Հա
08/10/2018 - 08:10

Կոլորադոյում Սարդարապատի հերոսամարտի յիշատակին մայրուղում ցուցանակներ են տեղադրւել

ԱՄՆ Կոլորադոյի Սենթենիալ համայնքում սեպտեմբերի 29-ին բացւեց Սարդարապատ հայկական մայրուղու (Sardarapat Armenian Memorial Highway) ցուցանակի բացումը:

«alikonline.ir» - ԱՄՆ Կոլորադոյի Սենթենիալ համայնքում սեպտեմբերի 29-ին բացւեց Սարդարապատ հայկական մայրուղու (Sardarapat Armenian Memorial Highway) ցուցանակի բացումը:

Բացմանը ներկայ էին մի քանի տասնեակ պաշտօնեաներ, ամերիկահայ առաջնորդներ եւ համայնքային ակտիւիստներ: Այս մասին հաղորդում է «Ասպարէզ» թերթը:

2018 թւականի ապրիլին Կոլորադոյի Ներկայացուցիչների պալատը եւ նահանգային սենատը միաձայն ընդունել են որոշումը, ըստ որի մայրուղիներից մէկի մի հատւածը պէտք է վերանւանւի Սարդարապատի հերոսամարտի պատւին, որով ճանապարհ է բացւել անկախ Հայաստանի Հանրապետութեան:

Որոշումն ընդունւելուց յետոյ ցուցանակների պատրաստումը ֆինանսաւորել է Կոլորադոյի ամենահին ամերիկահայ կազմակերպութիւնը` Կոլորադոյի հայերը (AOC):

Բացման արարողության սկզբում բացման աղօթք է հնչեցրել Լաս Վեգասի Սուրբ Կարապետ եկեղեցու Սրբազան Հայր Արսէն Քասսաբեանը, ապա ելոյթով է հանդէս եկել կոնգրեսական Մայք Քոֆմանը, սենատոր Դոմինիկ Մորենոն, նահանգի ներկայացուցիչների պալատի ներկայացուցիչ Քոուլ Վիստը, Սենթենիալ համայնքի խորհրդի անդամ Մայք Սուդերլանդը, Ամերիկայի Հայ Դատի արեւմտեան տարածաշրջանի յանձնախմբի ղեկավար Նորա Յովսէփեանը եւ Կոլորադոյի հայեր կազմակերպութեան խորհրդի նախագահ Սոնա Հեդեշեանը: Միջոցառման աւարտին երգւել է Սարդարապատի երգը:

Ներկայացուցիչների պալատից Քոուլ Վիստն իր ելոյթում ասել է, որ Սարդարապատի հերոսամարտն անհաւանական պայքար էր, որով ճամփայ հարթւեց Հայաստանի Հանրապետութեան ստեղծման համար:

«Սա համընդհանուր ոգեշնչման աղբիւր է մարդու իրաւունքների համար: Այն բոլորին յիշեցնում է մարդկային պայքարի եւ ոգու ուժի մասին, երբ նայում ենք իրար եւ դրանով իսկ ուժեղանում», - ասել է Վիստը:

Նա նաեւ խօսել է իր կնոջ մասին, ում ընտանիքի անդամները զոհւել են Հայոց Ցեղասպանութեան ժամանակ:

Կոնգրեսական Մայք Քոֆմանը յոյս է յայտնել, որ ցուցանակը մարդկանց մէջ հետաքրքրութիւն կառաջացնի Հայոց Ցեղասպանութեան խնդրի նկատմամբ:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։