Հա

Համայնք

14/08/2018 - 09:30

Ս. Աստւածածնայ տօնը Ռաշտ-Անզալիում

Շուրջ 40 ուխտաւորներից բաղկացած հանրակառքը հինգշաբթի առաւօտ կանուխ ճանապարհւեց դէպի Ռաշտ: Սոյն ուխտագնացութեանը թեմիս առաջնորդ գերշ. Տ. Սեպուհ Ս. արք. Սարգսեանին ընկերակցում էին առաջնորդական փոխանորդ՝ գերշ. Տ. Մակար եպս. Աշգարեանը, շրջանի այցելու հովիւ՝ Արժ. Տ. Սահակ քհնյ. Խոսրովեանը եւ հիւրաբար տիրամայր Սօնա Աշգարեանը:

Ս. Աստւածածնայ Վերափոխման տօնն իր էութեամբ եւ խորհրդով խորը քրիստոնէական կրօնի վարդապետութիւն բովանդակելու պատճառով մեր եկեղեցու Սրբազան Հայրերի կողմից ներառւել է եկեղեցում հինգ մեծ (տաղաւար) տօների ցանկում: 

Որպէս վարդապետութիւն սոյն տօնն իր մէջ խտացնում է մեռելների յարութեան, երկինք համբառնալու, յաւիտենական արքայութիւնը ժառանգելու եւ ըստ գործերի վարձատրւելու ամենակարեւոր հոգեւոր ճշմարտութիւնները, որ Քրիստոս իր երկրաւոր կեանքի, առաքելութեան եւ քարոզութիւնների միջոցով բացայայտեց ու փոխանցեց: 

Այո՛, թէեւ վերափոխման տօնը անմիջականօրէն առընչւել է Ս. Կոյս Մարիամի անձին, նրա ննջման դրւագին եւ ապա մարմնով երկինք փոխադրւելուն, սակայն սոյն կատարւածը, որպէս աստւածային խոստում վերագրւում ու կապւում է իւրաքանչիւր ճշմարիտ քրիստոնեայ հաւատացեալին, ով իր կեանքը ապրում է համաձայն Աստծու կամքին, Աստւածաշնչին եւ աստւածային պատւիրաններին եւ յատկապէս իբրեւ անդամ Ս. Եկեղեցուն եւ Քրիստոսի խորհրդական մարմնին, ինչպէս նաեւ իբրեւ Ս. Կոյս Մարիամի հարազատ զաւակ, նրա կեանքին հետեւելով, նրա նման իր կեանքը յատուկ առաքինութիւններով յատկանշելով, որոնցով մասնաւորւում էր Ս. Կոյսը: 

Այս ուրախալի առիթով նախորդ տարիների նման, այս տարի եւս թւականիս 9 եւ 10 օգոստոսին, Թ.Հ.Թ. Կրօնական խորհրդի կողմից, ուխտագնացութիւն կազմակերպւեց դէպի Ռաշտ-Անզալի: 

Շուրջ 40 ուխտաւորներից բաղկացած հանրակառքը հինգշաբթի առաւօտ կանուխ ճանապարհւեց դէպի Ռաշտ: Սոյն ուխտագնացութեանը թեմիս առաջնորդ գերշ. Տ. Սեպուհ Ս. արք. Սարգսեանին ընկերակցում էին առաջնորդական փոխանորդ՝ գերշ. Տ. Մակար եպս. Աշգարեանը, շրջանի այցելու հովիւ՝ Արժ. Տ. Սահակ քհնյ. Խոսրովեանը եւ հիւրաբար տիրամայր Սօնա Աշգարեանը: 

