Հա

Համայնք

08/12/2016 - 09:50

ՅԻՇԱՏԱԿ - Ալիս Գասպարեան-Շահմուրադեանի յիշատակին (Մահւան քառասնօրեակի առիթով)

Երբ հողին են յանձնում մէկ սիրելիի, ակամայից մտածում ես թէ՛ նրա եւ թէ՛ նրա ապրած կեանքի մասին եւ այս յետադարձ հաշւարկման մէջ մտածում ես որ այս սիրելին ինչպիսին էր եւ ի՞նչ հետք թողեց իրենից իր ապրած հաւաքականութեան մէջ:

Երբ հողին են յանձնում մէկ սիրելիի, ակամայից մտածում ես թէ՛ նրա եւ թէ՛ նրա ապրած կեանքի մասին եւ այս յետադարձ հաշւարկման մէջ մտածում ես որ այս սիրելին ինչպիսին էր եւ ի՞նչ հետք թողեց իրենից իր ապրած հաւաքականութեան մէջ:
Մարդկային կեանքում կան եւ լինում են բազում երեւոյթներ, որոնք չեն պահանջում մեզանից տիրապետել որեւէ գիտութեան, չեն գնւում դրամով, որեւէ շահի վրայ չեն խարսխւած եւ չեն իրականանում շողոքորթութեամբ, այլ հակառակը դա այն ձեռքբերումն է, որ առանց վերը նշւած պայմանների ընդունելի է լինում բոլորի կողմից եւ արժանանում բոլորի անկեղծ յարգանքին: Այս սակաւաթիւ անհատները իրենց պարզ ու վճիտ հոգով շատ հեշտ կարողանում են առանց որեւէ դժւարութեան տեղ գրաւել բոլորի մօտ, նրանք մեծի հետ մեծ, եւ փոքրի հետ փոքրանալու կարողութեամբ են օժտւած, նրանց ներկայութիւնը գունաւորում եւ զարդարում է մթնոլորտը, հաճելի զգացում են պարգեւում շրջապատին, համեմում, համ ու հոտ են տալիս ներկայ եղած հաւաքականութիւններին, թւում է որ մի քանի հարիւր տարին մէկ անգամ են աշխարհ գալիս նման անհատներ:
Ահա այդպիսի անձնաւորութիւններից մէկն էր Ալիս Գասպարեան-Շահմուրադեանը, ով ծնւել էր 1934 թւականին Թաւրիզում, ուրմիահայ մի ընտանիքում, ընտանիքի կրտսեր զաւակն էր: Տարրական կրթութիւնը ստացել էր Թաւրիզի «Թամարեան» երկսեռ դպրոցում, ապա միջնակարգ կրթութիւնը «Փարւին» աղջկանց դպրոցում: 12-ամեայ դպրոցն աւարտելուց յետոյ 1952 թւականին ընդունւել էր Թաւրիզի Ամերիկեան միսիոներների հիւանդանոց, թէ՛ սովորելու եւ թէ՛ միաժամանակ աշխատելու լաբորատորիայի բաժնում:
1962 թւականին մեկնել էր Ամերիկա, Կալիֆորնիա նահանգի Թորլաք քաղաք, աշխատանքի հրաւիրւել «Էմմանուէլ հոսփիթալ» հիւանդանոց, սակայն մի քանի տարի յետոյ չդիմանալով ծնողների կարօտին վերադարձել էր Իրան եւ 1965 թւականին ամուսնացել Հրայր Շահմուրադեանի հետ՝ բախտաւորւելով 2 աղջիկ զաւակներով:
Նա սիրւած անձնաւորութիւն էր թէ՛ իր շրջապատում եւ թէ՛ իր աշխատանքի վայրում: Աշխատանքին զուգընթաց 18 տարեկանից անդամակցել էր Թաւրիզի Հայ Օգնութեան միութեանը, շուրջ 62 տարիներ գործօն անդամուհին էր եղել եւ 70-ական թւականներին երկու նստաշրջան ընտրւել էր նոյն միութեան վարչութեան անդամ: 80-ական թւականներին մի քանի նստաշրջան ընտրւել եւ եղել էր Թաւրիզի հայոց ազգային դպրոցների ծնողական խորհրդի ժրաջան եւ գործօն անդամուհի: 1991 թւականից սկսեալ շուրջ 19 տարիներ շարունակ եղել էր Թաւրիզի հայոց եկեղեցիների կանանց Խնամակալ մարմնի անդամ, զբաղեցնելով նախագահուհու պաշտօնը մինչեւ 2010 թւականը, գլխաւոր դեր ունենալով Թաւրիզի եկեղեցիների բարեզարդման գործում: Այնուհետեւ մինչեւ իր մահը, առանց բացակայութեան ներկայ է եղել եկեղեցական բոլոր արարողութիւններին լաւագոյնս գիտակցելով հայ եկեղեցու ունեցած կարեւորագոյն դերն հայ ժողովրդի կեանքում:
Տիկին Ալիսի իւրայատուկ բնաւորութիւնը նրան տարբերում էր բոլորից եւ դա նրա անկեղծ մարդասիրութիւնն էր, անկեղծ ուշադրութիւնը, անկեղծ սէրը, որը ցուցաբերում էր իւրաքանչիւր անհատի թէ՛ մեծի եւ թէ՛ փոքրի հանդէպ, մէկ խօսքով օժտւած էր մարդկային լաւագոյն արժանիքներով: Անչափ հաճոյախօս էր եւ ընդհանրապէս այնպէս էր թւում, որ անհոգ է նա, սակայն վստահ, որ նա էլ ունէր իր մտահոգութիւնները, ինչպէս իւրաքանչիւր անձ այս Երկիր մոլորակի վրայ, սակայն երբեւիցէ եւ ոչ մէկի մասնակից չդարձրեց: Միշտ բոլորը նրան տեսան ժպտերես եւ անչափ ուշադիր բոլորի հանդէպ, անչափ բարի եւ լաւ ընկեր էր, վշտակից եւ ցաւակից էր բոլորին եւ անկեղծ ուրախ բոլորի յաջողութիւններով: Ունէր հիանալի զաւեշտախառն պատմելու կարողութիւն, որով դառնում էր հաւաքականութիւնների փնտրւած եւ սիրւած անձը: Դաստիարակեց զաւակներ, ովքեր նոյնպէս գործօն անհատներ են եկեղեցական եւ ազգային կեանքում:
Իր մահկանացուն կնքեց 2016 թւականի նոյեմբերի 7-ին, սրտի տագնապի հետեւանքով, սուգի մատնելով իր շրջապատին եւ սիրողներին:
Իր անսպառ եռանդը, լի կեանքով եւ քաղցր յուշերը միշտ վառ կը մնայ եւ կը ջերմացնի բոլոր նրանց սրտերը եւ հոգիները, ովքեր ճանաչել եւ սիրել են նրան:
Հողը թեթեւ եւ յիշատակը անմոռաց:

ԱՐՄԻՆԷ ՅՈՎՍԷՓԵԱՆ-ՎԱՀՐԱՄԵԱՆ

Յարակից լուրեր

  • «Տասն կուսանաց»-ի խորհրդալից արարողութիւն Ատրպատականի հայոց թեմում
    «Տասն կուսանաց»-ի խորհրդալից արարողութիւն Ատրպատականի հայոց թեմում

    Քրիստոսի տնօրինական կեանքի վերջին՝ Աւագ շաբաթւայ ընթացքում, եկեղեցական հոգեթով արարողութիւնների ցուցակում իր մասնաւոր տեղով ու բարոյական խոր դասով յայտնի է Աւագ երեքշաբթի օրւայ երեկոյեան ժամերգութիւնը, որի ընթացքում կարդացւում է Յիսուսի պատմած «Տասն կուսանաց»-ի առակը, եւ տասն կոյսեր խորհրդանշականօրէն ներկայացնում են առակի անձերը, սուրբ բեմի առջեւ կանգնած, լապտեր իրենց ձեռքին: Աղջիկներից հինգը խորհրդանշում են առակում պատմւած հինգ իմաստուն կոյսերին, իսկ միւս հինգը՝ յիմար կոյսերին:

  • Միջինքի աւանդական հաւաքոյթը Թաւրիզում Եկեղեցիների Խնամակալ մարմնի կազմակերպութեամբ
    Միջինքի աւանդական հաւաքոյթը Թաւրիզում Եկեղեցիների Խնամակալ մարմնի կազմակերպութեամբ

    Հինգաբթի, 11 ապրիլ 2019 թ.-ին, երեկոյեան ժամը 8:30-ին, կազմակերպութեամբ Թաւրիզի եկեղեցիների Կանանց Խնամակալ մարմնի, տեղի ունեցաւ Միջինքի աւանդական հաւաքոյթը, հովանաւորութեամբ Ատրպատականի հայոց թեմի առաջնորդ գերշ. Տ. Գրիգոր Ս. եպս. Չիֆթճեանի եւ Թեմական խորհրդի:

  • Հ.Օ.Մ.-ի Թաւրիզի «Տաթեւ» պարախումբը տարեկան գեղեցիկ ելոյթով տօնեց իր հնգամեակը
    Հ.Օ.Մ.-ի Թաւրիզի «Տաթեւ» պարախումբը տարեկան գեղեցիկ ելոյթով տօնեց իր հնգամեակը

    «Տաթեւ»-ը արդէն տօնում է իր հիմնադրութեան հնգամեակը, բարձր հովանաւորութեամբ Ատրպատականի Հայոց թեմի առաջնորդ գերշ. Տ. Գրիգոր Ս. եպս. Չիֆթճեանի եւ Թեմական խորհրդի եւ կազմակերպութեամբ Հ.Օ.Մ.-ի Թաւրիզի մասնաճիւղի վարչութեան, գեղարւեստական ղեկավարութեամբ Կարինէ Մանուչերեանի: 

  • Սիրահարների տօնի առիթով ուրախ երեկոյ՝ Թաւրիզի Տաթեւ պարախմբի նախաձեռնութեամբ
    Սիրահարների տօնի առիթով ուրախ երեկոյ՝ Թաւրիզի Տաթեւ պարախմբի նախաձեռնութեամբ

    Սիրահարների տօնի հմայքը աւելացնող եւ երիտասարդութեան սիրտը գրաւող ծրագիր եղաւ, 15 Փետրւար  2019-ին, Ազգային առաջնորդարանի «Համազասպ Ոսկանեան սրահում կայացած ուրախ երեկոն, կազմակերպութեամբ Հ.Օ.Մ.-ի Թաւրիզի մասնաճիւղի հովանու ներքոյ գործող «Տաթեւ» պարախմբի:

  • Թաւրիզում օծւեցին Մաղարդայ Սբ. Ստեփանոս Նախավկայի վանքի նոր կանթեղները
    Թաւրիզում օծւեցին Մաղարդայ Սբ. Ստեփանոս Նախավկայի վանքի նոր կանթեղները

    Ատրպատականի հայոց թեմի վանքերի բարեզարդման հանդէպ բարեպաշտ նախանձնախնդրութեան արտայայտութիւն դարձաւ կիրակի 3 փետրւար 2019-ին, Թաւրիզի Լիլաւա հայաշատ թաղամասի Սուրբ Սարգիս եկեղեցում, յընթացս ս. պատարագի տեղի ունեցած հանդիսաւոր արարողութիւնը, երբ օծւեցին Սբ. Ստեփանոս Նախավկայի վանքի տաճարի նոր կանթեղները: 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։