Հա

Համայնք

Կիրակի, 02 Յուլիսի 2017 12:00

Սրբոց Հռիփսիմեանց տօնը Ղազւինում

Հայաստանեայց Առաքելական Ս. Եկեղեցու հաւատքի մեծագոյն վկայուհիներից եւ նահատակներից՝ Սրբոց Հռիփսիմեանց կոյսերի տօնը այս տարի էլ հանդիսաւորապէս յիշատակւեց ու տօնւեց Ղազւին քաղաքի Ս. Հռիփսիմէի անունը կրող եկեղեցում:

Հայաստանեայց Առաքելական Ս. Եկեղեցու հաւատքի մեծագոյն վկայուհիներից եւ նահատակներից՝ Սրբոց Հռիփսիմեանց կոյսերի տօնը այս տարի էլ հանդիսաւորապէս յիշատակւեց ու տօնւեց Ղազւին քաղաքի Ս. Հռիփսիմէի անունը կրող եկեղեցում: 

Այս տարի տեղական հասկանալի պայմանների բերումով, սրբուհիների տօնը մի քիչ յետաձգումով կատարւեց: Սակայն, անցնող տարիների նման այս անգամ էլ թեմիս Կրօնական Խորհրդի կազմակերպութեամբ եւ եկեղեցիների եկեղեցական խորհրդների համագարծակցութեամբ դէպի Ղազւին միօրեայ ուխտագնացութիւնը յաջողապէս իրականացւեց: 

Թւականիս ուրբաթ 30 յունիսի առաւօտեան վաղ ժամերից սկսեալ արդէն ուխտաւորները ժամանել էին Ղազւին եւ լցրել՝ թէ՛ Ս. Հռիփսիմէի եկեղեցին եւ թէ նրա շրջափակը: «Գիշերային» եւ «Առաւօտեան» ժամերգութիւններին հանդիսապետեց առաջնորդական փոխանորդ՝ գերշ. Տ. Մակար Ս. եպս. Աշգարեանը, ընկերակցութեամբ շրջանի այցելու հոգեւոր հովիւ՝ արժ. Տ. Սահակ քհնյ. Խոսրովեանին: Իսկ ժամը 10:00-ին օրւայ հանդիսաւոր ս. պատարագը մատուցեց թեմիս առաջնորդ՝ գերշ. Տ. Սեպուհ. Ս. արք. Սարգիսեանը: Պատարագի երգեցողութիւնը կատարեց ուխտագնացութիւնների յատուկ երգեցիկ խումբը, ղեկավարութեամբ՝ տիկ. Օֆիկ Մելիքեանի: 

Ուխտաւորների շարքին ներկայ էր նաեւ Իրանում Հայաստանի մեծարգոյ դեսպան՝ Արտաշէս Թումանեանը իր ազնւափայլ տիկնոջ հետ միասին:

Առաջնորդ Սրբազան Հայրը իր քարոզում ողջունելուց յետոյ Ղազւինի փոքրաթիւ համայնքն ու նրա ներկայացուցիչներին, ներկայ ուխտաւորների հոծ բազմութեանը ու յատկապէս պրն. դեսպանին, մատնանշելով, թէ ի՜նչ ուրախութիւն եւ միաժամանակ հպարտութիւն է, երբ մեր մէջ մշտատեւ ունենք եւ կունենանք ֆիզիկական ներկայութիւնը նաեւ մեր հայրենիքին, յանձինս՝ պարոն դեսպանին, դեսպանութեան եւ դեսպանական կազմին, Նա լայնօրէն անդրադարձաւ Ս. Հռիփսիմեանց կոյսերի կենսագրութեան, ծառայական գործունէութեան եւ նահատակութեան մասին, մէջբերումներ կատարելով մատենագիր հայրերից: Առաջնորդ Սրբազան Հայրն ասաց, թէ Հռիփսիմեանց կոյսերը մեր ժողովրդի քրիստոնէացման պատմութեան մէջ մեծապէս դերակատար են եղել: «Հռիփսիմեանք նահատակւեցին եւ իրենց արիւնով նւիրագործեցին մեր հողը: Ս. Հռիփսիմէն իր նահատակութեամբ դարձաւ խորհրդանիշը արիւնոտ հաւատքին մեր ժողովրդին եւ Հայաստանում քրիստոնէութեան պետականացմանը...: Եւ այսօր նրանց դամբարանների վրայ կառուցւած են Հայոց ճարտարապետութեան կոթող հանդիսացող զոյգ տաճարներ՝ Ս. Հռիփսիմէի եւ Ս. Գայիանէի, որոնք վեհապանծօրէն Էջմիածին քաղաքի մուտքին ողջունում են բոլոր հաւատացեալներին» ասաց Սրբազան Հայրը: 

Մի այլ տեղ իր քարոզում, խօսելով հաւատի, կրօնի եւ ազգային արժէքների նկատմամբ մեր ուխտը վերանորոգելու անհրաժեշտութեան մասին, Սրբազան Հայրը յիշեցրեց, որ մեր քրիստոնէական հաւատը անքակտելիօրէն միախառնւած լինելով մեր ազգային ինքնուրոյնութեանը, դառնում է առանցքը մեր գոյութեան: 