Առաջնորդ Սրբազանը Ռաշտի մուտքին դիմաւորեց Ռաշտի եւ Անզալիի եկեղեցադպրոցական հոգաբարձութիւնների կողմից եւ ապա ուղղւեց դէպի եկեղեցի, ուր ուխտաւորների ներկայութեամբ կատարեց կանոնական աղօթքը եւ նրանց փոխանցեց իր հայրական պատգամը: Ապա դպրոցի սրահում տեղի ունեցաւ հիւրասիրութիւն: Ռաշտի եկեղեցադպրոցական հոգաբարձութեան անունից՝ Մաքսիմ Յովսէփեանը բարի գալուստ արտասանեց: Նա իր խօսքում շնորհաւորեց Առաջնորդ Սրբազան Հօր քահանայական ձեռնադրութեան եւ օծման 50-ամեակը, ինչպէս նաեւ Թեհրանի թեմի առաջնորդութեան 19-ամեակը: Նա անդրադարձաւ նաեւ տեղում կատարւած աշխատանքների, ինչպէս նաեւ դիմագրաւած դռւարութիւնների մասին: 

Կէսօրւայ ճաշը դպրոցի սրահում միասնաբար կիսեցին, որի ընթացքին տեղի ունեցան բաժակառութիւն, խմբերգ, մեներգ եւ ասմունք: Աւարտին Սրբազան Հայրն իր հերթին գնահատեց Ռաշտի փոքրաթիւ համայնքը եւ յատկապէս եկեղեցադպրոցական հոգաբարձութեան անդամների անձնազոհ աշխատանքն ու ծառայութիւնը: Նա խօսեց ուխտագնացութեան կարեւորութեան մասին, գնահատելով ուխտագնացութիւնը կազմակերպողների աշխատանքը եւ աւարտին անդրադարձաւ նաեւ սոյն տարին յատկանշող Հայաստանի առաջին հանրապետութեան հիմնադրութեան 100-ամեակին եւ դրանից փոխանցւող պատգամներին: Այդ առիթով, Սրբազան Հայրը  եկեղեցադպրոցական հոգաբարձութեան եւ գրասենեակին նւիրեց 100-ամեակին նւիրւած՝ նոր հրատարակւած երկու հատոր գրքերից զոյգ օրինակներ: 

Երեկոյեան ուխտաւորները մեկնեցին դէպի Անզալի: 

Ուրբաթ առաւօտեան ժամը 10:30-ին Անզալիի Ս. Աստւածածին մատուռի մէջ մատուցւեց հանդիսաւոր եպիսկոպոսական պատարագ ձեռամբ թեմիս առաջնորդ գերշ. Տ. Սեպուհ Ս. արք. Սարգսեանի: Պատարագին Ս. Սեղանին սպասարկեց արժ. Տ. Սահակ քհնյ. Խոսրովեանը, իսկ երգեցողութիւնը կատարեց ուխտագնացութեան յատուկ երգեցիկ խումբը ղեկավարութեամ տկն. Օֆիկ Մելիքեանին: 

Սրբազան Հայրն իր քարոզում անդրադարձաւ Ս. Կոյս Մարիամի առաքինութեանց մասին եւ վեր բերեց նրա մայրութիւնը իբրեւ տիպար եւ բարձրագոյն օրինակ բոլոր մայրերին: Իր քարոզում անդրադարձաւ նաեւ վերափոխման կապւած ազգային աւանդութիւնների եւ ի մասնաւորի խաղողի օրհնութեան արարողութեանը եւ դրա տօնին առնչւելու իմաստին եւ կարգաւորմանը: 

Պատարագի աւարտին տեղի ունեցաւ աւանդական խաղողօրքնէքը, որից յետոյ ուխտաւորները եկեղեցու բակում հիւրասիրւեցին եւ ապա ճշտւած ճաշարանում, որտեղ Անզալիի եկեղեցադպրոցական հոգաբարձութիւնը Առաջնորդ Սրբազան Հօրն ու իր ընկերակիցներին էր ճաշով հիւրասիրել, միասնաբար կէսօրւայ ճաշը կիսեցին: Ընթացքին դարձեալ ըստ սովորութեան տեղի ունեցաւ բաժակաճառութիւն, խանդավառ երգեցողութիւն եւ մաղթանքների փոխանակում: Երկու տեղում էլ, թէ Ռաշտում եւ թէ Անզալիում սեղանապետութիւնը վարեց պրն. Արման Բանդարին: 

Ուրախ եւ խանդավառ մի պահ անցկացնելուց յետոյ ուխտաւորները երեկոյեան ժամը 5:00-ին վերադարձան Թեհրան: 

Ազգային առաջնորդարանի Հանրային կապ

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։