Հա
31/05/2018 - 09:30

Ծրագրում եմ շուտով գալ Հայաստան եւ հանդիպել Փաշինեանի հետ. Կարօ Փայլանի հարցազրոյցը

Թուրքիայի քրդական «Ժողովուրդների դեմոկրատական» կուսակցութեան պատգամաւոր, Դիարբեքիրից պատգամաւորի թեկնածու առաջադրւած Կարօ Փայլանը հարցազրոյց է տւել «Akunq.net»-ի Դիարբեքիրի թղթակից Կարօտ Սասունեանին։ 

«alikonline.ir» - Թուրքիայի քրդական «Ժողովուրդների դեմոկրատական» կուսակցութեան պատգամաւոր, Դիարբեքիրից պատգամաւորի թեկնածու առաջադրւած Կարօ Փայլանը հարցազրոյց է տւել «Akunq.net»-ի Դիարբեքիրի թղթակից Կարօտ Սասունեանին։ Գրում է «news.am»-ը:

 

Կարօտ Սասունեան- Պարոն Փայլա՛ն, Դուք նախկինում պատգամաւորի թեկնածու էք առաջադրւել Ստամբուլից: Ի՞նչն է պատճառը, որ այս անգամ ներկայացւած էք Դիարբեքիրից:

Կարօ Փայլան- Ինչպէս գիտէք, ներկայում Թուրքիայում մնացած հայերի, յոյների, ասորիների եւ հրեաների մեծ մասը բնակւում է Ստամբուլում: Սակայն Անատոլիայում եւս, բնականաբար, դեռ շատ, թերեւս` հարիւր հազարաւոր մարդ կայ, ով իրեն հայ է համարում, բայց նրանց մասին առանձնապէս տեղեակ չեն Թուրքիայում: Ես թէեւ հիմնականում Ստամբուլից եմ պատգամաւոր ընտրւել, սակայն աշխատել եմ ոչ միայն Կ. Պոլսի, այլ նաեւ` ամբողջ Թուրքիայի, մինչեւ իսկ` համայն հայութեան շահերի համար: Իրականում ես արմատներով Մալաթիայից եմ եւ ինձ միշտ մալաթիացի եմ զգացել: Դիարբեքիրում եւս տարիներ շարունակ աշխատել եմ: Պայքարել եմ Դիարբեքիրի բազմաթիւ մշակոյթները պահպանելու համար: Այդ իմաստով, հպարտ եմ, որ պիտի հանդէս գամ որպէս Դիարբեքիրի պատգամաւոր: Այստեղ ինձ հարազատ եմ զգում սեփական հողիս: Սակայն, ինչպէս նշեցի, Թուրքիայի բոլոր տարածքներն են իմը: Ես որպէս Ժողովուրդների դեմոկրատական կուսակցութեան եւ ամբողջ Թուրքիայի հայ պատգամաւոր` պայքարելու եմ այստեղի բոլոր ժողովուրդների եղբայրութեան համար:

 

Կարօտ Սասունեան- Ինչպէ՞ս էք գնահատում Թուրքիայի ներկայիս քաղաքական վիճակը:

Կարօ Փայլան- Ներկայում Թուրքիան կարեւոր խաչմերուկում է գտնւում: Տարիներ շարունակ միանձնեայ իշխանութեան համակարգը աշխատում է մեզ լռեցնել եւ հիմա էլ իր բոլոր արարքները յանգեցնում է ընտրութեան: Ասում է` այս ամէնին այո՞ էք ասելու, թէ՞ ոչ: Ես կարծում եմ, որ Թուրքիայի հասարակութիւնը «Ոչ» կասի միանձնեայ կառավարութեան այս համակարգին: Քանզի հանրաքւէի ժամանակ այդ խնդիրը լիովին չէր հասկացւել, սակայն հիմա տեսանք, թէ իրականում ինչ է նշանակում միանձնեայ կառավարութեան համակարգ. բոլորը տեսան, որ քաղաքական ճգնաժամն իրականում նաեւ տնտեսական ճգնաժամ է: Եւ այդ առումով, կարծում եմ, որ մեր հանրութիւնը յունիսի 24-ին «Ոչ» կասի այդ ռեժիմին: Ինչպէս ասացի` կարեւոր խաչմերուկում ենք գտնւում եւ պէտք է կանգնեցնենք այդ միանձնեայ բռնապետութիւնը:

 

Կարօտ Սասունեան- Ի՞նչ քաղաքականութիւն էք վարելու Հայկական Հարցի ուղղութեամբ:

Կարօ Փայլան- Իմ կուսակցութեան` Հայկական Հարցի եւ, ընդհանրապէս, բոլոր ժողովուրդների խնդիրների ուղղութեամբ քաղաքականութիւնն ու դիրքորոշումը յստակ է. թէ բոլոր ժողովուրդների` անցեալում ենթարկւած ցեղասպանութիւնների եւ կոտորածների հետ առերեսւել, եւ թէ ներկայիս քաղաքականութեան առումով` հաւասարութեան սկզբունքի վրայ հիմնւած մի կենսակերպ հաստատել: Մեր պայքարը հէնց այդ ուղղութեամբ է տարւում: Այս հարցում իմ կուսակցութիւնը ոչ մի «բայց» կամ «սակայն» չունի: Կուսակցութիւնս վարում է բոլոր ժողովուրդների եղբայրութիւնն ու հաւասարութիւնը հաստատելու եւ անցեալի հետ առերեսւելու քաղաքականութիւն, որը շարունակելու ենք նաեւ հետագայում:

 

Կարօտ Սասունեան- Ինչպէ՞ս էք գնահատում Թուրքիայում փոքրամասնութիւնների առնչութեամբ ներկայում տեղի ունեցող գործընթացները:

Կարօ Փայլան- Մինչ վերջերս, երբ Թուրքիայում սկսել էին քայլեր անել` ժողովրդավարութեան եւ ժողովրդավարացման ուղղութեամբ, փոքրամասնութիւնները եւս սկսել էին լռութիւնը խախտելով` իրենց իրաւունքները պահանջել: Սակայն յատկապէս քրդական հարցի ուղղութեամբ դրսեւորւած խիստ կեցւածքի հետեւանքով փոքրամասնութիւնները վերստին վերադարձան լռութիւն պահպանելու դիրքորոշմանը: Փոքրամասնութիւնների իրաւունքների պաշտպանութիւնը կապւած է ընդհանուր քաղաքական մթնոլորտի բնականոնացման հետ: Այդ առումով կենսական նշանակութիւն ունեն յունիսի 24-ի ընտրութիւնները: Ես բոլոր փոքրամասնութիւնների եւ մեծամասնութեան ներկայացուցիչներին կոչ եմ անում նրբազգացութիւն ցուցաբերել այս հարցի նկատմամբ: Եթէ չենք ցանկանում նորից նոյն լռութեանը վերադառնալ, մեր ձայնը բարձրացնենք յունիսի 24-ի ընտրութիւններում:

 

Կարօտ Սասունեան- Մեր շրջանում, այսինքն` Արեւմտեան Հայաստանում կան նաեւ մեծ թւով ծպտեալ եւ իսլամացւած հայեր: Դուք ի՞նչ կարծիք ունեք նրանց մասին: Արդեօք Ձեր կողմից որեւէ աշխատանք արւելու՞ է նրանց ուղղութեամբ:

Կարօ Փայլան- Նկատի ունենանք, որ հարիւրամեայ լռութեան մասին ենք խօսում, եւ արդէն երեք սերունդ է անցել: Սակայն այդ յիշողութիւնը (նկատի ունի Ցեղասպանութեան մասին յիշողութիւնը-Ակունքի խմբ.) դեռ շարունակում է պահպանւել մարդկանց մէջ: Երբ ես Անատոլիայի որեւէ շրջան եմ գնում, հազարաւոր, հարիւր հազարաւոր մարդկանց եմ հանդիպում, ովքեր թեւիցս քաշելով` ասում են` մեծ մայրս հայ է, պապս հայ է, մեր գիւղը հայկական է, եւ մենք բոլորով իսլամացւել ենք: Կարծում եմ` նրանց թիւը շատ մեծ է: Սակայն այս պատմութիւնը, այսինքն` հայկական ինքնութիւն ունեցող մարդկանց` սեփական արմատներին հանգիստ վերաբերւելը կապւած է Թուրքիայի ժողովրդավարացման հետ: Որքան Թուրքիան ժողովրդավար դառնայ, այնքան նման մարդիկ աւելի խիզախ կերպով, առանց քաշւելու կը յայտարարեն իրենց ծագման մասին: Այս առումով, կարծում եմ, որ ժողովրդավարութեան ուղղութեամբ մեր ձեռնարկած քայլերի շնորհիւ հայկական ինքնութիւնն իրենց յիշողութեան մէջ պահպանող, սակայն այդ ուղղութեամբ քայլ անել չհամարձակւող մարդիկ եւս աւելի խիզախ կը դառնան: Կարծում եմ, որ Ստամբուլում մեր հաստատութիւնները, պատրիաքարանը եւս պէտք է քայլեր ձեռնարկեն այդ ուղղութեամբ: Սակայն, ինչպէս նշեցի, այս վախի մթնոլորտում շատ դժւար է: Այդ իմաստով յունիսի 24-ը խիստ կարեւոր սկիզբ կարող է լինել: Այստեղ ապրող հայերի համար ինչ-որ բան անելու նպատակով հարկ է ազատւել Թուրքիայի այս ճնշող համակարգից, միանձնեայ իշխանութիւնից: Դրան անցեալում ականատես ենք դարձել. տակաւին 3 տարի առաջ բոլորը կարողանում էին իրենց ինքնութիւնը բացայայտել: Մինչ այդ վերականգնել եւ բացել էինք այստեղի մեր եկեղեցին` Սուրբ Կիրակոսը, ուր ամէն օր հարիւրաւոր մարդ էր գալիս: Հաւատում եմ, որ կը կարողանանք վերականգնել այդ մթնոլորտը: Իմ պայքարը հէնց այդ ուղղութեամբ է տարւելու: Իհարկէ կարեւոր են նաեւ այնպիսի քայլեր, ինչպիսիք էին, օրինակ, անցեալում կատարւած «Արի տուն» ծրագրի նման նախաձեռնութիւնները: Դրանք էլ կանենք: Սակայն հիմա էականը միանձնեայ իշխանութեան գաղափարախօսութեան վերացումն է: Միայն այդ դէպքում, բոլորը կը վերադառնան 2015 թ. առաջ եղած մթնոլորտին, որում մարդիկ կարողանում էին հանգիստ կերպով իրենց ազգային ինքնութիւնը դրսեւորել:

 

Կարօտ Սասունեան- Ինչպէս յայտնի է, հէնց վերջերս Հայաստանում եւս, Նիկոլ Փաշինեանի գլխաւորութեամբ, մի նոր կառավարութիւն ձեւաւորւեց: Դուք ի՞նչ էք մտածում այդ կառավարութեան մասին:

Կարօ Փայլան- Հայաստան վերջին այցիս ժամանակ առիթ էի ունեցել հանդիպելու «Ելք» դաշինքի ներկայացուցիչների եւ յարգելի Նիկոլ Փաշինեանի հետ: Այդ ժամանակ նրանք իրենց համեստ կուսակցութիւն էին համարում: Սակայն ես նրանց ասացի, որ հետեւում եմ իրենց կուսակցական ծրագրին, որը շատ նմանութիւններ ունի Ժողովրդադեմոկրատական կուսակցութեան ծրագրի հետ: Նաեւ ասացի, որ հաստատ յաջողելու են, եւ որ ես աջակցում եմ իրենց: Սակայն, իրօք, այն ժամանակ անգամ ես չէի սպասում, որ այսքան արագ յաջողութեան կը հասնեն: Այցիցս 6 ամիս անց նրանք Հայաստանում անաղմուկ յեղափոխութիւն արեցին եւ չքաւորների, ճնշւածների ձայնը փողոցներից, ժողովրդավարական փոփոխութեան քամով, տեղափոխեցին իշխանութեան ղեկ: Ծրագրում եմ շուտով, Թուրքիայում ընտրութիւններից անմիջապէս յետոյ կրկին Հայաստան այցելել եւ դէմ առ դէմ հանդիպել պարոն Փաշինեանի հետ:

Յարակից լուրեր

Ամենաշատ ընթերցւած

Քւէարկութիւն

Կը յաջողւի՞ արդեօք Արմէն Սարգսեանին նոր որակ մտցնել ՀՀ քաղաքական կեանքում:

Եղանակ

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։