Հա

Համայնք

02/07/2012

altՔրիստոսի Այլակերպութեան-Պայծառակերպութեան տօնը մեր եկեղեցու հինգ մեծ տաղաւարներից (մեծ տօն) մէկն է: Մեր ժողովուրդը այս տօնը նշում է յատուկ երկիւղածութեամբ եւ բարեպաշտութեամբ, իսկ կրօնական արարողութիւններից յետոյ կամ կէսօրից յետոյ էլ կատարում է հեթանոսական օրերից մեզ հասած միմեանց վրայ ջուր թափելու աւանդութիւնը, որը քրիստոնէական նշանակութիւն է ստացել. ջուրը մաքրող, սրբող յատկութիւն ունի, քրիստոնէական իմաստով այն հաւատացեալին սրբում, մաքրում է իր մեղքերից: Ժամանակին նոյն այս տօնի այլ սովորութիւններից են եղել խաղերի կազմակերպում, աղաւնիներ թռցնելը: Աղաւնին միշտ խորհրդանիշ է եղել խաղաղութեան:

Ազգագրական այս գեղեցիկ սովորութիւնները իրենց նոր քրիստոնէաբոյր յատկանիշով պահելն ու պահպանելը մեր բոլորի պարտականութիւնն է. հետեւաբար՝ մեր հայրական թելադրանքն ու պատւէրը մեր երիտասարդութեան այն է, որ գան մասնակցեն կիրակի օրւայ կրօնական արարողութեանը, Ս. Հաղորդութիւն ստանան եւ ապա եկեղեցական արարողութեան ու ս. պատարագի աւարտին եկեղեցու շրջափակում կատարեն նաեւ Վարդավառի կամ Վարդիւորի աւանդական ջրթափը՝ պատշաճութեան սահմանում եւ հայավայել ու քրիստոնէավայել ձեւով: Թելադրելի է, որ մեր միութիւններն էլ կէսօրից յետոյ կազմակերպեն նման ջրթափի աւանդական սովորութիւն՝ ի վայելում մեր երիտասարդութեան, ինչու չէ նաեւ ողջ ժողովրդի:
Շնորհաւորում ենք մեր ողջ ժողովրդի բոլոր զաւակներին Քրիստոսի Պայծառակերպութեան տօնի առիթով եւ բոլորին ցանկանում ամենայն բարիք ու աստւածային օրհնութիւն:
Մասնակցենք կրօնական եւ աշխարհիկ արարողութիւններին՝ զգաստութեամբ, պատշաճութեամբ եւ քրիստոնէավայել կերպով:

ՍԵՊՈՒՀ ԱՐՔ. ՍԱՐԳՍԵԱՆ
ԱՌԱՋՆՈՐԴ ԹԵՀՐԱՆԻ ՀԱՅՈՑ ԹԵՄԻ
1 յուլիսի 2012
Թեհրան

 
Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։