Հա

Համայնք

03/05/2017 - 10:20

Հայոց Ցեղասպանութեան 102-րդ տարելիցի ոգեկոչման ծրագիր՝ Շահինշահրում

Ապրիլի 21-ին Շահինշահրի «Սրբոց Վարդանանց» դպրոցի շրջափակում, Հայոց Ցեղասպանութեան զոհերի յիշատակին կառուցւած յուշարձան-խաչքարի առջեւ, Սպահանի հայոց թեմի Կաթողիկոսական փոխանորդ գերպ. Տ. Սիփան ծ. վրդ. Քէչէճեանի նախագահութեամբ եւ Շահինշահրի հոգեւոր տեսուչ գերպ. Տ. Անանիա ծ. վրդ. Գուճանեանի եւ արժ. Տ. Սահակ քհնյ. Մինասեանի մասնակցութեամբ կայացաւ Սրբոց Նահատակացն Բարեխօսական կարգը:

«alikonline.ir» - Ապրիլի 21-ին Շահինշահրի «Սրբոց Վարդանանց» դպրոցի շրջափակում, Հայոց Ցեղասպանութեան զոհերի յիշատակին կառուցւած յուշարձան-խաչքարի առջեւ, Սպահանի հայոց թեմի Կաթողիկոսական փոխանորդ գերպ. Տ. Սիփան ծ. վրդ. Քէչէճեանի նախագահութեամբ եւ Շահինշահրի հոգեւոր տեսուչ գերպ. Տ. Անանիա ծ. վրդ. Գուճանեանի եւ արժ. Տ. Սահակ քհնյ. Մինասեանի մասնակցութեամբ կայացաւ Սրբոց Նահատակացն Բարեխօսական կարգը: Այս մասին տեղեկացնում է Շահինշահրի հայ համայնքի վարչութեան թղթակից Վ. Յարութիւնեանը:

Օրւայ խորհրդին ներկայ էին Սպահանի հայոց թեմի ազգային իշխանութեան, ազգային մարմինների, ենթամարմինների, միութիւնների եւ անձնակազմերի ներկայացուցիչները, տեղի հայոց ազգային դպրոցների աշակերտութիւնն ու հոծ թւով հայորդիներ:

Շահինշահրի հայ համայնքի վարչութեան անունից, համահաւաքը բացւած յայտարարեց հաղորդավար Վիոլէտ Յարութիւնեանը:

Բացման խօսքին յաջորդեց ներկաների մէկ րոպէ յոտնկայս լռութիւնը՝ Հայոց Ցեղասպանութեան սուրբ նահատակների անմոռաց յիշատակին:

Ազգային իշխանութեան անունից բանախօսական ելոյթ ունեցաւ թեմի Պատգամաւորական ժողովի դիւանի ատենապետ Թաթուլ Օհանեանը, ով ներկայացրեց հայոց ջարդի, տարագրութեան եւ կրած բարոյական, մարդկային եւ նիւթական կորուստների պատմականն ու տարագրութիւնը՝ 1892-1923 թ.թ.: Յարգելի բանախօսն անդրադառնալով Թուրքիոյ անցեալի եւ այժմեան փանթուրքիստական քաղաքականութեանը եւ գործունէութիւններին շեշտեց Թուրքիոյ պետութեան ազգայնամոլութեան ու հայատեաց անփոփոխ նկարագրի վրայ:

Հայ համայնքի վարչութեան անունից օրւայ խօսքն  ընթերցեց վարչութեան ատենապետ Մելքոն Շիրւանեանը, որտեղ անդրադառնալով 1892-1923 թ. թ. Օսմանեան կայսրութիւնում տեղի ունեցած հայ բնակչութեան զանգւածային տեղահանութեան, տարագրման եւ բնաջնջման ասւել էր. «Հայոց Ցեղասպանութեան գիտակցումն ու ոգեկոչումը կարեւոր է բոլորիս համար, որպէսզի նոր թափով, պայքարի նոր ուղիով քայլենք դէպի մեր  ոտնահարւած իրաւունքների վերականգման եւ նահատակների սուրբ կտակի իրականացման»:

Այնուհետեւ ընթերցւեցին շրջանի Հայ Դատի յանձնախմբի, Շահինշահրի մասնաճիւղի Հայ Մ. Մ. «Արարատ», «Փերիոյ» կրթասիրաց, Շահինշահրի «Հայ կանանց եկեղեցասիրաց» միութիւնների եւ «Սրբոց Վարդանանց» ու «Մասիս» դպրոցների ուսուցչական կազմի, ծնողական խորհրդի եւ աշակերտական խօսքերը:

Յաջորդիւ ազգային-հայրենասիրական երգերի գեղեցիկ կատարումներով ելոյթ ունեցան շնորհալի երիտասարդներ Վանանդ Իսաղուլեանն ու Արութին Հախնազարեանը:

Այնուհետեւ տեղի ունեցաւ ծաղիկների մատուցման արարողութիւնը, որտեղ Հայոց Ցեղասպանութեան սուրբ նահատակների անմահ յիշատակին իրենց յարգանքի տուրքը մատուցեցին թեմիս հոգեւորականաց դասը՝ Կաթողիկոսական փոխանորդի գլխաւորութեամբ, ազգային իշխանութեան, ազգային մարմինների, շրջանի Հայ Դատի յանձնախմբի, միութիւնների եւ հայոց ազգային դպրոցների ներկայացուցիչներն ու պատասխանատուները:

