Հա

Համայնք

02/06/2018 - 11:10

Հայաստանի Հանրապետութեան հիմնադրման 100-ամեակի շքեղ հանդիսութիւնը Թաւրիզում

Հինգշաբթի, 31 մայիս, 2018-ին, երեկոյեան ժամը 8.30-ին, Հ.Մ.Ա.Կ.-ի Թաւրիզի մասնաճիւղի մշակութային յանձնախմբի կազմակերպութեամբ, «Արարատ»-ի կենտրոնատեղիում տեղի ունեցաւ Հայաստանի անկախութեան 100-ամեակի շքեղ հանդիսութիւնը, նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի: 

«alikonline.ir» - Հինգշաբթի, 31 մայիս, 2018-ին, երեկոյեան ժամը 8.30-ին, Հ.Մ.Ա.Կ.-ի Թաւրիզի մասնաճիւղի մշակութային յանձնախմբի կազմակերպութեամբ, «Արարատ»-ի կենտրոնատեղիում տեղի ունեցաւ Հայաստանի անկախութեան 100-ամեակի շքեղ հանդիսութիւնը, նախագահութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի: Տեղեկացնում է Ատրպատականի ազգային առաջնորդարանը:

«Արարատ»-ի հանդիսասրահը լեցուն էր հայորդիներով, որոնք հայրենիքի անկախութեան փառապանծ ամեակի առիթով հաւաքւած, միասնաբար վայելեցին մատուցւած գեղարւեստական ծրագիրը եւ բանախօսութիւնը:

Ներկայ էին Թաւրիզի հոգեւոր հովիւ արժ. Տ. Մարտիրոս քհնյ. Ղուկասեանը, Թեմական խորհրդի եւ Պատգամաւորական ժողովի անդամներ, Հ.Մ.Ա.Կ.-ի Թաւրիզի մասնաճիւղի վարչութիւնը եւ այս առիթով Թեհրանից հրաւիրւած բանախօս՝ Իրանահայ անւանի բանաստեղծ՝ Վարանդ Քիւրքչեանը:

Իրանի քայլերգի ունկնդրութիւնից յետոյ, բացման խօսքով սոյն առիթին բացառիկ իմաստը եւ խորհուրդը մեկնաբանեց օրւայ հանդիսավար՝ Կարէն Սարգսեանը: Նա զատորոշեց այս տարւայ հանդիսութիւնը նախորդ տարիներից, շեշտելով 100-ամեակի իւրայատուկ նշանակութիւնը:

Օրւայ բանախօս՝ հանրայայտ մտաւորական-բանաստեղծ Վարանդը բեմ բարձրանալով, առաջին հերթին իր ուրախութիւնը յայտնեց, ազգային պատմութեան մէկ թատերաբեմի արժէք ունեցող գաղութում գտնւելու համար: Մեր պատմութեան մէկ մասնիկը հանդիսացող Ատրպատականը նա համարեց իր գոյութիւնը պահպանած այն բացառիկ համայնքն ու թեմը, որտեղ գործել են մեր ժամանակակից պատմութեան տիտանները:

Վարանդ, իր խորախորհուրդ բանախօսութեամբ թարգմանը հանդիսացաւ անհաւատալի այն երազին, որ ջարդւած ժողովրդի բեկորների համար անիրականանալի կարող էր թւալ 1918 թւին, բայց որ իրականացաւ աստւածային հրաշքով. «Եթէ 20-րդ դարի առռաջին տարիներին, մինչեւ իսկ 1915 թւականին, Ապրիլ ամսի առաջին շաբաթների ընթացքում, եթէ ասէիք հայերին թէ դուք շուտով ենթարկւելու էք Ցեղասպանութեան, երեւի քիչ մարդ հաւատար: Եթէ 1918 թւին ասէքին, ո՜վ հայ ժողովուրդ, դուք Մայիսին ունենալու էք ազատ երկիր՝ ո՞վ կը հաւատար: Սակայն՝ եղաւ: Եթէ մէկ ասէր 1980-ական թւերին, թէ Խորհրդային միութիւնը փլուզւելու է, ո՞վ կը հաւատար: Սակայն՝ ականատես եղանք դրան: Ես ասում եմ, որ նաեւ մի օր Սիսն ու Մասիսը վերադառնալու են հայրենիք…»:

Այնուհետեւ Վարանդ իր պայծառ գաղափարներով եւ բանաստեղծական ոգեշնչող թռիչքով ներկայացրեց իր յուսադրող տեսակէտները, հայ ժողովրդի փայլուն ապագայի մասին, հիմնւելով փոթորկաշունչ «մարգարէ»՝ Ատրպատականի մեծ ծնունդ Ռաֆֆիի յեղափոխական վէպերի տարածած գաղափարների վրայ:

Օրւայ գեղարւեստական ծրագիրը, Հ.Մ.Ա.Կ.-ի Մշակութային յանձնախումբը վստահել էր Թաւրիզում 20 տարիներ առաջ հիմնադրւած «Երազ» համոյթին, որի վաստակաշատ անդամներ՝ Վարդան Սարգսեանի, Ռիմա Աղաջանեանի, դոկտ. Յովիկ Գալստեանի, Սաթիկ Աբրահամեանի եւ Կարէն Սարգսեանի կազմին էր միացել նաեւ նոր անդամ՝ Միրօ Աբրահամեանը: Նրանք ե՛ւ խմբական բազմաձայն ելոյթներում ե՛ւ անհատական երգերում փայլեցին, թաւրիզահայ համայնքի տաղանդաւորների մշակութանւէր մէկ փաղանգը ներկայացնելով: Իւրաքանչիւր ելոյթի սկզբնաւորութեան Կարէն Սարգսեանի նախաբանը առաւել եւս ջերմացնում էր մթնոլորտը, տւեալ կատարումի բացատրականը հանդիսանալով:

Ծրագրի ընթացքում հայրենասիրական բացառիկ ապրումներով ասմունքեցին՝ անւանի ասմունքող Նայիրի Դիլանեանը եւ Փաթրիշիա Դանղեանը:

Աւարտին առաջնորդ Սրբազանը իր պատգամը յղեց թեմի համայն ժողովրդին, 100-ամեակից հեռուն տեսնելու խորհրդով. «Ի՞նչ է լինելու հարիւրամեակից յետոյ: Մեզ համար ամէն օր Սարդարապատ է, որովհետեւ ամէն օր գոյապայքար է: Հայութեան բառարանում յուսահատւել բառը գոյութիւն չունի: Սակայն, ամեակներ միայն առիթներ են, մեր կամքը պրկելու եւ գոյապայքարը ճիշտ հունի մէջ գցելու»,- ասաց Սրբազանը:

Հանդիսութիւնը աւարտւեց Սարդարապատի յաւերժահունչ զանգերի հնչիւնով գրւած քայլերգով՝ «Երբ չի՛ մնում ելք ու ճար, խենթերն են գտնում հնար», որը կատարեց «Երազ» համոյթը, մասնակցութեամբ ներկայ ամբողջ ժողովրդի:

«Արարատ»ի վարչութեան կողմից պատրաստւած տորթը հատեցին առաջնորդ Սրբազանը, Թեմական խորհրդի ատենապետ Ռուբիկ Ջանանեանը, «Արարատ»-ի Թաւրիզի մասնաճիւղի վարչութեան ատենապետ՝ Հենրիկ Աբրահամեանը եւ օրւայ բանախօս Վարանդը:

Հայապահպանման եւ հայրենակերտման զոյգ զգացումներով համակւած սրտով, ներկաները բաժանւեցին «Արարատ»-ի կենտրոնատեղիից, հայկականութեան շունչը եւ Մայիս 28-ի յաղթանակի ոգին իրենց հետ տանելով:

Յարակից լուրեր

  • Մեր սրբերի արեան գինը խաղաքարտ չէ՛
    Մեր սրբերի արեան գինը խաղաքարտ չէ՛

    Պահանջատէր մեր ժողովուրդը արդէն 104-րդ տարին լինելով, ապշահար հետեւում է քաղաքակիրթ կոչւած աշխարհի յամրաքայլ ընթացքին, որոնք իրենց դարաւոր քնից արթնացող հեքիաթային իշխանների նման, նոր յիշում են 20-րդ դարի առաջին եւ մեծագոյն ողբերգութիւնը գէթ ճանաչելու իրենց պարտականութիւնը, թող դեռ դատապարտելու պարտաւորութիւնը:  

  • «Քրիստոսի խորհրդանշական թաղման կարգը Ատրպատականի հայոց թեմում
    «Քրիստոսի խորհրդանշական թաղման կարգը Ատրպատականի հայոց թեմում

    Աւագ ուրբաթ, 19 ապրիլ 2019 թ.-ի երեկոյեան, Ատրպատականի հայոց թեմում հանդիսաւորապէս կատարւեց տարւայ ամէնից սուրբ օրւայ արարողութիւնը՝ Յիսուսի սուրբ թաղման խորհրդանշական արարողութիւնը: Երեկոյեան ժամերգութեան ընթացքին եւ ապա նախատօնակով, բարեպաշտ ժողովուրդը իր երկիւղալից յարգանքը ընծայեց Փրկչին, որ մարդկութեան մեղքերի քաւութեան համար յանձն առաւ խաչի մահը:

  • Տառապողին փառաւորումը՝ Յարութիւն
    Տառապողին փառաւորումը՝ Յարութիւն

    Մարդկանց ամենամեծ ակնկալիքը, դժւարութիւններից դուրս գալու հրաշազան պահն է, որը եթէ ո՛չ յաղթանակի, բայց գէթ փրկութեան ելքով է ազատագրում տագնապահար մարդուն: Յաջողութիւնների ակնկալիքը միշտ զբաղեցնում է մարդու հոգու եւ մտքի հորիզոնը, կարմրաւուն արեւի բազմերանգ ճառագայթների գունագեղ յոյսով վառւած: Սակայն նեղութիւնների դժւարանցանելի արահետներից եւ տրտմութեան հովտից դուրս գալը՝ մարդկային ցեղի համար միշտ նախապատիւ է ու գերադաս, գլխաւորելով նրա սպասումների փութանակի լուծում սպասող ցուցակը:

  • Աւագ հինգշաբթիի հոգեթով արարողութիւնները Ատրպատականի հայոց թեմում
    Աւագ հինգշաբթիի հոգեթով արարողութիւնները Ատրպատականի հայոց թեմում

    Եկեղեցական սրտառուչ արարողութիւններով եւ մեղանոյշ շարականներով հարուստ Աւագ շաբաթում, իւրայատուկ իմաստ եւ նշանակութիւն ունի Աւագ հինգշաբթին համայն քրիստոնեայ աշխարհի համար: Սոյն օրւայ ընթացքում, աղօթքների միջոցաւ եւ շարականների երաժշտական յուզականութեամբ պատմւում են Քրիստոսի տնօրինական կեանքի վերջին դէպքերը:

  • «Տասն կուսանաց»-ի խորհրդալից արարողութիւն Ատրպատականի հայոց թեմում
    «Տասն կուսանաց»-ի խորհրդալից արարողութիւն Ատրպատականի հայոց թեմում

    Քրիստոսի տնօրինական կեանքի վերջին՝ Աւագ շաբաթւայ ընթացքում, եկեղեցական հոգեթով արարողութիւնների ցուցակում իր մասնաւոր տեղով ու բարոյական խոր դասով յայտնի է Աւագ երեքշաբթի օրւայ երեկոյեան ժամերգութիւնը, որի ընթացքում կարդացւում է Յիսուսի պատմած «Տասն կուսանաց»-ի առակը, եւ տասն կոյսեր խորհրդանշականօրէն ներկայացնում են առակի անձերը, սուրբ բեմի առջեւ կանգնած, լապտեր իրենց ձեռքին: Աղջիկներից հինգը խորհրդանշում են առակում պատմւած հինգ իմաստուն կոյսերին, իսկ միւս հինգը՝ յիմար կոյսերին:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։