Հա

Համայնք

22/08/2017

Վերափոխման տօնը՝ Փերիոյ գաւառի Խոյգան գիւղի Ս. Աստւածածին եկեղեցում Հոգեհանգստեան պաշտօն՝ ի յիշատակ 18-րդ դարի պատմագիր Տ. Ստեփանոս Երէցի

Հայաստանեայց Առաքելական Սուրբ Եկեղեցու հինգ տաղաւար տօներից չորրորդի՝ Ս. Աստւածածնի Վերափոխման տօնի (Խաղողօրհնէք) առթիւ հանդիսաւոր սուրբ պատարագ մատուցւեց Փերիոյ գաւառի Խոյգան գիւղի Ս. Աստւածածին եկեղեցում՝ նախագահութեամբ Սպահանի հայոց թեմի առաջնորդ գերպ. Տ. Սիփան ծ. վրդ. Քէչէճեանի, ուրբաթ՝ 2017 թւականի օգոստոսի 18-ի առաւօտեան։

«alikonline.ir» - Հայաստանեայց Առաքելական Սուրբ Եկեղեցու հինգ տաղաւար տօներից չորրորդի՝ Ս. Աստւածածնի Վերափոխման տօնի (Խաղողօրհնէք) առթիւ հանդիսաւոր սուրբ պատարագ մատուցւեց Փերիոյ գաւառի Խոյգան գիւղի Ս. Աստւածածին եկեղեցում՝ նախագահութեամբ Սպահանի հայոց թեմի առաջնորդ գերպ. Տ. Սիփան ծ. վրդ. Քէչէճեանի, ուրբաթ՝ 2017 թւականի օգոստոսի 18-ի առաւօտեան։ Օրւայ պատարագիչն էր արժ. Տ. Խաչատուր քհնյ. Զարգարեանը. երգեցողութեամբ հանդէս եկան Ս. Ամենափրկիչ վանքի «Կոմիտաս» երգչախմբի անդամուհիները։ Տեղեկացնում է Նոր Ջուղայի մեր թղթակիցը: 

Արարողութեան իրականացման գործում մասնակցութիւն ունէին եկեղեցական ու դպրաց դասերը, իսկ ներկայ էին՝ թեմիս պատգամաւորական Ժողովի փոխ-ատենապետ Մկրտիչ Աւետումեանը, Կրօնական խորհրդի անդամներ՝ ատենապետ Վարուժ Մովսիսեանն ու Սաքօ Տէր-Յովհաննիսեանը եւ հոծ թւով հաւատացեալ ուխտաւորներ։

Ս. պատարագի ընթացքում առաջնորդ Հայր Սուրբն իր յաւուր պատշաճի քարոզն ուղղեց ներկայ հաւատացեալներին, ուր անդրադառնալով Աստւածամօր վերփոխմանը, նշեց, թէ Քրիստոսի համբարձումից 12 տարիներ անց, երբ իր մահկանացուն կնքեց Սուրբ Մարիամը, Տէրը գերեզմանից վերցրեց իր մօր մարմինը եւ այն փոխադրեց երկինք, ուր դարձեալ միաւորելով իր հոգու հետ՝ յարութիւն տւաւ նրան։ Թեմակալ առաջնորդն իր խօսքի շարունակութեան մէջ ընդգծելով, որ Քրիստոսն իր ամբողջ կեանքում հնազանդ եղաւ «Պատւիր քո հօրն ու մօրը» աստւածային պատւիրանին, շեշտեց, թէ Տէրը տիպար օրինակ է մեզ համար՝ ծնողի նկատմամբ հոգածութիւն ցուցաբերելու առումով։ Քարոզիչ հայրը յորդորեց՝ կատարելով որդիական պարտականութիւնները, խնամել ու հոգալ ծնողներին՝ նրանց աղօթքների շնորհիւ Աստծոյ ողորմութեանն ու օրհնութեանն արժանանալու համար։

Վերջում կատարւեց աւանդական Խաղողօրհնէքի կարգը, որից յետոյ օրհնւած խաղողների կապոցները բաժանւեցին ներկաներին։

Հոգեպարար արարողութիւններն աւարտւելուն պէս, առաջնորդ Հայր Սուրբը քահանայից ու սարկաւագաց դասերի, ինչու չէ նաեւ ազգային մարմինների ներկայացուցիչների ընկերակցութեամբ, մեկնեց Փերիոյ գաւառի Հազարջրիբ գիւղի հայոց գերեզմանատուն, ուր Թեհրանի Փերիոյ Կրթ. միութեան նախաձեռնութեամբ եւ հրաւէրով, կատարեց սոյն գերեզմանատանն առյաւէտ հանգիստ առած պատմագիր Ստեփանոս Երէցի (Տ. Ստեփանոս քահանայ, ծնունդ՝ 1746թ., վախճան՝ 1813 թ.) շիրիմի վրայ տեղադրւած նոր գերեզմանաքարի օրհնութեան եւ հանգուցեալի յիշատակին կայացած հոգեհանգստեան արարողութիւնները։

Սոյն եկեղեցական կարգերին ներկայ էին նաեւ նախաձեռնող միութեան ներկայացուցիչներն ու մի շարք հաւատացեալ ժողովուրդ։