Ծաղկեմատոյցի արարողութիւնից յետոյ, «Նարեկ» մանկապարտէզ-նախակրթարանի եւ «Սրբոց Վարդանանց» դպրոցի աշակերտ-ուհիները երգուսոյց Նարբէ Տէր-Գրիգորեանի ղեկավարութեամբ կատարեցին խմբերգեր եւ ծաղիկներ մատուցեցին՝ նահատակների յիշատակն ոգեկոչելու համար:

Օրւայ խորհրդի առիթով իր հայրական պատգամը փոխանցեց թեմիս կաթողիկոսական փոխանորդ գերպ. Տ. Սիփան ծ. վրդ. Քէչէճեանը: Նա իր գնահատանքի խօսքն ուղղելով համահաւաքի եւ օրւայ արարողութեան կազմակերպիչներին, ծրագրի իրականացմանը օժանդակողներին, պատասխանատուներին, բոլոր մասնակիցներին եւ ներկաներին հաւաստիացրեց, որ անշուշտ այսպիսի միահամուռ, միասնական պահանջատիրական  ոգով տոգորւած է, որ պէտք է շարունակենք մեր երթը, մեր անվարան ուղին դէպի Հայկական հարցի եւ Հայ Դատի վերջնական եւ արդար լուծում:

Համահաւաքի աւարտին համայնքի անդամները ակնածանքով մօտենալով խաչքար-յուշարձանին ծաղիկներ մատուցեցին սուրբ նահատակների վառ յիշատակին:

 

Լուսանկարները՝
ՍԵՐԻՆԷ ԱՂԱԽԱՆԵԱՆԻ

Յարակից լուրեր

  • Նոր Ջուղայի եւ Շահինշահրի պահանջատէր ժողովուրդը խուռներամ շարքերով մասնակցեց Հայոց Ցեղասպանութեան 104-րդ տարելիցի ոգեկոչման միջոցառումներին
    Նոր Ջուղայի եւ Շահինշահրի պահանջատէր ժողովուրդը խուռներամ շարքերով մասնակցեց Հայոց Ցեղասպանութեան 104-րդ տարելիցի ոգեկոչման միջոցառումներին

    Չորեքշաբթի՝ ապրիլի 24-ի առաւօտեան, գերշ. Տ. Սիփան եպս. Քէչէճեանի ձեռամբ ս. եւ անմահ պատարագ մատուցւեց վանքի Ս. Յովսէփ Արիմաթացի եկեղեցում՝ ի յիշատակ բիւրաւոր Սուրբ նահատակների, ապա վանքի շրջափակում կայացաւ ծաղիկների մատուցման արարողութիւնը՝ ազգային մարմինների, շրջանի Հայ Դատի յանձնախմբի, Նոր Ջուղայի եւ Շահինշահրի հայոց դպրոցների ու միութիւնների մասնակցութեամբ։

  • Մարութեան եւ գեղեցկութեան տօնը՝ Շահինշահրում
    Մարութեան եւ գեղեցկութեան տօնը՝ Շահինշահրում

    Կիրակի, 2019 թւականի ապրիլի 7-ի կէսօրից յետոյ, Շահինշահրի Հայ Կանանց եկեղեցասիրաց միութեան նախաձեռնութեամբ, կազմակերպւել էր միջոցառում՝ Մարութեան եւ գեղեցկութեան տօնի առթիւ, ուր ներկայ էին «Նարեկ» երգչախմբի անդամուհիները, համայնքի ուսուցչուհիներն ու մայրերը եւ մի շարք այլ հրւիրեալներ։

  • Միջինքի առիթով միջոցառում՝ Շահինշահրում
    Միջինքի առիթով միջոցառում՝ Շահինշահրում

    Չորեքշաբթի, 2019 թւականի մարտի 27-ի առաւօտեան, Շահինշահրի Սրբոց Վարդանանց եկեղեցում, արժն․ Տ․ Սահակ քհնյ․ Մինասեանի միջոցով տեղի ունեցաւ Արեւագալի արարողութիւնը, ապա Հայ Կանանց եկեղեցասիրաց միութեան նախաձեռնութեամբ «Սրբոց Վարդանանց» դպրոցի սրահում իրականացւեց միջոցառում՝ Միջինքի առիթով։

  • Արաբական խալիֆայութեան Արմինիա շրջաններ
    Արաբական խալիֆայութեան Արմինիա շրջաններ

    2010 թւին, Երեւանի Պետական համալսարանի հրատարակչութեան կողմից, լոյս է տեսել, Արման Եղիազարեանի հեղինակութեամբ, «Արաբական Խալիֆայութեան Արմինիա Վարչական Շրջանը» 186 էջից բաղկացած, պատմա-աշխարհագրական արժէքաւոր գիրքը:

  • Նազարէթ Պերպերեանի 13.3.2019 թւի յօդւածի առիթով
    Նազարէթ Պերպերեանի 13.3.2019 թւի յօդւածի առիթով

    Շատ ճիշտ է 97 տարի առաջ նորելուկ բոլշեւիկների «Յեղկոմ»-ի կողմից, հակառակ հայ ժողովրդի եւ ժամանակի մտաւորականութեան կամքին, պետականօրէն պարտադրւեց հայ լեզւի իրենց նախընտրած ուղղագրութիւնը, ըստ հեղինակի «սխալագրութիւն»-ը, նպատակ ունենալով հայ ժողովրդից խլել իր ազգային պատմական յիշողութիւնը եւ ձուլել հայ ժողովրդին, «բազմազգ հայրենիք»-ի ու «խոհրդային ժողովրդ»-ի խառնարան կաթսայի մէջ:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։