Հա

Համայնք

26/09/2018 - 10:30

Առաջին զանգը հնչեց Ատրպատականի հայոց թեմի կրթօջախներում

Կիրակի, 23 սեպտեմբեր 2018-ին, Իրանի Իսլամական Հանրապետութիւնում բոլոր կրթօջախները վերաբացեցին իրենց դռները կրթական նախարարութեան կողմից յայտարարւած վերամուտի թւականի հետեւողութեամբ, առաջին զանգով 2018-2019 ուսումնական-կրթական տարեշրջանի սկսման ազդանշանը տալով: 

«alikonline.ir» - Կիրակի, 23 սեպտեմբեր 2018-ին, Իրանի Իսլամական Հանրապետութիւնում բոլոր կրթօջախները վերաբացեցին իրենց դռները կրթական նախարարութեան կողմից յայտարարւած վերամուտի թւականի հետեւողութեամբ, առաջին զանգով 2018-2019 ուսումնական-կրթական տարեշրջանի սկսման ազդանշանը տալով: Տեղեկացնում է Ատրպատականի ազգային առաջնորդարանը:

Բոլոր դպրոցների հետ, Ատրպատականի հայոց թեմի զոյգ դպրոցներն ու Հ.Օ.Մ.-ի զոյգ մանկապարտէզները խանդավառութեամբ իրենց դռներից ներս հրաւիրեցին աշակերտութեան, յաջողութեամբ լեցուն ուսումնական տարի ունենալու վառ յոյսերով:

ա) Վերամուտը Թաւրիզի «Թամարեան, Հայկազեան, Սահակեան» դպրոցում.-

Առաւօտեան ժամը 8.15-ին սկսւեց կրթական տարին, պատշաճ հանդիսութեամբ: Աշակերտութիւնը աւելի շուտ ժամանել էր, պատմական դպրոցի հովանին դարձեալ վայելելու կարօտով: Ներկաները՝ տեսչութիւն, ուսուցչական կազմ, նախկին պատւակալ ուսուցիչներ եւ կրթական մշակներ, հոգաբարձութեան եւ ծնողական խորհրդի անդամներ եւ ծնողներ, միասնաբար դիմաւորեցին Ատրպատականի հայոց թեմի առաջնորդ՝ գերշ. Տ. Գրիգոր Ս. եպս. Չիֆթճեանին, որ Տէրունական աղօթքով եւ «Զգործս ձեռաց մերոց» մաղթանքով բացումը կատարեց ուսումնական տարւայ: Սրբազան հօրը ընկերակցում էին Թաւրիզի Հոգեւոր հովիւ՝ արժ. Տ. Մարտիրոս քհնյ. Ղուկասեանը եւ Թեմական խորհրդի անդամները:

Իրանի Իսլամական հանրապետութեան եւ դպրոցի քայլերգների կատարումից յետոյ սկաւուտական կանոնաւոր քայլերով տեղի ունեցաւ դրօշակի արարողութիւն, որը գործադրւեց Հ.Մ.Ա.Կ.-ի Թաւրիզի մասնաճիւղի սկաւուտական կազմի խմբապետների միջոցով: Ապա, տեսչուհի՝ Արմինէ Վահրամեան ի լուր ներկաների ընթերցեց Կրթութեան նախարարի պատգամը, ուղղւած կրթութեան ոլորտում գործող բոլոր անձանց եւ երկրի աշակերտութեան: Ապա բացման եւ բարի գալստեան խօսք ուղղեց ինք՝ տեսչուհին, խնդրելով որ բոլորը յոտընկայս լռութեամբ նախ յարգեն յիշատակը, նախորդ օր Ահւազ քաղաքում տեղի ունեցած ահաբեկչական արարքի զոհ դարձած զինւորականներին եւ քաղաքացիներին: Տեսչուհին, դիմաւորելով բացւող տարեշրջանը, կարեւորութեամբ անդրադարձաւ կրթական կեանքի մասնագիտական ոլորտներին, որոնք սկսւում են դպրոցական առաջին դասարաններից: Վերջապէս, նա գնահատական խօսք ուղղեց բոլոր նախկին եւ գործող ուսուցիչներին, որոնք իրենց հարազատ տուն են համարում այս դպրոցը, իսկ աշակերտները՝ իրենց հարազատ զաւակները: Այս առիթով, նա մէկական վարդերով յարգեց նրանց, ինչպէս նաեւ ազգային իշխանութեան անդամներին, որոնք իրենց մտահոգութեան տեսադաշտում են պահում Հայոց դպրոցը:

Առաջնորդ Սրբազանը իր ողջոյնի խօսքը ուղղելով ներկաներին եւ յատկապէս աշակերտութեան, յատկապէս բաժնելով ծնողների ուրախութիւնը, որոնք ներկայ էին տեսնելու իրենց զաւակների մէկ տարով մեծանալը: Վերջապէս, նա դատապարտելով Ահւազ քաղաքում տեղի ունեցած ահաբեկչական արարքը, ասաց, որ լոյսն ու գիտութիւնը մարդկութիւնը միշտ հեռու կը պահի նման անմարդկային ոճիրներից եւ հաւաքական նախճիրից: Ուստի նա աշակերտներից յորդորեց սպունգի նման լինել լոյսի ու գիտութեան դիմաց, որպէսզի իրենց կեանքում, իրենց հերթին, միշտ լոյս ու գիտութիւն կարողանան բաշխել ապագայում: Սրբազան հայրը բարձր գնահատեց դպրոցի տեսչուհու եւ ամբողջ անձնակազմի նւիրումը կրթական աշխատանքին, յոյս յայտնելով որ 2018-2019 այս տարեշրջանը եւս յաջողութիւններով լեցուն օրեր կը բերի իր հետ:

Տեսչութիւնը անակնկալ էր պատրաստել, այդ օր ամէնից առաջ դպրոց ժամանած աշակերտի համար, որ էր Յասմիկ Շահմուրդեանը: Ապա, նոյն դպրոցի շրջանաւարտ եւ համալսարան փոխւած կամ բարձրագոյն մասնագիտութեան արձանագրւած չորս ուսանողների համար եւս իր պատրաստած նւէրները տեսչութիւնը փոխանցեց նրանց:

Յայտնենք, որ աշակերտական խօսքերով եւ ուսումնական նոր տարեշրջանի յատուկ արտայայտութիւններով հանդէս եկան Իզապէլ Սարգիսեանը, Շարիս Վարդանեանը, Նարէ Սայադեանը եւ Մեղմիկ Ոսկանեանը:

Թամարեան դպրոցի շէնքի մուտքին կախւած պատմական զանգի լեզւակը քաշելով, առաջնորդ Սրբազանը հնչեցրեց տարեշրջանի առաջին զանգը: Դա արդէն 123-երորդ տարինր լինելով զրնգում էր հայ նոր սերնդի ականջներում, Սբ. Մեսրոպի անմահական պատգամը փոխանցելով բոլորին: Ապա, ուսուցիչներ եւ աշակերտներ միասնաբար դասարանները բարձրացան եւ սկսւեց կրթական-ուսումնական տարեշրջանը: 

բ) Վերամուտը Հ.Օ.Մ.-ի Թաւրիզի «Ծերունի Գասպարեան» մանկապարտէզ-նախակրթարանում.-

Նոյն օր, առաւօտեան, ժամը 10.00-ին, Հ.Օ.Մ.-ի Թաւրիզի կրթօջախը եւս վերաբացեց իր դռները, հայ մատղաշ սերնդին հայեցի կրթութիւն ջամբելու իր առաքելութիւնը աննահանջ շարունակելու համար, 2018-2019 ուսումնական տարեշրջանին: Առաջնորդ Սրբազանը ընկերակցութեամբ Տէր հօր, Պատգամաւորական ժողովի եւ Թեմական խորհրդի անդամների, ժամանեց կրթօջախ եւ դիմաւորւեց Հ.Օ.Մ.-ի Թաւրիզի մասնաճիւղի վարչութեան անդամների կողմից: Իրենց զաւակների դողդոջ քայլերը դէպի մանկապարտէզ առաջնորդելու քաղցր պարտականութեամբ, ծնողներ մեծ ուրախութեամբ մասնակցեցին բացման սոյն հանդիսութեան:

Բացման խօսքով Հ.Օ.Մ.-ի ատենապետուհի Անահիտ Յովսէփեանը ողջունեց բոլորի ներկայութիւնը, իսկ Մանկապարտէզ նախակրթարանի ուսուցչուհի Նայիրի Դիլանեան բարի գալուստ մաղթեց բոլորին, յիշելով Գասպարեան բարերար ընտանիքի կատարած կարեւոր ներդրումը, որը արդէն շուրջ կէս դար է որ արդիւնաւորւում է կրթական շինիչ աշխատանքով:

Առաջնորդ Սրբազանը իր քաջալերական խօսքով դիմեց մանուկներին եւ յատկապէս նորեկներին, որոնք նոր միջավայրին ընտելանալու ամէն հնարաւորութիւն ունէին, ուսուցչական կազմի մասնագիտական մօտեցումները նկատի ունենալով: Նա գնահատեց, արդէն երկար տարիներ գործող ուսուցչական կազմի անդամներին՝ Նայիրի եւ Անի Դիլանեաններին, Կարէն Սարգիսեանին եւ օգնականուհի՝ Կարինէ Գրիգորեանին: Այս առիթով Սրբազանը բարձր գնահատեց նաեւ Հ.Օ.Մ.-ի Թաւրիզի մասնաճիւղի վարչութեան, որոնք յաղթահարելով բոլոր դժւարութիւնները, կարողանում են կանգում պահել կրթօջախը եւ դրա առաքելութիւնը: 

