Սբ. Ստեփանոս ծխական եկեղեցում եւս մատուցւեց սուրբ պատարագ եւ կատարւեց Գոհաբանական մաղթանք, աղօթքով սկսելու Հայաստանի Հանրապետութեան հիմնադրութեան 100-ամեակի տարին: 

«alikonline.ir» - Կիրակի, 27 մայիս 2018-ի առաւօտեան մատուցւած սուրբ պատարագով եւ Հայաստանի Հանրապետութեան նւիրւած Գոհաբանական մաղթանքով բացումը կատարւեց Հայաստանի անկախութեան 100-ամեակի առիթով թեմում տեղի ունենալիք ձեռնարկներին: Ուրմիայում, Սբ. Ստեփանոս ծխական եկեղեցում եւս մատուցւեց սուրբ պատարագ եւ կատարւեց Գոհաբանական մաղթանք, աղօթքով սկսելու Հայաստանի Հանրապետութեան հիմնադրութեան 100-ամեակի տարին: Տեղեկացնում է Ատրպատականի ազգային առաջնորդարանը:

Թաւրիզի Լիլաւա թաղամասի Սբ. Սարգիս եկեղեցում մատուցւած պատարագին հանդիսապետեց Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը, իսկ պատարագը մատոյց՝ Թաւրիզի հոգեւոր հովիւ՝ արժ. Տ. Մարտիրոս քհնյ. Ղուկասեանը: Ուրմիայում սուրբ պատարագը մատոյց՝ Ուրմիոյ հոգեւոր հովիւ՝ արժ. Տ. Ներսէս քհնյ. Պասիլեանը:

«Հայր մեր»-ից առաջ տեղի ունեցաւ Գոհաբանական մաղթանք, որը Հայաստանի Խորհրդայնացումից յետոյ խմբագրւել էր հգելոյս Տ. Թորգոմ արք. Գուշակեանի կողմից եւ ապա Մեծի Տանն Կիլիկիոյ կաթողիկոսութեան բոլոր թեմերում ամէն տարւայ Մայիսի 28-ի մերձաւոր Կիրակիին գործադրւել: Դրա ողոգական աղօթքներով ու սաղմոսներով աղերս է մատուցւում առ Աստւած, մեր ազգին վերստին պարգեւելու համար մեր հայրենիքի անկախութիւնը:

Իր քարոզում, առաջնորդ Սրբազանը խմբագրւած այս աղօթքի պաղատանքի իրականութիւն դարձած լինելը շեշտելով, մեր կեանքում այնքան կարեւոր համարեց աղօթքը, որի պատասխանը միշտ Աստծու մօտ է գտնւում. «Հայաստանի սակաւակեաց անկախութիւնը կորցնելուց յետոյ, մեր նախորդ սերունդները եւ մենք տասնամեակներ շարունակ աղօթեցինք առանց յուսահատւելու, միշտ խնդրելով Աստծուց, որ վերստին պարգեւի մեզ մեր հայրենիքը, մեր ազատ ու անկախ Հայաստանը: Մենք չյուսահատւեցինք, ինչպէս երբեմն նոյնիսկ հաւատացեալ հոգիներ յուսահատւում են երբ իրենց աղօթքը անպատասխան է մնում: Կասկածո՞ւմ ենք արդեօք Աստծու լսողութեան… կամ միթէ՞ Աստւած անտարբեր է իր ստեղծած մարդկութեան նկատմամբ: Ո՛չ: Մեղանչած կը լինենք, եթէ նման մտածումներ ունենանք Աստծու մասին, կամ նման վերագրումներ կատարենք Կատարեալի մասին: Աստւած պահը յարմար համարեց 70 տարիներ յետոյ մեզ պարգեւելով մեր հայրենիքը, առանց որեւէ արիւնահեղութեան: Այս եւս մի հրաշք է, համազօր անկախութեան հրաշքին, որով առանց նահատակներ ունենալու, Աստւած մեզ պարգեւեց մեր երկիրը, որտեղ ապրելու եւ արարելու ազատութիւն տրւեց մեզ»: Նոյն հրաշքների շարքի վրայ Սրբազանը նաեւ տեսաւ վերջին ամսւայ ընթացքում ստեղծւած Նոր Հայաստանի պայմանները, երբ դարձեալ առանց արիւնահեղութեան կամ եղբայրասպան արարքների կազմւեց նոր կառավարութիւն, ժողովրդային կամքի իբրեւ արտայայտութիւն. «Եւ մենք դեռ անհաւատութեամբ ասում ենք, թէ հրաշքների չենք հաւատում: Բա ե՞րբ ենք սկսելու հաւատալ, եթէ Աստւած նման առիթներ պարգեւում է մեզ, սթափեցնելու մեզ մեր անհաւատութիւնից եւ դարձ պարգեւելու դէպի Իրեն: Սրանք մերօրեայ հրաշքներ են, մեզ մեր հաւատքի մէջ ամրապնդելու միտող», ասաց Սրբազանը:

Ապա, անդրադառնալով անկախութեան 100 ամեայ յիշատակին, Սրբազանը ասաց. «100 տարիների խորքից եկող պատգամին ականջալուր լինելու պարտաւոր ենք, եթէ դարերով փայփայած եւ այժմ իրականացած մեր երազի արժէքը իմանում ենք: Դա՝ մեր հայրենիքի անկախութիւնը պահպանելու համար, իւրաքանչիւր հայի պարտաւորութիւնն է, ի գին ամէն զոհողութեան: Այս է մեր հայրերից ժառանգւած կտակը, նոյնքան սուրբ, ինչքան հայրենի հողը, նոյնքան նւիրական, ինչքան Մայր Հայաստանը իր բոլոր բջիջներով», շեշտեց նա:

Իր քարոզում, առաջնորդ Սրբազանը որդիական զգացումներով շնորհաւորեց Ն.Ս.Օ.Տ.Տ. Արամ Ա կաթողիկոսի անւանակոչութեան օրը եւ քահանայական ձեռնադրութեան 50-ամեակը, որովհետեւ յիսուն տարիներ առաջ, Անթիլիասի Մայր Տաճարի խորանին առջեւ ծունկի գալով Վեհափառ Հայրապետը ուխտ էր կատարել կուսակրօն քահանայութեան եւ Հայաստանի անկախութեան յիսնամեակի առիթով վերանւանւել էր Արամ, ի յիշատակ Արամ Մանուկեանի:

Գոհաբանական Մաղթանքի ընթացքում, Հ.Մ.Ա.Կ.-ի Թաւրիզի մասնաճիւղի սկաւուտական կազմի խմբապետները Հայոց Եռագոյնը կարգապահ շարքերով եւ յատուկ արարողութեամբ բերեցին սուրբ բեմի առջեւ, իսկ առաջնորդ Սրբազանը օրհնեց այն, կատարելով դրօշի օրհնութեան կարգը:

Օրհնութեան կարգի աւարտին, ըստ կանոնի երգւեց Հայաստանի Հանրապետութեան քայլերգ՝ «Մեր Հայրենիք»-ը: Թաւրիզում այն կատարեց «Կոմիտաս» երգչախումբը, ղեկավարութեամբ երաժիշտ Վարդան Վահրամեանի, իսկ Ուրմիայում՝ «Նարեկացի» երգչախումբը, ղեկավարութեամբ Օֆելիա Սայադեանի:

Ս. Պատարագի աւարտին տեղի ունեցաւ հոգեհանգստեան արարողութիւն, հոգիների համար բիւրաւոր այն նահատակների, որոնք 1918 թւականին, Սարդարապատի, Ղարա Քիլիսայի եւ Բաշ Ապարանի ու այլ ճակատամարտների ընթաքում զոհւեցին, ի սէր հայրենիքի անկախութեան:

Անկախութեան հանդէպ մեր հարիւրամեայ հաւատքի երթը ողջունելով եւ մեր հայրենիքի հանդէպ ունեցած սիրոյ նոր մղում տալով, հաւատացեալ ժողովուրդը վերադարձաւ տուն, նորովի սկսելու 100-ամեակի հանդիսութիւնները, ժողովրդական լայն խաւերի մասնակցութեամբ:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։