Հա

Համայնք

14/01/2019 - 11:30

Սբ. Ծննդեան եւ Աստւածայայտութեան տօնը Ռահւա գիւղի Սբ. Աստւածածին եկեղեցում

Ուրբաթ, 11 յունւար 2019 թ.-ի առաւօտեան ժամը 10:30-ին, Ռահւա գիւղ ժամանեց Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանը, եւ գիւղի աւանդութեան համաձայն Սբ. Ծննդեան տօնի յաջորդող ուրբաթ օրը ս. պատարագ մատոյց Ս. Աստւածածին պատմական եկեղեցում: Խորանին սպասարկում էր Ուրմիայի հոգեւոր հովիւ՝ արժ. Տ. Ներսէս քհնյ. Պասիլեանը: Պատարագի երգեցողութիւնը կատարում էր Ուրմիայի «Նարեկացի» երգչախումբը, ղեկավարութեամբ երաժիշտ դոկտ. Վարդան Սիմոնզի:

«alikonline.ir» - Ուրբաթ, 11 յունւար 2019 թ.-ի առաւօտեան ժամը 10:30-ին, Ռահւա գիւղ ժամանեց Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանը, եւ գիւղի աւանդութեան համաձայն Սբ. Ծննդեան տօնի յաջորդող ուրբաթ օրը ս. պատարագ մատոյց Ս. Աստւածածին պատմական եկեղեցում: Խորանին սպասարկում էր Ուրմիայի հոգեւոր հովիւ՝ արժ. Տ. Ներսէս քհնյ. Պասիլեանը: Պատարագի երգեցողութիւնը կատարում էր Ուրմիայի «Նարեկացի» երգչախումբը, ղեկավարութեամբ երաժիշտ դոկտ. Վարդան Սիմոնզի: Տեղեկացնում է Ատրպատականի ազգային առաջնորդարանը:

Ս. պատարագին ներկայ էին հաւատացեալներ Ռահւա եւ Գեարդաբադ գիւղերից եւ Ուրմիա քաղաքից, ինչպէս նաեւ Թաւրիզից: Առաջնորդ Սրբազան Հօր ընկերակցում էր Թեմական խորհրդի ատենապետ Ռուբիկ Ջանանեան, ինչպէս նաեւ մէկ խումբ թաւրիզահայ հաւատացեալներ:

Առաջնորդ Սրբազանը «Հայր Մեր»-ից առաջ իր պատգամը տալով, Աստծուց վախենալու դրդապատճառների գլխաւորագոյնին՝ մարդկային մեղքերին անդրադարձաւ. «Յիսուսի ծննդեան պահին, երկնային մարմիններին՝ հրեշտակներին տեսնելով, Աւետարանիչը ասում է որ հովիւները սաստիկ վախեցան: Դա նախաքրիստոնէական շրջանի մարդկութեան վախն է խորհրդանշում, երբ փրկութեան կարօտ էին մարդիկ: Իսկ այժմ, Քրիստոսի աշխարհ գալուց աւելի քան երկու հա-զար տարիներ յետոյ, մենք այլեւս վախ չունենք, բացի մեր մեղքերի պատճառով զգացւած վախից: Սակայն այն եւս կը փարատւի, երբ ամբողջական հաւատքով զղջանք մեր գործած յանցանքների համար եւ ապաւինենք Փրկչին»,- ասաց Սրբազանը: Նա գնահատեց գիւղի հոգաբարձութեանը, Խնամակալ կանանց մարմնին, ինչպէս նաեւ գիւղում բնակւող հաւատացեալ ժողովրդին, որոնք Աստծու տան հանդէպ նախանձախնդրութեամբ, միշտ հոգատար են Սբ. Աստւածածին եկեղեցու պայծառութեան եւ բարեկարգութեան:

Ջրօրհնէքից առաջ, Կարէն Մկրտիչեանը գիւղի հոգաբարձութեան անունից յայտարարեց օրւայ խաչքաւորի անունը՝ փոքրիկն Էմիլ Ասատրեան, որի փոխարէն նրա մեծ հայրը՝ Վազգէն Աղասարեանը կատարեց խաչքաւորի պաշտօնը: Նա նոր առողջացած լինելով իր հիւանդութիւնից, խորը յուզմունքով եւ հոգեկան մեծ բաւարարութեամբ կանգնեց սուրբ խորանի առջեւ, իր ձեռքին պահելով օրհնւած ջրից դուրս բերւած խաչը:

Սբ. պատարագից անմիջապէս յետոյ, առաջնորդ Սրբազանը իր ընկերակիցներով այցելութիւն տւեց հայոց եկեղեցու հարեւանութեան մէջ գտնւող ասորական Սբ. Գէորգ եկեղեցին, որտեղ կատարեց Կանոնական աղօթք:

Ապա Հայ եւ Ասորական եկեղեցիների հոգաբարձութեան կողմից, Համօ Մկրտիչեան եւ Նաթօ Չարլու, միասնաբար պաշտօնական ճաշկերոյթ տւեցին, իրենց տների դռներն ու իրենց սրտերը լայն բացելով հաւատացեալների դիմաց: Սրբազան Հայրը իր բարձր գնահատանքը յայտնեց նրանց, մաղթելով որ նորածին Փրկիչը օրհնի նրանց ընտանիքներն ու գիւղի համայն Հայ եւ Ասորի բնակչութեանը:

Եկեղեցու հոգաբարձութեան կազմակերպութեամբ ամէն տարի Սուրբծննդեան յաջորդող շաբաթների ընթացքում, Ռահւա գիւղում տեղի ունեցող եկեղեցական արարողութիւնը առիթ է հանդիսանում մէկ անգամ եւս ողջունելու մեր Տիրոջ եւ Փրկչի Սուրբ Ծնունդը եւ Մկրտութիւնը, ինչպէս նաեւ շնորհաւորելու հայոց Ամանորը:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։