գ) Վերամուտը Ուրմիայի «Մասիհա» ազգային դպրոցում.-

Վերամուտի զանգը զրնգաց նաեւ Ուրմիայի «Մասիհա» ազգ. դպրոցի բակում առաւօտեան ժամը 7.30-ին, որտեղ հաւաքւել էին աւելի քան հարիւրքսան աշակերտները, որոնք տեսչութեան գլխաւորութեամբ բացւած համարեցին 2018-2019 կրթական-ուսումնական տարեշրջանը:

Հանդիսաւոր բացմանը ներկայ էր Ուրմիայի հոգեւոր հովիւ՝ արժ. Տ. Ներսէս քհնյ. Պասիլեանը, որը Տէրունական աղօթքով օրհնեց տարեշրջանի բացումը:

Յաջորդ օրը, երկուշաբթի, 24 սետպեմբեր 2018-ին, առաջնորդ Սրբազանը ժամանեց դպրոց, ընկերակցութեամբ Ուրմիայի հոգեւոր հովիւ Ներսէս քահանայի, Պատգամաւորական ժողովի Բ ատենապետ Սաքօ Մեջլումեանի եւ անդամ՝ Սերժիկ Մովսէսեանի, եւ ողջունեց աշակերտներին:

Դպրոցի տեսչուհի՝ Ադրինէ Մեջլումեանի հրաւէրով Սրբազան հայրը աղօթք արտասանեց եւ ապա իր հայրական խօսքը ուղղեց երեխաներին: Յատկապէս ու­ շադրութիւն դարձրեց նորեկ եւ առաջին դասարաններուն տեղ գրաւած աշակերտութեան, կրծքանշաններ նւիրելով նրանց:

Սրբազանը յորդորեց աշակերտութեան լաւ սովորել հայոց լեզուն եւ հայոց պատմութիւնը, մէկ օր անպայման պատիւ բերելու մեր ազգին եւ իրանական հայրենիքին: Նա յատկապէս պատւիրեց սիրել մեր եկեղեցին, մեր ազգին, մեր եկեղեցուն եւ հայ դպրոցին:

Աշակերտութիւնը կանոնաւոր շարքերով բարձրացաւ դասարաններ, խանդավառութեամբ սկսելու համար կրթական տարեշրջանը, իրենց ուսուցչակազմի գլխաւորութեամբ: 

դ) Վերամուտը Հ.Օ.Մ.-ի Ուրմիայի մասնաճիւղի «Նայիրի» մանկապարտէզի յարկում.-

Ուրմիայի Սբ. Ստեփանոս ծխական եկեղեցու շրջափակում 1986 թւից գործող «Նայիրի» մանկապարտէզը, Հ.Օ.Մ.-ի Ուրմիայի մասնաճիւղի հովանաւորութեամբ, իր դռները բացեց երկուշաբթի 24 սեպտեմբեր 2018-ի առաւօտեան, նախագահութեամբ առաջնորդ Սրբազան Հօր: Թեմական առաջնորդին ընկերակցում էին Ուրմիայի ծխատէր քահանան, Պատգամաւորական ժողովի Բ ատենապետն ու վերոյիշեալ անդամը, որոնք սրտաբաց դիմաւորւեցին մանկապարտէզի սիրասուն երեխաների կողմից ծաղկեփնջերով, գլխաւորութեամբ ուսուցչուհի Օֆելիա Սայադեանի:

Բոլոր երեխաները, արդէն նախորդ տարուց աշակերտածներն ու նոր սաները տօնական ուրախ մթնոլորտում էին: Նրանք հետեւեցին Սրբազան Հօր աղօթքին, միացնելով իրենց ձեռքերը եւ կրկնելով արտասանւած բառերը:

Հ.Օ.Մ.-ի Ուրմիայի մասնաճիւղի ատենապետուհի՝ Սեդա Մեջլումեանի բարի գալստեան խօսքից յետոյ, առաջնորդ Սրբազան հայրը զրուցեց երեխաների հետ, որոնք խոստացան հնազանդ լինել իրենց ուսուցչին եւ ծնողներին: Սրբազանը այս առիթով բարձր գնահատեց Հ.Օ.Մ.-ի վարչութեան, մանկապարտէզի ուսուցչուհի Օֆելիա Սայադեանին, օգնականուհի Զենֆիրա Մնացականեանին եւ բոլոր ծնողներին: Հ.Օ.Մ.-ի վարչութեան կողմից գրենական պիտոյքների պայուսակներ նւիրւեցին աշակերտներին, ինչպէս նաեւ այլ նւէրներ, քաջալերելու նրանց, իրենց կրթական տարեշրջանի սկզբում:

Եկեղեցու գրասենեակում հիւրասիրութիւն կատարւեց վարչութեան կողմից, որի ընթացքում ներկաները Սրբազան Հօր հետ ցրուցեցին ապագայ մէկ շարք ծրագրերի մասին: Յայտնենք, որ «Նայիրի» մանկապարտէզի հաւաքավայրի վերանորոգութեան պատճառով, կրթօջախի բացման հանդիսութիւնը տեղի ունեցաւ կողքի փակ խաղավայրում:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։