Հա

Համայնք

11/03/2012

altՍիրելի հայրենակիցներ,
Ուրբաթ, մարտի 2-ին տեղի ունեցան 9-րդ նստաշրջանի Իրանի Իսլամական խորհրդարանի ընտրութիւնները, որոնց մասնակցեցինք ազգային բարձր գիտակցութեամբ, քաղաքական հասունութեամբ եւ քաղաքացիական պարտականութիւնների խորն ըմբռնումով։ Գիտակցութիւն, հասունութիւն եւ ըմբռնում, որոնք միշտ եւ ամենուրեք զուգորդւել ու ընկերակցել են իրանահայութեանը՝ Իրանի փառապանծ պատմութեան եւ հերոսական ժողովրդի կեանքի բոլոր ժամանակահատւածներում ու դրւագներում, ի խնդիր նրա ամբողջականութեան, գերիշխանութեան, լիակատար անկախութեան, յարատեւման ու զարգացման։ Այս առիթով համեստ պարտքս եմ համարում խոնարհւել Ձեր այս ոգու եւ իմացութեան վառ արտայայտութեան առջեւ, որը դրսեւորեցիք դուք՝ ընտրատեղամասեր ներկայանալով եւ քւէարկելով, յատկապէս շնորհակալութիւն եմ յայտնում Սպահանի եւ Իրանի հարաւային շրջանների՝ Նոր Ջուղայի, Շահինշահրի, Փերիայի, Շիրազի, Ահւազի եւ Աբադանի հայ համայնքներին, որոնք խորհրդարանի սոյն նստաշրջանի ընտրութիւններում, անցեալի համեմատութեամբ, արձանագրեցին աւելի բարձր ցուցանիշեր՝ ընտրողների թւաքանակի առումով։

Երախտիքս եմ յայտնում՝ Սպահանի հայոց թեմի թեմակալ առաջնորդ Գերշ. Տ. Բաբգէն Ս. եպս. Չարեանին, որի հայրական խորհուրդներն ու օրհնանքն ենք վայելել ինչպէս անցեալում, նաեւ՝ ներկայ ընտրութիւնների ընթացքում։ Շնորհակալութիւն՝ Թեհրանի հայոց թեմի առաջնորդ Գերշ. Տ. Սեպուհ Ս. արք. Սարգսեանին՝ իր բարեմաղթանքների եւ հայրական օրհնութեան համար։
Շնորհակալութիւն՝ Սպահանի հայոց թեմի մարմիններին ու ժողովականութեանը՝ ցարդ ունեցած համագործակցութեան, ընտրութիւնների կազմակերպման գործում երկրի կենտրոնական ընտրական կառոյցի ուղղութեամբ կատարած արդիւնաւէտ աշխատանքի կապակցութեամբ։
Երախտագիտութիւն՝ ինձ առաջադրած կառոյցներին՝ իրենց տածած վստահութեան համար։ Ջերմ շնորհակալութիւններ իմ ընտրական քարոզչական շտաբին, ինձ հովանաւորող միութիւներին, խմբերին ու անհատներին, որոնք իրենց անվերապահ աջակցութիւնը եւ խրախուսող ու քաջալերող համագործակցութիւնը ցուցաբերեցին՝ նախընտրական շրջանի հանդիպումների կազմակերպման, հրատարակած նիւթերի, ժողովրդին ընտրութիւններին մասնակցելու ուղղութեամբ տրւած լուսաբանութիւնների եւ քարոզչութեան համար։ Վարձքներդ ի կատա՛ր։
Յատկապէս, մաղթում եմ առողջութիւն եւ յաջողութիւն՝ ութ տարիների ընթացքում իմ լաւ ընկեր եւ գործընկեր Թեհրանի եւ հիւսիսային իրանահայութեան գործող պատգամաւոր ճրտգ. Գէորգ Վարդանեանին, որի հետ իմ գործակցութիւնն ու ընկերութիւնը մի նոր փուլ է թեւակոխելու եւ աւելի է խորանալու առաջիկայում։
Ի սրտէ շնորհաւորում եմ դոկտ. Կարէն Խանլարեանին՝ 9-րդ նստաշրջանի Իսլ. խորհրդարանի Թեհրանի եւ հիւսիսային իրանահայութեան պատգամաւոր ընտրւելու կապակցութեամբ՝ համոզւած լինելով, որ ապագայ չորս տարիների ընթացքում միմեանց հետ ունենալու ենք սերտ ու արդիւնաւէտ գործակցութիւն՝ իրանահայութեան ձայնը խորհրդարանում լսելի դարձնելու եւ իրաւունքները պաշտպանելու ուղղութեամբ։
Վերջում մէկ անգամ եւս դիմում եմ Ձեզ, սիրելի ժողովուրդ, ինչպէս միշտ՝ Ձեր առաջարկներով, խորհուրդներով եւ ուղղութիւններով սատարելու եւ աջակցելու նւաստիս՝ ստանձնածս պարտականութիւնները լաւագոյնս կատարելու համար։

ՌՈԲԵՐՏ ԲԵԳԼԱՐԵԱՆ

 
Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։