Հա

Մշակոյթ

20/05/2018 - 10:20

«Երեւան 2800» գորգը նւիրաբերւել է Երեւան քաղաքի պատմութեան թանգարանին

Քաղաքապետ Տարօն Մարգարեանը Երեւան քաղաքի պատմութեան թանգարանում «Թանգարանային գիշեր» ծրագրի շրջանակում ներկայ է գտնւել «Մեգերեան կարպետ» ընկերութեան կողմից պատրաստւած «Երեւան 2800» գորգի նւիրաբերման հանդիսաւոր արարողութեանը: Յիշեցնենք, որ Երեւանի քաղաքապետի նախաձեռնութեամբ «Մեգերեան կարպետ» ընկերութեան հետ համատեղ «Երեւան 2800» գորգի ստեղծման մեկնարկը տրւեց ուղիղ մէկ տարի առաջ, որն ինքնատիպ նւէր պէտք է դառնար մայրաքաղաքի յոբելեանին: 

«alikonline.ir» - Քաղաքապետ Տարօն Մարգարեանը Երեւան քաղաքի պատմութեան թանգարանում «Թանգարանային գիշեր» ծրագրի շրջանակում ներկայ է գտնւել «Մեգերեան կարպետ» ընկերութեան կողմից պատրաստւած «Երեւան 2800» գորգի նւիրաբերման հանդիսաւոր արարողութեանը: Յիշեցնենք, որ Երեւանի քաղաքապետի նախաձեռնութեամբ «Մեգերեան կարպետ» ընկերութեան հետ համատեղ «Երեւան 2800» գորգի ստեղծման մեկնարկը տրւեց ուղիղ մէկ տարի առաջ, որն ինքնատիպ նւէր պէտք է դառնար մայրաքաղաքի յոբելեանին: Այս մասին տեղեկացնում է «tert.am»-ը:

«Մեգերեան կարպետ» ընկերութեան գլխաւոր տնօրէն Րաֆֆի Մեգերեանը, շնորհակալութիւն յայտնելով Երեւանի քաղաքապետ Տարօն Մարգարեանին գորգի ստեղծման առաջին իսկ օրւանից ընկերութեանն աջակցելու համար, նկատել է, որ «Երեւան 2800» գորգն իսկապէս կարեւոր նւէր է Երեւանին: 

«Պարոն քաղաքապետ, գորգի ստեղծման առաջին իսկ օրւանից, Դուք մեզ հետ միասին արեցիք հնարաւորը, որ ամէն ինչ համահունչ ու գեղեցիկ լինի, ինչպէս Երեւանն է այսօր:

Այս գորգն իսկապէս կարեւոր նշանակութիւն կունենայ Երեւանի հազարամեակների պատմութիւնը մեր սերունդներին ներկայացնելու գործում»,- նշել է Րաֆֆի Մեգերեանը:

Այնուհետ տեղի է ունեցել «Երեւան 2800» գորգի հանդիսաւոր բացումը, որի պատիւը վերապահւել է Երեւանի քաղաքապետ Տարօն Մարգարեանին եւ «Մեգերեան կարպետ» ընկերութեան գլխաւոր տնօրէն Րաֆֆի Մեգերեանին: 

Իր հերթին ողջունելով ներկաներին՝ քաղաքապետ Տարօն Մարգարեանը շնորհակալութիւն է յայտնել Մեգերեան ընտանիքին եւ գորգագործ բոլոր վարպետներին՝ նւիրւած աշխատանքի եւ նախաձեռնութիւնը կեանքի կոչելու համար: 

