Հա
11/03/2019 - 13:00

100-ամեայ ՀՄԸՄ-ին ծառայած միութենականներու պարգեւատրում

Հովանաւորութեամբ ՀՄԸՄ-ի Կեդրոնական վարչութեան, կազմակերպութեամբ ՀՄԸՄ-ի Լիբանանի Շրջանային վարչութեան, երէկ` կիրակի, 10 մարտ 2019-ի երեկոյեան ժամը 6:00-ին, Ազգային առաջնորդարանի «Երջօ Սամուէլեան-Եռագոյն» սրահին մէջ տեղի ունեցաւ պարգեւատրումի հանդիսաւոր արարողութիւն` ՀՄԸՄ-ի հիմնադրութեան 100-ամեակին առիթով:

«ՀՄԸՄ-ը հայ պատանիին ու երիտասարդին մէջ դրոշմեց իր էութեան գիտակցութիւնը, կազմաւորեց զանոնք իբրեւ պատասխանատու հայեր». Հաստատեց Յակոբ Տէր-Խաչատուրեան

 

Հովանաւորութեամբ ՀՄԸՄ-ի Կեդրոնական վարչութեան, կազմակերպութեամբ ՀՄԸՄ-ի Լիբանանի Շրջանային վարչութեան, երէկ` կիրակի, 10 մարտ 2019-ի երեկոյեան ժամը 6:00-ին, Ազգային առաջնորդարանի «Երջօ Սամուէլեան-Եռագոյն» սրահին մէջ տեղի ունեցաւ պարգեւատրումի հանդիսաւոր արարողութիւն` ՀՄԸՄ-ի հիմնադրութեան 100-ամեակին առիթով:

Լիբանանի, Հայաստանի եւ ՀՄԸՄ-ի քայլերգներէն ետք ներկաները մէկ վայրկեան յոտնկայս լռութեամբ յարգեցին յիշատակը մեզմէ առյաւետ բաժնուած ՀՄԸՄ-ականներուն:

Հանդիսութեան բացման խօսքը արտասանեց եւ յայտագիրը վարեց Հուրի Փափազեան-Էմմիեան, որ ՀՄԸՄ-ի անցած 100-ամեայ երթը նկատեց ո՛չ միայն յարգանք պարտադրող փորձառութեան ու վաստակի ցուցանիշ, այլ նաեւ համայն հայութիւնը գօտեպնդող ու ներշնչող պատգամ` շարունակելու հայ ժողովուրդի սերունդներու ինքնութեան պահպանման եւ անոնց մտքի եւ մարմինի առողջ զարգացման սրբազան գործը:

Անդրադառնալով հանդիսութեան նպատակին` ան ըսաւ, թէ անիկա կը միտի երախտագիտութիւն յայտնել այն ՀՄԸՄ-ականներուն, որոնք հասկցած են ծառայել բառին ամբողջական իմաստը` չվարանելով վճարելու անոր պահանջած անխուսափելի գինը` երկարատեւ տարիներու աշխատանք եւ նիւթաբարոյական ներդրում, նաեւ այն կառոյցներուն, որոնք նեցուկ կանգնած են միութեան` խորապէս հաւատալով անոր առաքելութեան կարեւորութեան:

Ապա ՀՄԸՄ-ի Լիբանանի Շրջանային վարչութեան խօսքը արտասանեց Հայկ Թապաքեան, որ կարեւոր նկատեց ՀՄԸՄ-ի շարքերուն մէջ տրուած դաստիարակութիւնը, որ կը կեդրոնանայ ազգասիրութեան, հայրենասիրութեան, չարքաշութեան եւ արիութեան վրայ` միշտ իբրեւ նշանաբան ունենալով «Բարձրացի՛ր, բարձրացո՛ւր»-ը: Ան շեշտեց, որ այս բոլորին իրագործումը կը պահանջէ յարատեւ ճիգ, անշահախնդիր զոհողութիւն, անխախտ ու անսասան հաւատք, որոնց շնորհիւ ՀՄԸՄ 100 տարի շարունակ հարթեց իր ճամբուն վրայ ցցուած խոչընդոտները, իր քայլերը ուղղեց դէպի լաւն ու բարին, յոյս ու ինքնավստահութիւն ներշնչեց իրերայաջորդ սերունդներու` միշտ ի մտի ունենալով զանոնք հեռու պահել օտար ազդեցութիւններէ: Հայկ Թապաքեան լուսարձակի տակ առաւ այն, որ այս բոլորը կը կատարուին շնորհիւ նուիրեալ ու վաստակաշատ երախտաւորներու, որոնց նուիրուած է այդ հանդիսութիւնը:

