Հա

Համայնք

05/11/2017 - 10:30

Նոր Ջուղայի Հայուհեաց Բարեգործական ընկերութիւնը հանդիսութեամբ նշեց իր հիմնադրման 125-ամեակը

Շաբաթ՝ 2017 թւականի հոկտեմբերի 28-ի երեկոյեան, Նոր Ջուղայի Հայուհեաց Բարեգործական ընկերութիւնն իր հիմնադրման 125-ամեակի առթիւ հանդիսաւոր տօնական երեկոյ կազմակերպեց, Ն. Ջ. Հայ Մ. Մ. «Արարատ» միութեան դահլիճում:

«alikonline.ir» - Շաբաթ՝ 2017 թւականի հոկտեմբերի 28-ի երեկոյեան, Նոր Ջուղայի Հայուհեաց Բարեգործական ընկերութիւնն իր հիմնադրման 125-ամեակի առթիւ հանդիսաւոր տօնական երեկոյ կազմակերպեց, Ն. Ջ. Հայ Մ. Մ. «Արարատ» միութեան դահլիճում: Տեղեկացնում է Նոր Ջուղայի մեր թղթակիցը:

Երեկոյթին ներկայ էին՝ Սպահանի հայոց թեմի առաջնորդ գերպ. Տ. Սիփան ծ. վրդ. Քէչէճեանը, Շահինշահրի հայ համայնքի հոգեւոր տեսուչ գերպ. Տ. Անանիա ծ. վրդ. Գուճանեանը, քահանայից դասը, ազգային մարմինների, շրջանի Հայ Դատի յանձնախմբի, միութիւնների ու հայոց ազգ. դպրոցների ներկայացուցիչները, ընկերութեան անդամուհիները եւ մի շարք այլ հրաւիրեալներ:

Միջոցառումը բացւած յայտարարւեց ընկերութեան «Փարոս» ասմունքի խմբի անդամուհիներ՝ Վանա Զոհրաբեանի եւ Վանէ Շահնազարեանի գեղեցիկ ասմունքով, որից յետոյ ներկաներին ջերմօրէն ողջունեցին ծրագրի հանդիսավարներ՝ Վեհանուշ Խուդաբախշեանն ու Մարտունի խաչիկեանը:

Ապա հրաւիրւեց գերպ. Տ. Սիփան ծ. վրդ. Քէչէճեանը՝ ընթերցելու Ն. Ս. Օ. Տ. Տ. Արամ Ա Վեհափառ Հայրապետի օրհնութեան գիրը՝ յոբելեանի կապակցութեամբ, ուր ասւած էր. «Այս առիթով Մեր գնահատանքը կը յայտնենք 125-ամեայ Հայուհեաց Բարեգործական ընկերութեան ճամբով ցարդ գործած եւ այժմ գործող վարչութիւններուն, որոնք ընկերութեան ջահը պահեցին անմար՝ զայն փոխանցելով սերնդէ սերունդ: Մենք վստահ ենք, որ 125-ամեակի նշումը նոր մղում պիտի տայ ձեզի՝ նոր ծրագրեր մշակելու եւ նոր աշխատանքներ ձեռնարկելու, նւիրեալ ծառայութեան ճամբով, նոր յոբելեաններ նւաճելու վճռակամութեամբ»:

Երեկոյի շարունակութեան մէջ բանախօսութեամբ ելոյթ ունեցաւ Վրէժ Շիրւանեանը: Նա իր խօսքում ընդգծելով, թէ հայ ժողովրդի պատմութեան էջերը թերթելիս, մեզ համար ակնյայտ է դառնում այն իրողութիւնը, որ ազգային կազմակերպութիւններն ու խմբակցութիւնները կազմւել են ոչ թէ պատահականութեամբ, այլ ժամանակի հրամայականից եւ մեր ժողովրդի առարկայական պայմաններից ելնելով, կարեւորեց յատկապէս այն փաստը, որ Սփիւռքում ազգային կազմակերպութիւնները հանդիսանում են որպէս առանցքային նշանակութիւն ունեցող կենտրոններ:

Ապա բանախօսն անդրադառնալով նաեւ ընկերութեան հիմնադրման նպատակներին ու որդեգրած ուղուն՝ ակնարկ ունեցաւ 125 տարիների ընթացքում կատարած կարեւորագոյն աշխատանքներին:

Ահա մի հատւածի մէջբերում բանախօսի զրոյցից.

