Հա

Մշակոյթ

05/02/2018 - 12:20

Ջիւան Աւետիսեան. «Ֆիլմերս խաղաղութեան մասին են, դատապարտում են պատերազմը»

Հայ եւ օտար արւեստասէրների համակրանքը շահած, միջազգային կինոփառատօններում մրցանակների արժանացած «Թեւանիկ», «Վերջին բնակիչը» ֆիլմերի ռեժիսոր Ջիւան Աւետիսեանը պատրաստւում է հանրութեանը ներկայացնել մարդկային երազանքների, խաղաղութեան, ապրեցնող կարօտների մասին պատմող «Դրախտի դարպասը» կինոնկարը:

«alikonline.ir» - Հայ եւ օտար արւեստասէրների համակրանքը շահած, միջազգային կինոփառատօններում մրցանակների արժանացած «Թեւանիկ», «Վերջին բնակիչը» ֆիլմերի ռեժիսոր Ջիւան Աւետիսեանը պատրաստւում է հանրութեանը ներկայացնել մարդկային երազանքների, խաղաղութեան, ապրեցնող կարօտների մասին պատմող «Դրախտի դարպասը» կինոնկարը: Այս առիթով «Արմէնպրես»-ի թղթակիցը զրուցել է ռեժիսորի հետ:

 

- Բազմիցս ասել էք. «Ես ուզում եմ պատմել Արցախի մասին»: Ի՞նչ իրադարձութիւնների է անդրադառնում ձեր նոր «Դրախտի դարպասը» կինոնկարը:

- Նոր ֆիլմը պատմում է 1990-ականներին Արցախեան պատերազմի մոռացւած դրւագի մասին, որը բացայայտւում է 2016 թւականի քառօրեայի ընթացքում: Առկայ են հերոսների յիշողութիւնների տեսարաններ, դէպքեր, որոնք ամիսներ, օրեր, տարիներ առաջ են տեղի ունեցել. ժապաւէնում երկու իրականութիւն է. այն, ինչ ներկայում է տեղի ունենում, եւ այն, ինչ անցեալում է կատարւել եւ խորը ազդեցութիւն թողել այսօրւայ վրայ:

Սցենարի համահեղինակներ Արտաւազդ Եղիազարեանը եւ Մկրտիչ Մալխասեանը մանրակրկիտ աշխատել են նիւթի վրայ, որպէսզի այն հետաքրքրի ոչ միայն հայ հանդիսատեսներին, այլեւ ուրիշ ազգերի ներկայացուցիչներին: Ես եւ իմ թիմը, առաւօտից մինչ երեկոյ քրտնաջան աշխատում ենք՝ աղիւսն աղիւսի վրայ դնելով, որ ֆիլմը կեանքի կոչենք:

 

- Ձեր նախորդ՝ «Թեւանիկ», «Վերջին բնակիչը» ֆիլմերում բուն պատերազմական գործողութիւնները չեն ներկայացւում: Նոր կինոնկարում կռւի տեսարաններ կը տեսնե՞նք:

- «Դրախտի դարպասը» պատերազմական գործողութիւնների մասին չէ, այլ այդ ֆոնին մարդն է իր խնդիրներով, բարդոյթներով, անճարակութեամբ, սեր փնտրելու ցանկութեամբ: Ինձ հետաքրքիր է անհատը՝ կանգնած ընտրութեան առաջ, սահմանագծին: Յագեցած մարդն ուշագրաւ չէ: Մենք, կարծես թէ, այնքան ենք յագեցել, որ մոռացել ենք, թէ 25 տարի առաջ ինչ է տեղի ունեցել մեզ հետ, երեսուն տարի առաջ որտեղ ենք եղել՝ կախւած լինել չլինելու խնդրից:

Ցաւօք, կեանքը մեզ այնպէս է «կշտացրել», որ մենք շատ նշանակալի բաներ մոռացել ենք: Մեր յիշողութիւնը նեղացել է. ներանձնական, ներթիմային, թաղային, խմբակային խնդիրների մէջ ենք: Մինչդեռ, մեր առաջ մեծ նպատակներ կան դրւած, եւ մեզնից սպասելիքներ ունեն այն սերունդները, որոնց հարցերին մի օր պատասխան պիտի տանք:

 

- Նախորդ ֆիլմերը նկարել էք տարբեր համարտադրողների հետ: Այս անգամ համագործակցելո՞ւ էք:

- Մէկ անգամ չէ, որ ասել եմ՝ հայկական կինոյի ճանապարհը, զարգացումն ու առաջխաղացումը համագործակցութիւնն է եւրոպական երկրների հետ: Այս նպատակով նետւեցինք Բեռլինի կինոշուկայ, յետոյ՝ Կանն, որտեղ գտանք ֆրանսիական կողմին, որը կարող է ներդրում կատարել: Նախորդ տարւայ ընթացքում աշխատել ենք այս նախագծի վրայ, փորձել ֆինանսաւորում գտնել հնարաւոր բոլոր աղբիւրներից: Այսօր եօթ երկիր ցանկանում է աջակցել մեզ, պատրաստ լինելուն պէս գնել ֆիլմը:

Տարիներ շարունակ պատմում ենք Արցախի մասին, եւ ես այսօր հպարտութեամբ կարող եմ ասել, որ աշխարհում կայ ձեւաւորւած հանդիսատես, որը ծանօթ է Արցախեան խնդրին. թող անհամեստ չհնչի, բայց դա իմ հանդիսատեսն է: «Թեւանիկ»-ը ցուցադրւել է աւելի քան 25 երկրների 70 քաղաքներում եւ յաղթել մի շարք կինոփառատօններում: «Վերջին բնակիչը» ֆիլմի ցուցադրութիւնները շարունակւում են մինչ օրս: Շուտով այն ներկայացւելու է նաեւ ԱՄՆ-ում (Նիւ Ջերսի, Բոստոն, Սենթ Լուիս), Լիտւայում (Վիլնիւս) եւ Յունաստանում (Սալոնիկ, Աթենք): Այժմ էլ ֆիլմը գնելու եւ ցուցադրելու առաջարկ ունենք աշխարհահռչակ «HBO» ընկերութիւնից:

- Սիրում էք աշխատել ոչ միայն հայ, այլեւ օտարազգի դերասանների հետ: Այս ժապաւէնում նոր դէմքեր կը բացայայտէ՞ք:

- Չեմ ցանկանայ բացել բոլոր փակագծերը, բայց ասեմ, որ կը լինեն եւ՛ ծանօթ, եւ՛ անծանօթ դերասաններ: Կան հայ դերակատարներ, որոնց հետ միշտ աշխատում եմ: Եւ ես հաւատում եմ՝ եթէ մեր դերասանները, լաւ ֆիլմերում նկարահանւելով, կարողանան մուտք գործել համաշխարհային կինոշուկայ, տասը տարի յետոյ փայլուն դերասաններ կունենանք, որոնք ճանաչւած կը լինեն Եւրոպայում:

 

- Մեր նախորդ զրոյցում նշեցիք, որ իւրաքանչիւր արւեստագէտ պէտք է մասնակցի փառատօնների, կապեր հաստատի օտարազգի գործընկերների հետ աշխարհայացքն ընդլայնելու, հոգեպէս հարստանալու, նոր ազդակներ ստանալու համար…

- Սահմանները միշտ պէտք է ընդլայնել: Դա միայն դրական է ազդում: Այնպէս չէ, որ իմ գեղեցիկ աչքերի կամ գզգզւած մազերի համար են աջակիցներս հաւաքւել շուրջս: Նրանք իմ կողքին են լաւ պատմութեան, ճիշտ ծրագրած քայլերի, լաւ մշակւած բիզնես եւ ֆինանսական պլանի, տեղին ծախսւող գումարների եւ ընդհանուր նպատակի համար: «Թեւանիկ»-ը, «Վերջին բնակիչը» ստեղծւած են սրտով, հոգով, բայց նաեւ պէտք է հասկանալ, թէ ինչպիսին պէտք է լինի ֆիլմը, որ մենք ունենանք հարիւր հազար, մէկ միլիոն, տասը միլիոն եւ աւելի հանդիսատես: Բարդ է հանրութեանը ներկայացնել Արցախի խնդիրը. Կայ չհանգուցալուծւած կոնֆլիկտ, ագրեսիա եւ խանգարող այլ հանգամանքներ հարեւանների կողմից:

Երբ որեւէ օտար դերասանի եմ հրաւիրում ֆիլմում նկարահանւելու, նա ակամայից առկայ կոնֆլիկտի մասնակից է դառնում՝ ընտրելով այս կողմը: Անկախ ամէն բանից՝ մենք պատրաստ ենք դիմագրաւել բոլոր մարտահրաւէրներին:

- Ի՞նչ փուլում է գտնւում գեղարւեստական կինոնկարի ստեղծման գործընթացը:

- Դեռ նախապատրաստական շրջանում ենք: Նկարահանման աշխատանքները կսկսւեն ամռանը: Կաշխատենք ինչպէս Հայաստանում, այնպէս էլ՝ արտերկրում: Որոշակի ֆինանսական բաց կայ, որը կը փորձենք լրացնել` առաջիկայում «Crowdfunding»-ի (հանրային դրամահաւաք) արշաւ իրականացնելով: Սպասում ենք նաեւ Հայաստանի ազգային կինոկենտրոնի աջակցութեանը, որը մեծ դերակատարութիւն կարող է ունենալ ֆիլմի կայացման գործում:

 

- Ռեժիսոր, պրոդիւսեր Ալֆրէդ Հիչքոքն ասել է, որ ֆիլմեր է նկարահանում այն ամէնի մասին, ինչից վախենում է…

- Ստեղծում եմ կինոնկարներ, որոնք խաղաղութեան մասին են, դատապարտում են պատերազմը: Չեմ վախենում պատերազմից... Կեանքում էլ փորձում եմ չկռւել, բայց եթե ստիպւած եղայ, միայն յաղթող դուրս կը գամ, որովհետեւ երբեք չեմ յոգնում պայքարելուց:

 

Հարցազրոյցը` Անժելա Համբարձումեանի

Լուսանկարները տրամադրել է Ջիւան Աւետիսեանը

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։