Հա

Համայնք

23/04/2018

Ապրենք ու գործենք Ապրիլեան խորհրդով

Ապրիլ ամիսը ազգերի եւ ժողովուրդների կեանքում, իր գարնանաբոյր զեփիւռով, աստիճանաբար կանաչազարդւող բնութեամբ նոր ու զւարթ կեանքի աւետիսով ողողում է բնութիւնն ու մարդկային կեանքը ընդհանրապէս։

Դժբախտաբար, մեզ հայերիս համար Ապրիլը սարսուռ, հալածական կեանք, ջարդ ու սպանութիւն եւ հայրենազրկում յիշեցնող ամիս է. ամիս, որի յիշատակումն իսկ հայ մարդուն, ակամայ յիշեցնում է իր նախահայրերի դժոխային կեանքը Ցեղասպանութեան ահաւոր տարիներին, այլեւ աւերակութիւնն ու քանդումը իր հայրենիքի։

Ապրիլ ամիսը ազգերի եւ ժողովուրդների կեանքում, իր գարնանաբոյր զեփիւռով, աստիճանաբար կանաչազարդւող բնութեամբ նոր ու զւարթ կեանքի աւետիսով ողողում է բնութիւնն ու մարդկային կեանքը ընդհանրապէս։

Դժբախտաբար, մեզ հայերիս համար Ապրիլը սարսուռ, հալածական կեանք, ջարդ ու սպանութիւն եւ հայրենազրկում յիշեցնող ամիս է. ամիս, որի յիշատակումն իսկ հայ մարդուն, ակամայ յիշեցնում է իր նախահայրերի դժոխային կեանքը Ցեղասպանութեան ահաւոր տարիներին, այլեւ աւերակութիւնն ու քանդումը իր հայրենիքի։

Այս բոլորը պարզապէս դրա համար, որ ցեղասպան թուրքը որոշել էր բնաջնջել հայ ժողովրդին, որպէսզի կարողանար իր համաթուրանական ծրագիրը հեշտութեամբ իրագործել։ Սադայէլական իր ծրագիրը իրագործելու համար նա դիմեց անմարդկային աներեւակայելի հալածանքների, չարչարանքների, տեղահանութեան եւ հաւաքական սպանդին։

Շէն ու բազմամարդ, քաղաքակրթութեան, գիտութեան, հոգեւոր, մշակութային կեանքի հայրենիք համարւող Հայաստան աշխարհը իր Արեւմտեան բաժնով մէկ օրից միւսը ամայացաւ, աւերակի ու մոխրակոյտի վերածւեց։ Բանաստեղծի բառերով.-

Հայ ըլլալնուս մենք չտեսանք օր ու արեւ,

Որպէս բաժին առինք կեանքէն մեր բախտը սեւ

. . . . . . . . . . . . . . . . . . . . . . . . . . . . . . . . . . . . .

Հայ ըլլալնուս հանդերձեալիդ դժոխքն ահեղ

Ապրեցանք հո՛ս, մենք, ցեղովին ու ամէն տեղ

Մեր վէրքերուն, մեր արիւնին ու մեր մահւան

Չմօտեցաւ ոչ իսկ ստւերը գթութեան։

Այսօր, երբ 103 տարիների հեռաւորութիւնից ենք դիտում անցեալի մեր ողբերգութիւնը, ամայացումը մեր երկրի, տեսնում ու վկայում ենք ցաւի պատմութեան կրկնողութեան։ Այսօր պատմական մեր հայրենիքի հարաւային մասում ապրող ժողովուրդը, որ 103 տարիներ առաջ, գործիք էր դարձել ցեղասպանի իր անմարդկային ծրագիրը իրագործելու գործում, դժբախտաբար նոյն ճակատագրին է ենթարկւում։ Թէլ Ապիատն ու Ճարապլուսը, Ռաս Էլ Այնն ու Աֆրինը այսօր արեան ծովի են վերածւել, ինչպէս էր 103 տարի առաջ։ Պատմութիւնը ինքն իրեն կրկնում է։ Հազարաւոր անմեղներ զոհ են գնում թուրքական կայսրապաշտական քաղաքականութեան եւ ժողովրդի «վէրքերի», «արեան» ու «մահւան» չմօտեցաւ ոչ իսկ «ստւերը գթութեան»։

Հաւատքով Հին Կտակարանի հերոսները ապրեցին եւ վկայեցին իրենց հաւատքին. առաքեալն ասում է. «Ուրիշները ենթարկւեցին նախատինքների ու ծեծի, շղթաների ու բանտերի համն առան, քարկոծւեցին, սղոցւեցին, փորձութիւնների մատնւեցին, սրով սպանւեցին… շրջեցին… հալածանք ու չարչարանք կրելով, թափառական կեանքով ապրելով անապատում կամ լեռների վրայ, քարայրներում կամ խոռոչներում» (Եբ. 11։36-38)։

