Հա

Համայնք

09/04/2018 - 08:50

Աւագ շաբաթւայ եւ Ս. Յարութեան տօնի արարողութիւնները՝ Շահինշահրի Սրբոց Վարդանանց եկեղեցում

Աւագ շաբաթւայ բոլոր արարողութիւնները կանոնաւոր կերպով կատարւեցին Շահինշահրի Սրբոց Վարդանանց եկեղեցում՝ համայնքի հոգեւոր տեսուչ գերպ. Տ. Անանիա ծ. վրդ. Գուճանեանի նախագահութեամբ։ Արարողութիւններին մասնակցում էին նաեւ արժ. Տ. Սահակ քհնյ. Մինասեանն ու սարկաւագաց դասը։

«alikonline.ir» - Աւագ շաբաթւայ բոլոր արարողութիւնները կանոնաւոր կերպով կատարւեցին Շահինշահրի Սրբոց Վարդանանց եկեղեցում՝ համայնքի հոգեւոր տեսուչ գերպ. Տ. Անանիա ծ. վրդ. Գուճանեանի նախագահութեամբ։ Արարողութիւններին մասնակցում էին նաեւ արժ. Տ. Սահակ քհնյ. Մինասեանն ու սարկաւագաց դասը։ Տեղեկացնում է Շահինշահրի մեր թղթակիցը:

Յատկանշական է, որ Սպահանի հայոց թեմի Կրօնական խորհրդի որոշմամբ ՀՀ հիմնադրման 100-ամեակի առիթով Ոտնլւայի կարգի ընթացքում գերպ. Տ. Անանիա ծ. վրդ. Գուճանեանը լւաց համայնքի վաստակաւոր ազգայինների եւ միութենականների ոտքերը։

Մարտի 29-ի երեկոյեան, Քրիստոսի չարչարանքների եւ խաչելութեան յիշատակի օրւայ կարգը Շահինշահրի եկեղեցում կատարւեց առաջին անգամւայ համար. կարգի աւարտին եկեղեցու բակում Տիրոջ խորհրդանշական գերեզմանը վեր բարձրացնելով՝ եկեղեցական դասի, երգչախմբի եւ հաւատացեալների մասնակցութեամբ կազմւեց Քրիստոսի թաղման թափօրը։

Ս. Զատկի նախատօնակի՝ Ճրագալոյցի ս. պատարագը մատուցւեց մարտի 31-ի երեկոյեան՝ արժ. Տ. Սահակ քհնյ. Մինասեանի ձեռամբ: Պատարագին նախագահում էր գերպ. Տ. Անանիա ծ. վրդ. Գուճանեանը։

Որպէս քարոզ՝ Հայր Սուրբն անդրադառնալով Քրիստոսի յարութեան աւետարանական դրւագին եւ բնաբան ունենալով «Ես ձեզ հետ եմ մինչեւ աշխարհի վախճանը» նախադասութիւնը, յորդորեց, որ հայելի լինել բոլորի համար, որպէսզի մարդիկ մեզ տեսնելիս մեր մէջ տեսնեն յարուցեալ Քրիստոսի գաղափարը եւ խօսքերի իրագործումը: Նա փոխանցեց յարութեան պատգամը՝ «Ապրել, զգալ եւ առաջնորդւել Քրիստոսով, քանի որ յարութեան լոյսը միմեանց սիրելով ենք կարող արժեւորել:

Կիրակի, ապրիլի 1-ի առաւօտեան ժամը 10:30-ին, ս. եւ անմահ պատարագ մատուցւեց՝ Ս. Յարութեան տօնի առթիւ: Օրւայ պատարագիչն էր հայ համայնքի հոգեւոր տեսուչ գերպ. Տ. Անանիա ծ. վրդ. Գուճանեանը։

Քարոզի պահին, հաւատաւոր հայորդիներին իր հայրական խօսքը փոխանցեց պատարագիչ Հայր Սուրբն, ուր անդրադառնալով Քրիստոսի յարութեանը նշեց, որ այս աւետիսը իւրաքանչիւրի համար պէտք է լինի խորհրդածութեան եւ գիտակցութեան առիթ: Նա շարունակութեան մէջ ասաց, թէ փնտրել Քրիստոսին առաջին հերթին մեր սրտերում ու նրանից խնդրել ողորմութիւն եւ գութ, քանի որ Քրիստոսը մեր կեանքի առաջնորդն է։

