Հա

Մշակոյթ

15/05/2019 - 10:00

Յովհաննէս Թումանեանի անձնական հաւաքածուի բացառիկ քարտէզներն առաջին անգամ ցուցադրւեցին մէկ հարթակում

Յովհաննէս Թումանեանի անձնական հաւաքածուի 28 անուն քարտէզագրութեան եզակի ու տարաբնոյթ ցուցանմուշներ ներկայացւեցին «Աւանդ սերունդներին. պատմութեան գիտական յիշողութիւն» խորագրով ժամանակաւոր ցուցադրութեանը:

«alikonline.ir» - Յովհաննէս Թումանեանի անձնական հաւաքածուի 28 անուն քարտէզագրութեան եզակի ու տարաբնոյթ ցուցանմուշներ ներկայացւեցին «Աւանդ սերունդներին. պատմութեան գիտական յիշողութիւն» խորագրով ժամանակաւոր ցուցադրութեանը:

«Արմէնպրես»-ի հաղորդմամբ` ցուցահանդէսը բացւեց մայիսի 14-ին Յովհաննէս Թումանեանի թանգարանում:

«Հին եւ Նոր Կիլիկիայի», «Երեւանի եւ Ելիզաւետպոլի», «Ղարաբաղի եւ յարող շրջանների», «Կովկասի խաղողի այգիների» քարտէզներով եւ այլ ցուցանմուշներով հարուստ ցուցահանդէսը բաց կը լինի մինչեւ մայիսի 26-ը:

«Ցուցադրութեան բաղկացուցիչ մաս են կազմում բանաստեղծի թանգարանում պահւող անձնական գրադարանի կովկասագիտութեան բաժնի գրքերը, որոնք նոյնպէս նախկինում չեն ցուցադրւել: Դեռ 1910-ական թւականներին Թումանեանը բարձրաձայնում էր կովկասագիտութեան ակադեմիա ստեղծելու կարեւորութեան մասին: Նա կարծում էր, որ կողք-կողքի ապրող ժողովուրդները պէտք է լաւ ճանաչեն միմեանց եւ հասկանան հիւսիսի, հարաւի, արեւելքի եւ արեւմուտքի կենտրոնում գտնւող «հսկայի» կարեւոր նշանակութիւնը  աշխարհի զարգացման գործում»,- նշեց թանգարանի տնօրէն Անի Եղիազարեանը:

Հայաստանի ազգային արխիւի տնօրէն Ամատունի Վիրաբեանի խօսքով` քարտէզների հաւաքածուն իւրօրինակ է նրանով, որ դրանց մի մասից միայն մէկ օրինակ է պահպանւել: Նա շեշտեց, որ լաւ է ունենալ նման արժէքաւոր քարտէզներ, որոնք հնարաւոր է ոչ միայն ցուցադրել, այլեւ ուսումնասիրել»,- նշեց Վիրաբեանը:

Քարտէզները թանգարանին է տրամադրել Հայաստանի ազգային արխիւը: Ցուցահանդէսն իրականացւում է Յովհաննէս Թումանեանի ծննդեան 150-ամեակի յոբելեանական հանդիսութիւնների շրջանակում:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։