Հա

Համայնք

28/06/2012 - 11:33

Նոր Ջուղայի Հայ Մ. Մ. «Արարատ» միութեան Շահինշահրի մասնաճիւղի նորընտիր վարչութիւնը իր անդրանիկ նիստը գումարեց կիրակի, փետրւարի 19ին: Վարչութիւնը բաց քւէարկութեամբ ընտրեց իր դիւանը՝ հետեւեալ կարգով.
Պրն. Ռոբերտ Գորգի՝ նախագահ
Պրն. Վազրիկ Շմաւոնեան՝ փոխնախագահ
Տկն. Հայկուշ Անդոն՝ քարտուղար
Տկն. Մարինա Մանասէրեան՝ գոյքապահ
Պրն. Գեւիկ Շահբազեան՝ հաշւապահ եւ գանձապահ
Միութեան աշխատող միաւորներն են Մշակութային, Երէցական, Սկաուտական եւ Մարզական:

alt

Սկաուտական միաւոր

altԹւականիս մարտի 16-ից 17-ը ուրբաթ եւ շաբաթ օրերում Հ. Մ. Մ. «Արարատ» միութեան Շահինշահրի մասնաճիւղի Սկաուտական միաւորը կազմակերպել էր սկաուտական գիշերային բանակում: Արի-արենուշ, գայլիկ եւ արծւիկ սկաուտները թւով 30 հոգի էին: Բանակավայրի պատասխանատւութիւնը վստահւած էր Սկաուտական օժանդակ մարմնի անդամներին: Նորամուտ գայլիկ-արծւիկները այդ բանակումի ընթացքում առիթ ունեցան ծանօթանալու սկաուտական որոշ կանոնների, իսկ գիշերային խարոյկը իր շուրջ հաւաքեց բոլորին՝ ստեղծելով յատուկ ջերմ մթնոլորտ: Մինչեւ ուշ գիշեր սկաուտները խարոյկի շուրջ բոլորը խմբւած՝ յեղափոխական եւ ժողովրդական երգեր կատարելով, ինչպէս նաեւ գեղեցիկ ասմունքներով, հաճելի եւ ուրախ ժամեր անցկացրին: Յաջորդ առաւօտը յագեցած էր սկաուտական աշխատանքներով եւ գիտելիքների մրցութեամբ, որին մասնակցեցին բոլոր սկաուտները: Սկաուտական միաւորը աշխոյժ մթնոլորտ էր ստեղծել սկաուտների համար պարգեւելով ուրախ եւ յագեցած օրեր:
Սկաուտական միաւորը իր աշխոյժ մասնակցութիւնն է բերում համայնքի բոլոր միջոցառումներին: Ապրիլի 23-ին սկաուտների միջոցով տեղի ունեցաւ դրօշակի արարողութիւն, ինչպէս նաեւ ծաղկեպսակ դրեցին Ապրիլեան Եղեռնի զոհերի յիշատակի խաչքարին: Ջահակիր սկաուտները մինչեւ ուշ երեկոյ հերթափոխ խմբերով Ապրիլեան Եղեռնի խաչքարի մօտ հսկեցին եւ իրենց յարգանքի տուրքը մատուցեցին Բիւրաւոր Նահատակներին: Մայիսի 28-ի տօնակատարութեանը եւս նրանց միջոցով կատարւեց դրօշակի արարողութիւն:

