Հա

Համայնք

24/02/2013 - 11:04

altԹաւրիզ, ազգային առաջնորդարան - Երկուշաբթի, փետրւարի 11-ին, առաւօտեան ժամը 11-ին, Արեւելեան Ատրպատականի ընդհանուր դատախազ այաթ. Շարիֆին ընդունեց Ատրպատականի հայոց թեմի առաջնորդ Տ. Գրիգոր ծ. վրդ. Չիֆթճեանի պաշտօնական այցելութիւնը:
Իսլամական յեղափոխութեան 34-րդ տարեդարձի առիթով թեմակալ առաջնորդը իր շնորհաւորանքը ներկայացրեց այաթ. Շարիֆիին՝ միաժամանակ յայտնելով հայ համայնքի գործուն մասնակցութեան եւ ներազգային կեանքում կազմակերպած տարբեր ձեռնարկների մասին:

Քրիստոնեայ-իսլամ երկխօսութեանն ու գոյակցութեանն անդրադառնալով՝ Գրիգոր ծ. վրդ. Չիֆթճեանն իր ուրախութիւնը յայտնեց, յատկապէս Ատրպատականում հայ համայնքի իրաւունքների գծով ընդհանուր դատախազութեան ու անձնապէս այաթ. Շարիֆիի ցուցաբերած անշահախնդիր մօտեցման ու հոգածու վերաբերմունքի համար:
Այաթ. Շարիֆին, իր հերթին, գնահատանքով արտայայտւեց հայ համայնքի օրինապահ քաղաքացիութեան մասին՝ շեշտելով աշխատասէր ու ազնիւ հայութեան դրական ներկայութիւնը՝ ընդհանրապէս Իրանում, ու յատկապէս՝ Ատրպատականում: Ապա, խօսելով քրիստոնեայ-իսլամ համակեցութեան մասին՝ երախտագիտութեամբ անդրադարձաւ մի քանի ամիս առաջ Ատրպատականի հայոց թեմի առաջնորդի արտայայտութիւններին՝ իսլամի մարգարէի դէմ անարգական տեսաերիզի հրապարակման առիթով, որին ներկայ էր գտնւել ինքն անձնապէս՝ որպէս համանախագահ յիշեալ ակադեմական հանդիպմանը:
Դատախազի գրասենեակում կայացած սոյն մտերմիկ հանդիպումը առիթ դարձաւ նաեւ խօսելու հայ համայնքին վերաբերող մի շարք հարցերի մասին եւ հնարաւոր եղաւ ընդհանուր դատախազից ստանալ բարեացակամ լուծումներ:
Սոյն հանդիպումից անմիջապէս յետոյ՝ թեմակալ առաջնորդը նաեւ հանդիպեց նահանգի դատախազութեան պետ Խէյրօլլահիի հետ՝ դարձեալ փոխանցելով յեղափոխութեան տօների շնորհաւորանքը ու արծարծելով հայ համայնքին վերաբերող հարցեր:

 
Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։