Վերոյիշեալ վիճակների միջից անցաւ մեր ժողովուրդը առանց յուսահատութիւն, որովհետեւ հաւատացած էր նաեւ որ հետեւող լինել Քրիստոսի, նշանակում էր կրել նաեւ իր խաչը ու խաչով զօրացած ապրել նաեւ Յարութիւնը Աստւածորդուն։

Հայոց Ցեղասպանութիւնը իրագործող բորենիների ժառանգորդները այսօր էլ շարունակում են իրենց ցեղասպանութիւնը քանդելով, մոխրակոյտի վերածելով մնացորդացը մեր եկեղեցիների ու վանքերի, գերեզմանների ու յուշակոթողների, որտեղ ժամանակին կեանք ու քաղաքակրթութիւն էր տարածւում։

Այդպիսին եղաւ Ապրիլը մեր կեանքում։ Հայ կեանքի բացւող կակաչները խամրեցին հազիւ բացւած, հայ նորաբողբոջ մանուկը հազիւ բարբառած ա բ գ-ն ընդմիշտ դատապարտւեց լռութեան։

Ապրիլին սակայն յաջորդեց Մայիսը, խրոխտ կեանքի խորհրդանիշ։ Մեր ժողովուրդը մահւան դէմ-յանդիման կանգնած կուրծք տւեց նրան եւ այս անգամ յաղթական կերտեց իր անկախութիւնը իր պատմական երկրի մի մասի վրայ, որքան գեղեցիկ են բառերը անմահանուն բանաստեղծի, որ խօսքն ուղղելով թուրքին գրում է.-

Պիտի իյնաս այս անգամ, եւ ալ իսպառ, անյարիր,

Պիտի մնաս գետնին վրայ՝ ճանկռտելով հողը դեռ.

. . . . . . . . . . . . . . . . . . . . . . . . . . . . . . . . . . . . . . . . . .

Պիտի իյնաս, կիյնաս ալ… բայց որպէսզի դեռ ճանչնաս

Քու անարգ սիրտդ ծակող մեծագոյն ցաւը վերջին՝

Պիտի զարնեն քեզ անոնք որ քեզ յաճախ փրկեցին.

Այսօր հայ ժողովուրդը իր ազատ, անկախ հայրենիքով, Արցախով ու կազմակերպ Սփիւռքով մղձաւանջ է Թուրքիայի։ Մեր հայրենիքի նւաճումները գիտութեան, մշակոյթի, գրականութեան եւ այլ բազմաթիւ բնագաւառներում ցոյց է տալիս, որ ճիշտ է, որ թուրքը մէկուկէս միլիոն անմեղ մարդ սպանեց, բայց չկարողացաւ մեր ժողովրդի հոգուց ապրելու, ստեղծագործելու կամքն ու հաւատքը սպանել եւ այդ պատճառով կարող ենք անվարան ասել կրկնելով Քրիստոսի խօսքը, «Մի վախեցէք ես աշխարհին յաղթեցի»։

Այս յաղթանակը պարտաւորեցնող ու մեզ յանձնառութեան տակ դնող յաղթանակ է։ Այս յաղթանակը մեզ մղում է լաւապէս ճանաչելու մեր պատմութիւնը իր հարուստ մշակոյթով, ընդարձակ աշխարհագրութեամբ, աւելին յաղթանակը մեզ մղում է կառչելու մեր արմատներին, մեր լեզւին ու հաւատքին ու հայրենիքին, որի պահպանման համար մեր հայրերը ծով արիւն են հոսեցրել, հայրենիք, որի ամբողջացման համար շարունակելու ենք պահանջատիրական մեր պայքարը եւ վերջապէս հայրենիքի, որի պետականութեան եւ անկախութեան հաստատման հարիւրամեակն ենք նշում մեր վերածնեալ հայրենիքում։

Ապրիլեան խորհուրդը խորհուրդն է մեր ամբողջական լինելութեան, մեր կեանքի գոյապայքարի յանուն ամբողջական Հայաստանին ու հայութեան, այլեւ զօրակցութեան ու յանձնառութեան այսօրւայ մեր ազատ ու անկախ հայրենիքի ու Արցախի ամրացման, զօրացման ու խաղաղութեան ամրագրման։ Դեռեւս Ապրիլեան խորհուրդը հաւատքի վերանորոգութեան, ուխտի կենսաւորման խորհուրդն է։ Հաւատք, որ Պօղոս առաքեալի բառերով մեզ կապում է գալիքի եւ յուսադրում ու համոզում է ծնցնում մեր մէջ այն բաների, որոնք չեն երեւում։ «Հաւատ նշանակում է վստահ լինել այն բաներին, որոնց հանդէպ յոյս ունենք եւ համոզւած լինենք այն բանին, որոնք չեն երեւում» (Եբ. 11։1)։ Մարկոս աւետարանիչը հաստատում է, որ հաւատացեալի, հաւատք ունեցողի համար, անկարելի բան չկայ։ Հաւատքով կը կարողանանք յաղթահարել ամէն ձեւի դժւարութիւնների ու նեղութիւնների։ Քրիստոս իր երկրաւոր կեանքի վերջին պահերին մեզ յիշեցրեց, որ «Աշխարհում դուք նեղութիւն կունենաք, սակայն քաջալերւեցէք, որովհետեւ ես յաղթեցի աշխարհին» (Յհ. 16։33)։

