Հա

Համայնք

13/03/2012 - 11:32

Իրանի Իսլ. յեղափոխութեան 33-րդ տարեդարձին նւիրւած միջոցառում եւ ցուցահանդէս

altԱյս տարի լրանում է 1979 թւականին Իրանի քաջարի եւ ազատախոհ ժողովրդի կողմից իրականացւած համաժողովրդական ապստամբութեան յաղթանակի 33-րդ տարեդարձը։
Այս յաղթապանծ առիթի նշման համար, ի շարս բազմատեսակ ծրագրերի, նախաձեռնութեամբ՝ Նոր Ջուղայի «Քանանեան» աղջ. ուղեցոյց եւ միջնակարգ դպրոցի տեսչութեան, ուսուցչական կազմի, ծնողական եւ Աշակերտական խորհուրդների, երեքշաբթի, թւականիս փետրւարի 14-ի առաւօտեան ժամը 10։30-ին, կրթահամալիրի «Ալենուշ Տէրեան» սրահում իրականացւեց գողտրիկ միջոցառում, որը դպրոցի աշակերտուհիներից ու պատասխանատուներից բացի՝ իրենց ներկայութեամբ պատւել էին՝ Սպահանի հայոց թեմի առաջնորդ Տ. Բաբգէն եպս. Չարեանը, Իրանի Իսլ. խորհրդարանում հարաւային իրանահայութեան պատգամաւոր Ռոբերտ Բեգլարեանը, Տ. Վազգէն քհնյ. Քեօշկերեանը, Թեմական, Կրօնական ու Կրթական խորհուրդների ներկայացուցիչները եւ Սպահան քաղաքի Ուսումնադաստիարակչութեան հիմնարկի 3-րդ շրջանի պատւիրակութիւնը։

Միջոցառումը բացւած յայտարարւեց Իրանի Իսլամական Հանրապետութեան օրհներգի յոտնկայս ունկնդրութեամբ, որից յետոյ դպրոցի միջնակարգ բաժնի աշակերտուհի Մեղրի Ղուկասեանը հանդէս եկաւ ողջոյնի եւ բարիգալստեան խօսքով։ Այնուհետեւ նա ներկաների ուշադրութեանը յանձնեց յեղափոխութեան մասին կատարած իր ուսումնասիրութիւնը՝ անդրադառնալով յեղափոխութիւն բառի իմաստին եւ նրա իրագործման նպատակներին, ի մասնաւորի Իրանի Իսլ. յեղափոխութեան կարեւորութեանը եւ նպատակներին։
altԱրտայայտութիւնների շարանում ելոյթ ունեցաւ նաեւ դպրոցի տեսչուհի տկն. Սալարիֆարը։ Նա շնորհաւորելով առիթի կապակցութեամբ՝ յեղափոխութեան եւ պատերազմի ժամանակաշրջանին պատկանող իր յուզիչ յուշերով կիսւեց ներկաների հետ։ Տեսչուհու խօսքին յաջորդեցին Սպահան քաղաքի Ուսումնադաստիարակչութեան հիմնարկի 3-րդ շրջանի պատւիրակութեան ներկայացուցիչ պրն. Ահմադիի արտայայտութիւնները, որը հիմնականում անդրադարձաւ Իրանի ժողովրդի միասնականութեանը եւ առաջնորդ Էմամ Խոմէյնիի մեծ դերակատարութեանը՝ յեղափոխութեան յաջողութեամբ պսակւելու գործում։
Այնուհետեւ ուղեցոյց բաժնի աշակերտուհի Շաղիկ Մատթէոսեանը հայերէն լեզւով ելոյթ ունեցաւ յեղափոխութեան նիւթով, որից յետոյ ձեռամբ առաջնորդ Սրբազան Հօր եւ Ռոբերտ Բեգլարեանի, Կրթական խորհրդի ատենապետ Ջանսոն Աղաբաբայեանի, Ուսումնադաստիարակչութեան հիմնարկի 3-րդ շրջանի պատւիրակութեան անդամների եւ դպրոցի տեսչութեան միջոցով գերազանցիկ աշակերտուհիներին շնորհւեցին գնահատագրեր։
Որպէս եզրափակիչ ելոյթ՝ օրւայ պատգամը փոխանցեց Սրբազան Հայրը։ Նա շնորհաւորելով Իսլամական յեղափոխութեան 33-րդ տարեդարձի առթիւ՝ իր խօսքում կարեւորութեամբ ընդգծեց հայերի դերակատարութիւնը՝ Իրանի Իսլամական յեղափոխութիւնում եւ Իրան-Իրաք պարտադրեալ պատերազմում։
Ծրագրի աւարտին «Քանանեան» դպրոցի աշակերտուհիների կատարմամբ՝ հնչւեցին մէկ հայերէն եւ մէկ պարսկերէն երգեր։