«Նոր Ջուղայի Հայուհեաց Բարեգործական ընկերութիւնը հիմնադրւել է Նոր Ջուղայի ուսուցիչ՝ Յովսէփ Բարսեղեանի ջանքերով: Պրն. Բարսեղեանը ձմռան մի ցուրտ օր տեսնելով չքաւոր աշակերտուհիների թշւառ դրութիւնը որոշում է մի միութիւն ստեղծել՝ չքաւորներին օգտակար հանդիսանալու համար: Այդպիսով հաւաքում է Ս. Կատարինեան օրիորդաց դպրոցի բարձր դասարանի աշակերտներին եւ հրաւիրում նրանց հիմնել միութիւն, որի միջոցներով հնարաւոր կը լինի օգնել նոյն դպրոցի չքաւոր երեխաներին, նրանց դպրոցական պիտոյքներ եւ զգեստներ մատակարարելով»:

Ընթացքում իր հայրական օրհնանքը փոխանցեց թեմի առաջնորդ գերպ. Տ. Սիփան ծ. վրդ. Քէչէճեանը, ով շնորհաւորելով պանծալի ամեակի կապակցութեամբ եւ շնորհակալութիւն յայտնելով ձեռնարկի կազմակերպիչներին ու դերակատարներին, դրւատեց միութեան գործունէութիւնը եւ հիմնադրման նպատակը: Թեմակալ առաջնորդն իր խօսքում հետաքրքիր ու հպարտառիթ անւանեց յատկապէս այն փաստը, որ Բարեգործական ընկերութեան վեհանձն գաղափարներով օժտւած հիմնադիրի կողքին, բարեսիրական ծրագրերի իրագործման համար աշխատել են մատղաշ սերնդի պարզ ներկայացուցիչները՝ աշակերտները:

Յանուն Սպահանի հայոց թեմի ազգային մարմինների շնորհաւորանքի խօսք ուղղեց թեմի Պատգամաւորական ժողովի ատենապետ Թաթուլ Օհանեանը: Նա գնահատելով ընկերութեան ծաւալած գործունէութիւնը, իր մանկութեան յուշերից հետաքրքիր դրւագներ պատմեց՝ յոբելեարի աշխատանքների հետ կապւած:  

Յատկանշական է, որ հանդիսավարների միջոցով ծրագրի ընթացքում ընթերցւեցին այս առիթով ստացւած ուղերձները: Ընկերութիւնն ուղերձներ էր ստացել՝ Թեհրանի Ս. Գրիգոր Լուսաւորիչ եկեղեցու խորհրդից, Հայ Ուս. «Չհարմահալ» միութեան Կենտրոնական եւ Նոր Ջուղայի մասնաճիւղի վարչութիւններից, Փերիոյ Կրթ. միութեան Կենտրոնական վարչութիւնից, Ն. Ջ. Հայ Կանանց Գթութեան միութեան վարչութիւնից, Ն. Ջ. հայոց ազգ. «Արմէն» երկսեռ տարրական կրթահամալիրի տեսչութեան, ուսուցչական կազմի, ծնողական խորհրդի եւ աշակերտութեան կողմից, «Շուշանիկ» հոգեւոր երգչախմբից, մի շարք անհատներից ու արտերկրում բնակութիւն հաստատած իր անդամուհիներից:

Միջոցառման ընթացքում իրականացւեց նաեւ գեղարւեստական յայտագրով ծրագիր, ուր ժողովրդական եւ հայրենասիրական երգերի գեղեցիկ կատարմամբ, ծրագրին առաւել խանդավառ եւ հայաշունչ մթնոլորտ հաղորդեց Հայաստանից ժամանած ժողովրդական երգիչ Նարեկ Պօղոսեանը, իսկ գերպ. Տ. Անանիա ծ. վրդ. Գուճանեանի ղեկավարութեամբ ասմունքեցին ընկերութեան «Փարոս» ասմունքի խմբի անդամուհիներ Մեղրի Կարապետեանն ու Նարեգա Սիմոնեանը:

50-ամեայ վաստակի համար՝ յոբելեար վարչութեան կողմից պարգեւատրւեց վաստակաշատ անդամուհի Ժենետ Դաւթեանը՝ իր յուշանւէրը ստանալով թեմակալ առաջնորդի եւ Բարեգործական ընկերութեան վարչութեան նախագահ Սանդրա Խուդաբախշեանի ձեռամբ, որից յետոյ Հայր Սուրբի, տկն. Խուդաբախշեանի ու մի շարք վաստակաւոր անդամուհիների միջոցով հատւեց յոբելեանական կարկանդակը:

Երեկոն շարունակւեց ուրախ մթնոլորտում եւ հիւրասիրութեամբ:

Հարկ է նշել, որ այս առիթով կից սրահում, կազմակերպւել էր ցուցահանդէս, ուր ցուցադրւել էին ընկերութեան բազմամեայ գործունէութիւնից լուսանկարներ եւ արհեստանոցներից հին իրեր:

Լուսանկարիչ՝ Գեւիկ Խաչատրեան

Յարակից լուրեր

  • Մայրերի տօնի հանդիսաւոր նշումը՝ Նոր Ջուղայում
    Մայրերի տօնի հանդիսաւոր նշումը՝ Նոր Ջուղայում

    Հինգշաբթի՝ 2019 թւականի ապրիլի 11-ի երեկոյեան Ն. Ջ. Հայ Մ. Մ. «Արարատ» միութեան դահլիճում, նախաձեռնութեամբ Նոր Ջուղայի Հայուհեաց Բարեգործական ընկերութեան, ամենամեայ միջոցառմամբ նշւեց Հայ Մայրերի տօնը:

  • Ուսումնական նոր տարեշրջանը բուռն աշխատանքով է ընթանում Շահինշահրի հայոց ազգ. «Նարեկ» մանկապարտէզ-նախակրթարանում
    Ուսումնական նոր տարեշրջանը բուռն աշխատանքով է ընթանում Շահինշահրի հայոց ազգ. «Նարեկ» մանկապարտէզ-նախակրթարանում

    Ընդամէնը ամիս ու կէս է անցել 2018-2019 թ.թ. ուսումնական տարեշրջանի մեկնարկից, սակայն Շահինշահրի հայոց ազգ. «Նարեկ» մանկապարտէզ-նախակրթարանի պատասխանատուներին յաջողւել է բուռն աշխատանք իրագործել, թէ դպրոցի ընթացիկ ծրագրերի եւ թէ զանազան միջոցառումների կազմակերպման ուղղութեամբ, որոնցով կարողացել են հաճելի, խանդավառ եւ նորանոր փորձառութիւններով ու գիտելիքներով ողողւած մթնոլորտ ստեղծել սաների համար։

  • Սրբոց Թարգմանչաց տօնին եւ Հայ Մշակոյթին նւիրւած ձեռնարկ՝ Շահինշահրում
    Սրբոց Թարգմանչաց տօնին եւ Հայ Մշակոյթին նւիրւած ձեռնարկ՝ Շահինշահրում

    Ն․ Ջ․ Հայ Մ․ Մ․ «Արարատ» միութեան Շահինշահրի մասնաճիւղի Մշակութային միաւորի նախաձեռնութեամբ եւ տեղի Հայ համայնքի վարչութեան համագործակցութեամբ, ուրբաթ՝ 2018 թւականի հոկտեմբերի 19-ի երեկոյեան, Սրբոց Թարգմանչաց տօնի առիթով, կազմակերպւել էր ձեռնարկ միութեան «Արամ Մանուկեան» սրահում: 

  • Հրաժեշտի հանդիպում՝ Շահինշահրում
    Հրաժեշտի հանդիպում՝ Շահինշահրում

    Չորեքշաբթի՝ 2018 թւականի հոկտեմբերի 10-ին, նախաձեռնութեամբ Շահինշահրի Հայ կանանց եկեղեցասիրաց միութեան, նոյն միութեան գրասենեակում, կազմակերպւել էր հրաժեշտի երեկոյ՝ Շահինշահրի հայ համայնքի հոգեւոր տեսուչ գերպ․ Տ․ Անանիա ծ․ վրդ․ Գուճանեանի առաքելութիւնը Սպահանի հայոց թեմում աւարտւելու առիթով։

  • Հրաժեշտի պատարագ՝ Շահինշահրի Սրբոց Վարդանանց եկեղեցում
    Հրաժեշտի պատարագ՝ Շահինշահրի Սրբոց Վարդանանց եկեղեցում

    Ն.Ս.Օ.Տ.Տ. Արամ Ա Վեհափառ Հայրապետի տնօրինումով ու կարգադրութեամբ, գերպ. Տ. Անանիա ծ. վրդ. Գուճանեանը շուրջ մի տասնամեակ Սպահանի հայոց թեմում ծառայելուց յետոյ, շուտով վերադառնալու է Անթիլիասի Մայրավանք՝ նոր պարտականութիւններ ստանձնելու համար։ 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։