Ապրիլեան խորհրդից մեզ եկող այս հաստատակամութեամբ ապրենք ու գործենք։ Ահա ճշմարիտ ճանապարհը իր առաքելութեան ու կոչումին հաւատացող ժողովրդի։

Ճշմարիտ այս ճանապարհից անշեղ ընթանալու համար հարկ է լիցքաւորւել մեր պատմութեամբ, մշակոյթով, մեր ժողովրդի անցեալի եւ ներկայ կեանքով ու մշակոյթի պատմութեամբ, որովհետեւ պատմութիւնը մեզ կենսաւորում է, խորացնում է, զօրացնում մեր արմատները։ Ստեղծագործական կեանքը մեր ժողովրդի իր հոգեւոր ու մշակութային երեսներով եղել է հարուստ, այնքան հարուստ, հզօր ու ներշնչող, որ նոյնիսկ բազմաթիւ օտարների ուշադրութեան, ուսումնասիրութեան առարկայ է եղել եւ շատերին էլ ներշնչել այդ ուղղութեամբ։

Հարուստ քաղաքակրթական մշակոյթի վրայ պատւանդանւած ապրելու հրամայականի առաջ ենք ազգովի եւ ոգեկոչումը Ցեղասպանութեան զոհ գնացած մեր սուրբ նահատակներին ջրդեղելու է մեզ մեր պայքարի, պահանջատիրական պայքարի մէջ ի խնդիր մեր սուրբ նահատակների անկատար իղձերի ու երազների իրականացման։

ՍԵՊՈՒՀ ԱՐՔ. ՍԱՐԳՍԵԱՆ

Առաջնորդ Թեհրանի հայոց թեմի

Ապրիլ 2018, Թեհրան

Յարակից լուրեր

  • Այցելութիւն Ազգային առաջնորդարան
    Այցելութիւն Ազգային առաջնորդարան

    Երկուշաբթի, 17 սեպտեմբեր 2018-ի առաւօտեան թեմիս առաջնորդ գերշ. Տ. Սեպուհ Ս. արք. Սարգսեանին այցելեցին Թեհրանի քաղաքապետարանի 6-րդ շրջանի մշակութային եւ հասարակական հարցերի օգնական ճրտ. Ալի Փուր Զոնուզին եւ նոյն պաշտօնով՝ նոյն շրջանի առաջին բաժնի օգնական դոկտ. Զանդին։

  • Վերամուտի առիթով հանդիպում
    Վերամուտի առիթով հանդիպում

    Հանդիպման հիմնական նպատակը համատեղ կերպով քննարկելն էր՝ մեր դպրոցների հետ կապւած հարցեր, յատկապէս կրօնի եւ Ադեանի դասանիւթերի եւ այդ նիւթերը դասաւանդող ուսուցիչների աշխատանքի եւ դասապահերի հետ։ Խօսւեց նաեւ դպրոցական 2018-2019 տարեշրջանի վերամուտի հետ կապւած հարցերի մասին։

  • Այցելութիւն Ազգային առաջնորդարան
    Այցելութիւն Ազգային առաջնորդարան

    Չորեքշաբթի օգոստոս 29, 2018 թ.-ի կէսօրին, Իրանի Իսլամական Հանրապետութիւնում հաւատարմագրւած Ռուսաստանի Դաշնութեան արտակարգ եւ լիազօր դեսպան՝ մեծարգոյ պրն. Լեւոն Ջաղարեանը, այցելեց թեմիս առաջնորդ՝ գերշ. Տ. Սեպուհ Ս. արք. Սարգսեանին:

  • Այցելութիւն Ազգային առաջնորդարան
    Այցելութիւն Ազգային առաջնորդարան

    Չորեքշաբթի օգոստոսի 29-ի առաւօտեան, թեմիս առաջնորդ՝ գերշ. Տ. Սեպուհ Ս. արք. Սարգսեանն իր գրասենեակում ընդունեց տիկնայք՝ Դորիս Ջաղարբէգեան, Նինա Թորոսեան եւ Սոֆի Ջաղարբէգեանին:

  • Սմբատ Յակոբեանն այցելեց Սրբազան Հօրը
    Սմբատ Յակոբեանն այցելեց Սրբազան Հօրը

    Երեքշաբթի օգոստոսի 28-ին, թեմիս առաջնորդ՝ գերշ. Տ. Սեպուհ Ս. արք. Սարգսեանն իր գրասենեակում ընդունեց, պրն. Սմբատ Յակոբեանին:

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։