Հա

Համայնք

29/04/2019 - 09:50

Փերիա գաւառի «Լուսահանգիստ» սրբավայրում տեղի ունեցաւ ամենամեայ հոգեհանգստեան արարողութիւնը

Սպահանի հայոց թեմի Կրօնական խորհրդի նախաձեռնութեամբ, ամենամեայ կարգով Ս. Յարութեան տօնին յաջորդող կիրակի օրը՝ Կրկնազատկին, Փերիա գաւառի Ներքեւի Խոյգան գիւղի մօտակայքում գտնւող «Լուսահանգիստ» կոչւող սրբավայրում կատարւում է հոգեհանգստեան արարողութիւն, իսկ վերջին տարիներին մեծաթիւ ուխտաւորների մասնակցութիւնն ապահովելու նպատակով սոյն կարգը տեղի է ունենում Կրկնազատկին նախորդող ուրբաթ օրը։ «Լուսահանգիստ»-ում է գտնւում 17-րդ դարի սկզբում քրիստոնէական հաւատի ճանապարհին նահատակւած Գրիգոր Արփայեցիի շիրիմը։

«alikonline.ir» - Սպահանի հայոց թեմի Կրօնական խորհրդի նախաձեռնութեամբ, ամենամեայ կարգով Ս. Յարութեան տօնին յաջորդող կիրակի օրը՝ Կրկնազատկին, Փերիա գաւառի Ներքեւի Խոյգան գիւղի մօտակայքում գտնւող «Լուսահանգիստ» կոչւող սրբավայրում կատարւում է հոգեհանգստեան արարողութիւն, իսկ վերջին տարիներին մեծաթիւ ուխտաւորների մասնակցութիւնն ապահովելու նպատակով սոյն կարգը տեղի է ունենում Կրկնազատկին նախորդող ուրբաթ օրը։ «Լուսահանգիստ»-ում է գտնւում 17-րդ դարի սկզբում քրիստոնէական հաւատի ճանապարհին նահատակւած Գրիգոր Արփայեցիի շիրիմը։ Տեղեկացնում է Նոր Ջուղայի մեր թղթակիցը:

Ձեւաւորւած այս աւանդոյթի համաձայն, այս տարի արարողութիւնը կատարւեց ուրբաթ՝ ապրիլի 26-ի առաւօտեան, նահատակի շիրիմի վրայ կառուցւած մատուռի առջեւ, նախագահութեամբ Սպահանի հայոց թեմի առաջնորդ գերշ. Տ. Սիփան եպս. Քէչէճեանի եւ մասնակցութեամբ արժ. Տ. Խաչատուր քհնյ. Զարգարեանի, արժ. Տ. Վարդան քհնյ. Աղաբաբայեանի եւ դպրաց դասի ներկայացուցիչների։

Հոգեհանգստեան արարաողութեան աւարտին առաջնորդ Սրբազան Հայրն անդրադառնալով այն փաստին, որ Գրիգոր անունը նշանակում է արթուն պահակ, ընդգծեց, թէ այստեղ առ յաւէտ հանգիստ առած Սուրբը, ոչ միայն եղել է հաւատի արթուն պահակը, այլեւ իր խիզախ կեցւածքի ու հետեւողականութեան շնորհիւ՝ հայերի իրաւունքների պաշտպանը։ Նա իր խօսքի աւարտին շեշտեց, որ Սուրբ Գրիգոր Արփայեցին մեզ պատգամում է, թէ մեղքերով եւ զանազան խոչընդոտներով շրջապատւած այս աշխարհում հաւատի արթուն պահակը լինենք եւ մեզ պաշտպանենք թերահաւատութիւնից ու հաւատի ուրացումից, իսկ որպէս իսկական հայորդի՝ մեր պարտականութիւնները կատարենք ազգի, հայրենիքի եւ համայնքի նկատմամբ։

Վերջում ուխտաւորներն աղօթեցին, մոմ վառեցին եւ խունկ ծխեցին նահատակի գերեզմանի վրայ, ապա գարնանային հաճելի օրը վայելեցին բնութեան գրկում հանգրւանելով։

Սրբազան Հօրն այս ուխտագնացութեան ընթացքում ընկերակցում էր՝ թեմի Կրօնական խորհրդի ատենապետ Վարուժ Մովսիսեանը։

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։