Հա

Մշակոյթ

07/01/2018

Լուի դէ Ֆիւնէսի հայ խոհարարը պատմել է լեգենդար դերասանի նախասիրութիւնների մասին

Անւանի ֆրանսիացի դերասան, համաշխարհային կինոյի մեծագոյն աստղերից մէկը՝ Լուի դէ Ֆիւնէսը, նախընտրել է հայկական խոհանոց, Հայաստանի Հանրային հեռուստատեսութեանը տւած հարցազրոյցում պատմել է նրա ընտանիքի նախկին խոհարար Աղունիկ Սարգսեանը։ 

«alikonline.ir» - Աշխարհահռչակ դերասանը սիրում էր հայկական խոհանոցը եւ նոյնիսկ սովորել էր քեաբաբ պատրաստել, յիշում է Ֆիւնէս ընտանիքի նախկին խոհարարը։

Անւանի ֆրանսիացի դերասան, համաշխարհային կինոյի մեծագոյն աստղերից մէկը՝ Լուի դէ Ֆիւնէսը, նախընտրել է հայկական խոհանոց, Հայաստանի Հանրային հեռուստատեսութեանը տւած հարցազրոյցում պատմել է նրա ընտանիքի նախկին խոհարար Աղունիկ Սարգսեանը։ Տեղեկացնում է «Sputnik» Արմենիան:

Սարգսեանն ապրել է Վանաձորում, 1949 թւականին ամուսնացել է սիրիահայի հետ եւ նրա հետ գնացել Մարսէլ։ Ֆրանսիան դուր չի եկել նրանց, ցանկացել են վերադառնալ, բայց նրա ամուսնուն թոյլ չեն տւել վերադառնալ ԽՍՀՄ։

Սարգսեանը նամակ է գրել Բրեժնեւին եւ տւել այն Վազգէն Առաջին կաթողիկոսին, որը Փարիզում է եղել։

Իսկ մինչ այդ նրան յաջողւել է աշխատանք գտնել․ դարձել է լեգենդար դերասան Լուի դէ Ֆիւնէսի խոհարարը։

«Նրանք մեզ տուն էին տւել իրենց այգում։ Այնտեղ էլ ապրում էինք»,- պատմում է Սարգսեանը։ Նա ասել է, որ Ֆիւնէսին դուր է եկել հայկական խոհանոցը։ Սարգսեանը պատրաստել սովորել էր իր էրզրումցի տատիկից։

«Ես շատ յաճախ եմ պատրաստել հայկական ապուրներ՝ լոբով, աւելուկով։ Նա սիրում էր տոլմա, քեաբաբ․ մենք կրակ էինք վառում, ես ցոյց էի տալիս, թէ ինչպէս պէտք է քեաբաբ պատրաստել», -յիշում է Սարգսեանը։

Ֆիւնէսի տանը շատ հայեր են հիւրընկալւել, սեղանին յաճախ են դրւել հայկական ազգային ճաշատեսակներ։ Սարգսեանի աղջիկը Ֆիւնէսին հայերէն տառերն է սովորեցրել։

Մի անգամ դերասանը փորձել է օգնել Սարգսեանին լամպը փոխելու հարցում։ Ցածր հասակի պատճառով նա կանգնել է աթոռի վրայ եւ ընկել. երկուսն էլ երկար ծիծաղել են։

Աղունիկ Սարգսեանը Ֆրանսիայում աշխատել է 5 տարի, դրանից յետոյ նրա խնդրանքը, վերջապէս, հասել է ԽՍՀՄ գլխաւոր քարտուղարին։ Կինը վերադարձել է Հայաստան։ Մինչեւ վերջերս Ֆիւնէսի ընտանիքն ամէն ամիս 100 դոլար է ուղարկել նրանց։

Նա իր հետ նաեւ հագուստ է բերել, որը նւիրել են Ֆիւնէս ընտանիքի անդամները։ Ընտանիքում պահում են կիսով չափ լիքը կոնեակի շիշը, որը նոյնպէս Ֆիւնէսներն են նւիրել։

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։