«Երեւանի հիմնադրման 2800-ամեակի առթիւ մենք բազմաթիւ միջոցառումներ ունենք, որի մի մասն էր կազմում նաեւ «Երեւան 2800» գորգի ստեղծումն ու յանձնումը Երեւանի պատմութեան թանգարանին: Շնորհակալութիւն եմ յայտնում Մեգերեան ընտանիքին, ընկերութեան գորգագործներին, բոլոր աշխատակիցներին, որ կարողացան ժամանակին աւարտել Երեւանի 2800-ամեակին նւիրւած այս աշխատանքը: Այսօր մեր սերունդներին ենք փոխանցում ինքնատիպ մի գորգ, որում ներկայացւած են Հայաստանի բոլոր 12 մայրաքաղաքները: Եւ, ընդհանրապէս, բոլորիս համար իսկապէս հպարտութիւն է, որ մասնակիցն ենք դառնում Երեւանի հիմնադրման 2800-ամեակի թէ՛ այս եւ թէ՛ բոլոր միջոցառումներին ու նախաձեռնութիւններին»,- նշել է քաղաքապետը: 

Հանդիսաւոր արարողութեան ժամանակ, Երեւանի հիմնադրման 2800-ամեակի առթիւ, գորգագործութեան մշակոյթի պահպանման, զարգացման եւ տարածման, ինչպէս նաեւ ձեռագործ գորգերի արտադրութեան գործում ներդրած աւանդի համար Երեւանի քաղաքապետ Տարօն Մարգարեանը «Մեգերեան կարպետ» ընկերութեանը պարգեւատրել է Երեւանի 2800-ամեակի յուշամեդալով: 

«Երեւան 2800» յոբելեանական միջոցառումների ծրագրով «Երեւան 2800» գորգի ստեղծման աշխատանքների իրականացման, գորգագործութեան մշակոյթի պահպանման, զարգացման եւ տարածման համար «Մեգերեան կարպետ» ընկերութեան դիզայներ Նաիրա Մխիթարեանը պարգեւատրւել է Երեւանի քաղաքապետի պատւոգրով: 

«Մեգերեան կարպետ» ընկերութեան գորգագործներ Լիլիթ Վարդանեանը, Ռոզա Սարգսեանը, Սուսաննա Ասատրեանը, Գոհար Թութխարեանը, Աննա Բադալեանը եւ Ջուլիետա Սեխլէեանն էլ պարգեւատրւել են Երեւանի քաղաքապետի շնորհակալագրով: 

Նշենք, որ բնական հումքով, բրդեայ թելերով գործւած գորգի լայնութիւնը 4 մ. է, երկարութիւնը՝ 7 մ.: Յոբելեանական գորգի կենտրոնական դաշտում պատկերւած է Երեւանի ծննդեան վկայականը՝ ուրարտական շրջանի սեպագիր արձանագրութիւնը: Գորգի հիմնական խորհրդանշական տարրերն են կենտրոնական դաշտի աջ եւ ձախ կողմերում գտնւող կերպարները՝ Էրեբունի բերդաքաղաքի հիմնադիր Արգիշտի արքան եւ նոր Երեւանի գլխաւոր ճարտարապետ Ալեքսանդր Թամանեանը: Կենտրոնական դաշտն ամփոփում է նաեւ Կենաց ծառ խորհրդանշական պատկերը, որը ճիւղաւորւում եւ շարունակւում է՝ վերեւում դառնալով սօսու տերեւ: Դրանք երկուսն էլ խորհրդանշում են կեանքի շարունակականութեան գաղափարը: Կենտրոնական դաշտում պատկերւած են նաեւ տասներկու մայրաքաղաքները ներկայացնող զարդանախշ տարրեր, որոնք թւագրւում են ըստ իրենց ժամանակաշրջանների: Բացի այդ, գորգի վրայ պատկերւած են նաեւ ներկայիս Երեւանի կարեւորագոյն՝ պետական, մշակութային, հոգեւոր խորհրդանիշ շէնքերը: 

Յաւելենք, որ «Երեւան 2800» գորգը մէկ տարի շարունակ ցուցադրւած կը լինի Երեւանի պատմութեան թանգարանի նախասրահում:

 

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։