Հա

Համայնք

Հինգշաբթի, 19 Հոկտեմբերի 2017 09:30

Սրբոց Թարգմանչաց տօնը նշւեց Նոր Ջուղայում

Շաբաթ՝ 2017 թւականի հոկտեմբերի 14-ի առաւօտեան, նախագահութեամբ Սպահանի հայոց թեմի առաջնորդ գերպ. Տ. Սիփան ծ. վրդ. Քէչէճեանի, Սրբոց Թարգմանչաց տօնի առթիւ ս. եւ անմահ պատարագ մատուցւեց Նոր Ջուղայի Ս. Յովհաննու եկեղեցում։ Օրւայ պատարագիչ եւ քարոզիչ հայրն էր Շահինշահրի հայ համայնքի հոգեւոր տեսուչ գերպ. Տ. Անանիա ծ. վրդ. Գուճանեանը։ Պատարագին մասնակցում էին թեմիս եկեղեցական դասը, իսկ երգեցողութիւնը կատարեց Ս. Ամենափրկիչ վանքի «Կոմիտաս» երգչախումբը՝ Արմէն Ամիրխանեանի ղեկավարութեամբ։ 

«alikonline.ir» - Շաբաթ՝ 2017 թւականի հոկտեմբերի 14-ի առաւօտեան, նախագահութեամբ Սպահանի հայոց թեմի առաջնորդ գերպ. Տ. Սիփան ծ. վրդ. Քէչէճեանի, Սրբոց Թարգմանչաց տօնի առթիւ ս. եւ անմահ պատարագ մատուցւեց Նոր Ջուղայի Ս. Յովհաննու եկեղեցում։ Օրւայ պատարագիչ եւ քարոզիչ հայրն էր Շահինշահրի հայ համայնքի հոգեւոր տեսուչ գերպ. Տ. Անանիա ծ. վրդ. Գուճանեանը։ Պատարագին մասնակցում էին թեմիս եկեղեցական դասը, իսկ երգեցողութիւնը կատարեց Ս. Ամենափրկիչ վանքի «Կոմիտաս» երգչախումբը՝ Արմէն Ամիրխանեանի ղեկավարութեամբ։ Տեղեկացնում է Նոր Ջուղայի մեր թղթակիցը:

Հոգեպարար արարողութեանը ներկայ էին ազգային մարմինների ներկայացուցիչները, Նոր Ջուղայի հայոց ազգ. դպրոցների աշակերտութիւնն ու պատասխանատուները եւ հոծ թւով ժողովուրդ։

Պատարագիչ Հայր Սուրբն իր քարոզում անդրադառնալով հայերէն այբուբենի յօրինման ուղղութեամբ Ս. Մեսրոպ Մաշտոցի կատարած տքնաջան աշխատանքին՝ աւելացրեց, քանի որ հայոց տառերի գիւտը տեղի ունեցաւ Աստծոյ կամքով ու տեսիլքի շնորհիւ, այն կատարեալ է ինչպէս Աստւած եւ այսքան տարիներ անց նոյնիսկ որեւէ փոփոխութիւն չի կրել։

Հայր Սուրբն իր խօսքի շարունակութեան մէջ յիշելով թարգմանիչ վարդապետներին եւ նրանց գործունէութիւնը, ընդգծեց նրանց գործի արդիւնքը, որը կենսական նշանակութիւն է ունեցել հայ ժողովրդի համար։ Նա վերջում աշակերտութեանը յորդորեց՝ սիրել հայոց լեզուն ու հայ մշակոյթը, ապրել հային հարիր ապրելակերպով, անաղարտ պահել ու զարգացնել լեզուն ու մշակոյթը եւ առաջնորդւել ուսուցիչների ու մեծերի ցուցումների համաձայն, իսկ ուսուցիչներին ու ծնողներին կոչ արեց՝ աշակերտութեանը առաջնորդել դէպի Աստծոյ տուն՝ եկեղեցի՝ նրանց մէջ առաւել ամրապնդելով աղօթքի եւ եկեղեցու նկատմամբ սէրն ու հաւատքը։

