Հա

Համայնք

10/07/2018 - 11:00

Հայ եկեղեցին ուրախացաւ եւ ուրախացրեց նոր սերնդին Վարդավառի ժողովրդական տօնով

Կիրակի, 8 յուլիս 2018-ին, Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեան եպիսկոպոսական հանդիսաւոր ս. պատարագ մատոյց եւ քարոզեց Թաւրիզի Մարալան թաղամասում, հայոց ուխտավայր Ս. Աստւածածին մատուռում, որտեղ կանուխ ժամերից հաւաքւել էին թաւրիզահայեր:

«alikonline.ir» - Կիրակի, 8 յուլիս 2018-ին, Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեան եպիսկոպոսական հանդիսաւոր ս. պատարագ մատոյց եւ քարոզեց Թաւրիզի Մարալան թաղամասում, հայոց ուխտավայր Ս. Աստւածածին մատուռում, որտեղ կանուխ ժամերից հաւաքւել էին թաւրիզահայեր: Խորանին սպասարկեցին սարկաւագաց, կիսասարկաւագաց եւ դպրաց դասերը, իսկ երգեցողութիւնը կատարեց «Կոմիտաս» երգչախումբը, ղեկավարութեամբ երաժիշտ Վարդան Վահրամեանի: Ուրմիոյ Ս. Ստեփանոս ծխական եկեղեցում ս. պատարագ մատոյց եւ քարոզեց Թաւրիզի հոգեւոր հովիւ՝ արժ. Տ. Մարտիրոս քհնյ. Ղուկասեանը: Երգեցողութիւնը կատարեց դոկտ. Վարդան Սիմոնզ: Տեղեկացնում է Ատրպատականի ազգային առաջնորդարանը:

Թեմակալ առաջնորդը իր քարոզում, Քրիստոսի այլակերպութեան դրւագը նմանեցրեց մարդկային մեղաւոր կեանքի մի շարք երեւոյթների, երբ ճշնարտութեան հետ դէմ յանդիման գալով, «չենք կարողանայ նայել նրան կամ ընդունել այն, ինչպէս Պետրոս, Յակովբոս եւ Յովհաննէս առաքեալները, որոնք չկարողական Յիսուսի լուսափայլ դէմքին նայել, այլ խոնարհեցրին իրենց գլուխները մինչեւ գետին, եւ ծածկեցին իրենց դէմքը: Սակայն ճշմարտութիւնը արդարութեան հետ այնպիսի վայելք է տալիս մարդուն, որ նա ուզում է միշտ այդ երանական վիճակում գտնւել, հեռու կեղծիքից, անարդարութիւնից եւ մեղքից, ինչպէս այդ պահի յաւերժութիւնը ցանկած Պետրոս առաքեալ եւ փափաք յայտնեց երեք վրաններ սարքել ու այնտեղ՝ Թափօր լերան վրայ մնալ…»,- ասաց Սրբազանը:

Սբ. պատարագի աւարտին, եկեղեցու բակում տեղի ունեցաւ Վարդավառի ազգային աւանդութիւնը՝ իրարու վրայ ջուր ցանելու սովորութիւնը: Յատկապէս երիտասարդներ ու մանուկներ, չբաւարարւելով թեթեւօրէն թրջել եկեղեցի եկած հաւատացեալներին, դոյլերով ջուր էին լցնում բոլորի վրայ, որը վերջում ընդհանրական խաղի տեսք ստացաւ, եւ որին մասնակցեցին բոլորը:

Թաւրիզի եկեղեցու Խնամակալ մարմինի անդամուհիները կէսօրւայ ճաշով պատւեցին հոգեւորականաց դասին եւ ազգային իշխանութեանը: Ուրմիոյ եկեղեցու շրջափակում եւս կատարւեց Վարդավառի ջրցանի աւանդութիւնը, երբ ուրմիահայ պարման-պարմանուհիներ, երիտասարդ-երիտասարդուհիներ իրարու վրայ ջուր լցնելով, Հայ եկեղեցու տաղաւար սոյն տօնի աւանդութիւնը խանդավառութեամբ կատարեցին: Վերջապէս, Հայ եկեղեցին ուրախացաւ իր զաւակներով՛, եւ իր հերթին՝ ուրախացրեց նոր սերնդին, Վարդավառի ժողովրդական տօնով:

