Հա

Համայնք

Հինգշաբթի, 09 Փետրւարի 2017 10:30

ՀՄԸՄ-ի Կենտրոնական Վարչութեան ատենապետ Գառնիկ Մկրտչեանը հիւրընկալւեց Նոր Ջուղայի Հայ Մ. Մ. «Արարատ» միութեան յարկի ներքոյ

Հայ Մարմնակրթական Ընդհանուր Միութեան (ՀՄԸՄ) Կենտրոնական վարչութեան ատենապետ՝ Գառնիկ Մկրտչեանը, շաբաթ՝ թւականիս փետրւարի 4-ի ժամը 18:30-ին, ժամանեց Նոր Ջուղայի Հայ Մ. Մ. «Արարատ» միութիւն:

Հայ Մարմնակրթական Ընդհանուր Միութեան (ՀՄԸՄ) Կենտրոնական վարչութեան ատենապետ՝ Գառնիկ Մկրտչեանը, շաբաթ՝ թւականիս փետրւարի 4-ի ժամը 18:30-ին, ժամանեց Նոր Ջուղայի Հայ Մ. Մ. «Արարատ» միութիւն: ՀՄԸՄ-ի Կ. վարչութեան ատենապետին ուղեկցում էին Թեհրանի Հայ Մշակութային «Արարատ» կազմակերպութեան շրջանաւարտ Կենտրոնական վարչութեան նախագահ՝ Գէորգ Վարդանեանը, փոխ-նախագահ՝ Ալեքս Կարապետեանը եւ Կենտրոնական վարչութեան գրասենեակի պատասխանատու՝ Սեւան Ծառուկեանը: Հիւրերին դիմաւորեցին միութեան արտօնատէրը, Կենտրոնական վարչութեան անդամները եւ Հայ Դատի յանձնախմբի ներկայացուցիչները: Միութեան Սկաուտական միաւորի անդամները պատւի առած ողջունեցին ՀՄԸՄ-ի ատենապետին:

Յարգելի հիւրերի ներկայութիւնը ողջունեց եւ բարի գալստեան խօսք ասաց միութեանս Կենտրոնական վարչութեան նախագահ Մասիս Մինասեանը:

ՀՄԸՄ-ի ատենապետը շնորհակալութիւն յայտնելով ընդունելութեան համար, իր ուրախութիւնը յայտնեց հանդիպումը կազմակերպելու կապակցութեամբ, ապա տեղեկութիւններ փոխանցեց «Առողջ միտք, առողջ մարմնի մէջ» նշանաբանի ներքոյ աշխատող ՀՄԸՄ-ի առաքելութեան, վարչական դրւածքի եւ մասնաճիւղերի մասին, որոնց նպատակն է պատրաստել ֆիզիկապէս տոկուն, հոգեւոր բարձր արժէքների տէր հայեր ու քաղաքացիներ. նրանց մօտ զարգացնել փոխադարձ օգնութեան գիտակցութիւնը եւ համերաշխութեան, պատասխանատւութեան ու պատւի զգացումը: Նաեւ հակիրճ կերպով անդրադարձաւ Պոլսում սկիզբ առած եւ յետագային Հայաստանում, ապա Սփիւռքում ձեւաւորւած ՀՄԸՄ-ի պատմականին, զարգացման փուլերին ու այսօրւայ դրւածքին:

Գառնիկ Մկրտչեանը կարեւոր համարեց Հայրենիք-Սփիւռք կապերը ամրապնդելու եւ հայրենիքի շուրջ համախմբելու ՀՄԸՄ-ի ծրագրերն ու համահայկական բովանդակութիւն ունեցող միջոցառումները եւ նշեց, որ սկաուտական բանակումների եւ մարզախաղերի կազմակերպումը մշտապէս եղել է ՀՄԸՄ-ի ուշադրութեան կենտրոնում եւ յոյս յայտնեց իրանահայ միութիւններն ու կազմակերպութիւնները եւս մասնակցութիւն բերեն առաջիկայ միջոցառումներին, յատկապէս ՀՄԸՄ-ի հիմնադրման 100-ամեակին նւիրւած ծրագրերին:

Միութեան արտօնատէր՝ Թաթուլ Օհանեանը եւս իր հերթին ողջունեց ՀՄԸՄ-ի Կենտրոնական վարչութեան ատենապետի այցը՝ Նոր Ջուղա եւ պատմական ակնարկով անդրադարձաւ միութեան հիմնադրման, առաքելութեան եւ հինգ միաւորների միջոցով իրականացւող մարզա-մշակութային եւ դաստիարակչական աշխատանքներին եւ նշեց, որ «Արարատ» միութեան մէջ կարեւոր տեղ եւ նշանակութիւն ունի համազգային մօտեցումը եւ որ մեր զաւակները այդպիսի դաստիարակութեամբ են մեծանում: Միութեան արտօնատէրը խօսքը աւարտեց շնորհակալական խօսքերով ուղղւած պրն. Մկրտչեանին՝ Նոր Ջուղա ժամանելու եւ նրան ընկերակցող ՀՄԱԿ-ի Կենտրոնական վարչութեան ներկայացուցիչներին՝ հանդիպումը կազմակերպելու եւ ուղեկցելու կապակցութեամբ:

Միութեան Կենտրոնական վարչութեան անդամ եւ Սկաուտական միաւորի կապ Մանիա Ղուկասեանը եւս բախտաւորութիւն համարեց պրն. Մկրտչեանի ներկայութիւնը, նրան հաղորդակից դարձնելով միութեան Սկաուտական միաւորի իրավիճակին, պայմաններին, կառոյցին ու աշխատելաոճին: Նա 2014 թւականին ՀՄԸՄ 10-րդ բանակումին միաւորի ներկայացուցիչների մասնակցութիւնը համարեց ուրախալի երեւոյթ եւ յոյս յայտնեց, որ այսուհետ եւս հնարաւորութիւն կստեղծւի մասնակից դառնալու ՀՄԸՄ-ական բոլոր միջոցառումներին:

ՀՄԱԿ-ի Կենտրոնական Վարչութեան նախագահ՝ Գէորգ վարդանեանը նշեց, որ 2000 թւականից ՀՄԱԿ-ը օրգանական կապով, կապեր ունի ՀՄԸՄ-ի հետ եւ խողովակ է հանդիսացել իրանահայ միւս միութիւնների հետ, սակայն այսօր առարկայական եւ ենթակայական պայմաններն այնքան են զարգացել, որ միութիւններն ունեն հնարաւորութիւն ուղղակի կապեր հաստատելու: Նա նշեց, որ Իրանում հայկական Սկաուտիզմը բաւականին զարգացած է եւ թէեւ գործում է ապակենտրոն, սակայն նոյն ապակենտրոնացման մէջ գոյութիւն ունի մեծ կենտրոնացում եւ խնդրեց, որ Սկաուտական համաշխարհային կոմիտէին բացատրական կարգով ներկայացնել՝ համշխարհային Սկաուտական մեր իրաւունքների մասին, որպէսզի մենք եւս հնարաւորութիւն ունենանք մասնակցելու համաշխարհային բանակումներին:

Հայ Դատի յանձնախմբից ողջոյնի եւ շնորհակալական խօսքերով արտայայտւեց Դրօ Մարգարեանը:

Հանդիպման աւարտին յուշանւէրներ փոխանակւեցին ՀՄԸՄ-ի եւ միութեան Կենտրոնական վարչութեան ատենապետերի միջեւ: Սկաուտական միաւորի Գերագոյն մարմինը եւս Գառնիկ Մկրտչեանին նւիրեց միութեան Սկաուտական աշխատանքային զգեստը եւ վերջերս հրատարակւած 3-րդ կարգի գիտելիքների գրքոյկը: Հանդիպման աւարտին պրն. Մկրտչեանը ընկերակցութեամբ միւս հիւրերի եւ միութենականների, շրջելով միութիւնում՝ ծանօթացաւ կառոյցին, գործունէութեանը եւ միութեան շրջափակում ծաւալւող շինարարական աշխատանքներին:

Նոր Ջուղայի Հայ Մ. Մ. «Արարատ» միութեան
թղթակից՝ Երանուշ Թահմազեան
լուսանկարները՝ հեղինակի

Յարակից Հրապարակումներ

Ամենաշատ ընթերցւած

Քւէարկութիւն

Խորհրդարանը կը վստահի՞ արդեօք 12-րդ կառավարութեան կազմին:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։