Երէցական միաւոր

altՈւրբաթ, ապրիլի 13-ին Հ. Մ. Մ. «Արարատ» միութեան Շահինշահրի մասնաճիւղի Երէցական միաւորը կազմակերպել էր ուխտագնացութիւն՝ դէպի Լուսահանգիստ: Ուխտագնացութեան կազմակերպումը աւանդոյթ է դարձել Երէցական միաւորի կողմից: Ուխտաւորները թւով 30 հոգի էին, որոնք մասնակցեցին հոգեհանգստեան արարողութեանը, որից յետոյ գեղեցիկ բնութեան գրկում անցկացրին անմոռանալի եւ յիշարժան օր:
Մայիսի 1-ին Նոր Ջուղայի Հ. Մ. Մ. «Արարատ» միութեան Շահինշահրի մասնաճիւղի Երէցական միաւորը կազմակերպել էր Աշխատաւորների օրւան նւիրւած տօնակատարութիւն: Ներկայ էին՝ Շահինշահրի հոգեւոր հովիւ Տ. Անանիա վրդ. Գուճանեանը, Տ. Վարդան քհնյ. Աղաբաբայեանը, Շահինշահրի համայնքի անդամները: Ծրագրի բացման խօսքով ելոյթ ունեցաւ Ժաննա Շահբազեանը: Նա Հ. Մ. Մ. «Արարատ» միութեան անունից շնորհաւորեց բոլորին Մայիս 1-ի առթիւ՝ նշելով, որ Երէցական միաւորը առ ի գնահատանք բոլոր աշխատաւորների՝ կազմակերպել է այս երեկոն, որից յետոյ հոգեւոր հովիւ Տ. Անանիա վրդ. Գուճանեանին խնդրեց օրւայ առիթով իր պատգամը փոխանցել: Հայր Սուրբը ողջունելով բոլոր ներկաներին՝ շնորհաւորեց բոլորին Մայիս 1-ի առթիւ՝ յայտնելով նաեւ իր ուրախութիւնը, որ. ««Արարատ» միութեան նոր վարչութիւնը նոր շնչով, նոր միասնականութեամբ եւ պատրաստակամութեամբ գործում է եւ բոլորս գործում ենք մէկ բանի համար՝ ծառայելու մեր ժողովրդին: Եւ ուզում եմ նշել, որ ամէն օր է Աշխատաւորի օրը, իսկ Մայիս 1-ը նրանց գնահատելու եւ արժեւորելու օրն է: Այս առիթով գնահատում եմ Երէցական միաւորի այս գեղեցիկ միտքը՝ հրաւիրելու բոլորիս այստեղ եւ միասին նշելու այս օրը»: Այնուհետեւ Ժաննա Շահբազեանը բացատրութիւններ տւեց Մայիս 1-ի որպէս Աշխատաւորների տօն ընդունելու վերաբերեալ:

alt

Ներկաներին շնորհաւորեց նաեւ Երէցական միաւորի նախագահուհի Արմիկ Թահմազեանը՝ բոլորին ցանկանալով հաճելի եւ ուրախ երեկոյ: Իր շնորհաւորանքի խօսքով ելոյթ ունեցաւ նաեւ միութեան նախագահ Ռոբերտ Գորգին՝ նշելով հայ ազգի աշխատասիրութիւնը եւ տաղանդը, որը ցրւած լինելով աշխարհի բոլոր անկիւններում՝ աչքի է ընկնում իր արհեստով եւ արւեստով:
Հայկական երգ ու երաժշտութեան ներքոյ ներկաները պարեցին եւ ուրախացան, ինչպէս նաեւ հիւրասիրւեցին Երէցական միաւորի անդամուհիների ձեռքով պատրաստւած համեղ ուտեստներով: Երեկոն ուրախ եւ հաճելի ուրախ տրամադրութիւն պարգեւեց բոլորին:
Մայիսի 17-ին Համբարձման տօնի առիթով Երէցական միաւորը կազմակերպել էր շրջագայութիւն՝ դէպի Չհարմահալ գաւառի գեղեցիկ գիւղերից մէկը: Այս շրջագայութեանը մասնակցում էին համայնքի շուրջ 25 անհատներ: Երէցական միաւորը հաճելի մթնոլորտ ստեղծելու նպատակով՝ կազմակերպել էր հետաքրքիր եւ զւարճալի խաղեր, ինչպէս նաեւ նախատեսել էր հանելուկներ: Խաղերի մասնակիցները եւ հանելուկների գուշակողները պարգեւատրւեցին նւէրներով, իսկ վերջում գնւած տոմսերի համարներով տեղի ունեցաւ վիճակահանութիւն: Այդ օրը եւս գեղեցիկ պահերով մնաց բոլորի յուշերում:

Մշակութային միաւոր

Մարտի 30-ից մինչեւ 31-ը Հ. Մ. Մ. «Արարատ» միութեան Շահինշահրի մասնաճիւղի Մշակութային միաւորը կազմակերպել էր Երիտասարդական շրջագայութիւն՝ դէպի Փերիա գաւառի Նամակերտ գիւղ: Շրջագայութեանը մասնակցում էին 16-ից բարձր տարիքի երիտասարդներ՝ թւով 45 հոգի: Ժամանակը աւելի արդիւնաւէտ եւ հետաքրքիր անցկացնելու նպատակով՝ Մշակութային միաւորը կազմակերպել էր զանազան խաղեր եւ զբաղմունքներ, որոնց շնորհիւ՝ մթնոլորտը դարձել էր աւելի մտերմիկ եւ հաճելի:

alt

Սա նորընտիր Մշակութային միաւորի կազմակերպած առաջին շրջագայութիւնն էր եւ մասնակիցները յոյս յայտնեցին որ կազմակերպւի յաճախակի եւ աւելի երկար ժամանակով:
Մայիսի 15-ի երեկոյեան Հ. Մ. Մ. «Արարատ» միութեան Շահինշահրի մասնաճիւղի Մշակութային միաւորը մեծ շուքով նշեց Շուշիի ազատագրման 20-ամեակը: Միջոցառումը տեղի ունեցաւ Շահինշահրի «Սրբոց Վարդանանց» դպրոցի սրահում: Ներկայ էին՝ Շահինշահրի հոգեւոր հովիւ Տ. Անանիա վրդ. Գուճանեանը, ազգային մարմինների ներկայացուցիչներ, Շահինշահրի համայնքը եւ հիւրեր: Ծրագրի սկզբում բացման խօսքով հանդէս եկաւ Այլին Քեշիշեանը: Նա Մշակութային միաւորի անունից բարի գալուստ եւ բարի երեկոյ մաղթեց բոլոր ներկաներին՝ ասելով. «Այսօր բոլորս ի մի ենք եկել՝ մեր ուրախութիւնը կիսելու եւ մեր պարտքը կատարելու: Այսօր լրանում է Շուշիի ազատագրման 20-ամեակը, երբ հայը կրկին հաւատաց իր ուժերին եւ վայելեց յաղթանակի համը: Մայիսի 9-ը պատմական յիշարժան թւական դարձաւ եւ իր տեղը գրաւեց հայոց պատմութեան մէջ՝ 1992 թւականին, երբ անառիկ ամրոց Արցախ աշխարհի բերդաքաղաք Շուշին ազատագրւեց հայ ժողովրդի հերոսական զաւակների ռազմական բացառիկ սխրանքների շնորհիւ: Շուշիի ազատագրումով՝ վնասազերծւեցին Ստեփանակերտի շրջակայ բոլոր թշնամական կրակակէտերը եւ ռազմական յենակէտերը, ինչպէս նաեւ սկսւեցին Լաչինի միջանցքի ռազմական գործողութիւնները, որոնցով բացւեց Լեռնային Ղարաբաղը Հայաստանին միացնող կեանքի ճանապարհը: Փառք հայ ժողովրդի յաղթանակները կերտողներին: Նոր Ջուղայի Հ. Մ. Մ. «Արարատ» միութեան Շահինշահրի մասնաճիւղի Մշակութային միաւորը իր ազգային պարտքը համարեց, որ այս բացառիկ թւականի նշումով՝ իր լուման նւիրաբերի ազգային-յեղափոխական երգերի ձօնումով», որից յետոյ բոլորին հրաւիրեց՝ ունկնդրելու Շուշիի ազատագրմանը նւիրւած գեղարւեստական ծրագիրը:

alt

Ծրագիրը վարում էին՝ Արգին Չհարմահալին եւ Մելինէ Աղախանեանը: Ծրագիրը բաղկացած էր հայրենասիրական երգերից, ասմունքներից եւ Շուշիի մասին պատմող տեսաֆիլմի ցուցադրումից: Հայրենասիրական երգերի գեղեցիկ կատարումներով հանդէս եկան՝ Մարտիկ Յովհաննիսեանը, Էմմանուէլ Քամարզարեանը եւ Լիդա Շահբազեանը, Այլին Քեշիշեանը եւ Լիդուշ Քամարզարեանը: Գեղեցիկ ասմունքներով հանդէս եկան՝ Ռազմիկ Մարկոսեանը եւ Անի Ղեւոնդեանը: Գեղարւեստական ծրագրի աւարտին օրւայ առիթով իր խօսքը փոխանցեց համայնքի հոգեւոր հովիւ Տ. Անանիա վրդ. Գուճանեանը՝ ասելով. «Ահաւասիկ, մէկ ժամ տեւողութեան մէջ բոլորս ճաշակեցինք եւ վայելեցինք այն ուրախութիւնը եւ այն տօնակատարութիւնը, որ 1992 թւականին նոյն ձեւով ճաշակեցին եւ վայելեցին Արցախի բնակչութիւնը եւ համայն հայութիւնը: 1992 թւականի մայիսի 9-ը տօն է փրկութեան, պայքարի եւ միասնականութեան: Եւ այնպէս, ինչպէս ազատագրւեց Շուշին, կազատագրենք նաեւ՝ Մուշը, Վանը, Ալաշկերտը եւ ամբողջ Արեւմտեան Հայաստանը: Գնահատում եմ Նոր Ջուղայի Հ. Մ. Մ. «Արարատ» միութեան Շահինշահրի մասնաճիւղի Մշակութային միաւորին եւ նրանց, ովքեր ելոյթ ունեցան այսօր եւ բոլոր նրանց, ովքեր համագործակցել են այսօրւայ ծրագրին: Հազար յարգանք մեր բոլոր հերոսներին, խունկ եւ աղօթք՝ մեր բոլոր ազատամարտիկներին եւ Շուշիի ազատագրման պայքարի մէջ զոհւած բոլոր հերոսներին»:
Ծրագրի վերջում «Արարատ» միութիւնը կազմակերպել էր հիւրասիրութիւն՝ Նոր Ջուղայի եւ Շահինշահրի հիւրերի համար: Հիւրասիրութիւնն անցաւ ջերմ եւ մտերմիկ մթնոլորտում:

Մարզական միաւոր

alt

Ապրիլի 16-ին Նոր Ջուղայի Հ. Մ. Մ. «Արարատ» միութեան Շահինշահրի մասնաճիւղի սրահում տեղի ունեցաւ Գարնանային 24-րդ խաղերի մեդալաբաշխում: Մեդալաբաշխման արարողութեանը ներկայ էին՝ Շահինշահրի հոգեւոր հովիւ Տ. Անանիա վրդ. Գուճանեանը, Տ. Վարդան քհնյ. Աղաբաբայեանը, «Արարատ» միութեան վարչութեան անդամները, մարզիկ-մարզուհիները եւ նրանց ծնողները: Ծրագրի սկզբում «Արարատ» միութեան Շահինշահրի մասնաճիւղի նախագահ՝ Ռոբերտ Գորգին ողջունելով ներկաներին՝ տեղեկացրեց, որ «Միութեան աղջկանց բասկետբոլի խումբը Գարնանային 24-րդ խաղերում յաջողել է զբաղեցնել 3-րդ տեղը: Յուսով ենք, որ ապագայում աւելի պատրաստւած մասնակցեն բոլոր մրցոյթներին՝ գրաւելով աւելի բարձր տեղեր: Եւ այդ առիթով միութիւնը որպէս գնահատանք՝ կազմակերպել է մեդալաբաշխման ծրագիր եւ այժմ բեմ ենք հրաւիրում համայնքի հոգեւոր հովիւ Տ. Անանիա վրդ. Գուճանեանին՝ իր խօսքը փոխանցելու, ինչպէս նաեւ մարզուհիներին՝ իրենց մեդալները բաշխելու համար»: Հայր Սուրբը շնորհաւորեց մարզուհիներին՝ իրենց յաջողութիւնների առթիւ՝ նշելով, որ. «Կարեւորը մասնակցութիւնն է եւ ոչ թէ գրաւած տեղը, կարեւորը այն է, որ ձեր լուման էք ներդրել ազգային գանձանակի մէջ: Մաղթում եմ ձեզ առողջութիւն եւ յարատեւ վերելք»: Հայր Սուրբի ձեռամբ յանձնւեցին մարզուհիների մեդալները: Միութիւնը պատրաստել էր անակնկալ՝ տօնական կարկանդակ, որի շուրջ լուսանկարւելուց յետոյ՝ հիւրասիրւեցին բոլոր ներկաները:

Թղթակից՝ ԱԴՐԻՆԷ ԻՍԱՅԵԱՆ

 

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։