Անկէ ետք ցուցադրուեցաւ տեսերիզ մը, որ կը ներկայացնէր ՀՄԸՄ-ի 100-ամեակին առիթով Անթիլիասի մայրավանքէն սկիզբ առած ջահերթը, որ անցնելով Պոլիսէն, Փարիզէն եւ Արարատ լեռէն, հասաւ Ծիծեռնակաբերդ ու միացաւ Հայոց ցեղասպանութեան սուրբ նահատակներուն յիշատակը յաւերժացնող անմար կրակին` հաստատելով, որ անոնց կտակին կառչած սերունդներ կը շարունակեն հայօրէն ապրիլ ու գոյատեւել աշխարհի չորս ծագերուն:

Ապա «Ծառայութեան շքանշան» ստացան Գօգօ Մկրտիչեան, Ասատուր Սրապեան (ի բացակայութիւն), Համբիկ Միսաքեան, Պերճ Փալուլեան, ինչպէս նաեւ հալէպահայ ՀՄԸՄ-ականներ Վահէ Քիւրքճեան եւ Դաւիթ Դաւիթեան:

Այս առիթով ՀՄԸՄ-ի Կեդրոնական վարչութեան խօսքը արտասանեց վարչութեան ատենապետ Գառնիկ Մկրտիչեան, որ ըսաւ, թէ իր հիմնադրութենէն 100 տարի ետք, ՀՄԸՄ հայրենիքի եւ աշխարհասփիւռ 26 հազար հաւատաւոր անդամներով արդար հպարտութեամբ, ճակատաբաց, հայոց պատմութեան հատորին մէջ ոսկեայ տառերով գրած է իր իրագործումներուն երկար ցանկը` միշտ հաւատարիմ միութեան հիմնադիրներու կտակին ու տեսլականին: «Տեսլական մը, որ միութեան տուաւ առանցքային եւ յառաջատար դերակատարութիւն մը բոլոր այդ տարածաշրջաններուն մէջ, ուր հայեր ապրած ու գոյատեւած են: Ո՛ւր որ ՀՄԸՄ գոյութիւն ունեցաւ եւ ՀՄԸՄ-ի դրօշն ու Եռագոյնը կողք-կողքի ծածանեցան, հոն հայրենիքէն հեռու փոքրիկ Հայաստան մը ստեղծուեցաւ: Ո՛ւր որ սկաուտները շեփորախումբերու կշռոյթներով եւ հայկական բանակի վճռականութեամբ առաջնորդուեցան, հոն ներկաներուն սրտերը արցունքախառն երջանկութեամբ եւ հպարտութեամբ տրոփեցին: Ո՛ւր որ ՀՄԸՄ-ի մարզիկները յաղթանակի բաժակներ եւ մետալներ բարձրացուցին, հոն Հայկեան եւ Մամիկոնեան խիզախութիւնը արձագանգեց», հաստատեց Գառնիկ Մկրտիչեան:

Ապա ան անդրադարձաւ յուլիս 2018-ին Հայաստանէն ընթացք առած ՀՄԸՄ-ի 100-ամեակի ձեռնարկներուն, որոնց շղթան երկարեցաւ սփիւռքով մէկ, իսկ եզրափակիչ հանդիսութիւնը պարգեւատրման այս ձեռնարկն է, որուն ընթացքին կ՛արժեւորենք ու կը պարգեւատրենք միութեան վաստակաշատ կարգ մը անդամներ, անշուշտ առանց մոռնալու ուրիշ միութենականներ, որոնք իրենց ժամանակն ու քրտինքը դրած են ի սպաս միութեան` խոստանալով, որ պատեհ առիթով ըստ արժանւոյն իրենք եւս պիտի ստանան իրենց իրաւունքը, ըսաւ ՀՄԸՄ-ի Կեդրոնական վարչութեան ատենապետը: Ան այս առիթով շնորհակալութիւն յայտնեց հայրենի պետութեան` անոր անվերապահ աջակցութեան համար, վեհափառ հայրապետներուն` կեդրոնական ձեռնարկներու հովանաւորութեան համար, Մեծի Տանն Կիլիկիոյ Արամ Ա. կաթողիկոսին` միութեան շնորհած հայրապետական կոնդակին եւ «Ս. Մեսրոպ Մաշտոց» շքանշանին համար, ՀՅԴ-ի մեծ ընտանիքին` հոգատար հօր վերաբերմունքին եւ մնայուն նեցուկին համար: Գ. Մկրտիչեան նաեւ շնորհակալութիւն յայտնեց ՀՄԸՄ-ի 100-ամեակի արժանաւորապէս նշման համար աշխատանք չխնայած յանձնախումբերուն եւ մասնաճիւղերու վարչութիւններուն` հաստատելով. «Այս հսկայական նուաճումին եւ իրագործումին գաղտնիքը կը կայանայ ՀՄԸՄ-ի ուժականութեան մէջ», որ ծնունդ առած է միութեան հայրենասէր հիմնադիրներուն պայծառատեսութենէն, իսկ այսօր աւիշ կ՛առնէ միութենականներուն միասնականութենէն:

Եզրափակելով իր խօսքը` Գառնիկ Մկրտիչեան հաստատեց, որ միութիւնը հպարտալի բազմաթիւ տուեալներ ու ձեռքբերումներ ունի, իսկ անոնք խթան են ուխտելու, որ ՀՄԸՄ-ի վաղուան սերունդը փայլուն ձեւով պիտի ցոլացնէ իր միութենական կազմաւորումը եւ առօրեայ ապրումի պիտի շարունակէ վերածել «Բարձրացի՛ր, բարձրացուր» գաղափարախօսութիւնը:

Իր սրտի խօսքը արտասանեց Լիբանանի մէջ Հայաստանի Հանրապետութեան արտակարգ եւ լիազօր դեսպան Վահագն Աթաբէկեան, որ նշեց, թէ հայ ժողովուրդի վերջին դարու պատմութիւնը կու տայ բազմաթիւ պատգամներ: Արդարեւ, վերջին տարիներուն նշուեցան տարբեր ամեակներ, որոնց կարգին ամէնէն դառնը Հայոց ցեղասպանութեանն էր, իսկ ամէնէն լուսաւորը` Հայաստանի Հանրապետութեան հիմնադրութեան 100-ամեակը: Դեսպանը շեշտեց, որ ՀՄԸՄ-ի 100-ամեակը եւս ունի իր ուրոյն տեղն ու արժէքը, որովհետեւ միութիւնը ծնունդ առաւ այնպիսի փուլի, երբ հայ ժողովուրդը ընկրկած էր. ՀՄԸՄ-ի հիմնադիրները բարձրացան ու բարձրացուցին հայութիւնը, իսկ յաջորդող սերունդները հայ մանուկները, պատանիներն ու երիտասարդները կրթեցին նոյն ոգիով` բարձրանալու, բարձրացնելու, ամրանալու ու ամրացնելու: Ըստ անոր, ներկայիս, երբ արդէն կայ Հայաստանի Հանրապետութիւնը, հայ ժողովուրդը ոտքի է, մեկնելով ՀՄԸՄ-ի հիմնադիրներուն պատգամէն պէտք է ըսել, որ հայրենիքը բարձրացնելով սփիւռքը կը բարձրանայ, իսկ սփիւռքը բարձրացնելով հայրենիքը կը բարձրանայ, իսկ նման միութիւններուն շնորհիւ հայութիւնը այլեւս ընկրկում չ՛ապրիր:

Անկէ ետք շարունակուեցան պարգեւատրումները. Րաֆֆի Եսայեան ստացաւ ՀՄԸՄ-ի «Արտակարգ» պատուանշանը, իսկ «Արժանեաց» շքանշան յանձնուեցաւ Գրիգորիս Պօղարեանի, Ստեփան Տէր Պետրոսեանի, Կարպիս Գապասագալեանի, Յարութ Չեքիճեանի, Պետիկ Սապունճեանի եւ Յակոբ Խաչերեանի, որուն երկրէն բացակայութեան պատճառով շքանշանը ստանձնեց անոր կինը` Կասիկ Խաչերեան:

ՀՄԸՄ-ի 100-ամեակի քայլերգի երաժշտութիւնը յօրինած Վահրամ Էմմիեան, ՀՄԸՄ-ի երիցագոյն անդամներէն Ժաք Պոյաճեան եւ Պատրիկ Կիւլպենկեան ստացան ՀՄԸՄ-ի 100-ամեակի յատուկ յուշանուէրը: 

