Հա

Համայնք

30/09/2019 - 08:07

Հանդիսաւոր Ս. Պատարագով եւ մատաղօրհնէքով նշւեց Գեարդաբադի Ս. Գէորգ եկեղեցու ուխտի օրը

Ատրպատական, Ազգային Առաջնորդարան, Թաւրիզ – Հինգշաբթի, 26  Սեպտեմբեր 2019-ին Սրբոյն Գէորգայ Զօրավարի տօնի առիթով Գեարդաբադի հնադարեայ Եկեղեցու անւանակոչութեան Սուրբ պատարագը մատուցւեց եւ 21-րդ տարին լինելով մատաղօրհնէք կատարւեց, ձեռամբ Ատրպատականի հայոց թեմի առաջնորդ՝ Գերշ. Տ. Գրիգոր Ս. Եպս. Չիֆթճեանի:

Ատրպատական, Ազգային Առաջնորդարան, Թաւրիզ – Հինգշաբթի, 26  Սեպտեմբեր 2019-ին Սրբոյն Գէորգայ Զօրավարի տօնի առիթով Գեարդաբադի հնադարեայ Եկեղեցու անւանակոչութեան Սուրբ պատարագը մատուցւեց եւ 21-րդ տարին լինելով մատաղօրհնէք կատարւեց, ձեռամբ Ատրպատականի հայոց թեմի առաջնորդ՝ Գերշ. Տ. Գրիգոր Ս. Եպս. Չիֆթճեանի:

Երեկոյեան ժամը 6-ից սկսեալ մինչեւ կէս գիշերւան 12-ը, աւելի քան 1000 հաւատացեալներ, Ուրմիայից, Թաւրիզից, Թեհրանից եւ տարբեր շրջաններից, հայ եւ ասորի, ժամանել էին նախապէս մեծաթիւ հայաբնակչութիւն ունեցած գիւղ, Ս. Գէորգ եկեղեցու հովանու տակ աղօթելու:

Սուրբ պատարագի ընթացքում, ներկայ հաւատացեալներին իր պատգամը յղեց առաջնորդ Սրբազանը: Խորանին սպասարկում էին Թաւրիզի հոգեւոր հովիւ՝ Արժ. Տ. Մարտիրոս Քհնյ. Ղուկասեանը եւ կիսասարկաւագները: Պատարագի սրբազան երգեցողութիւնը կատարւեց «Կոմիտաս» երգչախմբի միջոցով, ղեկավարութեամբ երաժիշտ Վարդան Վահրամեանի:

Գեարդաբադ գիւղի հոգաբարձութեան եւ խնամակալութեան կողմից կազմակերպւած ուխտագնացութիւնը երկար շաբաթների վրայ տարածւած աշխատանքով իրականացւել էր, յատկապէս մատաղի  պատրաստութեան դժւարին գործը, որը սակաւ մարդոյժով կարելի էր եղել տնօրինել, ներկայ ուխտաւորներին բաւարարելու քանակով:

Առաջնորդ Սրբազանը Սուրբ Գէորգի կեանքի բարձրակէտը նկատւող եւ նրա ձեռքով ջախջախւած վիշապի խորհրդապատկերը մեկնաբանելով, իւրաքանչիւր հաւատացեալի համար քաջալերական բացառիկ պատկեր համարեց այն, մաղթելով որ խորապէս հաւատացող բոլոր մարդկանց կեանքը մաքրւի չարերից. «Քրիստոնեայ մարդու կեանքը դժւարին կեանք է: Նա ստիպւած է դիմագրաւել աշխարհից եկող տեսակտեսակ փորձութիւններ, որոնք տարբեր կերպարներով են յայտնւում մեր կեանքում: Վիշապը, որ նրա օրերին Դիոկղետիանոս կայսրն էր,  դրանցից մէկն է միայն: Իւրաքանչիւր մարդու համար, վիշապը տարբեր իմաստով, տարբեր հզօրութեամբ եւ փորձութիւններով ներկայանում է: Սակայն Աստւած իր ընտրեալների հաւատքի համաձայն, նրանց կը տայ չարին դէմ պայքարելու մասնաւոր զէնք: Հաւատքը այն վահանն է, որով մենք կարող ենք պաշտպանւել չարի փորձութիւնների դէմ: Իսկ կամքը, այն զէնքն է, որով կարող ենք տապալել թշնամին», ասաց Սրբազանը:

Պատարագի աւարտին ջրօրհնէք կատարւեց, որից անմիջապէս յետոյ, եկեղեցական թափօրը ուղղւեց դէպի եկեղեցու շրջափակ, որտեղ յարդարւած յատուկ սեղանի վրայ բերւեց մատաղը՝ օրհնութեան համար: Յատուկ աղօթքներով եւ «ամէն ալէլուիա»ի երգեցողութեամբ կատարւեց մատաղօրհնէքը, ի յիշատակ բոլոր ննջեցեալների: Ապա, բոլոր ժողովրդի մասնակցութեամբ երգւեց «Կիլիկիա»ն եւ սկսւեց «հալիմ»ի բաժանումը:

Ներկայ հաւատացեալ ժողովուրդը երկիւղածութեամբ մասնակցեց արարողութեան, բարձր գնահատելով Գեարդաբադ գիւղի մէկ բուռ հայութեան կամքը, նման մեծաթիւ հաւատացեալների հիւրընկալելու իրենց եկեղեցու հովանու ներքոյ

Սրբազան հայրը սեղանի օրհնութիւն կատարելուց յետոյ իր բարձր գնահա-տանքը յայտնեց գիւղի հոգաբարձութեան եւ Խնամակալ մարմնին, ինչպէս նաեւ շրջանի բոլոր կառոյցներին, միասնական ջանքերով ուխտագնացութիւնը կազմակերպելու համար: Ապա, յատուկ գնահատանք յայտնեց ազգային բարերար եւ Էդիկ եւ Սանդրա Մեջլումեանին, նիւթական օժանդակութեան համար, ինչպէս նաեւ բոլոր նւիրատուներին, որոնց սրտաբուխ նւիրատւութիւններով իրականացւել էր սոյն ուխտագնացութիւնը: Նա իր գնահատանքը յայտնեց նաեւ հոգաբարձութեան եւ Խնամակալ մարմնի անդամներին, ինչպէս նաեւ բոլոր այն օժանդակ անձնաւորութիւններին, որոնց տքնաջան աշխատանքով պատրաստւել էր աւանդական հալիմը ¥հերիսա¤:

Նշենք, թէ ժողովուրդը եկեղեցու շրջափակում մնաց մինչեւ ուշ գիշեր, վայելելով գիւղի Հոգաբարձութեան եւ Խնամակալ մարմնին հիւրասիրութիւնը:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։