Հա

Համայնք

08/11/2016 - 10:20

Հոգեհանգիստ եւ յուշերեկոյ՝ ընկեր Սեպուհ Յովհաննիսեանի յիշատակին

Ի յիշատակ ազգային-հասարակական անբասիր գործիչ, Հայ մշակութային «Արարատ» կազմակերպութեան հիմնադիր անդամ՝ ընկեր Սեպուհ Յովհաննիսեանի (մահացած յուլիսի 29-ին ԱՄՆ-ում), «Արարատ» կազմակերպութեան Կենտրոնական վարչութեան նախաձեռնութեամբ՝ ուրբաթ հոկտ. 28-ի առաւօտեան, Ս. Սարգիս եկեղեցում կատարւեց հոգեհանգիստ:

Ի յիշատակ ազգային-հասարակական անբասիր գործիչ, Հայ մշակութային «Արարատ» կազմակերպութեան հիմնադիր անդամ՝ ընկեր Սեպուհ Յովհաննիսեանի (մահացած յուլիսի 29-ին ԱՄՆ-ում), «Արարատ» կազմակերպութեան Կենտրոնական վարչութեան նախաձեռնութեամբ՝ ուրբաթ հոկտ. 28-ի առաւօտեան, Ս. Սարգիս եկեղեցում կատարւեց հոգեհանգիստ: Նոյն օրը երեկոյեան, մարզաւանի Ս. Խաչ մատուռում մոմավառութիւն եւ խնկարկում կատարւեց հանգուցեալ ընկերոջ յիշատակին: Այնուհետեւ «Վաչիկ Ղարաբէգեան» սրահում տեղի ունեցաւ յուշերեկոյ:
161108c04aՅուշերեկոն սկսւեց Կենտրոնական վարչութեան նախագահ ընկ. Գէորգ Վարդանի խօսքով: Ցուցադրւեց պատկերներ ընկեր Սեպուհ Յովհաննիսեանից, ապա ընկեր Թովմաս Թովմասեանն ու ընկեր Վագրիկ Մանուկեանը ներկայացրին ընկեր Սեպուհի կեանքն ու գործունէութիւնը: Ընթերցւեց «Ալիք» հաստատութեան եւ օրաթերթի ուղերձը՝ նւիրւած ընկերոջ յիշատակին:
Գեղարւեստական բաժնում «Մաշտոց» երգչախումբը, մայեստրօ Ռազմիկ Օհանեանի ղեկավարութեամբ եւ դաշնակահար Արին Աւանէսեանի նւագակցութեամբ, կատարեց «Սի՛րտ իմ, սասանի՛ր» «Տէ՛ր, կեցո՛», «Ո՜վ Հայոց աշխարհ» եւ «Արփա Սեւան» երգերը՝ Կարինէ Մուրադեանի եւ Զօրիկ Ֆարհադեանի մենակատարութեամբ:
Մեներգեց Մխիթար Վարդինը, ելոյթ ունեցաւ փոքրիկ քնարահար Մերեդիթ Մովսիսեանը, ասմունքեցին Հ.Մ.Ա.Կ.-ի Արւեստից միութեան «Երիտասարդական-պատանեկան» գրական խմբի անդամներ՝ Փրենի Գոլազիզեանը, Թենի Աւագեանը, Էմիլ Սէթխանեանը եւ Արգին Արիստակէսեանը: Յուշերեկոն աւարտւեց համեստ ընդունելութեամբ:
Կենտրոնական վարչութեան խօսք՝

 

