Հա

Համայնք

06/12/2016 - 11:10

Թ. Հ. Թ. 15-րդ շրջանի Պատգամաւորական ժողովի վերջին երկու նիստերը

Այսու համայնքի սիրելի ժողովրդին տեղեկացնում ենք, որ թւականիս նոյեմբերի 1-ին եւ 2-ին, ազգային առաջնորդարանի դահլիճում գումարւեց Պատգամաւորական ժողովի 24-րդ եւ 25-րդ նիստերը, որով եւ իր աւարտին հասաւ 15-րդ Պատգամաւորական ժողովի քառամեայ գործունէութեան ժամանակաշրջանը:

Հաղորդագրութիւն թիւ 12

 

Այսու համայնքի սիրելի ժողովրդին տեղեկացնում ենք, որ թւականիս նոյեմբերի 1-ին եւ 2-ին, ազգային առաջնորդարանի դահլիճում գումարւեց Պատգամաւորական ժողովի 24-րդ եւ 25-րդ նիստերը, որով եւ իր աւարտին հասաւ 15-րդ Պատգամաւորական ժողովի քառամեայ գործունէութեան ժամանակաշրջանը:
Ժողովը նախագահում էր Թեհրանի հայոց թեմի առաջնորդ Տ. Սեպուհ արք. Սարգսեանը, ատենապետութեամբ՝ պարոնայք Գէորգ Վարդանի եւ Նորայր Արամեանի: Ժողովին ներկայ էին Թեմական եւ Կրօնական խորհուրդները եւ Հաշւեքննիչ մարմինը: Տէրունական աղօթքից եւ պատգամաւորների թւային պատկերը ստուգւելուց յետոյ՝ ժողովն ընթացաւ նախօրօք ճշտւած օրակարգով:
24-րդ նիստում նախ Թ. Հ. Թ. Թեմական խորհրդի նիւթականի պատասխանատուի միջոցով ներկայացւեց 1.1.1395-ից առ 29.12.1395 թւականի նախահաշիւը, որը պարունակում էր իրանական ընթացիկ տարում համայնքային աշխատանքների իրականացման համար նախատեսւած ծախսերն ու գանձւելիք գումարները եւ յատկացումները, որը կազմում է տարեկան բիւջէն:
Ապա պատգամաւորներին առիթ ընձեռւեց ուղղել իրենց հարցումներն ու առաջարկները՝ ներկայացւած բիւջէի վերաբերեալ: Արտայայտութիւնների ընթացքում յատկապէս ընդգծւեց այն պարագան, որ առաջիկայում հարկաւոր է ունենալ յստակ մշակւած տնտեսական ծրագիր՝ ազգապատկան կալւածներից լաւագոյն կերպով օգտագործելու նպատակով եւ դրանք դարձնել հասութաբեր՝ նիւթական վիճակը բարելաւելու համար: Պատգամաւորական ժողովի Տնտեսական յանձնաժողովի զեկոյցը ունկնդրելուց եւ երկար քննարկումներից յետոյ հաստատւեց Թեմական խորհրդի ներկայացւած բիւջէն՝ 26 թեր, 1 դէմ եւ 9 ձեռնպահ պատկերով:
Պատգամաւորներն առիթ ունեցան իրենց առաջարկութիւններով ու տեսակէտներով քննարկել եւ ինքնաքննադատութեան ենթարկել Պատգամաւորական ժողովի չորսամեայ գործունէութիւնը եւ դրական ու բացասական կողմերը:
Ժողովն իր աշխատանքը շարունակեց նոյեմբերի 2-ին, որը հանդիսացաւ վերջին եւ 25-րդ նիստը եւ կրկին պատգամաւորները իրենց արտայայտութիւնների օրակարգի գլխի տակ դրսեւորեցին իրենց խոհերը, գնահատումները եւ շնորհակալութիւնները: Հարկ է նշել, որ տւեալ նիստին ներկայ գտնւեց խորհրդարանի պատգամաւոր դոկտ. Կարէն Խանլարեանը:
Օրակարգերի յաջորդ բաժնում՝ Կրթական, բուջետային-տնտեսական եւ հասարակական-մշակութային յանձնաժողովները ներկայացրին իրենց ամփոփ զեկոյցները, որն ընդգրկում էր հայոց դպրոցների, համայնքի նիւթական եւ հասարակական խնդիրների, արտագաղթի, կալւածների, երիտասարդների ու նաեւ ապահովագրական հարցերի մասին տեղեկութիւններ ու մտահոգութիւններ:
Այնուհետեւ դիւանի միջոցով ընթերցւեց ստացւած նամակներ՝ «Արարատ» դպրոցի վերաշինութեան եւ մի շարք ազգապատկան կալւածների վաճառքի վերաբերեալ, որոնց մասին եղան քննարկումներ, տեսակէտներ ու առաջարկներ՝ լաւագոյն որոշումները կայացնելու համար: Արտայայտութիւնների ու մտքերի փոխանակման ընթացքում Թեմական խորհրդի միջոցով տրւեցին մի շարք լուսաբանական բացատրութիւններ՝ արծարծւած հարցերի կապակցութեամբ:
Վերջին օրակարգը եղաւ Պ. Ժ.-ի դիւանի զեկոյցը, որը ներկայացւեց Գէորգ Վարդանի միջոցով պարփակւած՝ 15-րդ Պատգամաւորական ժողովի կիրառած գործելաոճի եւ մի շարք հնարաւորութիւնների մասին: Ժողովի Ա ատենապետը ապա յիշեց կեանքից հեռացածներ՝ պատգամաւոր Ալբերտ Քոչարեանին եւ Հաշւեքննիչ մարմնի անդամ Գրիշ Մանուկեանին, իսկ ներկաներին մաղթեց քաջառողջութիւն ու յաջողութիւն: Դիւանի անունից արտայայտւեց նաեւ Բ ատենապետ Նորայր Արամեանը, շնորհակալութիւն յայտնելով պատգամաւորներին եւ առաւել արդիւնաւէտ աշխատանք ունենալու համար ներկաներին փոխանցեց իր առաջարկներն ու մտահոգութիւնները:
Թեմական խորհրդի ատենապետ Ռուբիկ Կարապետեանն եւս յաջողութիւն մաղթելով դիւանին եւ պատգամաւորներին՝ մատնանշեց սերտ համագործակցութեան կարեւոր հանգամանքը՝ համայնքի հարցերի ճիշտ տնօրինման նպատակով:
Ժողովի աւարտին եզրափակիչ արտայայտութեամբ հանդէս եկաւ թեմակալ առաջնորդը, ընդգծելով, որ ինքնաքննադատական մօտեցումը պատգամաւորների կողմից ինքնին Աստւածաշնչական եւ դրական է, եւ բոլորիս նպատակը մէկ է՝ ժողովրդին ծառայելը: Սրբազան Հայրը կարեւորեց Պ. Ժ.-ի կանոնադրութեան այժմէականացման անհրաժեշտութիւնը, ինչպէս եւ մեր ապրելակերպն ու գործելաոճը վերատեսութեան ենթարկելու հանգամանքները: Նա անդրադառնալով դեկտեմբերին կայանալիք Ն.Ս.Օ.Տ.Տ. Արամ Ա Վեհափառ Հայրապետի այցելութեանը, հարկ համարեց պատշաճ կերպով դիմաւորման միջոցառումներ կազմակերպել: Սրբազան Հայրը բարձր գնահատեց պատգամաւորների համբերութիւնն ու համարձակախօսութիւնը, կարեւորեց ազգային պահանջատիրութեան ոգին եւ ակնկալեց դա դարձնել մեր ազգային կեանքի հիմնական առանցքը: Վերջում, ներկայ եւ գալիք պատգամաւորներին յաջողութիւն մաղթելով՝ իր աւարտին հասաւ 15-րդ Պատգամաւորական ժողովի վերջին նիստը:


Դիւան Թ.Հ.Թ. 15-րդ Պատգամաւորական ժողովի

Յարակից լուրեր

  • «Բոլորս Իրանին ենք պատկանում». Դոկտ. Սալեհին՝ Թեհրանի ազգային առաջնորդարանում
    «Բոլորս Իրանին ենք պատկանում». Դոկտ. Սալեհին՝ Թեհրանի ազգային առաջնորդարանում