Երէցը ծնւել է Հազարջրիբ գիւղում, ապա մանկութիւնն իր ծննդավայրում անցկացնելուց յետոյ անցել է Նոր Ջուղա՝ կրթւելու համար։ Պատմագիրը հեղինակն է «Հանգիտագիրք» ձեռագիր մատեանի։ Տ. Ստեփանոս քահանայի մասին տեղեկութիւնները հրապարակւել են  1949 թւականին անւանի բանասէր Լեւոն Գ. Մինասեանի ջանքերի շնորհիւ, իսկ նրա շիրիմը յայտնաբերւել է Թեհրանի Փերիոյ կրթ. միութեան անդամների միջոցով։ Տարիներ է, ինչ սոյն միութեան անդամներից ուխտագնացութիւն են կատարում դէպի Հազարջրիբ գիւղի գերեզմանատուն՝ իրենց նախնիների գերեզմաններին այցելելու նպատակով։

«Պատմութիւն Նոր Ջուղայի» գրքի հեղինակ Յարութիւն Տէր-Յովհանեանն իր աշխատութիւնը գրի առնելիս բաւականաչափ օգտւել է «Հանգիտագիրք»-ում յիշատակւած տեղեկութիւններից։

 

Յարակից լուրեր

  • Համբարձման տօնի առթիւ ս. եւ անմահ պատարագ՝ Փերիոյ գաւառի Սնկերտ գիւղում
    Համբարձման տօնի առթիւ ս. եւ անմահ պատարագ՝ Փերիոյ գաւառի Սնկերտ գիւղում

    Սպահանի հայոց թեմի Կրօնական խորհրդի նախաձեռնութեամբ եւ Փերիոյ գաւառի Սնկերտ գիւղի Ս. Ստեփանոս եկեղեցու վարչութեան կազմակերպութեամբ, հինգշաբթի՝ 2018 թւականի մայիսի 10-ի առաւօտեան, Յիսուս Քրիստոսի Համբարձման տօնի առթիւ, ս. եւ անմահ պատարագ մատուցւեց նշւած եկեղեցում՝ նախագահութեամբ թեմակալ առաջնորդ գերշ. Տ. Սիփան եպս. Քէչէճեանի։ 

  • Հայոց Ցեղասպանութեան 103-րդ տարելիցը ոգեկոչւեց Փերիոյ շրջանի հայաբնակ Բոլորան գիւղում
    Հայոց Ցեղասպանութեան 103-րդ տարելիցը ոգեկոչւեց Փերիոյ շրջանի հայաբնակ Բոլորան գիւղում

    Սպահանի հայոց թեմի պատգամաւորական ժողովի Փերիոյ շրջանի պատգամաւոր Ջանի Նազարեանից տեղեկացանք, որ սոյն գաւառի հայբանակ Բոլորան գիւղի բնակիչները Հայոց Ցեղասպանութեան 103-րդ տարելիցը ոգեկոչելու նպատակով, գիւղում կազմակերպել են մոմավառութեան արարողութիւն եւ բողոքի համահաւաք։

  • Մայրերի մեծարման երեկոյ Նոր Ջուղայում
    Մայրերի մեծարման երեկոյ Նոր Ջուղայում

    Նախաձեռնութեամբ Նոր Ջուղայի Հայուհեաց Բարեգործական ընկերութեան շաբաթ՝ թւականիս ապրիլի 7-ի երեկոյեան, Ն. Ջ. Հայ Մ. Մ. «Արարատ» միութեան դահլիճում նշւեց Մայրերի տօնը՝ ՀՀ հիմնադրման 100-ամեակին նւիրւած։ 

  • Ծաղկազարդ տօնի եւ Դռնբացէքի արարողութիւնները՝ Սպահանի հայոց թեմի եկեղեցիներում
    Ծաղկազարդ տօնի եւ Դռնբացէքի արարողութիւնները՝ Սպահանի հայոց թեմի եկեղեցիներում

    Ծաղկազարդը՝ Քրիստոսի Երուսաղէմ կատարած յաղթական մուտքի յիշատակման տօնը՝ հանդիսութեամբ նշւեց Նոր Ջուղայի Ս. Մինաս, Ս. Ստեփանոս, Ս. Գրիգոր Լուսաւորիչ եւ Ս. Յովհաննու Կարապետ ու Շահինշահրի Սրբոց Վարդանանց եկեղեցիներում, կիրակի՝ մարտի 25-ի առաւօտեան։

  • Սպահանի հայոց թեմի առաջնորդի Ս. Զատկւայ պատգամը
    Սպահանի հայոց թեմի առաջնորդի Ս. Զատկւայ պատգամը

    Նոր Կտակարանի բոլոր Աւետարանները, անխտիր, պատմում են Քրիստոսի երկրաւոր կեանքի ամենահիմնական եւ ամենից էական բաժինը՝ Յարութեան դէպքը։ Իր խորքի մէջ թէեւ ընդհանրական, սակայն իւրաքանչիւր Աւետարան իրեն իւրայատուկ նուրբ ու փոքր տարբերութիւններով ներկայացրել են Քրիստոսի Յարութեան դէպքը, այնպիսի «տարբերութեամբ», որ կարծէք մէկը միւսին ամբողջացնում է։

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։