Ազգային ոգի-ահա՛ գերագոյն հերոսը, միա՛կը, մեր պատմութեան անիւը դարձնող, մեր հաւաքական ճակատագիրը վարող հերոսը:
Էապէս միայն դա է գործում մեր պատմութեան մէջ եւ պատմութեան համար: Անհատ հերոսներն ոչ այլ ինչ են, եթէ ոչ անձնաւորողներն այդ ոգու:
Մեռնում են հերոսները-Մանուէլները, Մուշեղները, Վարդանները՝ մնում է, սակայն, նրանց ոգին, որն իր մարմնաւորումը գտնելով այլ հայերի մէջ՝ շարունակում է ապրել ու ներգործել:
Եւ, հէնց սրանում է հերոսների անմահութիւնը: Չէ՛, չի մեռնում հերոսը, նա միայն իր անօթն ու անունն է փոխում:

ԳԱՐԵԳԻՆ ՆԺԴԵՀ

 

Յիշատակդ արդար, երթդ ի լոյս՝ ընկեր Սեպուհ Յովհաննիսեան:
Հայ մշակութային «Արարատ» կազմակերպութեան ընտանիքի անունից մեր երախտիքի ու շնորհակալութեան բարի աղօթքներն ենք ուղղում հոգուդ արդար յիշատակին եւ առ Բարձրեալն Աստւած հայցում ենք արդար մեծութեանդ՝ հոգու խաղաղութիւն...
Հետաքրքիր արարած ենք ՄԱՐԴ կոչւածներս... հոգեհանգստեան արարողութիւններին ու յուշերեկոների ընթացքում մտածում ենք աշխարհի անցողականութեան մասին եւ գեղեցիկ բանաձեւեր ենք հիւսում մարդկային արժէքների գերակայութեան մասին: Բանաձեւեր, որոնց մոռացութեան ենք տալիս մի քանի ժամ անց...
161108c04bՏեսնում ե՞ս Մեծ Ընկեր, երկար ժամանակ չի անցել յուլիսի 4-ից, երբ ինչպէս միշտ հէնց քո ու ընկերներիդ հմուտ ձեռքերով տնկած տունկի, բայց արդէն հաստաբուն ծառ դարձած կաղնու 72-րդ տարեդարձն էիր շնորհաւորում եւ բարեմաղթանքների ու քաջալերանքի խօսքեր էիր ասում քո ու ընկերներիդ հերթապահութեան հանգամանքը փոխարինած Կենտրոնական վարչութեան նախագահին եւ մտերմիկ զրոյց էիր ծաւալում հազարաւոր կիլոմետրներ հեռաւորութիւնից, բայց եւ այնքան հարազատ ու մօտիկ, ինչպէս քո հզօր ձեռքերով փոքր եղբօրդ գրկած կը շշնջայիր նրա ականջին...
Իսկ այսօր, կեանքի դառն իրականութեան թելադրմամբ, հաւաքւած ենք այստեղ քո բարեմասնութիւններն յիշելու եւ քեզ բարի երթ մաղթելու դէպի յաւերժութիւն տանող գնացքի այս սահմռկեցուցիչ կանգառում:
Եւ սա «կեանք» է կոչւում...
Անկեղծ ասած՝ մեղք պիտի համարել, եթէ անընդհատ յիշենք անցեալը: Միայն անցեալն յիշելով, Մեծ Ընկեր, արգելած կը լինենք ներգործուն անհատականութեանդ ու բանիմաց ոճիդ ազդեցութեան շարունակութիւնը տեսնելու ապագայում ընթանալիք գործընթացում: Ընդարձակ էր քո մտահորիզոնն ու անծայր՝ մարդկային փիլիսոփայութեան համար գծած քո սահմանները: Անտեսած կը լինենք քաջութեամբ ծաւալած քո ու ընկերներիդ պայքարը մարդկային թուլութիւնների ու ծառայողական ղեկավարման բացթողումների դէմ, եթէ եզրափակւած համարենք քո գործունէութիւնը...
Թէեւ ընկերային կեանքի նորմերով անծանօթներ պիտի համարւենք մէկս միւսին, բայց միութենական պատկանելիութեան գերակայութեամբ այնքան հարազատ ենք իրար, որ այսօր՝ ցանկացած «արարատական» երախտապարտ է զգում իրեն՝ քո ու քո նման տիտանների ծաւալած գործունէութեան համար:
Արի չխօսենք քո բարեմասնութիւնների մասին, դրա համար խօսողներ շատ կան: Քանզի դու անդամ ես եղել մեր ժողովրդի այն փաղանգին, ովքեր ճիշտ գնահատելով պահի կարեւորութիւնը եւ իրանահայ համայնքի կարիքները՝ լծւել են հեռանկարային այն ծանր աշխատանքին, որն ապահովելով Ձեր օրերի ներկան, մեզ ընծայել է մինչ այսօր շարունակւող ու դեռ մինչեւ հեռու ապագան երկարող հայապահպանման ուղին:
Թոյլ տուր խօսենք քեզ փոխարինած սերնդի մասին:
Սիրելի ընկեր Սեպուհ, մենք այնքան ծանօթ ենք իրար, որ նոյն հզօրութեամբ այսօր եւս գիտակցում ենք մեզ հասած աւանդի կարեւորութիւնը...
Սիրելի ընկեր Սեպուհ, մենք այնքան ծանօթ ենք իրար, որ նոյն համոզումով ընդլայնել ենք փորձում մեր ժողովրդի զարգացման հորիզոնը...
Սիրելի ընկեր Սեպուհ, մենք այնքան ծանօթ ենք իրար, որ նոյն հարազատութեամբ մագնիսացած հաւաքագրւում ենք մեր ժողովրդին ծառայելու վեհ նպատակների շուրջ...