    Երէկ՝ փետրւարի 20-ին Թեհրանի հայոց թեմի ազգային առաջնորդարան են այցելել Իրանի ատոմային էներգիայի կազմակերպութեան նախագահ դոկտ. Ալի Աքբար Սալեհին եւ նրան ընկերակցող պատւիրակութիւնը:

  • Հանդիսաւոր ս. պատարագ եւ մատաղօրհնէք՝ Ս. Սարգիս Զօրավարի տօնի առիթով
    Հանդիսաւոր ս. պատարագ եւ մատաղօրհնէք՝ Ս. Սարգիս Զօրավարի տօնի առիթով

    Շաբաթ, 16 փետրւարին, Ս. Սարգիս Զօրավարի եւ իր որդու՝ Մարտիրոսի, նաեւ 14 զինակիցների յիշատակի տօնի առիթով, մատուցւեց հանդիսաւոր ս. եւ անմահ պատարագ Ս. Սարգիս եկեղեցում, պատարագեց եւ յաւուր պատշաճի քարոզեց թեմիս բարեխնամ առաջնորդ՝ գերշ. Տ. Սեպուհ Ս. արք. Սարգսեանը: Սոյն տօնը նաեւ անւանակոչութեան տօնն է Ս. Սարգիս առաջնորդանիստ մայր եկեղեցու:

  • Ողջոյն քառասնամեայ յեղափոխութեան
    Ողջոյն քառասնամեայ յեղափոխութեան

    Մարդկային կեանքը յատկանշող եւ միաժամանակ բնորոշող երեւոյթներից մին շարժումն է, յարատեւ շարժը, որ յառաջ է բերում կեանքի փոփոխութիւն, նոր մտածելակերպի ձեւաւորում եւ կեանքի նոր ապրելակերպ ու գործելաոճ. ընկերային թէ քաղաքական, մշակութային թէ հոգեւոր ասպարէզներում յաջողութիւն, ժողովուրդները նոր հեռանկարով ու յոյսով պարուրող շարժումը դառնում է իրական ու իրաւական կեանք ունեցող երեւոյթ երբ իր մեկնակէտն ու վախճանակէտը ժողովուրդն է, հարազատ ժողովուրդը իր անցեալով, ներկայով ու ապագայով։ 

  • Առաջնորդ Սրբազանը մասնակցում է Միջին Արեւելքի եկեղեցիների խորհրդի Գործադիր վարչութեան ժողովին, 21-24 յունւար 2019 Աթշանէ ասորիների պատրիարքարանում
    Առաջնորդ Սրբազանը մասնակցում է Միջին Արեւելքի եկեղեցիների խորհրդի Գործադիր վարչութեան ժողովին, 21-24 յունւար 2019 Աթշանէ ասորիների պատրիարքարանում

    Ինչպէս նախօրօք յայտնած էինք թեմիս առաջնորդ գերշ. Տ. Սեպուհ Ս. արք. Սարգսեան յունւարի 21-24 2019-ին Լիբանանում մասնակցեց Միջին Արեւելքի եկեղեցիների խորհրդի Գործադիր վարչութեան տարեկան ժողովին, որը գումարւեց Ասորի Ուղղափառ եկեղեցու պատրիարքարանում Աթշանէ հիւրընկալութեամբ Ասորի եկեղեցու հոգեւոր պետ նորին սրբութիւն Մար Աֆրամ Բ. Պատրիարքի։

  • Իրանում ՀՀ դեսպանութեան նախաձեռնութեամբ նշւեց ՀՀ Բանակի 27-ամեակը
    Իրանում ՀՀ դեսպանութեան նախաձեռնութեամբ նշւեց ՀՀ Բանակի 27-ամեակը

    Հայաստանի Հանրապետութեան Բանակի օրը՝ յունւարի 28-ը նշւում է ոչ միայն Հայաստանում, այլեւ իւրաքանչիւր երկրում, ուր ՀՀ-ն ունի դեսպանատուն եւ պաշտօնական ներկայացուցչութիւն:

    Իրանում ՀՀ դեսպանութեան նախաձեռնութեամբ, երէկ յունւարի 28-ի երեկոյեան «Արարատ» մարզաւանի «Վաչիկ Ղարաբէգեան» սրահում կազմակերպւել էր իւրայատուկ միջոցառում նւիրւած ՀՀ Բանակի կազմաւորման 27-ամեակին:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։