Սրբազան Հայրը քարոզի աւարտում յարգանքով յիշեց բոլոր այն անձաձց, ովքեր Ղազւինի ցաղութում իրենց դերակատարութիւնն ու ծառայական ներդումն են ունեցել թէ՛ եկեղեցաշինութեան եւ թէ՛ ազգային, կրթական ու մշակութային տարածքներում: Նա մի անգամ եւս գնահատեց բոլորի ներկայութիւնը եւ աղօթեց, որ Աստւած բոլորի ուխտը ընդունի, ամէնքի աղօթքին պատասխանի եւ զօրացնի նրանց իրենց քրիստոնյական պատկանելիութեան մէջ: 

Պատարագից յետոյ Առաջնորդ Սրբազան Հայրը մէկ առ մէկ այցելեց  շրջափակում հաւաքւած ուխտաւորներին եւ մտերմօրէն զրուցեց նրանց հետ եւ ապա Ղազւինի եկեղեցադպրոցական հոգաբարձութեան կողմից մատուցւած կէսօրւայ ճաշին մասնակցեց իր ընկերակիցների հետ միասին եւ շուրջ երկու ժամ տեւողութեամբ եղաւ գաղութի ներկայացուցիչների հետ, գլխաւորութեամբ ատենապետ՝ պրն. Վիգէն Բարսեղեանի, եւ իր գնահատանքի ու քաջալերանքի խօսքն ու հայրական օրհնութիւնը փոխանցելուց յետոյ, հրաժեշտ տւեց նրանց ու վերադարձաւ Թեհրան:

Թ. Հ. Թ. Կրօնական խորհուրդ  

Յարակից Հրապարակումներ

  • Աղօթք եւ օրհնութիւն Ս. Սարգիս եկեղեցում
    Աղօթք եւ օրհնութիւն Ս. Սարգիս եկեղեցում

    Յուլիսի 20-ին Հ. Մ. Մ. «Նայիրի» միութեան պարի անսամբլի անդամները, նախքան իրենց դէպի Հայաստան եւ Վրաստան ուղեւորութիւնն իրենց պատասխանատուների հետ միասին ներկայ գտնւեցին Ս. Սարգիս առաջնորդանիստ Մայր եկեղեցում՝ թեմիս առաջնորդ գերշ. Տ. Սեպուհ Ս. արք. Սարգսեանի աղօթքն ու օրհնութիւնն ստանալու համար: 

  • Հանդիպում Թեհրանի ուսումնա-դաստիարակչական գերատեսչութեան տնօրինութեան հետ
    Հանդիպում Թեհրանի ուսումնա-դաստիարակչական գերատեսչութեան տնօրինութեան հետ

    Յուլիսի 5-ին թեմիս առաջնորդ՝ գերշ. Տ. Սեպուհ Ս. արք. Սարգսեանը ազգային առաջնորդարանի դահլիճում հանդիպեց Թեհրանի ուսումնա-դաստիարակչական գերատեսչութեան տնօրինութեան հետ: 

  • Ուխտագնացութիւն Սրբոց Թարգմանչացն՝ Ս. Սահակայ եւ Ս. Մեսրոպայ տօների առիթով
    Ուխտագնացութիւն Սրբոց Թարգմանչացն՝ Ս. Սահակայ եւ Ս. Մեսրոպայ տօների առիթով

    Հայաստանեայց Առաքելական Ս. Եկեղեցւոյ մեծագոյն սրբեր Ս. Սահակ եւ Մեսրոպի տօնը, այս տարի նշւեց յուլիսի 6-7-ին։ 

    Այդ առիթով թեմիս բարեխնամ առաջնորդ գերշ. Տ. Սեպուհ Ս. արք. Սարգսեանը ընկերակցութեամբ առաջնորդական փոխանորդ՝ գերշ. Տ. Մակար Ս. եպս. Աշգարեանի եւ Արաքի այցելու հոգեւոր հովիւ՝ Տ. Գրիգորիս քհնյ. Ներսէսեանի յուլիսի 6-ի առաւօտեան ժամանեց Արաք։

  • Հանդիպում եկեղեցական խորհուրդների ատենապետների հետ
    Հանդիպում եկեղեցական խորհուրդների ատենապետների հետ

    Յուլիսի 5-ին Թեհրանի հայոց թեմի առաջնորդ գերշ. Տ. Սեպուհ Ս. արք. Սարգսեանն ազգային առաջնորդարանի դահլիճում հանդիպեց Թեհրանի եկեղեցիների Եկեղեցական խորհուրդների ատենապետների հետ։ Հանդիպման ներկայ էր նաեւ Քրիստոնէական դաստիարակութեան բաժանմունքի պատասխանատու Շաքէ Եղիայեանը, որը միաժամանակ կապն է Եկեղեցական խորհուրդների հետ։

  • Հայրերի տօնը՝ Թեհրանում
    Հայրերի տօնը՝ Թեհրանում

    Տարիներ առաջ, թեմիս բարեխնամ առաջնորդ՝ գերշ. Տ. Սեպուհ Ս. արք. Սարգսեան գեղեցիկ մտայղացումն ունեցաւ, առ ի գնահատանք մեր հայ հայրերի կոչումին, առաքելութեան եւ ծառայութեան, Ս. Մեծն Ներսէս Պարթեւ Հայրապետի տօնը Թեհրանի թեմում հռչակելու իբրեւ հայ հայրերի օր եւ տօն:

Ամենաշատ ընթերցւած

Քւէարկութիւն

Ո՞ր թիմը կը յաղթի Կոնֆեդերացիաների գաւաթի մրցաշարում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։