Հա

Համայնք

26/06/2018 - 14:30

Դասախօսական երեկոյ՝ «ՀՈՒՍԿ»-ի նախաձեռնութեամբ «Հայաստանի վերջին իրադարձութիւններն ու հնարաւոր հեռանկարները»

«Հայաստանի վերջին իրադարձութիւններն ու հնարաւոր հեռանկարները» թեմայով դասախօսութեամբ հանդէս եկաւ Միջին Ասիայի եւ Կովկասի հարցերի փորձագէտ Վալի Քուզեգար Քալեջին, որին ներկայացրեց Հայ Դատի յանձնախմբի նախագահ Իսիկ Իւնանէսեանը:

«ԱԼԻՔ» - Հայկական հարցերի ուսումնասիրութեան կենտրոն «ՀՈՒՍԿ» հաստատութեան նախաձեռնութեամբ կազմակերպւող դասախօսութիւնների շարանում, երէկ՝ յունիսի 25-ին հաստատութեան կենտրոնատեղիում կազմակերպւել էր դասախօսական երեկոյ:

«Հայաստանի վերջին իրադարձութիւններն ու հնարաւոր հեռանկարները» թեմայով դասախօսութեամբ հանդէս եկաւ Միջին Ասիայի եւ Կովկասի հարցերի փորձագէտ Վալի Քուզեգար Քալեջին, որին ներկայացրեց Հայ Դատի յանձնախմբի նախագահ Իսիկ Իւնանէսեանը: Դասախօսը համապարփակ գծերով անդրադարձաւ Հայաստանի նոր կառավարութեանը յանգեցրած իրադարձութիւններին եւ չորս ենթավերնագրերով ամփոփւած ներկայացրեց զեկոյցը: Նա դասախօսութիւնը ամփոփեց ըստ հետեւեալի՝ շարժման ձեւաւորման պատճառները, իւրայատկութիւնները, Հայաստանի իրադարձութիւնների ապագայ հեռանկարը եւ դրա ազդեցութիւնը Հայաստանի արտաքին քաղաքականութեան վրայ: Նա կարեւորութեամբ անդրադարձաւ շարժման ձեւաւորման արդիւնաւորման առումով Հայաստանի եւ հայ ժողովրդի քաղաքական զգօնութեանը, կուսակցութիւնների դերակատարութեանը եւ իրականացած բողոքների դրդապատճառները համարեց տնտեսական իրավիճակը, կոռուպցիան եւ ժողովրդի արտագաղթը:

Նա ապա ութը իւրայատկութիւններ ներկայացրեց Հայաստանում 2018-ին արդիւնաւորւած շարժման համար, որը այն զանազանում է Հայաստանի նախորդ շարժումներից: Դասախօսը ընդգծեց, որ այս շարժման իւրայատկութիւններից էր՝ նրա ծաւալը, որը չսահմանափակւեց Եւրեւանով եւ ի մասնաւորի՝ Փաշինեանի երթը Գիւմրիից-Երեւան, որին միացան բազմահազար ժողովուրդ, շարժման քաղաքացիական եւ ոչ-բրտութեամբ զուգորդւած բնոյթը, որը որեւէ զոհ չպատճառեց, սոցիալական ցանցերի դերը, երիտասարդների ծաւալուն ներգրաււածութիւնը, Փաշինեանի անհատականութիւնը, զինւորների ներգրաււածութիւնը, Սերժ Սարգսեանի հրաժարականը, Հայ Յեղափոխական Դաշնակցութեան կատալիզոր եւ անժխտելի դերակատարութիւնը եւ նոր ձեւաւորւած կառավարութեան կառոյցը: Նա ընդգծեց, որ Հայաստանի տնտեսական զարգացման համար անհրաժեշտ է թափանցիկ տնտեսութեան առկայութիւնը, կոռուպցիայի վերացումը եւ տնտեսական ու ֆինանսական ներդրումների հարցով թէ՛ Սփիւռքի եւ թէ՛ միջազգային բեմի վստահութիւնը:

Վերջում ներկաները հարցումներ ուղղեցին կապւած Հայաստանի նորընտիր իշխանութեան արտաքին քաղաքականութեանը, ի մասնաւորի՝ Ղարաբաղեան հակամարտութեան եւ հարեւանների ու այլ երկրների հետ յարաբերութիւնների հարցով:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։