Պատարագի աւարտին առաջնորդ Հայր Սուրբի գլխաւորութեամբ բոլորը քայլեցին դէպի եկեղեցու մօտակայքում գտնւող հայոց ազգ. կրթահամալիր, ուր «Ալենուշ Տէրեան» դահլիճում կայացաւ գեղարւեստական ամենամեայ ծրագիրը՝ աշակերտների կատարմամբ։ Այստեղ ծրագիրն սկիզբ առաւ Կրթական խորհրդի կողմից կեանքի կոչւած Թարգմանչած տօնի միջոցառումների կազմակերպիչ յանձնախմբի անդամ Սոնիա Դիլանչեանի հաղորդավարութեամբ եւ առիթին նւիրւած խօսքով։

Աշակերտական ելոյթների բաժնում օրւան պատշաճ երգերով, ասմունքներով ու խօսքերով, առանձնաբար հանդէս եկան Նոր Ջուղայի հայոց ազգ. նախակրթարանի եւ «Արմէն» երկսեռ տարրական կրթահամալիրի 6-րդ դասարանի սաները, իսկ ասմունքեցին «Քանանեան» աղջկանց եւ «Կատարինեան» տղայոց միջնակարգ դպրոցների ներկայացուցիչներ Լիլիթ Գէորգեանն ու Արթուր Քամարզարեանը։

Ծրագրում Ս. Ամենափրկիչ վանքի «Ս. Ներսէս Շնորհալի» եւ «Արմէն», «Քանանեան» ու «Կատարինեան» դպրոցների գրադարանների ամենաընթերցասէր անդամ-աշակերտները, ինչու չէ նաեւ Հայագիտական համահայկական 8-րդ օլիմպիադային մասնակցած եւ սոյն աշակերտական մրցոյթի յաղթող խումբը ճանաչւած Նոր Ջուղայի պատւիրակութեան աշակրտներն ու պատասխանատուն գնահատւեցին՝ թեմակալ առաջնորդի, Թեմական եւ Կրթական խորհուրդների ներկայացուցիչների, օլիմպիադային մասնակցած աշակերտների ուսուցման գործն իրականացրած պատասխանատու ուսուցիչների եւ պատկան գրադարանավարուհիների ձեռամբ։

Յատկանշական է, որ նախորդ տարեշրջանում «Ս. Ներսէս Շնորհալի» գրադարանի աշխոյժ ընթերցասէր անդամ-աշակերտների թիւը հասաւ շուրջ 40-ի՝ աննախադէպ աճ արձանագրելով նախորդ տարիների համեմատութեամբ։ 

Վերջում գերպ. Տ. Սիփան ծ. վրդ. Քէչէճեանն իր հայրական պատգամն ուղղեց ներկաներին, ուր շնորհաւորելով առիթի կապակցութեամբ՝ մեծապէս գնահատեց հայ ուսուցչին՝ որպէս իր սրբազան առաքելութեանը նւիրւած առաքինի եւ յանձնառու էակ։ Հայր Սուրբն աւելացրեց նաեւ, որ երբ մեր ազգի նորօրեայ սերունդը խօսում եւ գրում է հայերէն, սովորում է հայ գրականութիւնը եւ հաւատարիմ է հայ մշակոյթին, արժանանում է Մեսրոպ Մաշտոցի եւ Սահակ Պարթեւ Հայրապետի օրհնութեանը։

Միջոցառումից յետոյ, կրթահամալիրի բակում, վերջին տարիների ընթացքում Ս. Ամենափրկիչ վանքի «Ս. Ներսէս Շնորհալի» գրադարանում հաւաքւած նոյնանուն գրքերի յաւելեալ օրինակները անվճար բաշխւեցին ընթերցասէր աշակերտներին ու ներկաներին։