161108c04c

Թոյլ տուր ընկերական անկեղծութեամբ խոստովանել ու նոյն համեստութեամբ վերանորոգել քո ու ընկերներիդ ձեռամբ շարադրւած մեր «արարատական»-ի ուխտը՝
Շարունակելու ենք 72 տարիների հայկական խրոխտ քայլքը, եւ «Արարատ»-եան անխախտ կամքով նւաճելու ենք մարզամշակութային նորանոր գագաթներ...
Յարգանք քեզ, որ մաս ես կազմել պատմութեան անկիւնադարձային այն «Սկիզբը» կերտողներին, որ քո ժամանակներում՝ «ներկայ», «այսօր» արդէն՝ «անցեալ», բայց դեռ վաղը՝ «ապագայ» որակմամբ, պիտի շարունակւի. եւ դա ոչ այլ ինչ էր քան՝ մեր ժողովրդի կամքը ներկայացնող ՀԱՅԿԱԿԱՆ ՅԱՂԹԱ-ԿԱՆ ԵՐԹԸ...
Հոգուդ խաղաղութիւն Մեծ Ընկեր՝ կը փայփայենք Ձեր վեհ գաղափաներն ու դրանք հարստացնելով կը յանձնենք մեզ փոխարինող՝ գալիք սերնդին: Չէ՞ որ հէնց «Սերնդափոխութեան» գաղտնիքով էք յաւերժացրել Ձեր «Սրբազան ուխտը»...
Յիշատակդ արդար, երթդ ի լոյս՝ Մեծ Ընկեր:

 

Հայ մշակութային «Արարատ» կազմակերպութեան
Կենտրոնական վարչութիւն
28 հոկտեմբերի 2016

Յարակից լուրեր

  • Իր աշխատանքներն սկսեց Հ.Մ.Ա.Կ.-ի 28-րդ Պատգամաւորական ժողովը
    Իր աշխատանքներն սկսեց Հ.Մ.Ա.Կ.-ի 28-րդ Պատգամաւորական ժողովը