Պատարագն աւարտւելուն պէս եկեղեցում գերպ. Հայր Սուրբն ընդունեց Ս. Յարութեան տօնի առիթով շնորհաւորանքներ:

Բոլոր արարողութիւններին ներկայ էին Շահինշահրի հայ համայնքի վարչութեան ներկայացուցիչներն ու հոծ թւով ժողովուրդ։

Ժամերգութիւնների եւ պատարագների երգեցողութիւնը կատարեց «Նարեկ» երգչախումբը։

Յարակից լուրեր

  • Քրիստոս Յարեաւ ի մեռելոց, Օրհնեալ է Յարութիւնն Քրիստոսի
    Քրիստոս Յարեաւ ի մեռելոց, Օրհնեալ է Յարութիւնն Քրիստոսի
  • Ինչո՞ւ էք ողջին մեռելների մէջ փնտրում, նա այստեղ չէ, յարութիւն առաւ
    Ինչո՞ւ էք ողջին մեռելների մէջ փնտրում, նա այստեղ չէ, յարութիւն առաւ

    Քրիստոսի Հրաշափառ Յարութեան խորհրդով մեզ շնորհւած նոր կեանքը պէտք է դարձնենք մեկնակէտ աստւածատուր կեանքի, որ է սիրոյ, զոհողութեան ու նւիրումի, բարեգործութեան ու խաղաղութեան կեանք, չարի վրայ տարւած յաղթական կեանք։ Չմոռանանք, որ Քրիստոս իր Յարութեամբ չարը խափանեց եւ բարի կեանքով մեզ արժանացրեց իր շնորհքին եւ օրհնութեան։

  • Սուրբ Յարութեան տօնի պատգամ
    Սուրբ Յարութեան տօնի պատգամ

    Ամբողջ Քրիստոնէական աշխարհը հոգեկան անհուն բերկրանքի մէջ է գտնւում՝ մօտակայ հանդերձեալ Զատկւայ տօնակատարութեան պատճառով, իսկ մենք, որպէս Հայաստանեայց Առաքելական Սուրբ Եկեղեցու հաւատացեալ եւ հարազատ զաւակներ, հոգեպէս մենք մեզ նախապատրաստում ենք՝ դիմաւորելու մեր եկեղեցական օրացոյցի մեծագոյն եւ հրաշափառ տօնը՝ Յիսուս Քրիստոսի Սուրբ Յարութիւնը:

  • Տառապողին փառաւորումը՝ Յարութիւն
    Տառապողին փառաւորումը՝ Յարութիւն

    Մարդկանց ամենամեծ ակնկալիքը, դժւարութիւններից դուրս գալու հրաշազան պահն է, որը եթէ ո՛չ յաղթանակի, բայց գէթ փրկութեան ելքով է ազատագրում տագնապահար մարդուն: Յաջողութիւնների ակնկալիքը միշտ զբաղեցնում է մարդու հոգու եւ մտքի հորիզոնը, կարմրաւուն արեւի բազմերանգ ճառագայթների գունագեղ յոյսով վառւած: Սակայն նեղութիւնների դժւարանցանելի արահետներից եւ տրտմութեան հովտից դուրս գալը՝ մարդկային ցեղի համար միշտ նախապատիւ է ու գերադաս, գլխաւորելով նրա սպասումների փութանակի լուծում սպասող ցուցակը:

  • «Տասն կուսանաց»-ի խորհրդալից արարողութիւն Ատրպատականի հայոց թեմում
    «Տասն կուսանաց»-ի խորհրդալից արարողութիւն Ատրպատականի հայոց թեմում

    Քրիստոսի տնօրինական կեանքի վերջին՝ Աւագ շաբաթւայ ընթացքում, եկեղեցական հոգեթով արարողութիւնների ցուցակում իր մասնաւոր տեղով ու բարոյական խոր դասով յայտնի է Աւագ երեքշաբթի օրւայ երեկոյեան ժամերգութիւնը, որի ընթացքում կարդացւում է Յիսուսի պատմած «Տասն կուսանաց»-ի առակը, եւ տասն կոյսեր խորհրդանշականօրէն ներկայացնում են առակի անձերը, սուրբ բեմի առջեւ կանգնած, լապտեր իրենց ձեռքին: Աղջիկներից հինգը խորհրդանշում են առակում պատմւած հինգ իմաստուն կոյսերին, իսկ միւս հինգը՝ յիմար կոյսերին:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։