Հա
22/10/2018 - 08:50

Անթիլիասում տեղի է ունեցել Նիկոլ Փաշինեանի եւ Մեծի Տանն Կիլիկիոյ Ն.Ս.Օ.Տ.Տ. Արամ Ա կաթողիկոսի հանդիպումը

Վարչապետի պաշտօնակատար Նիկոլ Փաշինեանը Լիբանան կատարած աշխատանքային այցի շրջանակում երէկ Անթիլիասում հանդիպում է ունեցել Մեծի Տանն Կիլիկիոյ Ն.Ս.Օ.Տ.Տ. Արամ Ա կաթողիկոսի հետ:

«alikonline.ir» - Վարչապետի պաշտօնակատար Նիկոլ Փաշինեանը Լիբանան կատարած աշխատանքային այցի շրջանակում երէկ Անթիլիասում հանդիպում է ունեցել Մեծի Տանն Կիլիկիոյ Ն.Ս.Օ.Տ.Տ. Արամ Ա կաթողիկոսի հետ: Տեղեկացնում է «tert.am»-ը:

Հանդիպումից առաջ Նիկոլ Փաշինեանը Արամ Ա կաթողիկոսի ուղեկցութեամբ այցելել է Մայրավանքի Սուրբ Գրիգոր Լուսաւորիչ Մայր Տաճարի հարեւանութեամբ կառուցւած Հայոց Ցեղասպանութեան զոհերի յիշատակը յաւէրժացնող մատուռ, ծաղիկներ դրել եւ յարգանքի տուրք մատուցել Ցեղասպանութեան զոհերի յիշատակին:

Այնուհետեւ տեղի է ունեցել ՀՀ վարչապետի պաշտօնակատարի եւ Արամ Ա կաթողիկոսի առանձնազրոյցը:

Մեծի Տանն Կիլիկիոյ Ն.Ս.Օ.Տ.Տ. Արամ Ա կաթողիկոսն իր ողջոյնի խօսքում նշել է. «Սիրելի պարոն վարչապետ, մէկ անգամ անհուն ուրախութեամբ ողջունում եմ Ձեր ներկայութիւնը Ձեր տանը: Եկեղեցին մեր ժողովրդին է պատկանում. մենք ժողովրդից ենք գալիս, ժողովրդին ենք պատկանում եւ կոչւած ենք մեր ժողովրդին ծառայել:

Սա մեր  ժողովրդի, հայրենիքի տունն է, մենք այս հասկացողութեամբ ենք կազմաւորւել եւ մեր ուսումն ենք առել այստեղ: Երբ Կիլիկիան կորցրեցինք որպէս թագաւորութիւն եւ որպէս հող, մենք հոգեւոր Կիլիկիան ստեղծեցինք: Այս գործօնը հոգեւոր Կիլիկիայի ծագմանը, զարգացմանը մեծապէս նպաստեց, ինչպէս առաւօտեան Ձեր խօսքի մեջ ակնարկեցիք, եւ այս աթոռի առաքելութիւնն է` մեր ժողովրդի կեանքում կենսագործել մեր հոգեւոր, առօրեական, մշակութային, ազգային արժէքները:

Մենք Հայաստանը երազեցինք, Հայաստանն ուզեցինք մեր երազի պատկերով տեսնել, ազատ, անկախ Հայաստան երազեցինք եւ ունեցանք: Հետեւաբար, այս աթոռի հիմնական մասը ներկայացնում է Հայաստանի հզօրութիւնը, եւ ես ուրախ եմ անձնապէս, որ ինչպէս եկեղեցու մէջ ասեցի, մեր հայրենիքի ժամանակակից պատմութեան մէջ մի նոր էջ բացւեց` յոյսի եւ սիրոյ, միասնութեան եւ տեսլականի, Հայաստանի ապագային առնչւող նոր էջ: Եւ ես առաջին իսկ օրւանից կոչ ուղղեցի մեր ժողովրդին` ոչ միայն հեռւից հպարտանալու, ուրախանալու, այլեւ մասնակից դառնալու Հայաստանի վերակերտման, հզօրացման աշխատանքներին: Հետեւաբար, այս առիթոց մէկ անգամ եւս Ձեզ յայտնում եմ, որ այս աթոռն իր թեւերով, եւ ես անձնապէս ամբողջական իմաստով նեցուկ եմ Ձեզ, որովհետեւ Ձեր յաջողութիւնը Հայաստանի յաջողութիւնն է: Հետեւաբար, մենք բոլորս ցանկանում ենք, որ հայրենիքը` Ձեր իմաստուն ղեկավարութեամբ, աւելի հզօրանայ: Մէկ անգամ եւս այս մտածումներով եւ սպասումներով ողջունում եմ Ձեզ»:

ՀՀ վարչապետի պաշտօնակատար Նիկոլ Փաշինեանը նշել է. «Շնորհակալ եմ, Վեհափառ Տէր: Անկեղծ ասած, շատ տպաւորիչ այցելութիւն ստացւեց: Ես ուզում եմ նախեւառաջ եւս մէկ անգամ շնորհաւորել Ձեզ` Ձեր հոգեւոր գործունէութեան 50-ամեակի կապակցութեամբ: Ես իմ գնահատանքի խօսքերն արտայայտեցի առաւօտեան տեղի ունեցած միջոցառման ժամանակ: Ցանկանում եմ վերահաստատել իմ մեծ յարգանքով պատկառանքը եւ գնահատանքը Ձեզ եւ Ձեր գործունէութեանը եւ շնորհակալութիւն յայտնել հրաւէրի համար, որովհետեւ այս հրաւէրը հնարաւորութիւն տւեց, որ լիբանանահայութեան բոլոր շերտերի հետ շփւելու, ծանօթանալու առիթ ունենամ: Իհարկէ, մեծապէս հաճելի էր արձանագրել, որ Հայաստանի կառավարութիւնն ունի մեր հայրենակիցների լիակատար աջակցութիւնը: Հաւատացէք, դա մեզ մեծ ուժ է տալիս, եւ առաւել եւս Ձեր խօսքը, Ձեր դիրքորոշումը, որ Դուք արտայայտել էք հէնց թաւշեայ յեղափոխութեան, փոփոխութիւնների օրերին, ինչի համար ուզում եմ Ձեզ շնորհակալութիւն յայտնել:

Ցանկանում եմ ասել, որ այդ փոփոխութիւնները չէին կարող տեղի ունենալ առանց Սփիւռքի միանշանակ աջակցութեան, եւ նաեւ Սփիւռքի եւ հայութեան միանշանակ աջակցութիւնն էր այն գործօններից մէկը, որ հնարաւորութիւն տւեց քաղաքական գործընթացներն իրականացնել բացառապէս խաղաղ, սիրոյ եւ համերաշխութեան մթնոլորտում, որովհետեւ այնքան ակնյայտ էր հայութեան դիրքորոշումը ոչ միայն Հայաստանում, այլեւ Սփիւռքում, որ պարզապէս որեւէ դիմադրութիւն անիմաստ էր դառնում:

Իհարկէ, շատ կարեւոր է ապագայի մասին խօսելը, եւ գտնւելով հայութեան այսպիսի հոգեւոր կենտրոնում` ես ցանկանում եմ ապագայի մասին խօսելիս շեշտել հաւատի գործօնը: Մենք պէտք է հաւատանք մեզ, մեր ժողովրդի ապագային, մեր ուժերին, եւ դա թերեւս ամենակարեւորն է: Եթէ կայ հաւատ, համոզմունք եւ նպատակ, այդ նպատակը հասանելի է, որովհետեւ, ինչպէս Աստւածաշնչում` Նոր կտակարանում է ասւում, եթէ մանանեխի չափ հաւատ ունենաս, լեռներ կարելի է շարժել:

Հայաստանում տեղի ունեցածը եւս մէկ անգամ ապացուցեց հետեւողականութեան սկզբունքի, հաւատքի ուժը, որովհետեւ ժողովուրդն, ի վերջոյ, հաւատաց ինքն իրեն, եւ այդ հաւատն էր, որ առաջ մղեց մեզ եւ բերեց յաղթանակի: Ես յոյս ունեմ եւ համոզւած եմ նաեւ, որ մեր ժողովուրդը հաւատն իր ուժերի նկատմամբ չի կորցնի, որովհետեւ շատ կարեւոր է արձանագրել` ինչն է էական: Էականն այն չէ, որ այս անձի փոխարէն միւս անձը դարձաւ վարչապետ կամ նախարար կամ որեւէ այլ պաշտօնեայ: Էական փոփոխութիւնն այն է, որ ժողորդի ձայնը դարձաւ վճռական իշխանութեան ձեւաւորման գործում, ինչպէս եւ նախատեսւած է մեր երկրի Սահմանադրութեամբ, եւ որեւէ կասկած չկայ, որ այդպէս էլ պէտք է շարունակւի: Պէտք է յուսանք, որ մեր գործերով, մեր գործունէութեամբ ոչ միայն չենք հիասթափեցնի մեր ժողովրդին, այլեւ նրան նոր շունչ, նոր հաւատ կը ներշնչենք սեփական ուժերի նկատմամբ: Իհարկէ, այս գործում շատ կարեւոր է Ձեր աջակցութիւնը եւ շնորհակալ եմ Ձեր պատրաստակամութեան համար»:

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։