    Երէկ երեկոյեան փետրւարի 19-ին, «Արարատ» մարզաւանի «Վաչիկ Ղարաբէգեան» սրահում կազմակերպութեան հիմնով կատարւեց Պատգամաւորական ժողովի պաշտօնական բացումը, որի ժամանակաւոր դիւանի ընտրութիւնից յետոյ, գործող Կենտրոնական վարչութեան նախագահ ճրտգ. Գէորգ Վարդանը համապարփակ զեկոյց ներկայացրեց կազմակերպութեան զանազան միութիւնների եւ մասնաճիւղերի ներքին եւ արտաքին մասշտաբով ծաւալած երկամեայ աշխատանքների մասին, ընդգծելով որ բոլոր աշխատանքների նպատակը մէկն է՝ հայեցի, ազգային ոգով դաստիարակել հայ նոր սերնդին, եւ միշտ վեր դասել ազգային շահերը:

  • Հոգեհանգստեան արարողութիւն
    Հոգեհանգստեան արարողութիւն

    Ուրբաթ 15 փետրւար 2019-ի առաւօտեան Թեհրանի մեր բոլոր եկեղեցիներում յաւարտ Ս. եւ անմահ պատարագի տեղի ունեցաւ յատուկ հոգեհանգստեան արարողութիւն Արցախի ազատագրական պայքարի եւ յատկապէս Բաքւում եւ Սումգայիթում նահատակւած մեր անմեղ զոհերի հոգիների խաղաղութեան համար։

  • Աւելի քան 600 աշակերտների մասնակցութեամբ՝ բոցավառւեց 43-րդ Համադպրոցական խաղերի ջահը
    Աւելի քան 600 աշակերտների մասնակցութեամբ՝ բոցավառւեց 43-րդ Համադպրոցական խաղերի ջահը

    Հինգշաբթի, յունւարի 10-ին, «Արարատ» մարզաւանի «Սասունցի Դաւիթ» սրահում բացումը կատարւեց 43-րդ Համադպրոցական խաղերի:

  • Հոգեհանգստեան պաշտօն եւ ցուցահանդէս՝ Փերիոյ Կրթ. միութեան հիմնադրման 90-ամեակի առթիւ
    Հոգեհանգստեան պաշտօն եւ ցուցահանդէս՝ Փերիոյ Կրթ. միութեան հիմնադրման 90-ամեակի առթիւ

    Փերիոյ Կրթ. միութեան հիմնադրման 90-ամեակի յանձնախմբի նախաձեռնութեամբ, սոյն յոբելեանական առիթի նշման շրջագծում, հինգշաբթի՝ 2018 թւականի դեկտեմբերի 20-ի առաւօտեան ժամը 10,00-ին, Նոր Ջուղայի Ս. Յովհաննու Կարապետ եկեղեցում տեղի ունեցաւ հոգեհանգստեան պաշտօն՝ ի յիշատակ յոբելեար միութեան կեանքից հեռացած անդամ-ուհիների եւ նոյն միութեան ու Փերիոյ գաւառի նախկին հիւանդանոցի բարերարների։

  • 1988-ի Հայաստանի աւերիչ երկրաշարժի զոհերի յիշատակին հոգեհանգիստ՝ Նոր Ջուղայում
    1988-ի Հայաստանի աւերիչ երկրաշարժի զոհերի յիշատակին հոգեհանգիստ՝ Նոր Ջուղայում

    Սպահանի հայոց թեմի Կրօնական խորհրդի նախաձեռնութեամբ, շաբաթ՝ 2018 թ. դեկտ. 8-ի երեկոյեան, Նոր Ջուղայի Ս. Գէորգ եկեղեցում մատուցւած կիրակնամուտի արարողութեան աւարտին, թեմակալ առաջնորդ գերշ. Տ. Սիփան եպս. Քէչէճեանի նախագահութեամբ ու հոգեւորականաց դասի մասնակցութեամբ, 1988 թ.-ի Հայաստանի աւերիչ երկրաշարժի 30-ամեակի առիթով, հոգեհանգստեան պաշտօն տեղի ունեցաւ՝ սոյն աղէտի զոհերի յիշատակին։

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։