Միութեան նեցուկ ու ապաւէն հանդիսանալնուն համար ՀՄԸՄ-ի 100-ամեակի յատուկ յուշանուէրներ յանձնուեցան նաեւ Լիբանանի Կեդրոնական կոմիտէին` յանձին ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունիի, ՀՅԴ Բիւրոյին` յանձին Բիւրոյի ներկայացուցիչ Յակոբ Տէր-Խաչատուրեանի, ինչպէս նաեւ Լիբանանի Հայոց առաջնորդ Նարեկ արքեպիսկոպոսին:

Այս առիթով խօսք առաւ ՀՅԴ Բիւրոյի ներկայացուցիչ Յակոբ Տէր Խաչատուրեան, որ հաստատեց, թէ ՀՅԴ-ն եւ ՀՄԸՄ-ը անքակտելի են` լծուած նոր սերունդներու դաստիարակութեան մեծ աշխատանքին, ուր արդէն բաւական արդիւնք ապահոված են: Ան ըսաւ, թէ ՀՄԸՄ-ը իբրեւ 100-ամեայ երիտասարդ իր առաջին քայլերը առաւ, երբ յարութիւն կ՛առնէր հայկական պետականութիւնը, իր քայլերը առաւ սփիւռքի մէջ արեւմտահայոց կարեւորագոյն օճախ ու հնոց Պոլիսէն, ուր շատ կարեւոր բաներ խմորուեցան եւ տիտաններ ծնունդ առին: «Այդ ընդհանուր մթնոլորտին մէջ էր, որ ծնունդ կ՛առնէր այս մեծ կազմակերպութիւնը, որ թէեւ ծնաւ հայրենիքէն դուրս, բայց իր կիզակէտը դարձուց հայրենիքը: Որքա՜ն լաւ, գեղեցիկ ու պատուաբեր իրողութիւն էր այն, որ ծնող կամաւոր բանակը եկաւ օգնելու հայկական բանակին, որ կը ծաղկէր, կը զարգանար Հայաստանի միւս կողմը` արեւելեան»,- յայտնեց ան:

Յակոբ Տէր-Խաչատուրեան դիտել տուաւ, որ ՀՄԸՄ-ը մասնակից դարձաւ մեր վերջին հարիւրամեակի էական բոլոր դրուագներուն, ան միայն դիտող չեղաւ, այլ իր մասնակցութիւնը կարեւորեց ամբողջական նուիրումով, մեր սերունդներու դաստիարակութեամբ եւ հանդիսացաւ մեր առաջին մեծագոյն պատանեկան եւ երիտասարդական կազմակերպութիւնը, որ շատ մը երկիրներու մէջ ո՛չ միայն տարածեց «Առողջ միտք առողջ մարմինի մէջ» հասկացողութիւնը, այլ նաեւ հայ պատանիին ու երիտասարդին մէջ դրոշմեց իր էութեան գիտակցութիւնը, զարգացուց զիրենք իբրեւ պատասխանատու հայեր` ո՛չ միայն իբրեւ իտէալ քաղաքացի, այլ նաեւ իբրեւ հայեր, որոնք տալիք ունին իրենց ժողովուրդին, նուիրուած են իրենց ազգին, ամբողջական պատրաստակամութիւն ունին մասնակցելու հայ ժողովուրդի վերջին 100-ամեակի բոլոր դէպքերուն: «Մենք բոլորս, սփիւռքի մէջ ծնած, մեծցած պատանիներս ու երիտասարդներս, մեր քայլերը առած ենք ՀՄԸՄ-ի մէջ, որ հայրենիքի անկախութեան կորուստէն ետք, երբ կրկին կեդրոնացաւ սփիւռքի վրայ, հոն կենդանացուց մեր անցեալի փառքն ու պատիւը, յիշեցուց սովորութիւններն ու աւանդները, միջինարեւելեան շրջաններուն մէջ հսկայական համախմբումներ կազմակերպեց, սկաուտներուն հպարտութիւն ներշնչող ելոյթներ իրականացուց, եւ նոյնիսկ ժամանակի մեծագոյն գրագէտները յատուկ նախաձեռնութեամբ երգեր նուիրեցին ՀՄԸՄ-ին»,- հաստատեց ան` աւելցնելով, որ միութենականները կոչուած են հայ պատանիին ու երիտասարդին դիմագիծը ներկայացնելու յաչս աշխարհին:

«ՀՄԸՄ-ը եղաւ մեր պարծանքը, մեր հպարտութեան աղբիւրը եւ սփիւռքի այն մեծ կազմակերպութիւնը, որ իր մեծաթիւ անդամներով իր ազդեցութիւնը կրցաւ տարածել 1980-ական թուականներէն սկսեալ նաեւ աշխարհի մեր միւս համայնքներուն մէջ, ուր տակաւին չկար ՀՄԸՄ, բայց կար մարզասէր հասարակութիւն, կար կարգապահութեան գիտակից պատանեկութիւն եւ երիտասարդութիւն, ան ներշնչեց սերունդներ ՀՄԸՄ-ի տեսլականով` միութիւնը վերածելով համաշխարհային կառոյցի: ՀՅԴ Բիւրոն ամուր թիկունք կանգնեցաւ ՀՄԸՄ-ին, որպէսզի ան ստանայ այդ համահայկական հանգամանքն ու դերակատարութիւնը», եզրափակեց Բիւրոյի ներկայացուցիչը:

Աւարտին իր պատգամը ուղղեց Նարեկ արքեպիսկոպոս, որ ըսաւ, թէ ՀՄԸՄ-ի 100-ամեակը առիթ մըն է նայելու դէպի պատուաբեր անցեալ, պատրաստակամ ներկայ եւ յաղթական ապագայ, ինչ որ լաւագոյնս արտացոլաց այս ձեռնարկին ընթացքին, եւ որ կը յուշէ, թէ տակաւին 100 տարի եւս պէտք է ապրիլ ու նշել միութեան 200-ամեակը: «Այս կը նշանակէ, որ մարդիկ կու գան ու կ՛երթան, բայց ՀՄԸՄ-ը կը մնայ, թուականները, վայրերը իմաստ կ՛ունենան մարդոցմով. Պոլիսէն Փարիզ, Փարիզէն Արարատ լեռ , Ծիծեռնակաբերդ, Սարդարապատ, այսօր Լիբանան, եւ մանաւանդ Պուրճ Համուտ` կու գանք ըսելու, որ ՀՄԸՄ-ը իր բազմաթիւ ՀՄԸՄ-ականներով 100 տարեկան ըլլալով հանդերձ, կը նայի ապագային` ներկային իր պարտաւորութիւններուն լուծը գիտակցաբար կրելով: ՀՄԸՄ-ը անցեալին չի պատկանիր, այլ կը պատկանի ներկային, եւ որքան ուրախ եմ, որ երբ կը նայիմ ձեզի, լիբանանահայ մեր ակումբներուն, հոն կ՛անդրադառնանք, որ ՀՄԸՄ-ականները լոկ մարզիկ ու սկաուտ չեն, այլ կը տողանցեն ու կը գործեն մեր հաւաքական կեանքի մայր էջին վրայ: Ամէն տեղ են ՀՄԸՄ-ականները, որովհետեւ ՀՄԸՄ-ը գործեց ու կերտեց ամէնուրեք` Հայաստան, Արցախ եւ սփիւռքի ամբողջ տարածքին»:

Ան իր յուշերուն ընդմէջէն անդրադարձաւ ՀՄԸՄ-ի պատրաստ ու կարգապահ շարքերուն, որոնք միշտ քալած են ծառայութեան ուղիէն: Սրբազան հայրը ըսաւ, թէ իրեն յանձնուած 100-ամեակի յուշանուէրը համայն լիբանանահայութեան կը նուիրուի, որպէսզի բոլորս ըլլանք միշտ ՀՄԸՄ-ին հետ, ծառայենք ու հպարտանանք անոր հետ, ինչպէս նաեւ պատրաստուինք նոր ամեակներու նշումին` յաղթահարելով ամէն տեսակի մարտահրաւէր: Իր պատգամը եզրափակելով` Նարեկ արքեպիսկոպոս բոլորին անունով ուխտեց միշտ ընթանալ ՀՄԸՄ-ին հետ ու անոր յաղթական ընթացքով:

Աւարտին հնչեց ՀՄԸՄ-ի 100-ամեակի քայլերգը, որուն բառերը կը պատկանին Ներսեհ Լիպարեանին, իսկ երաժշտութիւնը` Վահրամ Էմմիեանին:

Նշենք, որ ձեռնարկին ընթացքին գեղարուեստական բաժինին իրենց մասնակցութիւնը բերին Ռիթա Վարդան` ասմունք եւ Լոռի Պիլալեան` ֆլիւթ:

«Ազդակ»

Յարակից լուրեր

Հեղինակություն © 2011-2017 «ԱԼԻՔ» Օրաթերթ։ Բոլոր իրավունքները պահպանված են։