Հա

Համայնք

Կիրակի, 02 Յուլիսի 2017 10:30

Հարփիկ Թամրազեանին նւիրւած ժողովածուի շնորհանդէսը Հ.Մ.Ա.Կ.-ում

Նախաձեռնութեամբ Հ.Մ.Ա.Կ.-ի Երէցների միութեան վարչութեան եւ Հանրային-հասարակական բաժանմունքի ու «Գրական շրջանակ»-ի համագործակցութեամբ, յունիսի 23-ին «Արարատ» մարզաւանի «Շահբազեան» սրահում տեղի ունեցաւ վերջերս Երեւանում լոյս տեսած Հարփիկ Թամրազեանին նւիրւած ժողովածուի շնորհանդէսը:

«alikonline.ir» - Նախաձեռնութեամբ Հ.Մ.Ա.Կ.-ի Երէցների միութեան վարչութեան եւ Հանրային-հասարակական բաժանմունքի ու «Գրական շրջանակ»-ի համագործակցութեամբ, յունիսի 23-ին «Արարատ» մարզաւանի «Շահբազեան» սրահում տեղի ունեցաւ վերջերս Երեւանում լոյս տեսած Հարփիկ Թամրազեանին նւիրւած ժողովածուի շնորհանդէսը: Տեղեկցնում է Հ.Մ.Ա.Կ.-ի Հանրային կապը:

Բացման խօսքով հանդէս եկաւ միութեան Հանրային-հասարակական բաժանմունքի նախագահ Արմինէ Գրիգորեանը: Նա ակնարկելով «Հարփիկ Թամրազեան» անունը կրող գրքին, ամփոփ գծերով անդրադարձաւ հեղինակի կեանքին ու ազգային-հասարակական ծաւալուն գործունէութեանը, որը ցաւօք վաղաժամ ընդհատւեց մեքենայի վթարի պատճառով՝ 1977-ի մարտի 14-ին:

Հարփիկ Թամրազեանը ծնւել էր 1928-ին Ղազւինում, ապա ընտանիքով տեղափոխւել ու հաստատւել` Թեհրանում: Հայոց դպրոցների փակման բերումով նա զրկւում է հայկական դպրոցում ուսում ստանալուց, սակայն ինքնաշխատութեամբ այնպիսի մակարդակի է հասնում, որ հրաւիրւում է հայ գրականութիւն դասաւանդելու Գրականութեան ֆակուլտետի ժամանակի հայոց լեզւի ու գրականութեան գերլիսանսի բաժնում: Հարփիկ Թամրազեանը մասնագիտութեամբ էլեկտրոմեխանիկայի ճարտարագէտ էր եւ ունէր աշխատանքային բեղուն անցեալ: Նա օժտւած էր բազմակողմանի ընդունակութիւններով՝ վերլուծական միտք, բանաստեղծական ձիրք, գեղարւեստական բարձր ճաշակ: Եղել է Հայ մշակութային «Արարատ» կազմակերպութեան եւ Իրանահայ գրողների միութեան հիմնադիր անդամ, Հայ համալսարանականների ընդհանուր միութեան վարչութեան նախագահ, Հ.Մ.Ա.Կ.-ի կենտրոնական վարչութեան նախագահ: Նա բազմաթիւ յօդւածներ է ստորագրել ու տպագրել հայ մամուլում՝ հայ գրականութեան, արւեստի, ազգային հարցերի ու Հայ Դատի վերաբերեալ: Պարսկերէնի է թարգմանել հայ գրականութիւնից գործեր, այդ թւում՝Վահան Թոթովենցի «Կեանքը հին Հռովմէական ճանապարհի վրայ» վէպը: Ունի ինքնուրոյն արձակ ու չափածոյ ստեղծագործութիւններ:

Բացման խօսքի աւարտին ընկեր Արմինէ Գրիգորեանը հրաւիրեց Հարփիկ Թամրազեանի դստեր՝ դոկտ. Արմինէ Թամրազեանին՝ ելոյթ ունենալու:

Դոկտ. Արմինէ Թամրազեանը, ով մասնագիտութեամբ լեզւաբան է , նախ շնորհակալութիւն յայտնեց Երէցների միութեան վարչութեանն ու բոլոր նրանց, որոնց ջանքերի շնորհիւ հրատարակւել է ժողովածուն եւ կազմակերպւել է սոյն ձեռնարկը, երախտագիտութեան խօսք ասաց, «Ալիք»-ի հասցէին՝ բոլոր օժանդակութիւնների համար, Նորայր Էլսայեանին, ով գրի է առել գրքի նախաբանը՝ առողջական դժւար պայմաններում: Ապա անդրադարձաւ գրքի ենթաբաժիններին ու յօդւածներին, որտեղ ներկայացւած են Հարփիկ Թամրազեանի գրչին պատկանող գրական դէմքեր, գրական ուսումնասիրութիւններ, յօդւածներ ու դասախօսութիւններ, բանաստեղծութիւններ եւ մի պատմւածք: Ըստ նրա բացատրութեան՝ գրքի նիւթերը ընտրւել են տպագրւած կամ ձայնագրւած բազմաթիւ նիւթերի միջից: Նա ամփոփ տեղեկութիւններ փոխանցեց ժողովածուում տեղ գտած իւրաքանչիւր նիւթի եւ գրքում յայտնւելու պատճառների մասին:

Դոկտ. Արմինէ Թամրազեանի դիտարկմամբ, գրքի նիւթերի շարադրանքը սահուն է ու դիւրըմբռնելի, երիտասարդական մտքի թարմութիւնը զգալի է բոլոր նիւթերում, որը 40 տարի անց դեռեւս չի խունացել եւ չի կորցրել իր թարմութիւնը: Նա շեշտեց, որ գիրքը Հարփիկ Թամրազեանի կենդանի ներկայութիւնն է, նրա կենդանի խօսքն է 40 տարւայ լռութիւնից յետոյ, եւ այդ է գրքի հիմնական ու գլխաւոր առաքելութիւնը: «Ահա թէ ինչու,- աւելացրեց նա,- այսօր ինձ համար բացառիկ տօն է»:

Յաջորդ բանախօսը Վարդան Վարդանեանն էր: Նա նոյնպէս ակնարկելով գրքի նիւթերին, հետաքրքիր հետեւութիւններ կատարեց Հարփիկ Թամրազեանի մօտեցումների ու համոզմունքների մասին, մի-երկու բանաստեղծութիւն կարդալով իր մեկնաբանութիւնը ներկայացրեց, իսկ խօսքի վերջում յուշեր պատմեց Հարփիկ Թամրազեանի հետ ունեցած իր հանդիպումներից ու տպաւորութիւններից:

Այնուհետ շուրջ 6 րոպէ տեւողութեամբ հնչեց Հարփիկ Թամրազեանի կենդանի ձայնը՝ մի հատւած Մեծ Եղեռնի 50-ամեակին արտասանած բանախօսութեան ձայնագրութիւնից:

Ժողովածուում տեղ գտած Հարփիկ Թամրազեանի բանաստեղծութիւններից ընթերցեցին Արմիկ Դանիէլեանը, Սաթի Արթունօֆն ու Սեդա Թարվերդեանը: Այդ ընթացքին սրահում հնչում էր «Երգը կորցրած կարապը» բանաստեղծութեան վրայ յօրինւած Հարփիկի թոռան՝ Զօրի Դաւոյեանի երաժշտութիւնը:

Վերջում Իրանահայ գրողների միութեան նախագահ, բանաստեղծ Վարանդը ընթերցեց Հարփիկ Թամրազեանին նւիրած իր բանասեղծութիւնը՝ պատանի տարիքում նրանից ստացած տպաւորութեան հիման վրայ գրի առնւած, ապա մի օրինակ իր վերջին գրքից - իրանական արդի բանաստեղծներից կատարած թարգմանութիւններ - նւիրեց դոկտ. Արմինէ Թամրազեանին:

Նախասրահում ներկաներին էր տրամադրւում խնամքով կազմւած, որակեալ տպագրութեամբ «Հարփիկ Թամրազեան» ժողովածուն: Իր մահւան 40-ամեակին լոյս տեսած սոյն ժողովածուն հրատարակւել է հանգուցեալի դստեր ջանքերով եւ քոյրերի՝ Սեզա եւ Լիլա-ի օժանդակութեամբ:

Նախասրահում թէ ծրագրի սկզբում եւ թէ վերջում նախատեսւած էր ընդունելութիւն:

 

Նիւթը Հ.Մ.Ա.Կ.-ի Հանրային կապին է տրամադրել պրն. Էդւարդ Յարութիւնեանը:

Յարակից Հրապարակումներ

  • «Եւա» ֆիլմի ռեժիսորը «Արարատ»-ի Երէցների մօտ
    «Եւա» ֆիլմի ռեժիսորը «Արարատ»-ի Երէցների մօտ

    Երկուշաբթի, փետրւարի 5-ին կայացաւ Հ.Մ.Ա.Կ-ի Երէցների միութեան ամսական հանդիպումը մարզաւանի «Վաչիկ Ղարաբէգեան» սրահում:

    Մեծարւեց Հ.Մ.Ա.Կ-ի վաստակաւոր  անդամ՝ ընկեր Սեզա Թամրազեանը եւ միութեան վարչութեան կողմից յուշանւէր յանձնւեց իրեն:

  • Իրանական ժամանակակից պոէզիային նւիրւած «Ակներ ակներեւ» հանրութեան դատին
    Իրանական ժամանակակից պոէզիային նւիրւած «Ակներ ակներեւ» հանրութեան դատին

    Իրանի Իսլամական Հանրապետութեան յեղափոխութեան յաղթանակի տարեդարձին նւիրւած միջոցառումների շրջանակում` ՀՀ ԳԱԱ Մանուկ Աբեղեանի անւան գրականութեան ինստիտուտի, Հայաստանի գրողների միութեան եւ Հայաստանում Իրանի Իսլամական Հանրապետութեան դեսպանութեան մշակոյթի կենտրոնի նախաձեռնութեամբ, փետրւարի 2-ին գրականութեան ինստիտուտում տեղի ունեցաւ«Իրանի յեղափոխութեան ազդեցութիւնը ժամանակակից իրանական գրականութեան վրայ» խորագրով քննարկում: Դրան յաջորդեց Իրանի ժամանակակից պոէզիային նւիրւած «Ակներ ակներեւ» գրքի շնորհանդէսը (թարգմանիչ՝ Վարանդ (Սուքիաս Քիւրքչեան):

  • Երէցների միութիւնը՝ 53 տարեկան
    Երէցների միութիւնը՝ 53 տարեկան

    1964 թ.-ին կեանքի կոչւած Հ.Մ.Ա.Կ.-ի Երէցների միութիւնը, շաբաթ դեկտ. 9-ին տօնակատարեց իր հիմնադրման 53-րդ տարեդարձը:

    Մուտքի մօտ, վարչական անդամները հիւրերին սիրալիր դիմաւորելով, նրանց նւիրում էին Սայեաթ նովայի տաղերից մէկական խտ

  • Մայեստրօ Լորիս Ճգնաւորեանը Երէցների միութեան ամսական հանդիպումին
    Մայեստրօ Լորիս Ճգնաւորեանը Երէցների միութեան ամսական հանդիպումին

    Հայ մշակութային «Արարատ» Կազմակերպութեան Երէցների միութեան ամսական հանդիպումը, նւիրւած մայեստրօ Լորիս Ճգնաւորեանին, տեղի ունեցաւ երկուշաբթի նոյ. 13-ին «Արարատ» մարզաւանի «Վաչիկ Ղարաբէգեան» սրահում:

  • Հ.Մ.Ա.Կ.-ի Երէցների միութեան նախաձեռնութեամբ՝ Հայ մշակոյթի տօնի առիթով ձեռքի աշխատանքի մրցոյթ
    Հ.Մ.Ա.Կ.-ի Երէցների միութեան նախաձեռնութեամբ՝ Հայ մշակոյթի տօնի առիթով ձեռքի աշխատանքի մրցոյթ

    Ուրբաթ 20 հոկտեմբերի 2017 թւականին, Երէցների միութեան Արւեստից բաժանմունքի նախաձեռնութեամբ, Մշակոյթի շաբաթւայ առիթով տեղի ունեցաւ ձեռքի աշխատանքի մրցոյթ, «Արարատ» մարզաւանի «Խաժակ Արզումանեան» ցուցասրահում:

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։