Հա
01/07/2017

Սահակ Մաշալեան. «Արամ Աթեշեանն այլեւս լայն օրինաւորութիւն չունի եկեղեցու գործերում եւ նաեւ ընտրութիւնների գործընթացում խառնւելու»

Արամ արքեպիսկոպոս Աթեշեանը կրօնական ժողովով պաշտօնանկ արւեց Պոլսոյ պատրիարքի փոխանորդի աթոռից: «tert.am»-ի հետ զրոյցում այսպէս ասաց Պոլսոյ հայոց պատրիարքարանի Կրօնական ժողովի ատենապետ Սահակ Մաշալեանը:

«alikonline.ir» - Արամ արքեպիսկոպոս Աթեշեանը կրօնական ժողովով պաշտօնանկ արւեց Պոլսոյ պատրիարքի փոխանորդի աթոռից: «tert.am»-ի հետ զրոյցում այսպէս ասաց Պոլսոյ հայոց պատրիարքարանի Կրօնական ժողովի ատենապետ Սահակ Մաշալեանը՝ նշելով, որ լրատւամիջոցները գործընթացի համար ի սկզբանէ սխալ բառ էին ընտել՝ համարելով, որ Պոսլոյ պատրիարքի փոխանորդը կարգալոյծ է արւել:

«Քանի որ Արամ սրբազանը չցանկացաւ պաշտօնապէս հրաժարւել, դրա համար կրօնական ժողովով նրան պաշտօնաթող արեցինք: Որովհետեւ ընտրական գործընթացի համար պետութեան հետ գործ ունենալիս պէտք է պատրիարքարանի փոխանորդութիւն չլինէր. կամ Արամ Աթեշեանը պէտք է հրաժարական տար, կամ էլ մենք պէտք է նրան պաշտօնաթող անէինք: Նա փակ ժողովում հրաժարւեց հրաժարական տալ»,- ասաց նա:

Սահակ սրբազանի խօսքով՝ Արամ արքեպիսկոպոս Աթեշեանը հիմա Պոլսոյ պատրիարքարանում իր ծառայութիւնն է իրականացնում որպէս սովորական եպիսկոպոս: Նա նշեց, որ դեռեւս Արամ Աթեշեանը Պոլսոյ պատրիարքի տեղապահ ընտրւած Գարեգին Բեքչեանին հաշւետւութիւն չի ներկայացրել, ֆինանսական փոխանցումներ չի արել: «Դրա համար դեռեւս ժամանակ չի եղել: Առաջիկայ շաբաթների ընթացքում արդէն ընտրութիւնների նախաձեռնակ մարմինը պէտք է կազմւի, դրանից յետոյ արդէն Արամ սրբազանը ֆինանսական հաշւետւութիւնները կը ներկայացնի»:

Սահակ եպիսկոպոս Մաշալեանը  չբացառեց, որ Արամ Աթեշեանը հնարաւոր է՝ ցանկանայ որոշ խնդիրներ առաջացնել: «Սակայն նա այլեւս լայն օրինաւորութիւն չունի եկեղեցու գործերում եւ նաեւ ընտրութիւնների գործընթացում»,- ասաց նա:

Դիտարկմանը, թէ եթէ կրօնական ժողովով հնարաւոր էր Արամ Աթեշեանին պաշտօնաթող անել, ինչո՞ւ մինչ այժմ չէր արւում, նա պատասխանեց՝ դեռ առիթը չէր ստեղծւել: «Կրօնական ժողովը պէտք է անցկացնէր կամ պատրիարքի փոխանորդը կամ տեղապահը: Գարեգին Բեքչեանի՝ Ստամբուլ վերադառնալուց յետոյ այդ ժողովը եղաւ»,- ասաց նա:

Սահակ Մաշալեանը յոյս յայտնեց, որ Պոլսոյ պատրիարքի ընտրութիւնները, վերջապէս, կընթանան: «Դեռ թեկնածուները պէտք է ճշտւեն, եկեղեցու տոմարները պէտք է ճշտւեն, ընտրողների ցուցակը: Մի քանի ամսւայ մէջ հաւանաբար այս գործով պէտք է յաջողութիւններ ունենանք: Ստամբուլի նահանգապետարան արդէն դիմել ենք՝ յայտնելով, որ պատրիարքական աթոռը թափուր է, նոր պատրիարքական ընտրութիւններ պէտք է անցկացւեն, դրա համար տեղապահ ենք ընտրել եւ մօտ ապագայում ընտրելու ենք նաեւ նախաձեռնակ մարմին, նաեւ նահանգապետարանին տեղեկացրել ենք, որ Արամ սրբազանն այլեւս փոխանորդ չէ»,- ասաց նա՝ նշելով, որ իրենց նամակը՝ ուղղւած նահանգապետարանին պարզապէս տեղեկատւութիւն է եւ ոչ թէ թոյլտւութիւն՝ ընտրութիւններն անցկացնելու համար, ակնկալում են, որ նահանգապետարանից կը շնորհաւորեն ընտրւած տեղապահին:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։