alt

Ծրագրից յետոյ՝ ներկաները այցելեցին կրթահամալիրի միւս սրահ, որտեղ աշակերտների աշխատանքներից կազմակերպւել էր ցուցահանդէս։ 22 Բահմանի առիթով կազմակերպւած այս ցուցահանդէսում ցուցադրւել եւ մրցոյթի էին դրւել՝ դպրոցի աշակերտների գեղանկարչութիւններն ու լուսանկարները։ Ցուցադրւել էին նաեւ ուղեցոյցի երրորդ դասարանի աշակերտների միջոցով պատրաստւած Նոր Ջուղայի փողոցներից ու «Քանանեան» դպրոցի նախկին շէնքից կառուցւած մանրակերտները, դպրոցի Ռոբատիկի խմբի միջոցով պատրաստւած ռոբոտները եւ գիտական այլ սարքեր։ Յատկանշական է, որ մանրակերտների պատրաստման համար աշակերտներին ուղղութիւն էին տւել ուսուցչուհի Այլին Յովսէփեանն ու շրջանաւարտ աշակերտուհիներ՝ Անասիկ Խաչիկեանը եւ Աւենիա Բաղրամեանը։
Ուշագրաւ էր նաեւ ցուցահանդէսի մի այլ բաժնում տեղակայւած կրպակը, որտեղ Վարդանանց պատերազմին անդրադարձող նկարներով ու պատի թերթերով եւ Իրան-Իրաք պարտադրեալ պատերազմի հայ նահատակների լուսանկարներով գեղեցկօրէն ցուցադրւել էր հայ ժողովրդի ազատատենչ ոգին։

Բուն բարեկենդանը՝ Նոր Ջուղայի հայոց ազգային «Գէորգ Քանանեան» դպրոցում

Կիրակի, փետրւարի 19-ին, Բուն բարեկենդանի առիթով, Նոր Ջուղայի հայոց ազգային «Քանանեան» աղջ. ուղեցոյց եւ միջնակարգ դպրոցի հարազատ յարկի տակ՝ նախաձեռնութեամբ դպրոցի տեսչութեան եւ ծնողական խորհրդի՝ տեղի ունեցաւ տարազահանդէս-մրցոյթ, որտեղ աշակերտուհիները հետաքրքիր եւ անզուգական տարազներով զգեստաւորւած՝ տօնը առաւել տպաւորիչ եւ յիշարժան դարձրին։
Ուրախ հանդիսութեան առիթով դահլիճում տեղակայւած էին՝ խրտւիլակներ, վայրը զարդարւած էր խայտաբղէտ փուչիկներով, իսկ երեկոյի ընթացքում հնչւող հայկական երաժշտութիւնը առաւել տօնական տեսք հաղորդեց միջոցառմանը։
altԾրագրի հաղորդավարութիւնը վստահւած էր «Քանանեան» դպրոցի շրջանաւարտ աշակերտուհի Լալագէ Իսաղուլեանին, որը աշակերտներին ներկայացաւ բոլորի կողմից անչափ սիրւած քաղցրաւենիք M&M-ի զգեստով։ Ծրագրի սկզբում հաղորդավարուհին կատակ ներկայացմամբ եւ իր կերպարին պատշաճ շարժումներով առաւել բարձրացրեց ներկաների տօնական տրամադրութիւնը, որից յետոյ նախ՝ հրաւիրեց ուղեցոյցի, ապա՝ միջնակարգի տարազաւորւած աշակերտներին՝ մէկը միւսի յետեւից բեմ բարձրանալու եւ իրենց տարազը ներկայացնելու։ Իսկ ամենահետաքրքիր բաժինն այն էր, երբ տարազաւորւած աղջիկները իրենց կերպարը ներկայացնելուն զուգահեռ՝ գեղեցիկ խօսքերով, շարժումներով եւ պարային հիասքանչ կատարումներով զւարճացնում էին հանդիսատեսին։
Որպէս մրցոյթի իրաւարարներ՝ սոյն միջոցառմանը ներկայ էին՝ Վերգինէ Միրզախանեանը, Անասիկ Խաչիկեանը, Սօսէ Մինասեանը, Անի Ասատրեանը, Աւենիա Բաղրամեանն ու Նինելիա Աբրահամեանը, որոնք նոյնպէս զգեստաւորւել էին հետաքրքիր տարազներով, ինչը աշակերտուհիների խանդավառութեան առաւել բարձրացման պատճառ հանդիսացաւ։
Սոյն մրցոյթի արդիւնքում իրաւարար կազմը նկատի առնելով աշակերտների ստանձնած կերպարների իմաստը, տարազի իւրօրինակութիւնը, ճաշակը եւ կատարւած աշխատանքը՝ մրցանակներ բաշխեց լաւագոյններին։ Յատուկ մրցանակներ շնորհւեցին նաեւ ամենագեղեցիկ մազի յարդարման ու շպարի եւ ամենապատշաճ հագուստի համար։ Իսկ աշակերտների քւէներով ընտրւեց նաեւ դպրոցի ամենաընկերասէր աշակերտուհին եւ պարգեւատրւեց։
Վերջում ներկաները հիւրասիրւեցին համեղ պատառիկներով եւ աշակերտները ստացան աւանդական աղանձներ՝ սրահը թողնելով անմոռանալի յուշերով ու գոհունակութեամբ։

Թղթակից (Նոր Ջուղա)

 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։