Յարակից Հրապարակումներ

  • Ցաւակցագիր
    Ցաւակցագիր

    Մեծ կսկիծով մամուլից իմացանք այն ողբերգական լուրը, որ պատահել է անցնող առաւօտեան ժամը 08:50-ին, երբ «Ասեման» աւիաընկերութեան Թեհրան-Եասուջ չւերթն իրականացնող ինքնաթիռը կործանւել է Թեհրանի «Մեհրաբադ» օդանաւակայանը լքելուց 50 րոպէ անց:

  • Տեառնընդառաջի նախատօնակի հանդիսաւոր նշումը՝ Նոր Ջուղայում
    Տեառնընդառաջի նախատօնակի հանդիսաւոր նշումը՝ Նոր Ջուղայում

    Հոգեպարար արարողութեան մատուցմամբ Տեառնընդառաջի նախատօնակը նշւեց Նոր Ջուղայի Ս. Մինաս, Ս. Գրիգոր Լուսաւորիչ, Ս. Ստեփանոս եւ Ս. Յովհաննու Կարապետ եկեղեցիներում, երեքշաբթի՝ 2018 թւականի փետրւարի 13-ի երեկոյեան:

  • Տեառնընդառաջը եւ աւանդական հրավառութիւնը՝ Շահինշահրի հայոց ազգային դպրոցներում
    Տեառնընդառաջը եւ աւանդական հրավառութիւնը՝ Շահինշահրի հայոց ազգային դպրոցներում

    Երեքշաբթի՝ 2018 թւականի փետրւարի 13-ի առաւօտեան ժամը 11:30-ից Շահինշահրի հայոց ազգային «Նարեկ» մանկապարտէզ-նախակրթարանը եւ «Սրբոց Վարդանանց» տարրական դպրոցի աշակերտութիւնը մասնակցեցին՝ զոյգ դպրոցների տեսչութեան եւ ծնողական խորհրդի նախաձեռնութեամբ կազմակերպւած աւանդական հրավառութեանը եւ Տեառնընդառաջին:

  • Սրբոց Ղեւոնդեանց քահանայից եւ Վարդանանց տօների նշումը՝ Նոր Ջուղայում
    Սրբոց Ղեւոնդեանց քահանայից եւ Վարդանանց տօների նշումը՝ Նոր Ջուղայում

    Երեքշաբթի՝ փետրւարի 6-ի առաւօտեան, սրբոց Ղեւոնդեանց քահանաների տօնի առթիւ սուրբ եւ անմահ պատարագ մատուցւեց Նոր Ջուղայի Ս. Մինաս եկեղեցում՝ նախագահութեամբ Սպահանի հայոց թեմի առաջնորդ գերպ. Տ. Սիփան ծ. վրդ. Քէչէճեանի: Օրւայ պատարագիչն էր Շահինշահրի հայ համայնքի հոգեւոր տեսուչ գերպ. Տ. Անանիա ծ. վրդ. Գուճանեանը: Հոգեզմայլ պատարագին մասնակցում էին թեմիս քահանայից ու դպրաց դասերը: Ներկայ էին նաեւ ազգային մարմինների ներկայացուցիչներն ու ժողովուրդ: 

  • Ս. Սարգիս զօրավարի տօնի առթիւ արարողութիւններ՝ Նոր Ջուղայի Ս. Սարգիս եկեղեցում
    Ս. Սարգիս զօրավարի տօնի առթիւ արարողութիւններ՝ Նոր Ջուղայի Ս. Սարգիս եկեղեցում

    Ս. Սարգիս զօրավարի տօնի առթիւ հոծ թւով հաւատացեալների մասնակցութեամբ հոգեզմայլ արարողութիւններ իրականացւեցին Նոր Ջուղայի Ս. Սարգիս եկեղեցում, ուր միեւնոյն ժամանակ տօնւեց նաեւ նշւած եկեղեցու անւանակոչութեան տօնը: 

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։