Յարակից լուրեր

  • Ատրպատականի հայոց թեմի առաջնորդը Ղարադաղի Աղայի եւ Բալա գիւղերում եւ Վարդան գիւղատեղում
    Ատրպատականի հայոց թեմի առաջնորդը Ղարադաղի Աղայի եւ Բալա գիւղերում եւ Վարդան գիւղատեղում

    Թեմի տարբեր շրջաններում հետազօտական իր աշխատանքների ծիրից ներս, Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը, ուրբաթ 12 յուլիս 2019 թ.-ին այցելեց Ղարադաղի Աղայի եւ Բալա գիւղերը եւ նախկին հայկական Վարդան գիւղատեղը, տեղագրելով ցարդ աննկատ մնացած հինաւուրց գերեզմանատունը:

    Սրբազան Հօր կատարած ուսումնասիրութիւնը ներկայացնում ենք ստորեւ, ի՛ր գրչով:

  • Ատրպատականի հայոց թեմի առաջնորդը Ղարադաղի Բերդ գիւղում
    Ատրպատականի հայոց թեմի առաջնորդը Ղարադաղի Բերդ գիւղում

    Ատրպատականի հայոց թեմակալ առաջնորդ՝ գերշ. Տ. Գրիգոր Ս. եպս. Չիֆթճեանի ուսումնասիրական աշխատանքները, թեմի տարածքում նախկին հայաբնակ շրջանների տեղագրութիւնը կատարելու, շաբաթ 6 յուլիս 2019-ին նրան հասցրել էին Ղարադաղի Բերդ գիւղը: Տեղի եկեղեցու, գերեզմանատան եւ ընդհանրապէս նախկին հայկական կեանքի մասին Սրբազան Հօր կատարած ուսումնասիրութիւնը ստորեւ ներկայացնում ենք ի՛ր գրչով:

  • Եռօրեայ ուխտագնացութիւն դէպի Սբ. Թադէոս առաքեալի վանք (25, 26 եւ 27 յուլիս 2019 թ.)
    Եռօրեայ ուխտագնացութիւն դէպի Սբ. Թադէոս առաքեալի վանք (25, 26 եւ 27 յուլիս 2019 թ.)

    Այսու յայտնում ենք սիրելի ուխտաւոր հաւատացեալներին, թէ այս տարի Սբ. Թադէոս Առաքեալի Վանքի Ուխտագնացութիւնը բարձր արտօնութեամբ Ն.Ս.Օ.Տ.Տ. Արամ Ա Մեծի Տանն Կիլիկիոյ կաթողիկոսի, հովանաւորութեամբ Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանի եւ Թեմական խորհրդի տեղի է ունենալու յուլիս ամսի 25, 26 եւ 27-ին (3, 4 եւ 5 մորդադ) կազմակերպութեամբ Վանքերի ուխտագնացութեան յանձնախմբի։

  • Ս. Ստեփանոս Նախավկայի վանքի միօրեայ ուխտագնացութիւն
    Ս. Ստեփանոս Նախավկայի վանքի միօրեայ ուխտագնացութիւն

    Ն.Ս.Օ.Տ.Տ. Արամ Ա կաթողիկոսի Հայրապետական բարձր արտօնութեամբ, Ատրպատականի հայոց թեմի առաջնորդ՝ գերշ. Տ. Գրիգոր եպս. ՉիՖթճեանի հովանաւորութեամբ, Թեմական խորհրդի տնօրինութեամբ, եւ Վանքերի ուխտագնացութեան յանձնախմբի կազմակերպութեամբ, այս տարի Սբ. Ստեփանոս Նախավկայի վանքի տարեկան միօրեայ ուխտագնացութիւնը տեղի է ունենալու՝ չորեքշաբթի 24 յուլիս 2019 թւին (2 մորդադ)։

  • Ատրպատականի հայոց թեմի առաջնորդը Ղարադաղի Սիրուն գիւղում
    Ատրպատականի հայոց թեմի առաջնորդը Ղարադաղի Սիրուն գիւղում

    Տեղագրական եւ ազգագրական իր հետազօտութիւնների աշխատանքը շարունակելով թեմում, Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանը ուրբաթ, 5 յուլիս 2019 թ.-ին մեկնեց Ղարադաղի նախկին հայաբնակ Սիրուն գիւղը, եկեղեցու եւ գերեզմանատան ներկայ դրութիւնը արձանագրելու, ինչպէս նաեւ հայկական որեւէ հետքեր փնտռելու նպատակով:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։